“Ei Kapiti Anga Aroa Mou To Kotou ia Kotou Uaorai”

“Ei kapiti anga aroa mou to kotou ia kotou uaorai, i te aroa taeake ra.”​—ROMA 12:10.

1, 2. Eaa ra te pirianga ma to raua au taeake ta tetai mitinari i teia tuatau nei raua ko te apotetoro ko Paulo i rekareka ana?

I ROTO i tona 43 mataiti no te angaanga mitinari i te Itinga Mamao, kua kiteaia a Don no te tu maana i tona manako anga i te aronga tana i tavini ana. Iaia e akakoromaki marie ra i tona maki i te openga ra, ko etai o te aronga apiipii nana i mua ana kua aere mai e tauatini ua atu kiro mita te mamao ki te pae i tona roi maki i te karanga e, “Kamsahamnida, kamsahamnida!”​—“Meitaki maata, meitaki maata!” i roto i te reo Korea. No to Don kapiti anga aroa mou ra i akakeuia ai to ratou au ngakau.

² Ko teia akaraanga no Don kare i te mea tuke roa. I te anere mataiti mua, kua akakite te apotetoro ko Paulo i te inangaroanga oonu no te aronga i tavini ana aia. Kua oronga a Paulo iaia uaorai. Noatu e e tangata irinaki pakari aia, e tangata maru katoa aia e te manako ua, “mei te metua i matuapuru i tana tamariki.” Kua tata aia ki te putuputuanga i Tesalonia: “No te maata o to matou aroa ia kotou, kua tika rava ia matou i te oronga atu i te evangelia a te Atua ia kotou na, e auraka oki i te reira anake, ko matou katoa uaorai oki, no te mea kua riro kotou ei akaperepere na matou.” (1 Tesalonia 2:7, 8) I muri mai, kua akakite a Paulo ki tona au taeake i Ephesia e kare ratou e kite akaou iaia, kua “aue anake iora ratou ravarai, takave maira ki runga i te kaki o Paulo, kua ongi maira iaia.” (Angaanga 20:25, 37) Te taka meitaki ra e, e oonu roa atu te pirianga i rotopu ia Paulo e tona au taeake i to te irinaki anga aiteite. E kapiti anga aroa mou to ratou no tetai i tetai.

Kapiti Anga Aroa Mou e te Aroa

3. Akapeea ra te pirianga o nga tuatua Pipiria no te inangaroanga e te aroa?

³ I roto i te au Tuatua Tapu, te kapiti anga aroa mou, te aroa katoa anga, e te tangi aroa kua kapiti  vaitata pouroaia ki te au tu Kerititiano meitaki roa atu​—te aroa. (1 Tesalonia 2:8; 2 Petero 1:7) Mei te au tu o tetai taimana manea, te parani e te tauturu pouroa ra teia au tu akono i te Atua i tetai e tetai. Te akapiri vaitata atura te reira i te au Kerititiano kare ua e ki tetai e tetai kareka katoa ra ki to ratou Metua i te rangi. No reira, kua raurau atura te apotetoro ko Paulo i tona au taeake irinaki e: “Ei aroa pikikaa kore rai. . . . Ei kapiti anga aroa mou to kotou ia kotou uaorai, i te aroa taeake ra.”​—Roma 12:9, 10.

4. Eaa ra te aite anga no te tuatua “kapiti anga aroa mou”?

⁴ Te tuatua Ereni ta Paulo i taangaanga no te “kapiti anga aroa mou” e rua nga tuanga, e pirianga oa te aite anga o tetai, e e inangaroanga natura tetai. Mei ta tetai tangata apii Pipiria i akamarama mai, te aite anga o teia kua “akairoia [te au Kerititiano] e tetai akamorianga e tu no tetai ngutuare tangata aroa, ma te pirianga vaitata, e te tauturu anga tetai i tetai.” Te akapera ra ainei toou manako no runga i toou au taeake e te au tuaine Kerititiano? Ko tetai reva pumaana​—tetai manako ngakau no te pirianga kopu​—ka tau kia akakiia te putuputuanga Kerititiano. (Galatia 6:10) No reira, i taiku ei The New Testament in Modern English, na J. B. Phillips, ia Roma 12:10 e: “Kia rauka ia tatou te inangaroanga maana tika tikai no tetai i tetai mei i rotopu i te au taeake ra.” E te tatau ra The Jerusalem Bible e: “E aroa maata tetai i tetai mei te au taeake rai.” Ae, e maata atu oki te o maira no te aroa i rotopu i te au Kerititiano i te manako tau ua e te angaanga. “Kua tae i te aroa taeake pikikaa kore ra,” e mea tau ‘kia aroa maata tatou ia tatou uaorai ma te ngakau kinokino kore.’​—1 Petero 1:22.

