Koai Ma te Akakaka ra i te Atua i Teia Tuatau?

‘E tau te kakā ia koe e Iehova, to matou Atua, e te akangateitei, e te mana.’​—APOKALUPO 4:11, akaaite ia NW.

1, 2. (a) Eaa ra te au akaraanga te akatutu maira i te ngai te kapikiia ra ko te au biomimetic? (e) Eaa ra te uianga te mama maira, e eaa ra te pauanga?

I TETAI ra i te 1940, kua aere atu te tangata enitinia Tuiterani ko George de Mestral ma tana puakaoa i te ori aere. I te oki anga mai ki te kainga, kua kite atu aia e kua ki tona au kakau e pera katoa te uruuru o te puakaoa i te au piripiri. Ma te umere, kua akara matatio aia i te au piripiri i raro ake i te io akamaata e kua umere tikai i te au tapeka rikiriki te mou ra ki runga i tetai apinga e tatai tetai. I te openga iora, kua maani aiteite aia i tetai apinga synthetic​—e Velcro. Kare ko De Mestral anake ra tei kopi i te au mea natura. I Marike, na te nga taeake Wright i maani i tetai pairere i muri ake i te apii anga no runga i te au manu mamaata e rere ra. Na te tangata enitinia Varani ko Alexandre-Gustave Eiffel i maani i te punanga i Paris te taikuia ra tona ingoa, te taangaanga anga i te au kaveinga tumu anga te rauka ra i te ivi ua tangata i te turu i te teimaa o te kopapa.

² Te akatutu meitaki maira teia au akaraanga tei tapaia ko te au biomimetic, i te ngai no te taineti te tauta ra i te aru anga i te kopi i te au akapapaanga tei kiteaia i roto i te au mea natura. * Inara, kua tupu mai tetai uianga tau: Eia taime te oronga anga te aronga maani apinga i te akameitakianga ki Tei akapapa i te au piripiri mea rikiriki ra, te au manu mamaata, te ivi ua tangata, e tetai mea pouroa o te au mea manea ta te au tangata maani apinga e manganui i akatumu ra? E mea mii inara e tika te reira i roto i te ao o teia tuatau, taki tai ua ake taime kua orongaia te akameitakianga ki te Atua me kare te kaka te tau ra kiaia.

3, 4. Eaa ra te aite anga o te tuatua Epera tei uriia e e “kakā,” e ki teaa ta te reira e taikuia ra me taangaangaia kia Iehova?

³ ‘No teaa ra,’ ta tetai e manako ra, ‘ka tau ei e kia akakakaia te Atua? Kare ainei e kua rauka ke ana i te Atua te kaka?’ E tika, ko Iehova te Peretana kaka roa atu i roto i te ao katoa e pini ua ake, inara kare te aite anga o te reira e te akakakaia ra aia i roto i nga mata o te au tangata ravarai. I roto i te Pipiria, te akataka ra te tuatua Epera i te “kaka” ki te tumu manako no te “teimaa.” Te taiku ra te reira ki tetai apinga te akariro ra i tetai tangata ma te akara anga teimaa me kare e puapinga maata ki tetai ke. Me taangaangaia ki te Atua, te taiku ra te reira ki tei akariro i te Atua kia manako maataia e te tangata.

⁴ E tokoiti ua i teia tuatau te manako ra e na teaa oki i akariro ei i te Atua kia manako maataia. (Salamo 10:4; 14:1) Ko te tika, ko te au tangata rongonui i roto i te taiate, me te irinaki ra ratou i te Atua,  kua akakeu putuputu ana i te au tangata kia akono i Tei Anga kaka ra i te ao katoa e pini ua ake ma te akangateitei kore. Na roto i teea au mataara i rave ei ratou i te reira?

