Te Pure a te Atu​–Tona Aiteanga Noou

KO TE Pure a te Atu, tei orongaia mai e Iesu Karaiti i roto i te Tuatua i te Maunga, kua kiteaia i roto i te Pipiria o Mataio pene 6, irava 9 ki te 13. I mua ua ake ka oronga mai ei i teia pure, kua tuatua a Iesu: “E kia pure kotou, auraka e maata te tuatua rikiriki puapinga kore, mei ta te au etene ra: ko tei manako e, tei te rai o te tuatua e kiteia mai ei ratou.”​—Mataio 6:7.

Te taka meitaki ra, i reira, e kare a Iesu i akakoro ana i te Pure a te Atu kia riro mai ei tuatua taokioki ua. E tika tikai, kua ripiti akaou aia i teia pure i muri mai ei puapinga anga no tetai aronga akarongorongo. (Luka 11:2-4) Inara e tuke ua ake rai te tuatua o te pure i roto i te au papaanga Evangeria a Mataio e ta Luka. Tei maata atu, te au pure i muri maira na Iesu e na te au pipi ra kare i aru tika ana ki te au tuatua tikai o tana pure akaraanga.

No teaa ra i tataia ai te Pure a te Atu i roto i te Pipiria? Na roto i teia akaraanga, kua apii maira a Iesu ia tatou e akapeea e rauka ai kia arikiia mai ta tatou au pure e te Atua. I roto i teia pure, ka kite katoa tatou i te au pauanga ki etai au uianga tumu anga o te oraanga. No reira ka akamanako ana tatou i te tuanga taki tai o te Pure a te Atu.

Koai oki te Ingoa o te Atua?

“E to matou Metua i te [“rangi,” NW] ra, kia akatapuia toou ingoa.” (Mataio 6:9) Te tauturu ra teia au tuatua akamata anga o te pure akaraanga ia tatou kia akavaitata atu ki te Atua na te tuatua anga kiaia e ko “to matou Metua.” Mei tetai tamariki rai, tei akapiri vaitata atu ki tetai metua aroa e te marama, ka rauka ia tatou i te akavaitata atu ki to tatou Metua i te rangi ra ma te irinaki anga e te inangaro ra aia i te akarongo mai kia tatou. “E tei akarongo i te pure ra,” i imene ei te Ariki ko Davida, “ka tae te tangata ravarai kia koe na.”​—Salamo 65:2.

Te apii maira a Iesu ia tatou kia pure no to te Atua ra ingoa kia akatapuia. Inara koai oki te ingoa o te Atua? Te pau maira te Pipiria na roto i teia au tuatua e: “Kia kite ratou e, ko Iehova toou ingoa, e ko koe anake Tei Teitei i te enua katoa  nei.” (Salamo 83:18) Kua tatau ana ainei koe i te ingoa Iehova i roto i te Pipiria?

Ko te tika, kua mama mai te ingoa o te Atua, ko Iehova, e vaitata i te 7,000 taime i roto i te au tataanga Pipiria taito. Inara, kua rave katoa etai au tangata uri i te akaatea mai i teia ingoa nei mei roto mai i ta ratou au urianga o te Pipiria. No reira, e mea tau, kia pure tatou no Tei Anga mai ia tatou kia akatapuia tona ingoa. (Ezekiela 36:23) Ko tetai mataara kia angaanga ma te rotai ki taua pure ra koia oki kia taangaanga i te ingoa o Iehova me pure tatou ki te Atua.

Kua utuutuia mai tetai vaine ko Patricia te ingoa ei Katorika e kua matau tikai i te Pure a te Atu. Akapeea aia i te ariu anga atu i te akaari anga tetai o te Au Kite o Iehova kiaia ra i te ingoa o te Atua i roto i te Pipiria? “Kare au i irinaki ana i te reira!” i tuatua ai aia. “No reira kua rave mai au i taku uaorai urianga o te Pipiria, e te vai katoa ra te reira i roto i reira. Kua akaari mai i reira te Kite kiaku ia Mataio 6:9, 10 e kua akamarama mai e e pirianga to te Atua ingoa ki te Pure a te Atu. Kua rekareka tikai au e kua pati atu kiaia kia apii mai i te Pipiria kiaku.”

Kia Akonoia to te Atua Anoano i te Enua Nei

“Kia tae toou basileia. Kia akonoia toou anoano i te enua nei, mei tei te [“rangi,” NW] katoa na.” (Mataio 6:10) Akapeea teia tuanga o ta Iesu pure akaraanga e akatupuia ai? E maata te au tangata te manako ra i te rangi e e ngai no te au e te maru. Te taiku maira te au Tuatua Tapu i te rangi e e “nooanga tapu e te kakā” no Iehova. (Isaia 63:15) No reira rai i pure ei tatou e kia akonoia to te Atua ra anoano i te enua nei ‘mei tei te rangi katoa na’! Inara ka tupu ainei teia?