‘Te Apiiia ra e te Atua kia Aroa Tetai i Tetai’

5, 6. (a) Akapeea ra a Iehova i te taangaanga anga i te au uruoaanga pa enua kia apii i tona iti tangata no runga i te inangaroanga Kerititiano? (e) Akapeea i ketaketa mai ei te tatua i rotopu i te au taeake no tetai tuatau?

⁵ Noatu e te meangiti maira “te aroa o te maata anga” i roto i teianei ao, na Iehova e apii i tona iti tangata i teia tuatau nei “kia aroa tetai i tetai.” (Mataio 24:12, NW; 1 Tesalonia 4:9, NW) Te oronga maira te au uruoaanga pa enua a te Au Kite o Iehova i te au atianga meitaki no teia tereni anga. I ko i teia au uruoaanga, kua aravei te Au Kite o reira i te au taeake mei te au enua mamao, e e manganui tei oronga i to ratou au kainga ki te au tereketi ke. I tetai uruoaanga i tupu ua akenei, kua aere mai etai mei te au enua kare e rauka ana i taua au tangata ra i te akakite mai i to ratou au manako ngakau. “Te tae mua mai anga teia au tereketi, e manga emiemi rai ratou e te akama,” i akakite mai ei tetai Kerititiano tei angaanga tauturu ana ma te au pia moe. “Inara e ono rai ra i muri mai i mua ake ka akaruke ei ratou, te takave ra ratou ratou ko te aronga akono ia ratou i tetai e tetai e te aue anga. Kua rekareka ratou i tetai tu aroa Kerititiano kare roa e ngaropoina ia ratou.” Te akaari anga i te tu akamanuiri ki to tatou au taeake, noatu eaa to ratou turanga, ka akaariia mai te meitaki i roto i te manuiri e te tangata akono ra.​—Roma 12:13.

⁶ Mei te rekareka anga i taua au tupuanga uruoaanga, ka tupu maata katoa te pirianga vaitata me tavini taokotai te au Kerititiano ia Iehova e tere atu te au tuatau. Me kite meitaki tatou i to tatou au taeake, ka rauka ia tatou i te ariki maata tikai i to ratou au tu akaperepere anga​—to ratou tu tika  tikai, te tu irinaki anga, te tiratiratu, te takinga meitaki, te tu oronga ua, te manakoanga, te tangi aroa, e te tu noinoi kore. (Salamo 15:3-5; Maseli 19:22) Ko Mark, tei tavini ana ei mitinari i Aperika Itinga, te karanga ra e, “Te angaanga taokotai anga ma to tatou au taeake te akatupu ra i tetai tatua kare e rauka i te aatiia.”

7. Eaa ra te umuumuia ra kia rekareka tatou i te inangaroanga Kerititiano i roto i te putuputuanga?

⁷ Kia rauka e kia tamou i taua tatua i roto i te putuputuanga, kia akavaitata atu te au mema ki tetai e tetai. Na te aere putuputu anga ki te au uipaanga Kerititiano, ka akaketaketa ia tatou i to tatou pirianga ki to tatou au taeake e te au tuaine. Te tae anga e te o anga atu i mua ake, i te tuatau, e i muri ake i te au uipaanga, te akono marie ra e te akamaroiroi ra tatou tetai i tetai i te “aroa, e i te angaanga memeitaki ra.” (Ebera 10:24, 25) “Te maara akaperepere nei iaku,” i akakite mai ei tetai tangata pakari i Marike e, “i toku tamariki anga, ko toku ngutuare tangata ua rai tei rotopu i te aronga openga i te akaruke i te Are Uipaanga Patireia, kia roa atu te pukapuka anga rekareka oaoa e te puapinga.”

Te Anoano Ainei ra Koe kia “Maora Katoa”?

8. (a) Eaa ra te aite anga o ta Paulo tuatua i te raurau anga aia i to Korinetia kia “maora katoa”? (e) Eaa ra ta tatou ka rave kia akamaata atu i te inangaroanga i roto i te putuputuanga?

