Koai Oki “Te Atua Mou, e te Ora Mutu Kore”?

KO IEHOVAH, te Atua mou, te Metua o to tatou Atu ko Iesu Karaiti. Koia oki Tei Anga mai, ko te oronga ra i te oraanga mutu kore ki te aronga te inangaro ra iaia. Ka akapera te manganui te tatau ra e te irinaki ra i te Pipiria i te pau i te uianga te taikuia ra i roto i te tumu tuatua i runga ra. E tikai, kua karanga uaorai a Iesu e: “Teia te aite anga o te ora mutu kore, to ratou tamouanga i te kite ia koe, i te Atua mou anake ra, e taau i tono maira, ko Iesu Karaiti.”​—Ioane 17:3; NW.

Inara, e manganui te aronga te aere pure ra te oronga ra i tetai aiteanga takake mai ki taua tuatua ra. No roto mai te au tuatua o te tumu tuatua ia 1 Ioane 5:20, e te karanga ra, i tetai tuanga: “Tei roto tatou iaia i te tuatua-mou ra, tei roto i tana Tamaiti ra ia Iesu Mesia. Koia te Atua mou, e te ora mutu kore.”

Te karanga ra te aronga irinaki i roto i te apiianga Toru Tai e te tou ra te akaarianga kauono nomena ko “teia” (houʹtos) ki tei taikuia i mua ua akenei, kia Iesu Karaiti. Kua karanga oki ratou e ko Iesu “te Atua mou, e te ora mutu kore.” Inara, kua patoi teia urianga, ki te katoaanga o te au Tuatua Tapu. E kare te manganui o te aronga mana kite e ariki katoa ana ki te manako o te aronga apii Toru Tai. Kua tata te tangata kite i Cambridge University ko B. F. Westcott e: “Te taikuanga natura roa ake [o te kauono nomena houʹtos] e ki tei tuatuaia ra kare ra ki tera i te pae ua mai mari ra ko tei manako maataia ra i roto i te manakoanga o te apotetoro.” No reira, te akamanako ra te apotetoro ko Ioane i te Metua o Iesu. Kua tata te tangata apiipii akonoanga Tiamani ko Erich Haupt e: “Ka tau kia akapapuia me te tou ra te [houʹtos] o te manako tei aru mai ki tei tuatua vaveia ra i mua ua akenei e i te pae ua mai . . . me kore ki tei tuatua mamao atu ia o te Atua. . . E akakiteanga ia ki te Atua mou okotai tei rotai ake ki te akamatakite anga openga no runga i te au itoro e i to te akaarianga o tetai apiianga tu-Atua o Karaiti.”

Pera i te A Grammatical Analysis of the Greek New Testament, tei neneiia e te Ngai Akaaere Pipiria no te Epitikopo o Roma, te karanga ra: “[Houʹtos]: e ko te take ia ki te [irava] 18-20 e papu roa atu te tai[kuanga] e ki te Atua te tika tikai, te mou, [ei] pa[toianga ki te] apii anga peikani (irava 21).”

Te houʹtos, tei matauia i te uriia ko “teia” me kore “teia oki,” e putuputu ana te taime e kare e te tou ra ki tei tuatua vaveia i mua ua akenei o tetai takiota tuatua. Te akatutu maira tetai au tuatua tapu ke maira i teia manako. Ia 2 Ioane 7, NW, kua tata taua apotetoro e e tangata tata katoa rai o te reta mua: ‘Manganui oki te pikikaa i riro atura na te ao nei, ko tei kore e tuatua e, kua aere a tangata mai a Iesu Karaiti. Ko teia [houʹtosʹ] pikikaa ra oki te reira, e te akakore Karaiti.’ Kare te kauono nomena i konei e te tou ra ki tei tuatuaia i te pae ua mai​—kia Iesu. I te akaraanga, te tou ra “teia” ki te aronga tei patoi ia Iesu. E akapupuanga ratou o te ‘pikikaa e te akakakore Karaiti.’

I roto i tana Evangeria, kua tata te apotetoro ko Ioane: ‘E tetai o aua puke tangata toko rua i akarongo i te tuatua a Ioane ra, ko tei aru atu ia Iesu ra, ko Anederea ïa, te taeake o Simona Petero ra. E aravei atura teia oki [houʹtos] i mua i tona uaorai tuakana ia Simona.’ (Ioane 1:40, 41) E mea papu e ko “teia oki” kare e te tou ra, ki te tangata openga tei taikuia, mari ra kia Anederea. Ia 1 Ioane 2:22, kua taangaanga te apotetoro i taua kauono nomena rai na roto i tetai tu aiteite.