Kua totou mai te peroveta a Iehova ko Daniela e: “E akatupu ei te Atua no te rangi i tetai basileia, te ka kore rava e akakoreia e tuatau ua atu: kare oki taua basileia ra e riro i etai ke, e riro na te reira e akapueurikiriki e e akapou i taua au basileia [o te enua] katoa ra, e ka vai rai te reira e tuatau ua atu.” (Daniela 2:44) Ko teia Patireia i te rangi, me kare te kavamani, kare e roa atu ana ka rave i te angaanga kia apai mai i te au i te ao katoa i raro ake i te tutara anga tuatua tika.​—2 Petero 3:13.

Te pure anga no te Patireia o te Atua kia tae mai e no tona anoano ra kia akonoia i te enua nei e akakiteanga ia no te akarongo te ka kore rava e taki atu ki te mareka kore. Kua tata te apotetoro Kerititiano ko Ioane e: “Kua akarongo atura au i tetai reo maata no te rangi maira, i te na ko anga mai e, I na, tei ko te tangata ra te puakapa o te Atua e e noo aia ki rotopu ia ratou, e riro ratou ei tangata nona, e e noo te Atua ki rotopu ia ratou, ei Atua no ratou. E nana e orei i  te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” E oti kua na ko maira a Ioane: “Kua tuatua maira tei noo ki runga i te terono ra, . . . Ka tata ana: e tuatua-mou oki teianei au tuatua e te pikikaa kore.”​—Apokalupo 21:3-5.

Te Pure e to Tatou Au Anoano i te Pae Kopapa

Ko tana i akakite mai i roto i te pure akaraanga, kua akaari mai a Iesu e ko to tatou manako maata me pure oki kia piri atu ki to te Atua ingoa e te anoano. Inara, te akakite maira te pure akaraanga i te au patianga naau uaorai te oronga tau ia ra kia Iehova.

Te mea mua no teia koia oki e: “O mai i te kai e tau ia matou i teianei rā.” (Mataio 6:11) Kare teia i te pati anga no te apinganui i te pae materia. Kua akamaroiroi mai a Iesu ia tatou kia pure no te ‘kai e tau ia tatou i tera rā i tera rā.’ (Luka 11:3) Kia rotai ki te Pure a te Atu, ka rauka ia tatou i te pure i roto i te akarongo e ka oronga mai te Atua i te au anoano i te au ra ravarai no tatou me te aroa ra e te akarongo ra tatou kiaia.

Ka akatupu te taitaia maata no te au manamanata i te pae moni ia tatou kia akangere i to tatou anoano pae vaerua e no reira kua poka i te rave i ta te Atua e tapapa maira no tatou. Inara me tuku tatou i te akamori anga i te Atua ko te mea mua i roto i te oraanga, ka papu ia tatou e ka akarongo meitakiia mai ta tatou au patianga no te au anoano i te pae materia, mei te kai e te kakau ra. Kua akakite mai a Iesu e: “E na mua ra . . . i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.” (Mataio 6:26-33) Te kimi anga i to te Atua ra tuatua tika e mea akaaoangaia, no te mea e aronga ara tatou ravarai e te anoanoia ra te akakore anga i te ara. (Roma 5:12) Te kapiti katoa maira te Pure a te Atu i taua tumu manako ra.

Ta Tatou Au Pure e te Akakore Anga i te Ara

“E akakore mai i ta matou ara, mei ia matou i akakore i ta tei ara ia matou nei.” (Mataio 6:12; Luka 11:4) Ka akakore ainei tikai te Atua ko Iehova i ta tatou au ara?

Noatu e kua rave te Ariki ko Davida o Iseraela taito ra i te au ara kino, kua tataraara aia e kua pure mataku kore atura e: “Ko koe, E Iehova, te meitaki ra e te papa ra no te akakore; e te aroa takinga meitaki maata i te aronga ravarai te kapiki ra ia koe.” (Salamo 86:5, NW) Mei teaa ra te manako akapumaana anga! Ko to tatou Metua i te rangi ra te “papa ra no te akakore” i te au ara a te aronga tei kapiki tataraara ra kiaia. Ka rauka i te Atua ko Iehova i te akakore takiri mai i ta tatou au ara.

Inara, kua taiku mai a Iesu i tetai turanga: Kia akakoreia mai te ara e te Atua, kia akakore tatou i te ara a tetai ke. (Mataio 6:14, 15) Noatu e kua akakinoia te tangata tiratiratu ko Iobu e te nga oa toko toru ra, kua akakore atu aia i ta ratou ara e kua pure katoa atu no ratou. (Iobu 42:10) Me akakore tatou i te aronga tei ara mai ia tatou, ka akamareka tatou i te Atua e ka rauka i reira kia puapingaia mei tona tu akaaroa.

I to te Atua puareinga anga i te akarongo ki ta tatou au patianga ka akakeu te reira ia tatou kia kimi i tona mareka anga. E ka rauka ia tatou i te rave i te reira noatu e e tu apa ua to tatou. (Mataio 26:41) I konei, katoa, ka rauka ia Iehova i te tauturu ia tatou, mei ta Iesu i akaari mai ana na te taopenga anga ki te pure akaraanga ma tetai patianga puapinga maata.

