Kua Kite Ainei Koe i te Mataora tei Rauka mei te Oronga Anga?

KUA pou iaia vaitata rai e 50 mataiti i roto i te angaanga Kerititiano maroiroi. Noatu e kua akaparuparu te au tupuanga o te pakarianga iaia, kua tauta rai aia kia atoro atu i te Are Uipaanga Patireia koi patu ua ia akenei. Ma te urunga anga iaia uaorai ki runga i te rima o tetai taeake Kerititiano tauturu, kua tomo atu aia ki roto i te are uipaanga e kua aere marie inara ma te tika anga ki tona akakoroanga​—te pia akaputuanga. I reira kua tauru atu aia i tetai tuanga moni tau ua tana oki i akapae no teia akakoroanga. Noatu e kare i rauka ana i te oronga i tetai rima tauturu ki te patu anga o te are uipaanga, kua inangaro rai oki aia i te tauturu.

Penei te akamaara maira teia vaine Kerititiano ia tatou i tetai vaine tiratiratu akaou mai​—te “vaine apinga kore” ko ta Iesu i kite atu i te tukuanga e rua nga mea moni meangiti ua ki roto i te pia moni o te iero. Kare i akakiteia mai kia tatou tona au turanga, inara ma te kore e tane akaipoipo i taua taime ra ka riro i te tuku atu i tetai vaine ki roto i tetai turanga kino tikai i te pae o te moni. Papu e kua tangi te ngakau o Iesu iaia, no te mea kua kite meitaki aia i tona manamanata. I te akaataanga iaia ei akaraanga no tana au pipi, kua karanga oki aia e kua akatutu mai tana apinga aroa meangiti ua i te ‘katoatoa roa o tona apinga rikiriki rava kore.’​—Mareko 12:41-44.

Eaa ra tetai vaine kare e apinga mei teia vaine apinga kore rai i akono ei i taua atinga ra? Te taka meitaki ra, no te mea oki e tu tiratiratu oonu tikai tona ki te Atua ko Iehova, tei akamouia tana akamorianga ki ko i te iero i Ierusalema. Noatu kua kotingaia i roto i tana ka rauka i te rave, kua inangaro aia i te akamaata i te angaanga tapu. E kua kite mai aia i te rekareka tikai i te oronga anga i te ka rauka ua iaia.

Oronga Anga i te Turu Anga i ta Iehova Angaanga

Oronga anga i te au tauturu oronga ua i te pae materia e te pae moni e tuanga puapinga ua ana ia no te akamorianga ma, e e tumuanga ua ana rai no te rekareka maata. (1 Paraleipomeno 29:9) Ia Iseraela i taito ra kare te au tauturu oronga ua i taangaangaia kia akamanea ua i te iero mari ra kia akaaere i te au apinga katoatoa o ta Iehova akamorianga i te au ra ravarai. Kua akataka mai te Ture e kia oronga te au tamariki a Iseraela e tai i roto i te ngauru o ta ratou au apinga ei turuturu i te au ngati Levi, e rave ra i te au angaanga i te iero ra. Inara ka oronga katoa rai oki te au ngati Levi kia Iehova e tai i roto i te ngauru o ta ratou au apinga tei rauka mai ia ratou.​—Numero 18:21-29.

