Mei Teaa Rai Toou Tu no te Tapapa Anga?

I ROTO i te ao i teia tuatau nei, e iti te tangata te rekareka ra i te tiaki i tetai tangata me kore i tetai apinga. Te timata ra te reira i to ratou akakoromaki. Inara, te akamaroiroi maira te Tuatua Tapu, i to te Atua iti tangata kia tatanu i “tetai tu tapapaanga.” Ei tuke anga ma te au tangata takapini iaia, kua akakite te peroveta ko Mika e: “Ka akaari au i tetai tu tapapaanga no te Atua o toku ra ora.”​—Mika 7:7, NW; Te Aue o Ieremia 3:26.

I na, eaa ra, te aiteanga kia tapapa ia Iehova? Akapeea oki tetai Kerititiano i te tapapa atu i te Atua? E au mataara tau e te tau kore ainei tetai i te raveanga i teia? Te oronga maira te tupuanga o te peroveta ko Iona o te iva anere mataiti M.T.N i tetai apiianga no runga i te manako.

Tetai Tu Tarevake no te Tapapa Anga

Kua akaue a Iehova ia Iona kia aere e kia tutu aere ki te iti tangata o Nineve, te oire maata o te Patireia o Asura. Kua kiteaia a Nineve e ko “te oire toto” no to te reira takino anga tau kore e te tu kino, e tika anga tei akapapu meitakiia e te au tata tuatua enua e te aronga ko enua. (Nahuma 3:1) I te akamataanga kua tauta a Iona i te kopae i teia tukuanga angaanga, inara kua akapapu a Iehova e kia aere te peroveta i te openga iora ki Nineve.​—Iona 1:3–​3:2.

“Kua akamata aturā Iona i te aere na roto i taua oire ra, po tai akera i te aere anga; kua tutu aere aia, na ko atura, E rua takau rā toe e uritumuiaʼi Nineve.” (Iona 3:4) Kua akatupuia ta Iona au tautaanga ma te arikianga umere tikai: “Kua akatika atura te au tangata o Nineve i ta te Atua; e kua tutu atura i te akakore anga i te kai, kua kakau atura i te kakau paoa, mei tei maata i o ratou e tae rava atu ki tei mea ngiti i o ratou.” (Iona 3:5) Kia tau, kia Iehova ra, e Atua “kare rava i anoano e kia mate atu tetai, kia rauka katoatoa ra te tataraara,” kua akaora atura aia i te oire.​—2 Petero 3:9.

Eaa ra to Iona manakoanga? Te karanga ra te tataanga: “Kinokino roa akerā Iona, e maata atura tona riri.” (Iona 4:1) No teaa ra? Penei kua manako a Iona e kua taakamaia aia ei peroveta no te mea kare tana akakiteanga i akatupuia no te akapouanga i te tuatau i akakiteia. I te akaraanga kua maata atu tona manako i tona uaorai turanga i to te aroa e te ora no etai ke.

E tika, kare oki a Iona i tae roa ki te turanga kia akamutu mai ei peroveta ra. Inara, kua tapapa aia “kia kite aia e ka akapeeaia taua oire ra.” Ae, kua akatupu aia i tetai tu reka kore, te tu no te tiaki anga e kia akara oki. I te kiteanga e kare te au apinga i tupu ana ki te mataara tana i tapapa ei, kua anga iora aia i tetai are piritanga, kua noo iora i raro i te marumaru, e kua tapapa ma te maromaroa i te akara eaa oki te ka tupu.  Inara, kare a Iehova, i ariki ana i to Iona tu, e kua akatikatika aroa aia i te manako tarevake o tana peroveta.​—Iona 4:5, 9-11.

Eaa oki a Iehova i Akakoromaki Ei

Noatu kua tataraara a Nineve e kua akaora ia, kua oki akaou te reira i muri mai ki roto i te au tu kino. Na roto i te au peroveta ko Nahuma raua ko Zephania, kua totou a Iehova i to te reira akapouanga. I te tuatuaanga no “te oire toto,” kua akakite a Iehova e ka akapou aia ia Asura e ka akariro ia Nineve ei tanea oki. (Nahuma 3:1; Zephania 2:13) I te 632 M.T.N., kua akapouia a Nineve e kare roa i tu akaou mai ana.

I roto i taua tu rai, kua apa te ao o teia tuatau nei no te akamaringi toto i te tu maata rava atu i to Nineve taito ra. No teia e tetai atu au tumu, kua akaue a Iehova e ka aere te akatereanga kino o te au mea nei ki tona openga i roto i tetai “mate maata” akaaite koreia.​—Mataio 24:21, 22.

