“E Tamou Atu Rai kia Rauka te Mana i Roto i tea Atu”
“E Tamou Atu Rai kia Rauka te Mana i Roto i tea Atu”
“E tamou atu rai kia rauka te mana i roto i te Atu e i roto i te ririnui o tona maroiroi.”—EPHESIA 6:10, NW.
1. (a) Eaa te tamakianga umere tei tupu i tetai 3,000 mataiti i topa? (e) Eaa i riro ei ia Davida te re?
TETAI 3,000 mataiti i topa, kua aro atu e rua nga tangata tamaki i tetai e tetai i rotopu i e rua nga nuku patoi i te ngai o te tamaki. Te mapu ou mai e tamaiti tiaki mamoe ko Davida te ingoa. Te tu ra a Golia ki mua iaia, e tangata tuke ua ake rai te maroiroi e te teitei. Tona paruru umauma mei te 57 kiro i te teiaa, e te apai ra aia i tetai korare maatamaata e tetai aka koke. Kare takiri o Davida rakei e aao ra, e tana apinga tamaki ua rai koia oki e maka. Kua riri te tuputupua Philiseti a Golia e ko tona tangata ngati Iseraela e akaao maira e tamaiti ua rai. (1 Samuela 17:42-44) Ki te aronga e akarakara maira no nga tua e rua, ko te tupuanga ka aru mai mei te mea ra i te akaraanga e kua akakoro takereia. Inara kare tei te ririnui e re ei te tamaki. (Koheleta 9:11) Kua riro ia Davida te re no te mea kua tamaki aia na roto i to Iehova maroiroi. “Na Iehova oki te tamaki,” i tuatua ai aia. Te akakite ra te rekoti Pipiria e “inga iora te Philiseti ia Davida i te maka ma te toka.”—1 Samuela 17:47, 50.
2. Te piri ra te au Kerititiano ki roto i teea tu tamakianga?
2 Kare te au Kerititiano e piri ki roto i te tamakianga i te pae kopapa. Noatu e te noo au ua ra ratou ki te tangata katoa nei, te rave ra ra ratou i tetai tamakianga i te pae vaerua ki te au enemi ririnui tikai. (Roma 12:18) I roto i te pene openga o tana reta ki to Ephesia, kua akataka a Paulo i tetai tamakianga tei o mai te au Kerititiano ravarai. Kua tata aia: “E kukumianga ta tatou, kare ki te toto e te kiko ra, inara ki te au kavamani, ki te au tutara o teianei ao o teia poiri, ki te au vaerua ririnui kino i te au ngai o te rangi.”—Ephesia 6:12, NW.
3. Kia tau kia Ephesia 6:10, NW, eaa ta tatou ka anoano kia rauka ai te akapapu i to tatou autuanga?
3 Taua “au vaerua kino” ra koia oki ko Satani e te au temoni, te umuumu ra kia takore i to tatou pirianga ma te Atua ko Iehova. I te mea e maroiroi atu ratou ia tatou, ka kite tatou ia tatou uaorai i roto i tetai turanga tei aiteite ki to Davida, e kare tatou e autu mari ua kia irinaki tatou ki runga i te Atua no te maroiroi. E tikai, kua raurau mai a Paulo ia tatou kia “tamou atu rai kia rauka te mana i roto i te Atu e i roto i te ririnui o tona maroiroi.” (Ephesia 6:10, NW) I muri ake i te oronga anga i taua akoanga ra, kua akataka mai te apotetoro ko Paulo i te au apinga i te pae vaerua e te au tu Kerititiano te ka tauturu ia tatou kia re.—Ephesia 6:11-17, NW.
4. Eaa nga manako maata e rua ta tatou ka akamanako i roto i teia atikara?
4 Ka akara ana tatou i teianei eaa ta te au Tuatua Tapu tuatua no runga i te au tu maroiroi e te au mataara a to tatou enemi. I reira ka akamanako atu tatou i te parani paruruanga ta tatou ka taangaanga kia rauka i te paruru ia tatou uaorai. Me aru tatou i ta Iehova au ikuikuanga, ka papu tikai ia tatou e kare to tatou au enemi e autu i te patoi ia tatou.
E Kukumianga ki te Au Vaerua Ririnui Kino
5. Akapeea ra te taangaanga anga i te tuatua “kukumianga” ia Ephesia 6:12, NW, i te tauturu anga ia tatou kia kite i ta Satani parani?