Tauturu Anga i te Aruaru i Tetai Aerenga Tuatua Tika

“Auraka e akaruke ia matou kia timataia mai, e akaora ra ia matou i te kino.” (Mataio 6:13) Kare a Iehova e akaruke ia tatou kia timataia me kare kia topa atu tatou ki roto i te ara. Te akakite maira tana Tuatua e: “Kare rava te Atua e vavare i te kino, kare rava oki aia e pikikaa i te tangata.” (Iakobo 1:13) Kare rava te Atua e akatika ia tatou kia timataia, inara ka rauka iaia i te akaora mai ia tatou mei te Timata Maata​—“te kino” tei kiteaia e ko Satani te Tiaporo.

Kua raurau maira te apotetoro ko Petero i te au taeake Kerititiano e: “E akono meitaki, e matakite, te aaere nei oki to kotou enemi ko te diabolo, mei te liona ngunguru ra, i te kimi anga i te tangata e pou iaia.” (1 Petero 5:8) Ko te tika, kua timata katoa a Satani i te tangata tiama ko Iesu Karaiti! Eaa to te Tiaporo akakoroanga? Kia akaanga ke ia Iesu mei te akamori anga ma a te  Atua ko Iehova. (Mataio 4:1-11) Me te kimi ra koe i te tavini i te Atua, ko to Satani akakoroanga oki kia opu katoa ia koe!

Na roto i te ao tei raro ake i tana akatere anga, penei ka timata mai te Tiaporo ia tatou kia piri atu ki roto i te au ravenga kare te Atua e ariki ana. (1 Ioane 5:19) No reira e mea puapinga maata kia anga putuputu tatou ki te Atua no te tauturu, me te aro putuputu tikai ra tatou i te timataanga. E me te akamori ra tatou ia Iehova kia tau ki tana Tuatua akauruia, te Pipiria, ka akaora mai aia ia tatou na te tauturu anga mai ia tatou kia patoi atu i te Tiaporo. “E tuatua-mou ra ta te Atua,” i akakite mai ei te Pipiria kia tatou, “kare aia e vaoo ia kotou kia timataia, mari ra ko te tika ia kotou kia akakoromaki ra.”​—1 Korinetia 10:13.

E Puapinga Maata te Akarongo i Roto i te Atua

Mei teaa ra te ngakau pumaana i te kite anga e te manako maira to tatou Metua i te rangi ra ia tatou tataki tai! Kua tuku katoa mai aia i tana Tamaiti, ko Iesu Karaiti, kia apii mai kia tatou e akapeea me pure. E mea papu e ka akariro teia ia tatou kia inangaro i te akamareka i te Atua ko Iehova. Akapeea e rauka ai ia tatou i te rave i te reira?

Te akakite maira te Pipiria e: “Kare ra e akarongo ra kare rava [te Atua] e mareka: ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.” (Ebera 11:6) Akapeea e rauka mai ei taua akarongo ra? “Na te kite mari e raukaʼi te akarongo,” i karanga ai te Pipiria. (Roma 10:17) Te rekareka nei te Au Kite o Iehova i te tuatua atu no runga i te au tumu manako Tuatua Tapu ki te katoatoa te inangaro ra i te tavini i te Atua i roto i te akarongo mou.

Te manakonakoia nei e ka rauka i teia uriurianga no te Pure a te Atu i te akaoonu i toou marama no te aiteanga o te reira. Na te akono maata atu i te kite no Iehova e tana au tutaki anga no te “aronga i kimi tikai iaia,” ka rauka ia koe i te akaketaketa i toou akarongo ki roto i te Atua. Kia maata atu oki toou kite no runga iaia e tana au akakoroanga e rauka ai ia koe i reira i te rekareka i tetai pirianga vaitata ki toou Metua i te rangi ra e tuatau ua atu.​—Ioane 17:3.

[Tataanga i te kapi 5]

“E to matou Metua i te [rangi] ra, Kia tapu toou ingoa. Kia tae toou basileia. Kia akonoia toou anoano i te enua nei, mei tei te [rangi] katoa na. O mai i te kai e tau ia matou i teianei rā. E akakore mai i ta matou ara, mei ia matou i akakore i ta tei ara ia matou nei. Auraka e akaruke ia matou kia timataia mai, e akaora ra ia matou i te kino.”​—Mataio 6:9-13, akaaite ia NW

[Tutu i te kapi 7]

Te oronga maira a Iehova i te au anoano ki te aronga te aroa ra iaia

[Tutu i te kapi 7]

Te tauturu katoa maira te Atua ia tatou kia patoi atu i te Tiaporo

[Tutu i te kapi 7]

Me te akakore ra tatou, mei ia Iobu rai, i te aronga tei ara mai ia tatou, ka puapingaia tatou mei to te Atua tu akaaroa