“Kare ua Atura o Ratou Kotoe Anga”

5. Akapeea te au taineti e manganui i te akamaramaanga i te au mea umere no te au mea angaia ra?

⁵ E manganui te au taineti te maro ra e kare e Atua. Akapeea, i reira, ratou i te akamaramaanga i te au mea umere o te au mea angaia, kapiti atu te au tangata ravarai ra? Kua oronga ratou i taua au mea umere ki te mea tupu ua, ki tetai mana matapo tei akatumuia ki runga i te mea tupu ua. Ei akaraanga, kua tata a Stephen Jay Gould e tangata tei irinaki i te mea tupu ua e: “Tei konei tatou no te mea no tetai peau tuke tikai o tetai pupu ika tuke tei taui i te kopapa ki roto i nga vaevae no te au mea angaia o te enua ra . . . Penei ka umuumu tatou i te pau anga ‘teitei’​—inara kare e vai ana tetai.” Mei te reira katoa, kua tata a Richard E. Leakey raua ko Roger Lewin e: “Penei ua ake e apinga ora tarevake tikai te au tangata.” Ko etai au taineti tei akapaapaa ana i te manea e te akapapaanga o te au mea natura ra kua poka i te oronga i te akameitakianga ki te Atua.

6. Eaa ra te akaanga ke ra i te manganui i te oronga anga i te akameitakianga ki te Atua te tau ra e koia Tei Anga ra?

⁶ Me akakite te aronga apii tataki tai e e tika te mea tupu ua, te karanga ra ratou e ko te aronga kite kore ua te patoi ra i te irinaki atu i te reira. I akapeea ra te manganui i te ariu anga atu ki taua manako ra? I etai au mataiti i topa akenei, ko tetai tangata tei kite meitaki i te au mea tupu ua kua uiui manako atura i te au tangata tei ariki i te apiianga. Kua karanga aia: “Kua kitenaia mai e au e ko te maata anga o te aronga irinaki i te au mea tupu ua e aronga irinaki no te mea kua akakiteia mai kia ratou e ko te au tangata kite ravarai e aronga irinaki.” Ae, me akakite te aronga apii tataki tai i to ratou au manako irinaki kore i te Atua, kua akaanga ke ia tetai i te oronga anga i te akameitakianga ki te Atua te tau ra e koia Tei Anga ra.​—Maseli 14:15, 18.

7. Kia tau kia Roma 1:20, eaa te ka kite meitakiia na roto i te au mea angaia te akara mataia ra, e no teea ra?

⁷ Kua tae ainei te au taineti ki ta ratou au manakoanga taopenga no te mea oki e te tou ra te au tika anga e te akapapu anga ki te reira mataara? Kare roa! Te koropiniia nei tatou e te akapapuanga o Tei Anga ra. No runga iaia ra i tata ai te apotetoro ko Paulo e: “Te au mea oki nona tei kore e tau kia akara ra, tei kitea puia nei ïa, i te au mea katoa i angaia nei, mei te maani anga mai i teianei ao [o te au tangata ravarai]; koia oki, tona ra mana mutu kore anga, e te Atua anga; kare ua atura o ratou [te aronga irinaki kore] kotoe anga.” (Roma 1:20) Kua akaruke mai Tei Anga ra i tana akapapu anga ki runga i tana au angaanga. Te karanga ra i reira a Paulo e mei te akamata anga o te vai anga o te tangata ra, kua rauka i te au tangata kia ‘kite puia’ te akapapu anga no te vai anga o te Atua na roto i te au mea angaia te kite mataia ra. Teiea oki teia akapapu anga?

8. (a) Akapeea te au rangi tikai i te akakite anga i te mana e te pakari o te Atua? (e) Eaa ra te akapapuanga e e Tumu Anga Mua to te ao katoa e pini ua ake?

