Kua Akakite Aia i Tona Au Irinakianga ki Tona Au Taeake Apii

KA INANGARO ainei koe i te tauturu i toou au taeake apii kia marama meitaki i toou au irinakianga akatumuia ki runga i te Pipiria? Ko Magdalena, e 18 mataiti te pakari e mapu apiipii i te apii teitei i Porani, e putuputu ana i te tuatua ki tona au taeake apii no runga i tona au irinakianga e ko tetai o te Au Kite o Iehova. Tei tupu, kua ui putuputuia ana kiaia te au uianga mei te, ‘Eaa oki te aiteanga kia riro mai e ko tetai o te Au Kite o Iehova?’ e e ‘Kare koe e irinaki ana i roto ia Iesu Karaiti?’ Akapeea ra aia i te tauturuanga i tona au taeake apii? Kua pure a Magdalena kia Iehova no te aratakianga e kua angaanga rotai atu ma tana au pure.​—Iakobo 1:5.

I tetai ra, kua pati atu a Magdalena i tetai puapii tei ariki tau mai me ka rauka iaia i te akaari i te vitio Jehovah’s Witnesses​—The Organization Behind the Name. * Kua akatika mai te puapii ki teia. I reira kua akakite a Magdalena ki tona au taeake apii: “Kua akanoo au i tetai taeake kia oronga i tetai porokaramu e 90 miniti ki te pupu. Ka kapitiia mai tetai akaariarianga vitio e tetai uriurianga no runga i te Au Kite o Iehova. Ka inangaro ainei kotou i te aere mai? Kua ae pouroa mai te katoatoa. Kua akamata a Magdalena raua ko Wojciech, tetai tangata tamou tei kite i te tutu evangeria, i te akapapa no te angaanga.

Ko te parani koia oki kia akamata i te akaariarianga ma tetai tuatua e 20 miniti tei akatumuia ki runga i te poroutia Jehovah’s Witnesses​—Who Are They? What Do They Believe? * aru mai te uriurianga uianga e te pauanga. I reira ka akaariia te vitio i roto i te ngai vairanga puka i te apii. Ka orongaia tetai apinga aroa ki te aronga apiipii tatakitai i roto i te pupu​—e tikiro maatamaata tei roto etai au poroutia, te puka Questions Young People Ask​—Answers That Work, * e etai o te au aenga pepa e te au makatini.

I te ra i raveia ai te akaariarianga, kua kapiti mai i roto i te aronga akarongorongo e 14 taeake apii, te puapii, e 4 aronga apiipii ke mai tei roto i taua taime ra i te ngai vairanga puka. Kua akataka mua mai a Wojciech e kua taangaanga etai o te aronga atu pee Porani e te au tangata tata i te ingoa tu-Atua, ko Iehova, i roto i ta ratou au tataanga. Kua tou katoa aia ki etai o te au apiianga taito a te Katorika tei roto te ingoa tu-Atua. I te akatakaanga i te angaanga a te Au Kite o Iehova i teia tuatau nei, kua akaari aia i te au poroutia o te au opati manga tuketuke e tetai au tutu o te au Are Akaputuputuanga.

Kua tupu tetai uriurianga oraora. Kua taangaanga a Magdalena raua ko Wojciech i te Pipiria i te pauanga i te au uianga. Kua akakeu teia i te aronga e akarongorongo maira e kua akapapuia ratou e kare te Au Kite o Iehova e tutu aere ra i to ratou uaorai au manako. Eaa ra etai o te au uianga, e akapeea te reira i te pau angaia?

Uianga: Kua ki te Pipiria i te reo marama koreia e te au tuatua akaaiteanga, te ka rauka ua mai te au urianga ke e manganui. Akapeea e rauka ai kia noo rotai ma te Pipiria?

Pauanga: Kua karanga tetai e mei te vaiorini rai te Pipiria e ka rauka ia koe i te akatangi i tetai ua atu tangianga taau ka inangaro. Inara e akamanako ana: Me ka inangaro koe i te kite eaa ta te tangata tata aiteanga i tana au tataanga, kare ainei i te mea meitaki kia ui ua atu kiaia? Kare i aite mei te au tangata tata mate ra o te au tataanga  a te tangata, ko Tei Tata i te Pipiria, ko te Atua ko Iehova, te ora nei. (Roma 1:20; 1 Korinetia 8:5, 6) Ka rauka te aerenga tuatua o te irava i te akakite mai i te urianga tika. Kapiti katoa atu, e putuputu ana te Pipiria i te akono i taua tumu manako rai ki tetai au ngai ke mai, te akaaiteite anga atu i te reira ei tauturu. Ka akatika i reira tatou i te Atua kia arataki i to tatou au manako, mei te mea e te akataka maira aia uaorai i te irava kia tatou. Na te raveanga i te reira, ka rauka ia tatou kia kite e kia noo rotai ma tona anoano tei akakiteia mai i roto i te Pipiria, kare ainei e rauka ia tatou?

