“Na ko Kotou kia Pure”
“Na ko Kotou kia Pure”
KUA kite ainei koe i te au tuatua no te Pure a te Atu? E pure akaraanga te reira tei apiiia e Iesu Karaiti. I te tuatau o tana Tuatua rongonui i runga i te Maunga, kua tuatua a Iesu e: “Na ko kotou kia pure.” (Mataio 6:9) I te mea e na Iesu i oronga mai, kua kapiki putuputuia te reira ko te Pure a te Atu, kua kite katoaia ko te pure a to Matou Metua.—Latin, Paternoster.
E mirioni ua atu takapini i te ao tei tamou ngakau i te Pure a te Atu e kua tuatua putuputu i te reira, penei i te au ra ravarai. I te au mataiti ua akenei, e manganui tei tuatua taokioki i teia pure i roto i te au apii e i te au tupuanga i te ngai tangata. Eaa ra te Pure a te Atu i akangateitei maataia ai?
Kua tata te tangata apiipii akonoanga o te toru anere mataiti ko Cyprian e: “Eaa te ka riro maata atu i te pure pae vaerua i tei orongaia mai kia tatou e Karaiti . . . ? Eaa te ka riro maata atu i te pure anga ki te Metua ei tuatua mou ra i tei orongaia mai kia tatou e te Tamaiti koia oki te Tuatua Mou ra?”—Ioane 14:6.
I roto i ta ratou apiianga akonoanga, kua manako te Akonoanga Katorika Roma e kua riro te pure a to Matou Metua ei “pure puapinga maata roa na te Kerititiano.” Kua akakite maira The World Book Encyclopedia i te ngai puapinga maata o teia pure nei i roto i te au akonoanga katoatoa o Kerititome, i te kapiki anga i te reira ko tetai o te “au tuatua tumu anga no te akarongo Kerititiano.”
Inara, e mea tau kia akakiteia e, ko te manganui te tuatua taokioki ra i te Pure a te Atu kare e marama tikai ana i te reira. “Me e turanga Kerititiano ke ua atu toou penei ka rauka ia koe i te tuatua viviki i te Pure a te Atu ma te kore e tapu anga no te akaea anga,” i karanga ai te nutipepa Ottawa Citizen o Kanata, “inara penei ka ngata ia koe i te tuatua marie ua anga e te marama anga i te reira.”
E puapinga maata tikai ainei te reira kia maramaia mai ta tatou au pure ki te Atua ra? Eaa ra a Iesu i oronga mai ei i te Pure a te Atu kia tatou? Eaa ra te aiteanga o te reira noou? I teianei ka akara tatou i teia au uianga.