5 Te akamarama maira a Paulo e “e kukumianga ta [tatou] . . . ki te au vaerua ririnui kino i te au ngai o te rangi.” Te vaerua kino maata, koia oki, ko Satani te Tiaporo, “te demoni maata ra.” (Mataio 12:24-26) Te akatutu maira te Pipiria i ta tatou tamakianga ei “kukumianga,” me kore ei putoto anga rima ki te rima. I roto i te au tarereanga kukumi a to Ereni i taito, e timata ana te aronga tataki tai tei piri atu i te akainga i tona enemi kia rauka i te titiri iaia ki runga i te one. Pera katoa rai, te inangaro ra te Tiaporo ia tatou kia ngere i to tatou tu parani i te pae vaerua. Akapeea aia i te maani anga ia tatou kia rave i teia?
6. E akaari mai mei roto i te au Tuatua Tapu i akapeea te Tiaporo i te taangaanga anga i te au mataara tuke tuke kia akaparuparu i to tatou akarongo.
6 Penei ka akatutu mai te Tiaporo mei tetai ovi, tetai riona ngunguru, me kore mei tetai angera katoa no te marama. (2 Korinetia 11:3, 14; 1 Petero 5:8) Ka rauka iaia i te taangaanga i te au rima rave tangata kia takinokino e kia akamaroiroi kore ia tatou. (Apokalupo 2:10) I te mea e tei ia Satani te mana o te ao katoa nei i te rave i tana i anoano, ka rauka ua iaia i te taangaanga i to te reira au anoano e te au apinga rekaia ei akapuereere ia tatou. (2 Timoteo 2:26; 1 Ioane 2:16; 5:19) Ka rauka iaia i te taangaanga i te aerenga manako o teianei ao me kore o te apoteiti ei arataki ke ia tatou mei tana rai i akavare ei ia Eva.—1 Timoteo 2:14.
7. Eaa to te au temoni au kotinga, e eaa te au puapinga ta tatou ka rekareka?
7 Noatu e e akaraanga maata tikai te au apinga tamaki e te mana o Satani e tana au temoni, e au kotinga ra to ratou. Kare e rauka i teia au vaerua kino i te maro ia tatou kia rave i te au apinga kino te ka akamareka kore i to tatou Metua i te rangi. E au rima rave rangatira tatou, e tei ia tatou te akatere i to tatou au manako e te au angaanga. Tetai katoa, kare ko tatou anake ua te tamaki nei. Ko tei tika i te tuatau o Elisaia te tika nei i to tatou tuatau: “E maata oki to tatou pae, e iti to ratou.” (2 Ariki 6:16) Te akapapu maira te Pipiria kia tatou e me kauraro tatou ia tatou uaorai ki te Atua e te patoi atu i te Tiaporo, ka rere ke atu aia mei ia tatou.—Iakobo 4:7.
Kia Kite i ta Satani Au Ravenga
8, 9. Eaa te au timataanga ta Satani i apai mai ki rungao ia Iobu kia aati i tona tu tiratiratu, e eaa te au kino i te pae vaerua ta tatou e aro atu nei i teia tuatau?
8 Kare tatou i te kite kore i ta Satani au ravenga no te mea te akaari maira te au Tuatua Tapu i tana au mataara tumu. (2 Korinetia 2:11) Te patoi anga i te tangata tuatua tika ko Iobu, kua taangaanga te Tiaporo i te au manamanata pakari o te pae puapinga, te mate o te aronga akaperepereia, te patoianga a te ngutuare tangata, te mamae i te pae kopapa, e te au akaapaanga tau kore mei te au oa pikikaa. Kua ngakau taitaia a Iobu e kua manako e kua akaruke te Atua iaia. (Iobu 10:1, 2) Noatu penei e kare a Satani e akatupu tika ua maira i teia au manamanata i teia tuatau, ko taua au tu ngata ra te tupu ra ki te au Kerititiano e manganui, e ka taangaanga te Tiaporo i te reira kia puapingaia aia.
9 Te au kino i te pae vaerua kua tupu viviki takiri i teia tuatau openga nei. Te noo nei tatou i roto i tetai ao tei na runga roa atu te au aruaruanga no te apinga kopapa i te au akakoroanga i te pae vaerua. Te akatutu putuputu maira te au akakitekiteanga nuti i te ainga tureia e ko tetai tumu ia no te mataora kare ra no te mamae ngakau. E ko te maataanga kua riro “ei anoano i te au mea e navenave ei ra, kare i anoano i te Atua.” (2 Timoteo 3:1-5) Ko teia aerenga manako ka riro i te tamataku i to tatou tu parani i te pae vaerua mari ua ra ‘kia taumāro tikai tatou i te akarongo.’—Iuda 3.
