Maata Atu i te Kanga Ua

E INANGARO ua ana te tamariki i te kanga. Inara “kare teia i te angaanga kanga ua me kare e puapinga kore,” i akataka mai ei te puka The Developing Child. “I te akaraanga ko te reira te tumuanga i patuia ai te maataanga o te tupu anga o te kite manako.” Na te kanga anga, kua kite te tamariki i te taangaanga i to ratou au tu, i te marama i to ratou ngai, e i te kapiti atu ma etai ke.

Akamataanga i te a me kore i te rima mataiti, kua akamata te tamariki i te akatutu i te au angaanga a te aronga mamaata ei tuanga no ta ratou au kangakanga anga. I tetai taime kua tuatua a Iesu no runga i te tamariki te kanga ra. Kua inangaro tetai i te kanga “akaipoipo,” kua inangaro etai ke i te kanga “tanumanga” e, tei rave putuputuia ana e te tamariki, kua karo ratou i rotopu ia ratou uaorai no te mea kare oki tetai papaki i inangaro ana i te piri mai. (Mataio 11:16, 17) Ka riro teia tutu kanga anga i te akaoonu i te au tuanga puapinga i runga i te manako o te tamaiti te tupu maira.

Te tamariki i roto i te au tutu te akatutu ra i te au tuanga o tetai puapii Pipiria e tetai tangata te apii ra. Kare ta raua e e apii Pipiria tika tikai, inara ko te manako i te oronga anga i te karere a te Pipiria kua taka meitaki e tei runga i to raua manako. E teia apiianga e mea puapinga ia, no te mea kua akaue a Iesu i tana au pipi katoatoa kia akariro i te au tangata ei pipi e kia apii i te tangata kia akono pouroa i te au apinga tana i apii atu kia ratou.​—Mataio 28:19, 20.

Te au metua e rekareka ana ta ratou tamariki i te maani mai e te rave ra i te au apii Pipiria, te oronga ra i te ako, me kore te tutu aere ra mei tera are ki tera are ka tau kia manako ngakau parau ia ratou uaorai. E mea natura ua e, e aru ana te tamariki i ta ratou e kite ra i te aronga mamaata i te pae mai e rave ra. Te akaata ra te au kangakanga anga Pipiria a te tamariki e te utuutuia ra ratou “ma te tu apiianga e te akoanga te mareka ia ra e te Atu.”​—Ephesia 6:4, Charles B. Williams.

Te inangaro ra a Iehova i te tamariki kia piri mai ki roto i te akamorianga mou. Kua akakite aia kia Mose kia kapiti atu i “te tamariki” me tatauia te Ture. (Deuteronomi 31:12) Me kite te tamariki ou e te akapiriia atura, penei ka akatutuia te reira i roto i ta ratou au kanga anga. E te tamaiti te akatutu ra ei orometua no te Atua te akono ra i te takainga mua ki runga i te mataara i te akariroanga e koia tetai.