Au Uianga a te Aronga Tatau

Ia Iesu i te ikuikuanga i tana au pipi ‘kia oronga atu kare e moni tutaki na runga ake, kare e manakoanga kia akaokiia mai,’ te karanga ra ainei aia e auraka oki ratou e pati atu kia akaoki katoaia mai te moni tikai tei orongaia?

Ka marama meitakiia te au tuatua a Iesu tei rekotiia ia Luka 6:35 ki te papaanga o te Ture a Mose. I reira kua akaue te Atua i to Iseraela kia oronga i te au rounu kare e moni tutaki na runga ake ki te au taeake Iseraela kua akangereia i te pae moni e te inangaro ra i tetai tauturu. (Exodo 22:25; Levitiku 25:35-37; Mataio 5:42) Kare oki teia au rounu no tetai akakoroanga okooko, tetai raveanga pitiniti. Mari ra, kua akamama mai taua au rounu kare e moni tutaki na runga ake i te tu putaua me kore te tu manuia kore. I te mea oki, ka riro ei mea aroa kore tikai kia puapingaia mei te au topa anga o tetai tangata tupu i te tua o te pae moni. Noatu rai, kua akatikaia rai te tangata tei oronga i te rounu i te pati atu i te moni tikai tei orongaia, tetai koreromotu (tutaki tapao i runga i te rounu) tei raveia ana i tetai taime.​—Deuteronomi 15:7, 8.

E te akono ra i te Ture, kua oronga atu a Iesu i tetai akatakaanga maata atu, i te na ko anga e ko te tangata te oronga ra i te tauturu auraka oki e manako atu ‘kia akaokiia mai.’ Mei te au Iseraela rai, tetai taime ka rokoia te au Kerititiano i te au topa anga i te tua o te pae moni me kore tetai atu au turanga ke te ka akaruke ia ratou ki roto i te tu putaua, e te ngere katoa. Me ka kimi tetai taeake Kerititiano tei roto i tetai turanga kino i te moni tauturu, kare ainei i te mea takinga meitaki kia oronga atu i te tauturu? E tika, ka akakeu te inangaro tikai i tetai taeake Kerititiano kia inangaro i te tauturu i tetai taeake e kare nona te tarevake tei topa kino atu i roto i tetai manamanata i te pae o te moni. (Maseli 3:27) Penei ka rauka i reira i te oronga i tetai apinga aroa ki taua taeake te inangaro ra, noatu e e meangiti ua oki te moni i ta tetai ka oronga atu ei rounu.​—Salamo 37:21.

I te anere mataiti mua T.N., kua akaueia te apotetoro ko Paulo raua ko Banaba kia apai i te au moni tauturu mei te au Kerititiano i Asia Minora ki to raua au taeake i Iudea no te onge oki. (Angaanga 11:28-30) Pera katoa i teia tuatau nei, me rokoia ana te tumatetenga, e putuputu ana te au Kerititiano e tuku ana i te au apinga aroa ki to ratou au taeake te inangaro ra. I te raveanga i te reira, te oronga katoa ra ratou i tetai akakitekiteanga meitaki tikai ki tetai ke. (Mataio 5:16) Inara, ka tau te tu e te turanga o te tangata kimi tauturu ra kia akamanakoia. Eaa ra oki aia i inangaro ei? Ka tau ta Paulo au tuatua kia akamanakoia: “Ko te tangata kare e rave i te angaanga, auraka katoa aia e kaikai.”​—2 Tesalonia 3:10.

Me kare te taeake tei pati mai i te rounu i roto i tetai umuumuanga kino inara te inangaro ua ra i tetai tauturu no tetai tuatau poto ua kia tu akaou mai aia ki runga i tona nga vaevae i muri ake i tetai topaanga i te tua i te pae moni, e mea akaraanga tau i reira kia oronga atu kiaia i tetai rounu kare e moni tutaki na runga ake. I raro i taua au turanga ra, te oronga anga i tetai rounu ma te manakoanga kia tutaki katoaia mai kare oki i aere tuke ki te au tuatua a Iesu tei kiteaia ia Luka 6:35. Ka tau kia akanooia tetai tataanga no tetai koreromotu, e ka tau te tangata tei rauka iaia i te rounu kia akono i te tautaanga katoatoa kia tutaki i te reira kia tau ki te au turanga tei akatikaia. E tikai, ka akakeu te aroa Kerititiano i te tangata kaiou kia tutaki i te rounu mei tei akakeu katoaia rai te tangata oronga kia oronga i te reira.

Te tangata te akamanako ra kia oronga i te rounu (me kore te oronga ra i te apinga aroa) kia akara katoa aia i te turanga o tona uaorai pamiri. Ei akatauanga, ka takino ainei aia i tona tautaanga kia akono i te au inangaro a tona au mema pamiri, tetai tuanga maata ia o te Tuatua Tapu? (2 Korinetia 8:12; 1 Timoteo 5:8) Noatu rai, te kimi ra te au Kerititiano no te au tuatau kia akaari i te aroa no tetai e tetai, i te akaarianga i te reira aroa na roto i te au mataara tau tei rotai ma te au kaveinga Pipiria.​—Iakobo 1:27; 1 Ioane 3:18; 4:7-11.