10-12. (a) Eaa ra tetai akamatakiteanga ta Iesu i oake i roto i tana akatutuanga o te tangata ruru ua? (e) Akatutu mai e akapeea te au tu puapinga i te pae vaerua i te kukumi angaia.
10 Tetai o ta Satani au ravenga autu roa atu koia oki na te tavarenga anga ia tatou kia akapou ua i te taime ki teianei ao e ta te reira au aruaruanga no te apinga pae kopapa. I roto i tana akatutuanga no te tangata ruru ua, kua akamatakite a Iesu e i tetai au tu kua “pokia atura te tuatua [o te Patireia] i te anoano maata i to teianei ao.” (Mataio 13:18, 22) Te tuatua Ereni i konei e tuatuaia ra e e “pokia” te aiteanga e “kukumi takiri.”
11 I roto i te au vao rakau toropika, ka kite tetai i te strangler fig. E marie ua te tupu anga o te reira takapini i te tumu o tetai pu rakau metua. Aere marie ua, te vai takiri anga te atava i te pu metua ki te au aka tei tupu ketaketa e te ketaketa ua atu. I te openga ka akapou te au aka e manganui o te strangler fig i te maataanga o te kai meitaki i roto i te one i raro i te tumu o te rakau, i te rau tapoki e akangere ra i to reira pu metua ki te marama. I te openga, mate atu i reira te pu metua.
12 Na teia tu rai, ka akapou marie maata ua atu te au apiapianga o teia akatereanga e te kimianga i te au apinga nui e tetai tu oraanga mareka ua i to tatou taime e te maroiroi. Ma to tatou manako kua akauri keia ki te au apinga o teianei ao, penei ka ngoie ua ia tatou i te kopae i te apiianga Pipiria uaorai e te akariro anga i te reira ei akonoanga matau i te kore e tae ki te au uipaanga Kerititiano, i te akatakakeia mai anga mei te kaikaianga i te pae vaerua. I teianei kua mono te au akakoroanga apinga pae kopapa i te au aruaruanga i te pae vaerua, e i te openga ra riro atura tatou ei ereere mama ua na Satani.
Ka Anoanoia Tatou kia Tu Ketaketa
13, 14. Eaa te turanga ta tatou ka anoano i te apai me patoiia mai e Satani?
13 Kua raurau a Paulo i te au taeake akarongo kia “tu ketaketa atu i te patoi i te au ravenga pakari a te Tiaporo.” (Ephesia 6:11, NW) E tika, kare e rauka ia tatou i te takore i te Tiaporo e tana au temoni. Kua oti i te Atua i te tuku i te reira angaanga na Iesu Karaiti. (Apokalupo 20:1, 2) Inara, na te akaatea roa angaia a Satani, ka inangaroia tatou kia “tu ketaketa” kia kore tana au tamamaeanga e akaparuparu ia tatou.
1 Petero 5:8, 9) E tika oki, ko te turuturu a to tatou au taeake e te au tuaine i te pae vaerua e puapinga tikai ia ki to tatou tu ketaketa anga me tamaki mai te Tiaporo mei tetai riona ngunguru ra.
14 Kua akaketaketa katoa mai te apotetoro ko Petero i te anoano tikai kia tu ketaketa i te patoi ia Satani. “E akono meitaki, e matakite,” i tata mai ei a Petero. “Te aaere nei oki to kotou enemi ko te diabolo, mei te liona ngunguru ra, i te kimi anga i te tangata e pou iaia: Ko tei patoi atu ïa ma te akarongo turori kore, kua kite oki kotou e, tei to kotou au taeake katoa i te ao nei taua au mate ra.” (15, 16. Oronga mai i tetai akaraanga Tuatua Tapu i te akaari e akapeea te turuturuanga a te au taeake akarongo i te tauturu anga ia tatou kia tu ketaketa.