Kua taangaanga aiteite rai a Luka i taua kauono nomena, tei kiteaia ia Angaanga 4:10, 11: “No te ingoa o Iesu Mesia no Nazareta, ta kotou i [“tamamae,” NW] io nei, ko tei akatuia mai e te Atua mei te mate maira, nona i tu atu ei teianei tangata i mua i to kotou aroaro ma te maki kore  nei. Ko “te toka teia [houʹtosʹ] i akarukeia e kotou, e te aronga patu are, e kua akariroia io nei ïa ei toka tiavā.’” Kua taka meitaki e kare te kauono nomena “teia” e te tou ra ki te tangata tei akaoraia mai, noatu e koia oki te tangata tei taikuia i mua ua ake i te houʹtos. E tikai, ko “teia” i roto i te irava 11 te tou ra kia Iesu Karaiti o Nazareta, koia oki te “toka tiavā” i patuia ai te putuputuanga Kerititiano.​—Ephesia 2:20; 1 Petero 2:4-8.

Te akatutu katoa maira a Angaanga 7:18, 19 i te manako: ‘E tupu akera oki tetai ariki ke, kare i kite ia Iosepha. Kimi iora teia oki [houʹtos] i te ravenga pakari i to tatou, e takinga-kino iora i to tatou ai metua.’ Ko “teia oki” tei takinga kino i te ngati Iuda, kare oki e ko Iosepha, mari ra ko Pharao, te ariki o Aiphiti.

Te akapapu maira taua au irava i te kiteanga tei kiteaia e te tangata apiipii Ereni ko Daniel Wallace, te karanga ra e no runga i te au akaariarianga Ereni, “ko te akaraanga e ko tei vaitata ake i tei tuatuaia i te aereanga tuatua penei kare ko tei vaitata ake i tei tuatuaia i roto i te manako o te tangata tata.”

“Te Atua Mou Ra”

Mei ta te apotetoro ko Ioane i tata, ko Iehova “te Atua Mou ra,” te Metua o Iesu Karaiti. Koia anake te Atua mou, ko Tei Anga mai. Kua akatika te apotetoro ko Paulo e: “Kareka ia tatou nei, okotai rava ïa Atua, ko te Metua, no reira mai te au mea katoa nei.” (1 Korinetia 8:6; Isaia 42:8) Ko tetai tumu akaou mai e ko Iehova “te Atua mou ra” tei taikuia ia 1 Ioane 5:20 e koia oki e koia te Tumu o te tuatua mou. Kua kapiki te tata taramo ia Iehova ko “te Atua tuatua-mou” no te mea e tiratiratu oki Aia i roto pouroa i Tana e rave ra e kare e pikikaa ana. (Salamo 31:5; Exodo 34:6; Tito 1:2) Te taiku anga ki tona Metua i te rangi, kua karanga oki te Tamaiti: “Ko te tuatua aau na te tuatua-mou.” E no runga i tana uaorai apii anga, kua karanga a Iesu e: “Kare taku uaorai i taku e apii nei, nana ra, na tei tono mai iaku nei.”​—Ioane 7:16; 17:17.

E “ora mutu kore” katoa oki a Iehova. Koia te Tumu no te ora, Tei oronga mai i te reira ei apinga oronga uaia mai na roto ia Karaiti. (Salamo 36:9; Roma 6:23) Ma te puapinga, kua karanga te apotetoro ko Paulo e ko te Atua “tei tutaki mai i te aronga i kimi tikai iaia.” (Ebera 11:6) Kua akameitaki te Atua i tana Tamaiti na te akatuanga mai iaia mei te mate, e ka oronga te Metua i te tutaki no te oraanga mutu kore ki te aronga te tavini ra Iaia ma to ratou ngakau katoa.​—Angaanga 26:23; 2 Korinetia 1:9.

No reira, eaa te taopenga anga ta tatou ka akono mai? E ko Iehova, e kare atu tetai ke, “te Atua mou, e te ora mutu kore.” Koia anake tei tau kia oronga ua ia te akamorianga mei te aronga tana i anga mai.​—Apokalupo 4:11.