Noatu rai, kua tapu a Iehova i te akapouanga taputouia kia rauka te aronga maru i teia tuatau nei, mei te aronga tataraara i Nineve, i te tataraara e kia akaoraia mai. Kua taiku mai te apotetoro ko Petero i to te Atua aroa na roto i teia au tuatua: “Kare ua [“a Iehova,” NW] i akaroaroa i tana i tuatua maira, mei ta tetai pae e karanga ra e, e akaroaroa; e akakoromaki maata ra tona ia tatou, kare rava i anoano e kia mate atu tetai, kia rauka katoatoa ra te tataraara.”​—2 Petero 3:9, 10, 13.

Tapapa Anga na te Mataara Tau

Kua tuatua ua mai a Petero: “E teianei ka pou anake taua au mea katoa nei, mei te aa ra to kotou tu e tikaʼi i te tuatua tapu e te akono i te Atua; I te tatari anga, e te rapurapu anga atu, kia tae mai taua rā o [“Iehova,” NW] ra.” (2 Petero 3:11, 12) E akara e i te tapapa anga i to Iehova ra, ka tau tatou kia akaari i te “tu e tikaʼi i te tuatua tapu e te akono i te Atua”​—te angaanga, kare te angaanga kore, te ka tau ia.

Ae, ka akaari te tu tapapa anga tau i te akapapuanga tikai e ka aere mai to Iehova ra kare i te tuatau a muri ake i ta Iehova i akakoro. Ka akatupu taua akarongo i te au angaanga tapu e te au angaanga tau ki te Atua, e tei maata i rotopu i te reira koia oki ko te tutu anga i te tuatua meitaki o te Patireia o te Atua. Kua akanoo a Iesu i te akaraanga meitaki i roto i te tutu aere anga, e kua ikuiku aia i tana au pipi akatainuia: “Kia tatuaia to kotou taukupu, e kia vai kakā ua ta kotou mori; E kia tau kotou uaorai ki te aronga e tatari i to ratou pu, i te oki anga mai mei te akaipoipoanga; e kia tae mai aia e topāpā maira, kia eeu ratou i te pa kiaia i reira. E ao to te reira au tavini, i te oki mai anga o to ratou pu, te tapapa ra.”​—Luka 12:35-37.

Te au tavini i te anere mataiti mua kua ‘tatua i te taukupu’ na te aatu anga i te au ope o to ratou kakau i raro i te tatua kia rauka i te akamama mai i te angaanga pakari i te pae kopapa. No reira, kia maroiroi te Kerititiano, kia pakari i roto i te au angaanga meitaki. Ka tauta aia kia tamaki i tetai ua atu tu kia “akatau” i roto i te angaanga kore i te pae vaerua, penei na te tukuanga i tona au ririnui ki te au navenave me kore te au aruaruanga materia. Mari ra, “kia maata [aia] te rave anga i te angaanga a te Atu” i te tapapa atu anga i te ra maata e te rikarika o  Iehova.​—Roma 12:11; 1 Korinetia 15:58.

Angaanga Pakari i te Tapapa Atu Anga

Kua angaanga pakari te Au Kite o Iehova e te tapapa ra i to Iehova ra. Ei akatauanga, i roto i te mataiti tavinianga 2003, kua akapou ratou i tetai avereti e 3,383,000 ora i te ra tataki tai i te tutu anga i te tuatua a Iehova. Eaa oki, ka tau tetai tangata okotai i te tutu aere e 386 mataiti kare e tapu kia akatupu i tei raveia i te ra okotai!

Kareka ra, e mea meitaki kia ui tatou kia tatou uaorai, ‘Mei teaa rai toku uaorai tu no te tapapa anga?’ Kua oronga mai a Iesu i tetai parapore te akataka maira i te angaanga maroiroi te tapapaia ra no te au Kerititiano tiratiratu akatainuia. Kua tuatua aia no nga tavini e toru: “Tuku atura [te pu] i ta tetai e rima taleni, e rua ta tetai, okotai ua ta tetai; i tei tau katoa i aua nga tangata ra; aere atura aia i tona aerenga. Aere atura tei rave i nga taleni e rima ra, oko aere atura i taua nga taleni ra, rauka maira nga taleni ke e rima. Mei te reira katoa tei iaia nga taleni e rua ra, rauka maira nga taleni ke e rua. Kareka tei rave i te taleni okotai, aere atura ïa, e ko atura i te one, uuna atura i te moni a tona pu. E roa akera, oki maira te pu o taua aronga tavini ra, akatikatika maira i te tuatua ia ratou.”​—Mataio 25:15-19.