15 Me ngunguru tetai riona i te pae mai i tetai ngai matie ateatea ua i Aperika, penei ka maitu te ria na te oro viviki anga atu e na te atea roa anga ratou mei te kino. Inara, ko te au erepani, te oronga maira i tetai akaraanga no te turuturuanga kapiti. Te akamarama maira te puka Elephants—Gentle Giants of Africa and Asia e: “Tetai mataara o te paruruanga ta te anana erepani e rave matau ana koia oki ko te maani i tetai koro punupunu ki to ratou au kopapa, ma te manu mamaata e aro atura ki vao i te arai i te tamatakuanga e ko te au punupunua i reira kua paruruia ki roto ake i te koro.” No te aroia atura e tetai akaarianga o te maroiroi e te turuturuanga, e taime ua ake ka ta mai te riona i te au punupunua erepani.
16 Me tamatakuia mai e Satani e e tana au temoni, ka anoano katoaia rai tatou kia ruru okotai, ma te manako okotai ma to tatou au taeake tei turori kore i roto i te akarongo. Kua akakite mai a Paulo e kua riro tetai au taeake Kerititiano “ei tauturu akamaroiroi” kiaia i tona tapeka angaia i Roma. (Kolosa 4:10, 11, NW) Te tuatua Ereni tei uriia “tauturu akamaroiroi” te kiteaia ra e tai ua taime i roto i te au Tuatua Tapu Ereni Kerititiano. Kia tau ki ta Vine’s Expository Dictionary of New Testament Words, “e tu verepa no te tuatua te akataka maira i te au vairakau te akamaru ra i te mamae.” Mei te manongi akamaru rai, ka rauka i te turuturuanga a te aronga akamori pakari o Iehova i te takore i te mamae tei akatupuia i te pae ngakau e te pae kopapa.
17. Eaa te ka tauturu ia tatou kia vai tiratiratu ki te Atua?
17 Te akamaroiroianga mei to tatou au taeake Kerititiano i teia tuatau ka akaketaketa i to tatou akakoroanga kia tavini i te Atua ma te tiratiratu. Te aronga pakari Kerititiano tikai te inangaro ra i te oronga i te tauturu i te pae vaerua. (Iakobo 5:13-15) Te au tauturu i te tu tiratiratu ka o mai te apiianga Pipiria putuputu e te taenga ki te au uipaanga Kerititiano, te au akaputuputuanga, e te au uruoaanga. To tatou uaorai pirianga vaitata ma te Atua ka tauturu ia tatou kia vai tiratiratu ua rai kiaia. E tikai e, noatu te kai ra tatou, te inu ra, me kore te rave ra i tetai ua atu apinga, ka inangaro tatou i te rave i te au apinga ravarai no te kaka o te Atua. (1 Korinetia 10:31) Mea matauia e, e puapinga te irinaki ki runga ia Iehova kia rauka i te aere tamou atu rai na roto i tetai mataara te ka akarekareka iaia.—Salamo 37:5.
18. Eaa tatou ka kore ei e tuku i te au noatu me te akapouia ra to tatou maroiroi e te au turanga taitaia?
18 Tetai au taime i ta Satani au tamamaeanga ka rokoia mai i te taime kare tatou e manako maroiroi roa ana i te pae vaerua. E rere ana te riona ki runga i tetai manu kua apikepike. Ka akapou te au manamanata pamiri, te turanga ngata i te pae puapinga, me kore te maki i to tatou maroiroi i te pae vaerua. Inara auraka tatou e tuku i te au i te rave anga i te mea marekaia e te Atua, no te 2 Korinetia 12:10; Galatia 6:9; 2 Tesalonia 3:13) Eaa te aiteanga o tana tuatua? Tera tana aiteanga na te mana o te Atua e tauturu mai i to tatou au tu paruparu tangata ua nei, tera ra kia uri tatou kia Iehova no te maroiroi. To Davida reanga ki rungao ia Golia te akaari maira e ka rauka e te akamaroiroi ra te Atua i tona iti tangata. Ka rauka i te Au Kite o Iehova i teia tuatau i te akakite papu mai i te au tuatau o te kino pakari, kua kite ana tikai ratou i te rima akamaroiroi o te Atua.—Daniela 10:19.
mea kua tuatua a Paulo: “Kia paruparu oki au ra, te maroiroi ra au i reira.” (19. Oake mai i tetai akaraanga i te akaari e akapeea a Iehova i te akamaroiroi anga i tona au tavini.
19 No runga i te turuturuanga ta te Atua i oronga kia raua, kua tata tetai nga tokorua akaipoipo: “I te au mataiti i topa, kua tavini maua ia Iehova ei tane e te vaine e kua rekareka i te au akameitakianga e manganui e kua kite ana i te au tangata meitaki e manganui. Kua tereni katoaia e kua akamaroiroiia maua e Iehova kia akakoromaki i te au turanga ngata ma te autu tikai. Mei ia Iobu rai, kare maua i marama ua ana rai e eaa te au apinga i tupu ua ai, inara kua kite ra maua e tei reira ua rai a Iehova i te tauturu ia maua.”