Uianga: Eaa te tuke i rotopu i te au Kerititiano e te Au Kite o Iehova?

Pauanga: E Kerititiano rai matou! Inara i te karanga ua e e au Kerititiano ratou, kua aruaru te Au Kite o Iehova i te noo kia rotai ki ta ratou e irinaki ana e i ta te Atua e apii maira ia ratou no to ratou uaorai meitaki. (Isaia 48:17, 18) No te mea e kua akatumu pouroaia ta ratou au apiianga ki runga i te Pipiria, kua kite ratou e tei ia ratou te tuatua mou.​—Mataio 7:13, 14, 21-23.

Uianga: Eaa ra kotou i aravei ua atu ei te aronga ke ua e i te maro i te tuatua atu anga kia ratou? Kare ainei te reira e te maro ra i to kotou akarongo ki runga i etai ke?

Pauanga: I toou manako e mea tarevake me tuatua meitaki mai tetai tangata kia koe i runga i te mataara e kua ui mai kia koe i toou manako no runga i tetai apinga? (Ieremia 5:1; Zephania 2:2, 3) (Kua akaari i reira a Wojciech raua ko Magdalena e akapeea ana raua me ui ki tetai e pati maira e me te manako maira te Atua i te aronga tei rokoia e te vai puke koi tupu ua akenei i Porani.) I te akarongo anga ki te manako o te tangata, kua tou atu matou ki te Pipiria. Me kare tetai tangata e inangaro ana i te tuatua, kua akakite atu matou kiaia kia aere ma te meitaki e kua neke atu. (Mataio 10:11-14) Te maro ra ainei te reira i etai ke ki roto i tetai pukapukaanga? Me kore kare ainei e tau akaou ana i te tangata i te komakoma atu?

Uianga: Eaa ra kotou kare e akono ana i te au orote?

Pauanga: E akono ana matou i te tupuanga ua ta te Pipiria i akaue ia matou kia akamaara​—te Akamaara Anga o to Iesu Karaiti matenga. (1 Korinetia 11:23-26) E no runga i te au orote, ka rauka ia koe i te kite no runga i to ratou akamata anga mai na te akaraanga i te au encyclopedia e tetai atu au tumu anga irinakiia. Me rave koe i te reira, ka ngoie ua ia koe i te kite eaa ra matou kare e akono ana i tetai ua atu o teia au tupuanga.​—2 Korinetia 6:14-18.

E manganui ua atu te au uianga tei uiia e tei pauia. Kua roa roa te uriurianga e kua akarukenaia te akaariarianga vitio.

Eaa te au manako a te aronga apiipii? E akatika ia Magdalena kia akakite mai kia tatou: “Kua umere au e ko etai o te aronga apii e kanga neneva ana e e aviri ua ana i etai ke kua ui mai i te au uianga mako tikai. Noatu kua karanga e e aronga irinaki kore ratou i te atua, i te tuatau o te uriurianga kua akakite mai ratou i to ratou akarongo ki roto i te Atua!” Kua ariki rekareka te aronga tei tae atu i te au apinga aroa​—e 35 puka i te katoaanga, e 63 poroutia, e 34 makatini tei tukunaia atu kia ratou.

Mei teaa tikai te au tupuanga meitaki mei tetai angaanga apii! Kare e kua tauturu ua te reira i te au taeake apii o Magdalena kia kite meitaki e kia marama i te Au Kite o Iehova inara kua akamaroiroi katoa te reira i te aronga mapu e manganui i te akamanako no runga i te akakoroanga no te oraanga. Kore koe e tauta kia tauturu atu i toou au taeake apii kia kite maata atu no runga i taau e irinaki ra?

[Au Tataanga Rikiriki i Raro]

[Tutu i te kapi 31]

Ko Magdalena raua ko Wojciech te akapapa ra no te uriurianga