⁸ Kia piri tikai ki roto i taua inangaroanga ra, penei te anoanoia ia tatou kia “maora katoa” i roto i to tatou au ngakau. Ki te putuputuanga i Korinetia, kua tata te apotetoro ko Paulo: “Kua maora ua to matou ngakau. Kare kotou i apiapi ia matou.” Kua raurau atura a Paulo ia ratou kia “maora katoa” i te ariu anga atu. (2 Korinetia 6:11-13) Ka rauka katoa ainei ia koe i te “maora katoa” i roto i toou au inangaroanga? Kare e anoanoia kia tiaki atu koe i tetai ke kia akono i te manako rave ua kia koe. I roto i tana reta ki to Roma, kua kapiti mai a Paulo i te anoano no te rauka anga te kapiti anga aroa mou ma teia akoanga: “I te akangateitei anga tetai ki tetai.” (Roma 12:10) Kia akaari i te akangateitei anga ki tetai ke, e rave koe i te akono i te manako rave ua i te aravei atu ia ratou i te au uipaanga. Penei ka pati katoa atu koe kia piri mai ratou kia koe i roto i te angaanga orometua me kare i te akapapa anga no tetai uipaanga. Te rave anga i te reira te tauturu ra i te tu no te kapiti anga aroa mou kia tupu mai.

9. Eaa ra te au takainga ta etai papaki i rave kia riro mai ei au oa piri vaitata ma te au taeake Kerititiano ra? (Kapiti mai i tetai au akaraanga i toou ngai.)

⁹ Ka rauka i te au ngutuare tangata e te aronga tataki tai i roto i te putuputuanga i te “maora katoa” na te atoro anga tetai i tetai, penei ua ake na te kai kapipiti anga i te manga, e na te piri taokotai anga ki roto i te au angaanga tau tikai. (Luka 10:42; 14:12-14) I tetai au atianga e akanoonoo ana a Hakop i te au pikiniki no te pupu meangiti. “Kua tae pouroa mai te aronga ou e te aronga pakarikari, pera katoa te au metua takaua,” i akakite mai ei aia. “Ka apai pouroa te katoatoa i te au akamaaraara anga mataora ki te kainga, e te manako piri vaitata ra ratou tetai ki tetai.” Ei au Kerititiano, e tauta tatou kare kia riro ua ei au taeake irinaki mari katoa ra ei au oa mou.​—3 Ioane 14.

10. Eaa ra ta tatou ka rave me kua akakinoia te au pirianga?

¹⁰ Inara, i tetai taime, penei ka tuku mai te au tu apa i tetai akaaoanga ki te tatanu anga i te pirianga oa e te inangaroanga. Eaa ra ta tatou ka rave? Te mea mua, ka pure tatou no te au pirianga meitaki ma to tatou au taeake. To te Atua ia anoano kia oaoa tona au tavini tetai ki tetai, e ka pau mai aia i taua au pure ngakau tae. (1 Ioane 4:20, 21; 5:14, 15) Kia rave katoa tatou i te angaanga kia rotai ma ta tatou au pure. Kua maara ia Ric, e orometua tutaka i Aperika Itinga, i tetai taeake te akariro ra tona tu riri ei mea ngata kia piri atu kiaia. “Kare i kopae atu ana i te taeake, kua akamanako papu au e kia kite meitaki atu iaia,” i akamarama mai ei a Ric. “Tei tupu kua riro ana te metua tane o te taeake ra ei tangata papa pakari tikai. I toku kite anga  i muri mai i te putoto anga ngata o te taeake kia autu i teia turanga nei e mei teaa te mamao te rave anga aia i te reira, kua akaperepere au iaia. Kua riro mai maua ei nga oa meitaki.”​—1 Petero 4:8.

Akatuera i Toou Ngakau!

11. (a) Eaa ra te anoanoia ra e rauka ai kia tupu te inangaroanga i roto i te putuputuanga? (e) Eaa ra ka riro ei ei mea kino i te pae vaerua i te akamamao ke atu i te pae manako ra mei te tetai ke?

