Au Uianga a te Aronga Tatau

Akapeea te putuputuanga Kerititiano i te manakoanga no te kai tuauau?

Kua akaapa te Tuatua a te Atua i te kona kava e te kai tuauau katoa e e tu ia e kare e tau ana ki te tavinianga i te Atua. No reira, te manako ra te putuputuanga Kerititiano i tetai kua papuia e e tangata kai tuauau na roto i taua tu rai i to te reira akamanakoanga i tetai tangata matauia no te kona kava. Kare tetai tangata kona kava me kore tetai tangata kai tuauau e riro mai ei tuanga no te putuputuanga Kerititiano.

Te karanga ra a Maseli 23:20, 21 e: “Auraka koe e kapiti katoa ki te aronga i kona i te wina ra: ki roto i te aronga e kaituauau i te puaka. Ko te konā kava oki, e te kaki nui ra, ka putaua ïa; e na te moe ua e akakakau mai ki te kakau ngaengae.” Ia Deuteronomi 21:20, ka tatau tatou no runga i tetai tangata ‘māro e te upokoanga,’ tei tau ra kia tamateia atu i raro ake i te Ture a Mose. Kia tau ki teia irava, ko nga tu e rua o taua tangata upokoanga e te tataraara kore koia oki e e tangata “kaki nui e te kona kava” oki aia. Kua taka meitaki, i Iseraela taito ra, kua manakoia te kai tuauau ei peu ariki koreia no te aronga te inangaro ra i te tavini i te Atua.

Eaa, ra, te kapitiia maira i te tangata kai tuauau, e eaa ta te Tuatua Tapu Ereni Kerititiano e tuatua ra no runga i teia tumu manako? Kua akatakaia tetai tangata kai tuauau ra e “ko tetai kua matau i te tu kaikaianga e te inuinuanga tuauau maata tikai.” No reira, no tetai tumu oki, e tu tuauau te tu kai noinoi, e te akakite maira te Tuatua a te Atua e ko te ‘aronga noinoi apinga’ ra ko te  tu tangata ia kare e noo i te patireia o te Atua. (1 Korinetia 6:9, 10; Philipi 3:18, 19; 1 Petero 4:3) Pera katoa, i te akamatakiteanga a Paulo i te au Kerititiano kia patoi atu i te raveanga i “te au angaanga o te kopapa,” kua taiku oki aia i te “konā kava, te kariei, e mei te reira te tu.” (Galatia 5:19-21) Kua putuputu te kaikai maata i te kapiti mai i te kona kava e te kariei. Pera katoa, kua kapiti katoa ia mai tikai te tu kai tuauau ki roto i ta Paulo tuatuaanga “e mei te reira te tu.” E mei tetai o te “au angaanga o te kopapa,” ko tetai Kerititiano tei kite ateaia no tona tu kai tuauau e tei patoi marokiakia i te taui i tona tu noinoi ka tau kia akaateaia mai mei te putuputuanga.​—1 Korinetia 5:11, 13. *

Noatu e kua akaaite te tuatua a te Atua i tetai tangata kona kava ki tetai tangata kai tuauau ra, e mama ake te mea mua i te akatakaia i to te openga ra. Ka kitea uaia atu te au akairo no te kona kava. Inara, i te kiteanga i te taime tikai e kua akapapuia tetai tangata e e tangata kai tuauau e aka angaanga te kite no te mea kare e rauka i te akapapuia na te tu akaraanga ua o vao. No reira, ko te akonoanga i te au turanga i roto i teia tu no te akamanakoanga ka umuumuia te akono meitaki maata e te kite pakari i runga i te tua o te aronga pakari i roto i te putuputuanga.

Ei akaraanga, penei te tu matu e akairoia no te kai tuauau, inara kare aina e ko te reira ua te tu. Penei no tetai i matu roa ai e tupuanga ia no tetai tu maki. Penei e tu maki rai no te pamiri ko tetai au tumuia i matu ei. Kia manako katoa tatou e e turanga i te pae kopapa te tu matu, ko te tu kai tuauau ra e tu ia no te pae manako. Kua akatakaia mai te tu matu ei “tu tei kiteaia no te maata roa i te matu o te kopapa,” kareka ra te tu kai tuauau ra e “raveanga noinoi me kare e kino maata tikai.” No reira, kare te tu kai tuauau e akaraia ana na runga i te maatamaata o tetai tangata mari ra na runga i tona tu ki te kai. Penei te tano ua ra te maatamaata o tetai tangata me kore penei e ikoke katoa oki inara e tangata kai tuauau aia. Pera katoa, tei manakoia e ko te paunu me kore te kopapa tau meitaki e tuke oki te akamanakoanga mei tetai ngai ki tetai ngai.

Eaa ra te au akairo no te tu kai tuauau? Kua matau te tangata kai tuauau i te akaari i tetai tu tapupu kore, penei ka kai tuauau aia ma te rapurapu i te kai e tae ua atu ki te tuatau e kua manako kinokino tikai mai me kore kua makiia. Te akaari maira tona ngere no te akakoromaki e kare ona manako tikai no runga i te apa tana ka apai mai ki runga ia Iehova e te ingoa meitaki o Tona iti tangata. (1 Korinetia 10:31) I tetai tua ra, ko tetai tangata te kaikai maata ra i tetai au atianga kare e rauka i te akamanako vaveia e e ‘tangata noinoi apinga.’ (Ephesia 5:5) Noatu rai, i roto i te aereanga o Galatia 6:1, NW, penei ka umuumu taua Kerititiano ra i te tauturu. Kua karanga a Paulo e: “E te au taeake, noatu e ka rave tetai tangata i te takainga tarevake i mua ake ka kite ei aia, ko kotou ko te aronga e tu tau to kotou i te pae vaerua e tauta i te akatikatika i taua tangata ra i te vaerua maru.”

No teaa ra te akoanga Pipiria kia kopae i te kaikai maata ei mea puapinga maata tikai i teia tuatau nei? No te mea, no runga i to tatou tuatau tikai, kua akamatakite mai a Iesu e: “Kia matakite ia kotou uaorai kia kore to kotou ngakau e teiaaia i te kaikaianga nunui e te inu maata rava e te au pekapeka o te oraanga, e tae viviki mai ei taua ra ra i rungao ia kotou mei te ereere ra.” (Luka 21:34, 35, NW) Kopae anga i te kaikai maata ua atu i te kai ko tetai mataara maata ia i te kopae anga i te tu oraanga kino i te pae vaerua.

Te tu tau ua e tu akono Kerititiano tika meitaki ia. (1 Timoteo 3:2, 11) No reira, papu e ka tauturu a Iehova i te aronga katoatoa te tauta pakari ra i te akono i te akoanga a te Pipiria no runga i te au peu matauia no te tu tau i te kaikai anga e te inuinu anga.​—Ebera 4:16.

[Tataanga Rikiriki i Raro]