Au Uianga a te Aronga Tatau

I te tataanga te apotetoro ko Ioane e ka “peke te mataku i te aroa meitaki rava,” eaa te aiteanga o tana tuatua te “aroa meitaki rava,” e eaa oki i reira te “mataku” tei peke atura?

“Kare o te aroa ra e mataku,” i tata ei te apotetoro ko Ioane, “e peke te mataku i te aroa meitaki rava: e mamae oki tei te mataku. Ko tei mataku ra, kare ïa i meitaki rava i te aroa.”​—1 Ioane 4:18.

Te akaari maira te aerenga tuatua e te uriuri ra a Ioane i te tu ngoie ua i te tuatua​—koia tikai te pirianga i rotopu i te aroa i te Atua e i te tu ngoie ua i te tuatua kia Ia. Ka kiteaia mai teia mei ta tatou e tatau ra i roto i te irava 17: “Ko te mea teia e meitaki ravaʼi to tatou aroa, kia rauka oki ia tatou te mataku kore kia tae ki te rā akava anga ra.” Te maata i te tu e ka aroa tetai Kerititiano i te Atua e te kite ra i to te Atua aroa kiaia e akakeuanga tikai ia ki runga i tona tu ngoie ua i te tuatua​—me kore te ngere anga o te reira​—me aere atu aia ki te Atua na roto i te pure.

Te tuatua “aroa meitaki rava” e puapinga ia. Tei taangaangaia i roto i te Pipiria, te tuatua “meitaki rava” kare tona aiteanga ua e ko te tu apakore i te tu tikai, koia oki, ki te tu maata rava roa, inara e putuputu ana i te tu akatakaia. Ei akaraanga, i roto i tana Tuatua i te Maunga, kua tuatua a Iesu: “Kia apa kore oki kotou, mei to kotou Metua i te ao ra e apa kore.” Te akakite ra a Iesu ki tana au pipi me te aroa ua ra ratou i te aronga te aroa maira ia ratou, kua ope kore to ratou aroa, kare e rava ana, kare e meitaki ana. Ka tau ratou kia akameitaki, me kore kia akaki ki tikai, to ratou aroa na te kapiti katoa mai anga i to ratou au enemi. Mei te reira rai, i reira, to Ioane tataanga no runga i te “aroa meitaki rava,” te tuatua ra aia no runga i te aroa no te Atua tei tae te ngakau, kua tupu meitaki tikai, e te takave ra i te au tu katoatoa o to tetai oraanga.​—Mataio 5:46-48; 19:20, 21.

I te aereanga ki te Atua na roto i te pure, kia kite meitaki tetai Kerititiano e tangata ara aia e te apa ua. Inara, me kua tupu meitaki tikai tona aroa no te Atua e tona kiteanga i to te Atua aroa kiaia ra, kare aia e tapuia e te mataku no te akaapaanga me kore te kopaeanga. Mari ra, kua rekareka aia i te tu ngoie ua i te tuatua i te akakiteanga eaa tei roto i tona ngakau e i te patianga no te akakoreanga ara no runga i te tumu anga o te atinga oko, ta te Atua oki i oronga aroa mai na roto ia Iesu Karaiti. Kua manako papu aia e te akarongo marekaia maira tana au patianga e te Atua.

Akapeea e rauka ai i tetai i te “aroa meitaki rava” e ‘peke atu’ i reira te mataku no te akaapaanga me kore te kopaeanga? “Ko tei akono ra i tana ra [ta te Atua] tuatua, kua meitaki tikai te anoano i te Atua i roto iaia,” i karanga ai te apotetoro ko Ioane. (1 Ioane 2:5) E akamanako ana: Me kua aroa te Atua ia tatou ia tatou e vai ara ua ra, kare ainei e ka aroa maata atu aia ia tatou me te tataraara tikai ra tatou e te maroiroi ra i te “akono ra i tana ra tuatua”? (Roma 5:8; 1 Ioane 4:10) E tikai, me vai tiratiratu ua atu rai tatou, ka rauka ia tatou te akapapuanga aiteite mei ta te apotetoro ko Paulo rai i te tuatuaanga aia no runga i te Atua: “Ko tei kore oki i akaperepere i tana uaorai Tamaiti, ko tei tuku ua mai iaia no tatou katoa nei, eaa oki aia e kore ei e oronga katoa mai i te au mea ravarai no tatou?”​—Roma 8:32.