⁸ Te kite nei tatou i te akapapuanga o te Atua i roto i te au rangi etu. “Te tuatua nei te au rangi i te kakā o te Atua,” i karanga ai a Salamo 19:1. “Te au rangi”​—te ra, te marama, e te au etu​—te akakite ra i to te Atua mana e te pakari. Te akaki ra te maata anga tikai o te au etu ia tatou ma te umere. E te neke aere ra teia au mea pouroa o te rangi ra na roto i te mareva, kare ma te puapinga kore, inara kia tau oki ki te au ture tano tikai. * (Isaia 40:26) E mea tau ainei i reira kia oronga atu i taua turanga ra ki te  mea tupu ua? Ma te puapinga, e manganui te au taineti te karanga ra e e akamata anga poitirere to te ao katoa e pini ua ake. Te akataka anga i te au akaaiteanga no teia, kua tata tetai poropeta: “Ko tetai ao katoa e pini ua ake te vai ra e tuatau ua atu te ariki maataia ra ki te [manako] o tetai tangata irinaki kore i te Atua me kore ki te tangata kite kore i te Atua. Ma te reira katoa, ko tetai ao katoa e pini ua ake tei akamata ra i te akara anga te maro ra i tetai tumu mua; koai oki te ka manako atu i taua tupu anga me kare e rava ana te tumu anga?”

9. Akapeea e kiteaia ai to Iehova pakari i roto i te au mea angaia o te manu ra?

⁹ Te kite katoa ra tatou i te akapapuanga o te Atua i runga nei i te enua. Kua tuatua maata maira te tata taramo: “Tumatatini taau ra angaanga, e Iehova e! e au ravenga pakari anake rai taau: kua ki te enua nei i taau ra apinga.” (Salamo 104:24) Ko ta Iehova ra “apinga,” te kapiti maira i te au mea angaia o te au animara, te akapapu maira i tona pakari. Mei ta tatou i kite i te akamata anga, te akapapaanga i te au mea ora ma taua tu teitei ra kua tauta putuputu te au taineti i te kopi i te reira. E akamanako ana i tetai au akaraanga tokoiti ua. Te apii ra te aronga kimikimi i te au ria, ma te akakoroanga kia maani i te au pare paruru ketaketa; te akara ra ratou i tetai au tu o te rango e meitaki tikai te akarongo anga, ma tetai manako kia akameitaki mai i te au apinga tauturu no te akarongorongo; e te akara matatio ra ratou i te au peau uruuru o te au kuta, ma te manako kia akameitaki mai i te au pairere muna. Noatu eaa tana tauta anga, kare e rauka i te tangata i te kopi tikai i te au akapapaanga tiama te kiteaia ra i roto i te au mea natura. I akakite mai ei te puka Biomimicry​—Innovation Inspired by Nature: “Kua rave te au mea ora i te au mea ravarai ta tatou e inangaro ra i te rave, kare i kaimoumou i te apinga o te enua, te akataero i te paraneta, me kare i te akakino i to ratou tuatau ki mua.” Mei teaa tikai te pakari!

10. Eaa ra i tau kore ei i te patoi i te vai anga o Tei Akapapa Maata ra? E akatutu mai.

¹⁰ Noatu e te akara ra koe i te au rangi i runga me kare te akara ra i te au mea angaia i runga tikai i te enua nei, te taka ra te akapapuanga o Tei Anga ra. (Ieremia 10:12) Kia ariki ngakau tae tikai tatou i te au mea angaia o te rangi tei kapiki maata e: “E tau te kakā ia koe, [“e Iehova, to matou Atua,” NW], e te akangateitei, e te mana: naau oki i anga i te au mea ravarai nei.” (Apokalupo 4:11) Inara, e manganui te au taineti kua poka i te kite i te akapapuanga ma ‘te mata o to ratou ngakau,’ noatu e te umere ra ratou i te au mea akapapaia ta ratou e kite ra ma to ratou au mata tika tikai. (Ephesia 1:18) Ka akatutu tatou i te reira na teia mataara: Kia reka i te manea e te akapapaanga i roto i te au mea natura e te akakoreanga i te vai anga o Tei Akapapa Maata ra e mea tau kore ia i te mareka anga i tetai tutu peni maneaia e i taua taime rai te akakore ra i te vai anga o te tangata ati tei taui i tetai kie kare e apinga i runga ra ki roto i tetai apinga karape roa atu. No reira rai ko te aronga tei patoi i te irinaki ki roto i te Atua kua kapikiia e ei “kotoe anga”!