¹¹ I teia tuatau, e manganui te au tangata te akono ra i te oraanga kare e akatupu ana i tetai pirianga oa vaitata ki tetai tangata. Mei teaa ra te mii! Kare e anoanoia teia​—e kare e tau​—kia riro mai ei turanga i roto i te putuputuanga Kerititiano. Ko te aroa ngakau taeake ra kare ua i te pukapuka anga maru e te au tu mako ua; kare katoa te reira e akaari kavauvau ana i te manako ngakau ki tetai ke. Kareka ra, kia puareinga ua tatou i te akatuera i to tatou ngakau, mei ia Paulo rai ki to Korinetia ra, e kia akaari ki to tatou au taeake irinaki e te manako tikai ra tatou i to ratou oraanga. Noatu e kare te katoatoa i te tu oaoa me kare i te akakitekite ua, na te akamamao ke anga atu ka riro ia ei mea kino. “Ko tei [“akatakake,” NW] i tetai ke, kua ketaketa ra i tona uaorai manako,” i akamatakite mai ei te Pipiria. “Kua patoi atu aia ki te au tuatua pakari katoa ra.”​—Maseli 18:1.

12. Eaa ra i puapinga ai te komunikeiti meitaki ki te au pirianga vaitata i roto i te putuputuanga?

¹² E puapinga maata tikai te komunikeiti tiratiratu ki te pirianga oa mou. (Ioane 15:15) Te inangaro pouroa ra tatou i te au oa te ka akakite atu tatou i to tatou au manako e te au manako oonu i roto roa. Pera katoa, to tatou kite meitaki atu tetai i tetai, te ngoie ua ra i te akamerengo i te au anoano o tetai i tetai. Me akaari tatou i te manako no te au inangaro o tetai i tetai na roto i teia mataara nei, te akamaata ra tatou i te kapiti anga aroa mou, e ka kite tatou i reira i te tuatua mou o ta Iesu au tuatua e: “E mea meitaki i te oronga atu i te rave mai.”​—Angaanga 20:35; Philipi 2:1-4.

13. Eaa ra ta tatou ka rave i te akaari e e inangaroanga mou to tatou no to tatou au taeake?

¹³ No to tatou inangaroanga kia rave maata atu i te meitaki ra, te anoanoia ra tatou kia akaari i te reira. (Maseli 27:5) Me e tika tikai to tatou inangaroanga, penei ka akaari mai to tatou mata i te reira, e penei ka akakeu te reira i te ngakau o tetai ke kia ariu mai. “Te rekareka nei te ngakau me mārama te mata,” i tata mai ei te tangata pakari. (Maseli 15:30) Ka akamaata katoa te au angaanga manako anga i te kapiti anga aroa mou. Noatu e kare e rauka i tetai i te oko mai i te inangaroanga mou, ko tetai apinga aroa tei orongaia mai mei te ngakau ra ka riro ia ei mea puapinga tikai. Ko tetai kati, tetai reta, “me tuatuaia i te tuatau tikai ra”​—ka rauka pouroa teia i te akaari i te inangaroanga oonu. (Maseli 25:11; 27:9) Me rauka ia tatou te  pirianga oa ki tetai ke, e mea tau kia tamou tatou i te reira na te akaari ua atu anga i te inangaroanga noinoi kore. I te au tuatau te anoano tikai ia ra, ka inangaro tatou i te tauturu i to tatou au oa. Te karanga te Pipiria e: “E aroa tetai oa mou ra i te au tuatau katoa, e e taeake tei anauia maira i te tuatau tumatetenga.”​—Maseli 17:17, NW.

14. Eaa ra ta tatou ka rave i te akara anga e kare ra tetai tangata e ariu mai ana ki to tatou inangaroanga?

¹⁴ Ma te tika tikai, kare e rauka ia tatou i te tapapa atu e ka piri vaitata atu ki te katoatoa i roto i te putuputuanga. Te vai ua ra etai papaki te manako piri vaitata atura tatou i ta tatou e rave ra ki tetai ke. No reira me kare e akara anga e te oaoa maira tetai tangata kia koe mei taau e inangaro ra, eiaa e viviki ua i te manako e e apinga tarevake tetai ia koe me kare ki taua tangata ra. E auraka e maro atu i tetai pirianga oa ki te reira tangata. Me ka akatotoa maata ua atu koe i te tu oaoa ta te tangata ra ka akatika mai, te tauturu ra koe kia vai tuera ua i te ngutupa no te au pirianga vaitata ki te tuatau ki mua.