Noatu e kua akarangatiraia mai te au Kerititiano mei te au umuumuanga o te Ture  koremotu, ko te kaveinga e kia oronga te au tavini o Iehova i te pae materia i te turuturuanga i te akamorianga mou kua vai rai kare i tuke. (Galatia 5:1) Pera katoa, kua manako te au Kerititiano i te anere mataiti mua i te reira ei rekareka anga i te tauturu kia akamaru i te au anoano o to ratou au taeake. (Angaanga 2:45, 46) Kua akamaara te apotetoro ko Paulo i te au Kerititiano e mei te Atua rai i oake oronga ua kia ratou i te au apinga meitaki, kia akaari rai ratou i te tu oronga ua ki tetai ke. Kua tata aia: “E ako atu i te aronga apinga maata i teianei ao, eiaa ei ngakau teitei, eiaa oki e irinaki i te apinga maata mou kore, ei te Atua ora ra, ko tei oronga ua mai i te au mea katoa nei ei rave anga na tatou; Kia takinga-meitaki ratou, e kia apingaia ra i te angaanga meitaki ra, kia maata atu ïa ia ratou kia oronga aere, kia tau i te uipa; I te akaputu marie anga i te meitaki tumu no ratou uaorai a muri atu, kia rave ratou i te ora mutu kore.” (1 Timoteo 6:17-19; 2 Korinetia 9:11) E tikai, mei tana uaorai i kite mai, kua rauka ia Paulo i te akapapu i ta Iesu au tuatua: “E maata atu te mataora o te orongaanga i to te rave mai.”​—Angaanga 20:35, NW.

Oronga Anga Kerititiano i Teia Tuatau Nei

I teia tuatau, te tamou nei rai te au tavini o Iehova i te taangaanga i ta ratou au apinga materia i te tauturu i tetai e tetai e kia turu i te angaanga a te Atua. Noatu te aronga e meangiti ua ta ratou apinga te oronga ra ra i te ka rauka ia ratou. Kua manako mai “te tavini akono meitaki e te pakari” e apainga ta ratou kia Iehova kia taangaanga meitaki tikai i teia au moni akaputuia tei orongaia. (Mataio 24:45) Kua taangaangaia te au moni akaputuia kia akaaere i te au opati manga, i te uri e i te maani i te au Pipiria e te au puka Pipiria, i te akanoo no te au akaputuputuanga Kerititiano mamaata, i te tereni e kia tono atu i te au akaaere tutaka e te au mitinari, i te oronga i te au tauturu no te au tumatetenga, e pera katoa no tetai au akakoroanga umuumuia e manganui. Kia akamou tatou ki runga i tetai o taua akakoroanga ra​—te tauturu anga kia rauka te au ngai no te akamorianga.

E maata te au taime i roto i te epetoma e aravei ana te Au Kite o Iehova i roto i to ratou au Are Uipaanga Patireia kia puapingaia mei te apii anga pae vaerua e te taokotaianga meitaki tikai. Inara, i roto i te au enua e manganui, kare te au turanga i te pae moni e akatika i te au Kite o reira i te tutaki i te patuanga o te au Are Uipaanga Patireia ma te kore e tauturu i te akamataanga. No reira, i te 1999, kua akamata te Au Kite o Iehova i tetai porokaramu kia taangaangaia te au moni tutaki mei te au enua puapinga ua ake kia tauturu i te akatu i te au Are Uipaanga Patireia i roto i te au enua putaua. Kapiti katoa, tauatini ua atu te au aronga tavini tei oronga i to ratou taime e  to ratou kite karape, e angaanga putuputu ana i roto i te au ngai mamao o teia au enua. I te tuatau o te patuanga, kua tamou mai te au Kite o reira i te au tu karape akonoanga e te patuanga, e na te Tutakianga Are Uipaanga Patireia i rauka ai kia oko mai i te au apinga e te au materia tei inangaroia. Kua ariki oonu te au Kite e taangaanga ra i teia au are uipaanga i teianei e kua oronga oki to ratou au taeake irinaki i te taime e te moni. Kua oronga katoa te Au Kite o te reira ngai mei tetai marama ki tetai marama kia akono i te au Are Uipaanga Patireia ou e i te tauturu kia akamama mai te au tutakianga no te patuanga, te tauturu anga i reira i te patuanga kia maata atu te au Are Uipaanga Patireia.