Kua Akavare te “Matapo Arataki Matapo” i te Manganui

11, 12. Kua akatumuia te apiianga o te predestination ki runga i teea manakoanga, e eaa te akaari maira e kare teia apiianga e akakaka ana i te Atua?

¹¹ E manganui te au tangata irinaki akonoanga ngakau tae e te akakaka ra ta ratou tu akamori anga i te Atua. (Roma 10:2, 3) Inara, ko te akonoanga ei katoaanga te akatupu ra i tetai tuanga o te taiate tangata tei arai tikai i te au mirioni ua atu i te akakaka anga i te Atua. Akapeea ra? E akamanako ana tatou i nga mataara e rua.

¹² Te mea mua, te akakore ra te au akonoanga i te kaka mei te Atua na roto i te au apiianga pikikaa. E akamanako ana i tetai akaraanga no te apii anga i te predestination. Kua akatumuia teia apiianga ki runga i te manako anga e i te mea e tei te Atua te mana i te kite i te tuatau ki mua, kua kite ke ana aia i te tupu anga o te au mea ravarai. Te karanga ra i reira te predestination e kua akanoo ke ana te Atua mei ito roa mai i te tuatau ki mua​—i te meitaki me kare te kino​—no te au tangata ravarai. Kia tau ki teia manako nei, kua tukunaia te akaapa anga no te mamaeanga e te kino ravarai o teianei ao i teia tuatau nei ki te Atua. Kare rava te reira e akakaka ra i te Atua i te orongaia anga te akaapa anga ra kiaia te tau tikai ra ki tona Enemi maata ra, ko Satani, ta te Pipiria i kapiki e ko “te ariki o teianei ao”!​—Ioane 14:30; 1 Ioane 5:19.

13. Eaa ra i neneva ai e kia manako e kare e rauka i te Atua i te akatere i tona tu kite kia kite i te tuatau ki mua? E akatutu mai.

¹³ E apiianga tuatua tapu kore te predestination e te akakino ra i te Atua. Te akaoripu ra te reira te  ka rauka iaia i te rave i tana tikai ka rave ra. Ko te tika kua kite meitaki te Atua i te au tupuanga tei akakite taka meitakiia mai i roto i te Pipiria. (Isaia 46:9, 10) Inara, e mea tau kore i te manako e kare e rauka iaia i te akatere i tona tu kite i te kite anga i te tuatau ki mua me kare tei runga iaia te apainga no te au mea ravarai e tupu maira. Kia akatutuia: Penei e maata toou maroiroi i te pae kopapa. Te akariro ra ainei te reira kia inangaro koe i te taaki katoatoa i te au apinga teimaa tei kiteaia ra? Kare rava! Pera katoa, te rauka anga te tu kite kia kite i te tuatau ki mua ra kare e rauka i te akakeu i te Atua kia kite meitaki me kore ra kia akanoo ke ana i te au mea ravarai. Tona taangaanga anga i te kite momua e mea ikiia e te matakite. * Te taka meitaki ra e, kare te au apiianga pikikaa, kapiti mai te predestination, e akakaka ana i te Atua.

14. I roto i teea mataara i akangateitei kore ei te akonoanga akaaereia i te Atua?

¹⁴ Te rua o te mataara te akangateitei kore ra te akonoanga akaaereia i te Atua koia oki na roto i te tu o tona aronga akarongorongo. Te umuumuia ra te au Kerititiano kia aru i te au apiianga a Iesu. I rotopu i tetai ua atu au mea, kua apii a Iesu i tana au pipi kia ‘aroa ratou ia ratou uaorai’ e kia tamou rai e ‘kare no teianei ao.’ (Ioane 15:12; 17:14-16) Akapeea ra te au mema o te orometua o Kerititome? Kua aru tikai ainei ratou i taua au apiianga?