“Kua Mareka Rava Au ia Koe”

15. Eaa ra ta te tupu anga akameitakianga, me kare te ngere anga i te reira, ka raveia ki runga i tetai ke?

¹⁵ Mei teaa rai to Iesu rekareka i tona papetitoia anga, i tona akarongo anga atu i te au tuatua mei te rangi maira: “Kua mareka rava au ia koe”! (Mareko 1:11) Kua rauka teia tuatua no te arikianga i te akaoonu i to Iesu irinaki e te inangaro maira tona Metua iaia. (Ioane 5:20) Ma te mii, kare roa etai papaki e rongo ana i taua au akameitakianga mei te aronga ta ratou e akangateitei ra e te aroa ra. “E manganui te au mapu mei iaku rai kare te au mema ngutuare tangata e ariki mai ana i to ratou au irinaki anga Kerititiano,” i akakite mai ei a Ann. “I te kainga ra e rongo ua ana matou i te au tuatua akaapa anga. Te akariro ra teia ia matou kia mii tikai.” Inara, me riro mai ratou ei tuanga no te putuputuanga, te kite ra ratou i te tu maana o tetai ngutuare tangata i te tauturu anga, e te akono anga i te pae vaerua​—te au metua tane e te au metua vaine e te au taeake e te au tuaine i roto i te akarongo.​—Mareko 10:29, 30; Galatia 6:10.

16. Eaa ra i kore ei ei mea tauturu te akaari anga i te tu akaapa anga ki tetai ke?

¹⁶ I roto i etai au peu, ko te au metua, te aronga pakarikari, e te au puapii ra e taki tai ua ake taime te akakite ngakau tae ra i te mareka anga ki te au mapu, i te manako anga e penei ka akariro taua akapaapaa anga ia ratou kia manako kore ua me kare kia akaparau. Ka akakeu katoa taua manako anga ra i te au ngutuare tangata Kerititiano e te putuputuanga. Te tuatua anga no runga i tetai tuatua me kore i tetai tauta anga, penei ka karanga te aronga pakarikari e: “Meitaki ua tera, inara e maata atu taau ka rauka i te rave!” Me kare i roto i tetai tu, penei ka akakite katoa mai ratou i to ratou mareka kore ki tetai mapu. I te rave anga i te reira, e manganui te irinaki ra e te akakeu ra ratou i te au mapu kia itae atu i to ratou tu tau. Inara kua riro putuputu mai teia akaraanga ei tupuanga tuke, i te mea e ka akamamao ke atu te au mapu me kore ra ka manako e kare e tau ana.

17. Eaa ra tatou ka kimi ei i te au tuatau kia akameitaki i tetai ke?

¹⁷ Inara, auraka te akameitakianga, kia oronga uaia ei akamata anga ki te ako anga. Te akamaata ra te akameitakianga i te kapiti anga aroa mou i roto i te ngutuare tangata e te putuputuanga, i te akamaroiroi anga i reira i te au mapu kia kimi atu i  te au taeake e te au tuaine pakari no te ako anga. No reira kare e tuku ua i te peu kia akakite mai e ka akapeea tatou i te akono anga i tetai ke, “kia akatangata ou oki [tatou] ko tei angaia kia tau i te Atua ra, i te tuatua-tika e te tapu mou.” E akameitaki atu mei ia Iehova rai.​—Ephesia 4:24.

18. (a) E te au mapu, ka akapeea koe me akamanako i te ako anga no ko mai i te aronga pakarikari? (e) Eaa ra te aronga pakarikari ka matakite ei me oronga atu ratou i te ako anga?

¹⁸ I tetai tua, e te au mapu e, auraka e manako e me oronga mai te aronga pakarikari i te akatikatikaanga me kare i te ako anga kia koe, ko te aite anga o te reira e kare ratou e reka mai ana ia koe. (Koheleta 7:9) Ei tuke anga ra! Penei kua akakeuia ratou no to ratou manako e te oonu o te inangaroanga ia koe. Me kare ra, eaa oki ratou ka manamanata atu ei i te tuatua atu kia koe no runga i taua tumu ra? Te kite anga i te ka tupu mai ki te au tuatua ra, ko te aronga pakarikari​—te aronga pakari tikai o te putuputuanga ra—​kua akapou maata atu i te au taime ravarai ki te manako anga e te pure anga i mua ake ka oronga atu ei i te ako anga, no te mea te inangaro ua ra ratou i te rave i te meitaki.​—1 Petero 5:5.

