E Tuanga te ka Rauka ia Koe i te Irinaki

“ME RAUKA mai ia koe tetai akakiteanga na roto i te mere mei tetai tangata ‘kimi apinga’ i te akakite mai e te vai ra tetai tuanga e te tiaki maira ia koe, kia matakite. Penei ko koe te takete a tetai tangata akavare pikikaa ua.”

Tena akamatakiteanga na te Ngai Angaanga Tutaka Mere o Marike tei tukuia ki runga i ta te reira Web site. No teaa ra? No te mea e tauatini ua atu te au tangata tei rauka tetai akakiteanga i roto i te mere i te karanga mai e ‘Kua mate tetai taeake kopu tangata oou e kua akaruke mai i tetai tuanga naau.’ Tei tupu, e maata tei tuku atu i tetai moni tutaki e $30 me kore e maata atu no tetai ‘ripotianga apinga’ te karanga ra e ka akamarama mai e teea te ngai i vai ei te tuanga e akapeea e rauka mai ei te reira. Kua taitaia ra oki ratou. Te aronga pouroa tei pau atu e aiteite ua te ripoti tei rauka mai​—e ko te manakonakoanga no tetai ua atu kia akatuangaia ki tetai apinga e kare ua rai.

Ko taua au ravenga ra te takete ra i te anoano natura o te tangata kia rauka tetai tuanga. Inara, te tuatua mareka ra te Pipiria i te aronga tei oronga i tetai tuanga i te karanga anga te reira e: “Te vaooia nei te kainga o te tangata meitaki no te tamariki a te au tamariki ra.” (Maseli 13:22) E tika e, kare na tetai atu mari ra na Iesu Karaiti uaorai i tuatua i teia tuatua rongonui e te akaperepere maataia i roto i tana Tuatua i runga i te Maunga: “E ao to tei maru: e riro ia ratou te enua.”​—Mataio 5:5.

Kua riro te tuatua a Iesu i te akamaara mai i ta te Ariki ko Davida o Iseraela i taito i akauruia kia tata i te au anere mataiti i mua ana e: “Te aronga maru ra, ka noo ïa i te enua, e ka rekareka ratou i te maata o te au ra.”​—Salamo 37:11.

“Ka noo ïa i te enua”​—e manakonakoanga rekareka tikai! Inara ka papu ainei ia tatou e kare teia i tetai ravenga kikite ua tei akakoroia ei akangere i te tangata i tetai apinga? Ae, ka rauka. I te mea e tuanga te enua no ta Iehova mea umere i anga, koia te Pu e e Tei Maani mai kua tikaia i te ture kia oake i te reira ki tetai ua atu tana i iki. Na roto i te Ariki ko Davida, kua maani a Iehova i teia taputou totouia ki Tana Tamaiti akaperepere, ko Iesu Karaiti: “Ka pati mai kiaku, e naku e oronga i te au etene ei tuanga naau, e te au enua openga ei apinga naau.” (Salamo 2:8) No teia tumu, kua akataka te apotetoro ko Paulo ia Iesu e ko tei “akariroia e [te Atua] ei Atu no te au mea ravarai.” (Ebera 1:2) No reira, ka rauka ia tatou, te irinakianga pu tikai e i te tuatua anga a Iesu e ka ‘riro i tei maru ra te enua,’ i rave aia i te reira ma te tika tikai, e tei iaia te mana tikai kia akatupu i tana taputou.​—Mataio 28:18.

Te uianga puapinga, i reira, koia oki, Ka akapeea te reira taputou i te tupu tika anga? I te au ngai ravarai ta tatou ka akara i teia tuatau nei, i te akara anga te autu ra te manako kore e te ngakau akateitei e te rave ua ra i ta ratou i inangaro. Teea i reira te ngai o tei maru i roto i  te tutu? Kapiti katoa atu, te taviiviiia nei te enua e te au manamanata kino o te akataeroanga, e ta te reira au apinga te takinoia ra e tei noinoi e e tei ngere i te pakari. E enua tau ainei tetai ka vai mai ei noo anga? Te pati atu nei matou ia koe kia tatau i te atikara ka aru mai kia kite i te pauanga ki teia e e etai atu au uianga puapinga.

[Tutu i te kapi 3]

Ko koe ainei tetai te ka rauka mai tetai tuanga tika tikai?