15. (a) Eaa ra te rekoti o te au orometua me tae mai ki te au tamaki a te pa enua? (e) Te tu o te au orometua ra e tupu anga aa te reira ki runga i te au mirioni ra?

¹⁵ E akamanako ana i te rekoti no te au orometua no runga i te tamaki. Kua turu, kua ariki, e kua rave katoa ratou i te arataki anga i roto i te au tamaki e manganui a te pa enua. Kua akameitaki ratou i te au vaeau e kua akatika i te ta anga. Kua akakeuia tatou kia ui e, ‘Kare ainei taua au orometua ra i manako ana e te rave ra rai to ratou au taeake i te tua te patoi maira i taua mea rai?’ (Akara i te pia “Ka Tu te Atua ki Toai Tua?”) Kare te orometua e akakaka ana i te Atua i te karanga anga ratou e tei ia ratou tana turu anga i roto i te au tamaki akamaringi anga toto; kare katoa ratou i akakaka ana iaia i to ratou akakite anga e kua taito te au turanga Pipiria e kua ariki i te tu ainga tau kore o tetai ua atu tu. Mei teaa tikai te akamaara anga mai ratou kia tatou i te au arataki akonoanga ta Iesu i kapiki e ko “te aronga rave tuatua kino” e te “matapo arataki matapo”! (Mataio 7:15-23; 15:14) No te tu o te au orometua kua akatupu te mirioni ua atu kia akaiti mai i to ratou inangaro no te Atua.​—Mataio 24:12.

Koai Ma Tikai te Akakaka ra i te Atua?

16. Kia paunaia te uianga e koai ma tikai te akakaka ra i te Atua, eaa ra tatou ka akara ai ki te Pipiria?

¹⁶ Me i te maata anga o te taime e kua poka i te au tangata mamaata e te rongonui o te ao i te akakaka i te Atua, koai ma tikai i reira te rave ra i te reira? Kia pauia taua uianga, e mea tau kia akara tatou ki te Pipiria. Mei tera te tu, e tika anga to te Atua kia tuatua e akapeea me akakakaia aia, e kua akanoo aia i te au turanga i roto i tana Tuatua, te Pipiria. (Isaia 42:8) Ka akara ana tatou e toru mataara kia akakaka i te Atua, i roto i nga tuanga te akono ra i te uianga e koai ma tikai i teia tuatau te rave ra i te reira.

17. Akapeea a Iehova i te akakite anga mai e te akakaka anga i tona ingoa e tu puapinga maataia no tona anoano, e koai ma i teia tuatau te akapaapaa ra i te ingoa o te Atua takapini i te enua nei?

 ¹⁷ Te mea mua, ka rauka ia tatou i te akakaka i te Atua na te akapaapaa anga i tona ingoa. Te rave anga i te reira e tu puapinga maata no to te Atua ra anoano te kiteaia ra i ta Iehova i tuatua ana kia Iesu. I nga mea ra i mua ake ka mate ei aia, kua pure a Iesu: “E taku Metua, e akakakā i toou ingoa.” Kua pau maira i reira tetai reo: “Kua akakakā au, e ka akakakā akaou atu rai au.” (Ioane 12:28) Kare ekokoanga e ko Iehova uaorai te vaa tuatua. Mei tana pauanga, te taka meitaki ra e ko te akakaka anga i tona ingoa e mea puapinga maata ia kiaia. Koai ma, i reira, i teia tuatau, te akakaka ra ia Iehova na te akakitekite anga i tona ingoa e te akapaapaa anga i te reira takapini i te enua nei? Ko te Au Kite o Iehova, e te rave ra ratou i te reira i roto i te au enua e 235!​—Salamo 86:11, 12.