“E Ki oki a Iehova i te Aroa e te Takinga Meitaki”

19. Eaa ra te aronga te mamae ra i te au mareka kore anga ka akara ai kia Iehova no te turuanga?

¹⁹ Penei ka akaruke mai te au tupuanga tau kore i etai ma te manako ngakau e te akaari anga i te kapiti anga aroa mou ra ka taki atu ki te mareka kore anga. Te umuumuia ra e ratou te mataku kore e te akarongo ketaketa kia akatuera akaou i to ratou ngakau ki tetai ke. Inara auraka rava e ngaropoina ia ratou e “kare ra [a Iehova] i atea ke atu ia tatou katoa nei.” Te pati maira aia ia tatou kia akavaitata atu kiaia. (Angaanga 17:27; Iakobo 4:8) Kua marama katoa iaia to tatou mataku no te tamamaeia mai, e kua taputou mai e ka turu aia ia tatou e ka tauturu mai ia tatou. Kua akapapu mai te tata taramo ko Davida kia tatou e: “Te vaitata nei a Iehova i te aronga ngakau paruparu ra; e te akaora nei aia i te aronga ngakau taitaia.”​—Salamo 34:18.

20, 21. (a) Akapeea tatou i kite ei e ka rauka ia tatou tetai pirianga vaitata kia Iehova? (e) Eaa ra te umuumuia ra kia rekareka i te pirianga kia Iehova?

²⁰ Ko tetai pirianga oa vaitata kia Iehova e pirianga puapinga maata roa atu ka rauka ia tatou i te tatanu. Inara ka rauka ainei tikai taua tatua ra? Ae. Te akaari maira te Pipiria e e manako anga piri vaitata tikai to te au tane e te au vaine tuatua tika ra ki to tatou Metua i te rangi. Kua akaoraia mai ta ratou au tuatua maana kia orongaia mai kia tatou te akapapu anga e ka rauka katoa ia tatou te akavaitata atu kia Iehova.​—Salamo 23, 34, 139; Ioane 16:27; Roma 15:4.

²¹ Ka rauka ta Iehova au umuumu anga no te pirianga vaitata kiaia ra kia itaeia e te katoatoa. “Koai, e Iehova, te ka tuitarere i toou ra puakapa?” i ui ei a Davida. “Ko te tangata aerenga tiratiratu, ko tei akono i te tuatua-tika ra; e ko tei tuatua i te tuatua-mou i roto i tona ra ngakau.” (Salamo 15:1, 2; 25:14) I to tatou kite anga e te tavini anga i te Atua te akatupu ra i te ua meitaki e te autu anga tatou i tana aratakianga e te paruruanga, i kite mai ei tatou e “e ki oki a Iehova i te aroa e te takinga meitaki.”​—Iakobo 5:11, NW.

22. Eaa ra te pirianga ta Iehova e inangaro ra kia rekareka tona iti tangata?

²² Mei teaa ra to tatou akameitaki angaia e te anoano ra a Iehova kia rauka taua pirianga vaitata ma te au tangata apa ra! Kare ainei tatou e akaari i reira i te kapiti anga aroa mou no tetai ki tetai? Ma to Iehova tauturu, ka rauka ia tatou tataki tai i te oronga atu e te rekareka atu i te kapiti anga aroa mou e tu oki te reira no to tatou akataeakeanga Kerititiano. I raro ake i to te Atua Patireia, ka o atu te katoatoa i runga i te enua nei ki roto i teia inangaroanga e tuatau ua atu.

Ka Rauka Ainei ia Koe te Akataka?

• Eaa ra te tu o te reva ka vai i roto i te putuputuanga Kerititiano?

• Akapeea tatou tataki tai i te oronga anga ki te kapiti anga aroa mou i roto i te putuputuanga?

• Akapeea te akameitakianga ngakau tae i te akamaata anga i te inangaroanga Kerititiano?

• Akapeea to Iehova kapiti anga aroa mou i te turuanga e te akaoraanga ia tatou?

[Au Uianga Apii]

[Tutu i te kapi 15]

Te aroa i rotopu i te au Kerititiano e maata atu i te akaata maira i to te angaanga ua

[Au Tutu i te kapi 16, 17]

Ka rauka ainei ia koe i te “maora katoa” i roto i toou inangaro?

[Tutu i te kapi 18]

Te akaapa ra me te akamaroiroi ra koe?