Kua tapapa pouroa nga tavini e toru no te oki mai anga o te pu. Te tokorua tei angaanga pakari i te tapapa atu anga i to raua pu kua akakite atu ia kia raua i tona tae atu anga: “Kua tika rava, e teianei tavini meitaki e te pikikaa kore.” Inara, ko tetai ake tei tapapa puapinga kore atu kua akono tuke ia. Kua karanga atura te pu: “E uri atu i taua tavini puapinga kore nei ki vao i te poiri ra.”​—Mataio 25:20-30.

Noatu e te akonoia ra teia parapore ki te au Kerititiano akatainuia, te vai ra tetai apiianga kia tatou katoatoa noatu to tatou manakonakoanga. Te tapapa ra te Pu, ko Iesu Karaiti, ia tatou tataki tai kia angaanga pakari i roto i tana tavinianga ia tatou e tapapa ra i tona oki mai anga i to Iehova ra maata. Te ariki ra aia i te angaanga a te tangata okotai ‘tei tau ki tona maroiroi’ e te au turanga. Mei teaa te rekareka i te akarongo atu mei ko mai te Pu “kua tika rava” me oti tikai te tapapa atu anga!

Te Aroa o to Tatou Atu te Aiteanga e Akaoraanga

Akapeea me kua tere roa atu te akatereanga o te au mea i ta tatou i manako mua ana me  kore i manakonako atu? Kare teia ma te kore e tumu. Kua tata te apotetoro ko Petero: “E [“tamanako,” NW] kotou i te akakoromaki maata o to tatou Atu ra, ko te ora ïa.” (2 Petero 3:15) Na te kite tikai i to te Atua akakoroanga e te akamanakoanga ma te tu akaaka i to tatou uaorai puapinga kore e akakeu ia tatou kia akakoromaki e tae roa e kua akara meitaki a Iehova kia akakoromaki i teia akatereanga taito.

Kia akamaroiroi i te au Kerititiano kia akakoromaki, kua oronga te tangata tata Pipiria ko Iakobo i tetai akatutuanga. Kua tata aia: “I na oki te tanu-kai ra, te tatari marie ua ra aia i te kai meitaki o te enua nei, te akakoromaki marie ra oki i te reira, e kia rauka mai te ua momua e te ua openga ra. E akakoromaki katoa oki kotou; e akatinamou tikai i to kotou ngakau: kua vaitata rava taua aerenga mai o te Atu ra.”​—Iakobo 5:7, 8.

Kare te Atua ko Iehova e inangaro ana ia tatou kia roiroi me kore kia tuku i te au ia tatou e tapapa atura. E angaanga tana na tatou kia rave e te mareka ra me te taangaanga ra tatou i te tuatau e te tapapa ra kia piri atu ma te angaanga pakari i roto i te reira angaanga. Te inangaro ra aia ia tatou e ko tetai o te aronga ta te apotetoro ko Paulo i akataka mai i roto i tana reta ki to Epera: “Inara te anoano nei matou ia kotou tataki tai kia akaari i te tu aiteite o te manako angaanga kia rauka te akapapu anga ki katoa o te manakonakoanga e tae ua atu ki te openga, kia kore kotou e akatau, inara kia riro mai ei aronga aru i te aronga tei akarongo e te tapapa marie kua rauka ia ratou te au taputou.”​—Ebera 6:11, 12, NW.

No reira auraka tatou e roiroi. Mari ra, kia riro to tatou uaorai pirianga ki te Atua ko Iehova, to tatou akarongo i roto i te atinga oko o Iesu, e to tatou manakonakoanga mataora i roto i te akatereanga ou o te au mea nei e ko te au mana ririnui i roto i to tatou oraanga. Mei te au tavini “meitaki e te pikikaa kore” o ta Iesu parapore, kia akapapu tatou ia tatou uaorai kia tau no te akameitakianga e te tutaki na te angaanga pakari anga i te akapaapaa anga i to tatou Atua, mei ta te tata taramo i akakite mai: “Ka manako rai au ia koe, kare e tukumoe, ka akameitaki rai au ia koe na rungao na rungao.”​—Salamo 71:14.

[Tutu i te kapi 21]

Ma te mareka kore, kua tapapa a Iona i te akara eaa te ka tupu kia Nineve

[Au Tutu i te kapi 22, 23]

Kia akaari tatou i te akamorianga i te akono i te Atua i te tapapa atu anga i to Iehova ra