20. Eaa te akapapuanga Tuatua Tapu e akaari maira e e turuturu ua ana rai a Iehova i tona iti tangata?
20 Kare te rima o Iehova i poto takiri i te turuturu e i te akamaroiroi i tona iti tangata tiratiratu. (Isaia 59:1) Kua imene te tata taramo ko Davida: “Te mou rā Iehova i te aronga katoa e inga ra; kua akatu i te aronga katoa e piko ki raro.” (Salamo 145:14) E tikai, ko to tatou Metua i te rangi “tei apai ra i te apainga na tatou i te au ra takitai” e te oronga mai i ta tatou tikai e anoano ra.—Salamo 68:19, NW.
Ka Anoano Tatou i “te Paruru Umauma Katoa mei te Atua Mai”
21. Akapeea a Paulo i te akaketaketa anga mai i te anoano no te paruru umauma i te pae vaerua?
21 Kua akamanako ana tatou i tetai papaki o ta Satani au mataara e kua kite ana i te anoano no te tu ketaketa noatu tana au tamamaeanga. I teianei ka akamanako tatou i tetai tauturu puapinga ke mai no te rave anga i tetai paruruanga autu tikai o to tatou akarongo. E rua taime i roto i tana reta ki to Ephesia, kua taiku mai te apotetoro ko Paulo i tetai tumu puapinga i te tu ketaketa anga atu ki te au ravenga a Satani e te autu anga i roto i ta tatou kukumianga atu i te au vaerua ririnui kino. Kua tata a Paulo: “E aao i te paruru umauma katoa mei te Atua mai kia rauka ia kotou i te tu ketaketa i te patoi atu i te au ravenga pakari a te Tiaporo . . . E rave i te paruru umauma katoa mei te Atua mai, kia rauka ia koe i te patoi atu i te ra kino ra e, i muringao kia oti ia koe i te rave i te au apinga ravarai ma te tau tikai, kia tu ketaketa.”—Ephesia 6:11, 13, NW.
22, 23. (a) Eaa te ka o mai ki roto i to tatou paruru umauma i te pae vaerua? (e) Eaa ta tatou ka akamanako i roto i te atikara ka aru mai?
22 Ae, ka anoano tatou i te aao i “te paruru umauma katoa mei te Atua mai.” I te tata anga a Paulo i tana reta ki to Ephesia, te tiakiia ra aia e
tetai vaeau Roma, penei i tetai au taime kua aao ana i tetai paruru umauma katoa. Inara, na te akauruanga tu-Atua i akakeuia ai te apotetoro kia uriuri i te paruru umauma i te pae vaerua tei anoano maataia tikai e te au tavini ravarai o Iehova.23 Teia paruru umauma tei orongaia mai e te Atua ka o mai te au tu te ka anoanoia e tetai Kerititiano pera katoa te au apinga i te pae vaerua ta Iehova i oronga mai. I roto i te atikara ka aru mai, ka makitoro marie tatou i te au tuanga tataki tai o te paruru umauma i te pae vaerua. Na teia e tauturu ia tatou kia iki e mei teaa te maata o to tatou tu papa tikai no ta tatou tamakianga i te pae vaerua. I taua taime rai, ka kite tatou e akapeea te akaraanga umere o Iesu Karaiti i te tauturu anga ia tatou kia autu i te patoi anga atu ia Satani te Tiaporo.
Akapeea Koe me Pau?
• Eaa te tamakianga a te au Kerititiano katoatoa?
• Akataka mai i tetai papaki o ta Satani au mataara.
• Akapeea te turuturuanga a te au taeake akarongo i te akamaroiroi anga ia tatou?
• Ka irinaki tatou ki runga i toai maroiroi, e no teaa?
[Au Uianga Apii]
[Au Tutu i te kapi 11]
E ‘kukumianga ta te au Kerititiano ki te au vaerua ririnui kino’
[Tutu i te kapi 12]
Ka pokia e te au apiapianga o teia akatereanga te tuatua o te Patireia
[Tutu i te kapi 13]
Ka riro te au taeake Kerititiano “ei tauturu akamaroiroi”
[Tutu i te kapi 14]
E pure ana koe ki te Atua no te maroiroi?