Ripoti a te Aronga Tutu Patireia

Tetai Reta Mei ko Mai ia Alejandra

KUA ROA te tuatau e kua riro te tataanga reta ko tetai ravenga puapinga tikai no te oronga anga i te kite. Noatu kua akaraanga papu kore te tupuanga i tetai au taime, ko te aronga tei taangaanga tamou ua atu i teia mataara kua akameitaki maataia. Kua maara ia ratou te akoanga pakari a te Pipiria: “Ei te popongi ka ruru ei i taau ua, e ei te aiai auraka e tāpu ua i to rima: kare oki koe i kite i te ka tupu, me ko teia, me ko tera, peneiake ko te meitaki kapipiti katoa ra.”​—Koheleta 11:6.

Ko Alejandra, e Kite mapu e kua tavini ana i te opati manga i Meiko o te Au Kite o Iehova no tetai ngauru mataiti e ara, te aere ra ki te chemotherapy no te kaneta. Kua kino mai tona maki, e kua paruparu roa aia i te rave ua atu i tei matauia e ia i te au ra ravarai. Inara, kare i inangaro ana i te kopae i tana angaanga orometua, kua manako a Alejandra i te tata i te au reta. Kua tata aia no runga i te akanoonooanga no tetai apii Pipiria ki te kainga kare e tutaki e kua tuku atu i te numero terepaoni a tona mama. I reira kua oronga aia i te au reta ki tona mama kia akaruke aia ki te au kainga e kare e tangata i te kainga i tana angaanga orometua mei tera are ki tera are.

I taua taime rai, ko Diojany, tetai tamaine mapu mei Kuatemara mai, kua aere i te angaanga ei tamaine tama are i Cancún, Meiko. Iaia i reira, kua aravei aia i te Au Kite o Iehova e kua rekareka i te au uriurianga Pipiria kia ratou. I muri akera, kua inangaro tona nga pu i te neke atu ki Mexico City e kua inangaro oki iaia kia aru katoa. Kua ekoko a Diojany i te neke anga no te mea ko te aiteanga ka kore te pirianga ma te Au Kite.

“Eiaa e manamanata,” kua akapapu atu tona nga pu iaia, “tei te au ngai katoatoa te Au Kite. Ka kimi tatou ia ratou me tae roa atu tatou ki reira.” Ma taua manakonakoanga mataora, kua akatika a Diojany e kia aru ia raua. I te taeanga ki Mexico City, kua kimi to Diojany nga pu i te Au Kite. No etai tumu ra, kare ratou i kiteia ana e raua, noatu e te vai ra e tere atu i te 41,000 Au Kite e e 730 putuputuanga i roto i taua oire ra.

Kare i roa ana, kua mareka kore mai a Diojany no te mea kare i rauka ana iaia i te kite i te Au Kite kia akamata akaou i tana au uriurianga Pipiria. I tetai ra, kua aere mai tona pu vaine kiaia, i te na ko anga: “Kua kite koe eaa! Kua rongo mai toou Atua i taau au pure.” I te oake anga tetai reta kiaia, kua karanga aia: “Kua akaruke mai te Au Kite i teia reta naau.” E reta oki no ko mai ia Alejandra.

Kua ringi atu a Diojany ki te mama e te teina o Alejandra, ko Blanca, e kua ariki atu i tetai apii Pipiria. I etai au epetoma i muri ake, kua aravei aia ia Alejandra e kua rauka i tetai atoroanga pumaana ki te ngakau. Kua akamaroiroi a Alejandra iaia kia tamou ua atu kia akono iaia uaorai ki tana apii Pipiria kia rauka iaia kia tere ki mua i te pae vaerua.

I nga mea marama i muri mai, i roto ia Tiurai 2003, kua mate a Alejandra, i te akaruke mai anga i tetai akaraanga meitaki no te akarongo e te mataku kore ki tona au oa akarongo. I te matenga, e manganui tei tukia oonuia i te aravei anga ratou ia Diojany e te akarongo anga iaia i te tuatuaanga: “Kua riro a Alejandra e tona ngutuare tangata kiaku ei akaraanga meitaki tikai. Ka tauta au i te tavini ia Iehova e kare roa atu ana kia papetitoia. Mei teaa tikai toku inangaro i te kite akaou ia Alejandra i roto i te Parataito te aere maira!”

Ae, penei e apinga meangiti ua te reta. Inara mei teaa tikai te au akatupuanga marekaia e te mutukore ta te reira ka akatupu!