18. Akapeea e rauka ai ia tatou i te akataka i te aronga te akamori ra i te Atua ma te “tuatua-mou,” e ko teea pupu te apii ra i te tuatua mou Pipiria e tere atu i te anere mataiti ra?

¹⁸ Te rua, ka rauka ia tatou i te akakaka i te Atua na te apiianga i te tuatua mou no runga iaia. Kua tuatua a Iesu e ko te aronga akamori mou ra ka “akamori [i te Atua] ma te . . . tuatua-mou.” (Ioane 4:24) Akapeea e rauka ai ia tatou i te akataka i te aronga te akamori ra i te Atua ma te “tuatua-mou”? Kia kopae ratou i te au apiianga kare i akatumuia ki runga i te Pipiria e te akakite pikikaa ra i te Atua e tona anoano. Kareka ra, kia apii ratou i te au tuatua mou ma o ta te Atua Tuatua, kapiti atu i tei aru maira: Ko Iehova te Atua Teitei Rava, e te aere ra te kaka no teia turanga nei kiaia ua (Salamo 83:18); e Tamaiti na te Atua a Iesu e e Tutara ikiia no te Patireia Mesia o te Atua (1 Korinetia 15:27, 28); na te Patireia o te Atua e akatapu i to Iehova ingoa e te akatupu anga i tana akakoroanga no te enua nei e no te au tangata i runga i te reira (Mataio 6:9, 10); te tuatua meitaki no runga i teia Patireia kia tutu aereia i te ao katoa nei. (Mataio 24:14) Kua tere atu i te anere mataiti, okotai ua pupu tei apii tiratiratu ana i taua au tuatua mou puapinga maata ra​—ko te Au Kite o Iehova!

19, 20. (a) Eaa ra ta tetai Kerititiano tu memeitaki ra ka apai mai ei i te kaka ki te Atua? (e) Eaa ra te au uianga ka rauka i te tauturu ia tatou kia akamanako e koai ma i teia tuatau te akakaka ra i te Atua na te tamou anga i te tu memeitaki?

¹⁹ Te toru, ka rauka ia tatou i te akakaka i te Atua na te akono ma te rotai i tana au turanga. Kua tata te apotetoro ko Petero e: “Kia meitaki ta kotou tuatua i rotopu i te au etene: ta ratou oki i akakino mai ia kotou, mei te mea e aronga rave tuatua kino, kia akara ra ratou i ta kotou tuatua meitaki, kia [“akakaka,” NW] ratou i te Atua i te rā e rokoia mai ei ra.” (1 Petero 2:12) Te akaata maira te tu o tetai Kerititiano i tona akarongo. Me rave te aronga akarakara i taua manako ra​—koia oki, me kite ratou e e tupu anga tika te tu memeitaki o te Kerititiano no tona akarongo​—te oronga maira te reira i te kaka ki te Atua.

²⁰ Koai ma i teia tuatau te akakaka ra i te Atua na te akono tamou anga i te tu memeitaki? I na, ko teea pupu akonoanga ta te au kavamani e manganui e akapaapaa ana ei au tangata no te au e te akono ra i te ture, te tutaki ra i ta ratou tero? (Roma 13:1, 3, 6, 7) Koai ma te au tangata te kiteaia ra i te ao katoa no to ratou tu taokotai anga ma te au taeake irinaki​—e tu taokotai anga te akakore ra i te au tuke anga kopu tangata, iti tangata, e te eteniki? (Salamo 133:1; Angaanga 10:34, 35) Ko teea pupu te kiteaia ra i te ao katoa no ta ratou angaanga apiianga Pipiria te akamaroiroi ra i te akangateitei anga i te ture, te au mea puapinga no te ngutuare tangata, e te au tu akono tau o te Pipiria? Okotai ua rai pupu te akakite maira i to ratou tu memeitaki i roto i teia e tetai ua atu au ngai ra​—ko te Au Kite o Iehova!

 Te Akakaka ra Ainei Koe i te Atua?

21. Eaa ra tatou ka akamanako ei e me te akakaka tikai ra tatou ia Iehova?

²¹ E mea meitaki no tatou tataki tai nei i te ui e, ‘Te akakaka ra ainei au ia Iehova?’ Kia tau kia Salamo 148, te oronga ra te maata anga o te au mea angaia i te kaka ki te Atua. Te au angera, te au rangi, te enua e to te reira au mea angaia o te manu​—te akapaapaa pouroa ra ratou ia Iehova. (Irava 1-10) Mei teaa ra te mii e kare te maata anga o te au tangata i teia tuatau e akapera ana! Na te akono anga i tetai mataara te akakaka ra i te Atua, te tuku rotai ra koe ia koe uaorai ma te toenga o te au mea angaia te akapaapaa ra ia Iehova. (Irava 11-13) Kare e mataara ke atu i te taangaanga anga i toou oraanga.

22. Na te akakaka anga ia Iehova, i roto i teea au tu i akameitakiia ai koe, e eaa ra toou manako anga?

²² Na te akakaka anga ia Iehova, ka akameitakiia koe i roto i te au tu e manganui. Ia koe e akono ra i te akarongo ki roto i te atinga oko o Karaiti, ka akaongiia koe ki te Atua e ka rekareka i tetai pirianga au e te uua ma toou Metua i te rangi ra. (Roma 5:10) Ia koe e akara ra i te au tumu kia akakaka i te Atua, ka rauka ia koe te ariki anga papu maata. (Ieremia 31:12) No reira, ka rauka ia koe i te tauturu i tetai ke kia akono i tetai oraanga mataora e te merengo anga, i toou uaorai kite maata anga i te tu mataora. (Angaanga 20:35) Kia rauka oki e ko koe tetai i rotopu i taua aronga ra tei akariro i te reira ei manako anga ketaketa na ratou i te akakaka anga i te Atua​—i teianei e e tuatau ua atu!

[Au Tataanga Rikiriki i Raro]

Maara Ainei ia Koe?

• Eaa ra tatou ka karanga ai e kare te katoaanga o te ngai taineti i tauturu ana i te au tangata kia akakaka i te Atua?

• I roto i teea nga mataara e rua i arai ei te au akonoanga akaaereia i te au tangata i te akakaka anga i te Atua?

• I roto i teea nga mataara e rauka ai ia tatou i te akakaka i te Atua?

• Eaa ra koe ka akamanako ei e me te akakaka ra koe ia Iehova?

[Au Uianga Apii]

[Pia i te kapi 12

“Ka Tu te Atua ki Toai Tua?”

Kua maara i tetai tangata no roto ana i te Pupu Vaeau Mareva o Tiamani i te tuatau i te Tamaki II o te Ao inara kua riro mai i muri mai ko tetai o te Au Kite o Iehova e:

“Te mea tei akataitaia iaku i taua au tuatau tamaki ra . . . te kite tikai anga i te au orometua mei te au akapupu anga ravarai​—te Katorika, te Ruterana, te Epitikopo, e te vai atura​—i te akameitaki anga i te pairere e to ratou au pupu i mua ake ka rere atu ei ratou ki te au akakoroanga kia tuku mai i ta ratou au kako tamate anga. E manako putuputu ana au e, ‘ka tu te Atua ki toai tua?’

“Kua aao te au vaeau Tiamani i tetai pakara kiri piripou kua tataia te au tuatua Gott mit uns (Tei ia tatou te Atua). Inara kua manakonako ra au e, ‘Eaa ra e kare te Atua i te tua patoi o te au vaeau te aiteite ra te akonoanga e tei pure ra ki taua Atua rai ra?’”

[Tutu i te kapi 10]

Takapini i te enua nei, te akakaka nei te Au Kite o Iehova i te Atua