E akatuia ana te au Are Uipaanga Patireia na te taangaanga anga i te au ravenga e te au materia o te reira ngai. Noatu e kare i ope te manea o teia au are uipaanga, e manea ra te reira i te akaraanga, e tau e te reka rai. I te akamataanga i te porokaramu patuanga i te 1999, kua kapitiia mai e 40 enua e meangiti ua ta ratou moni. Mei reira mai, kua akamataia atu te porokaramu patuanga kia kapitiia mai e 116 o taua au enua ra, tei o mai tere atu i te apa o te au putuputuanga o te Au Kite o Iehova i te ao nei. I roto i te rima mataiti i topa akenei, kua akatuia e tere atu i te 9,000 Are Uipaanga Patireia i raro ake i teia akanoonooanga, tere atu i te 5 are uipaanga ou i te avereti i te ra takitai! Noatu rai i roto i teia au enua e 116, te vai ra rai e 14,500 Are Uipaanga Patireia te inangaroia ra. Ma ta Iehova akameitakianga e na roto i te tu puareinga ua e te tu oronga ua o te Au Kite takapini i te ao nei, te manakonakoia nei e ka oki te moni tutaki i te akono i teia anoano.​—Salamo 127:1.

Akamaata te Au Are Uipaanga i te Tupu Anga

Mei teaa tikai te akakeuanga ta teia tautaanga pakari tikai i akono ki runga i te Au Kite o reira e ki runga i te au angaanga tutuanga Patireia? I te au ngai e manganui, e aka tupuanga tikai tetai i roto i tei tae atu ki te uipaanga i muri ua ake i te patuia anga o tetai Are Uipaanga Patireia ou. Kua kiteaia tetai tu o taua akaraanga ra i roto i teia ripoti mei Burundi mai: “Me oti ua mai ana te Are Uipaanga Patireia i te akatuanga ia, kua akakiia te reira. Ei akaraanga, kua akatuia tetai Are Uipaanga Patireia no tetai putuputuanga tei avereti mei tetai 100 tei tae ana ki ta ratou au uipaanga. Ka rauka to ratou Are Uipaanga Patireia ou i te akanoo meitaki e 150. Tae ki te tuatau e kua oti mai te reira, e 250 te aere ra ki te au uipaanga.”

No teaa ra taua tu tupuanga i tupu mai ei? No tetai apinga oki, te au pupu papuritia o te Patireia e kare o ratou ngai tikai no te akaputuputuanga inara e akaputuputu ana ki raro i tetai tumu rakau me kore i roto i te ngai one i tetai taime e manakoia ana ma te tarotokaka. I roto i tetai  enua, kua kapitiia ana te taanga eteniki ki taua au pupu akonoanga meangiti ra, e kua umuumuia e te ture kia raveia te au uipaanga akonoanga pouroa ki roto i tetai are akamorianga.

Kua tauturu katoa te rauka anga i to ratou uaorai au are uipaanga o te Au Kite o Iehova kia akaari ki te oire tangata e kare oki ratou i te au pipi na tetai tangata orometua. Kua tata oki te opati manga o Timipapue e: “I te tuatau i topa, i aravei ua ana te au taeake i teia ngai ki roto i te au kainga, e kua akataka te iti tangata o reira i te putuputuanga ki te pu o te kainga ta ratou e aravei putuputu ana i roto. E taiku ana ratou ki te au taeake e te piri ra ki te akonoanga a Mea e mea. Pouroa ra oki teia te tauiia nei i te kiteanga te au tangata i te au akairo taka meitaki i te akataka i te au are uipaanga tatakitai ei au ‘Are Uipaanga Patireia.’”

Aronga Oronga Rekareka

“Ko te tangata oronga ma te rekareka ta te Atua e inangaro,” i tata ei te apotetoro ko Paulo. (2 Korinetia 9:7) E tika, e aka tauturu tikai, te au moni tauturu maata. Inara ko te tuanga maata rava o te au moni tei orongaia ki te angaanga a te Au Kite o Iehova kua aere mai mei te au pia akaputuanga o te Are Uipaanga Patireia. Te maata  me kore te meangiti ua, e puapinga pouroa te au tauturu oronga ua e kare te reira e akavaavaaia. E akamaara e kua akanoo a Iesu iaia uaorai i te ngai e ka kite ua atu aia i te vaine takaua apinga kore i te tukuanga i tana nga mea moni meangiti ua e rua. Kua kite katoa rai te au angera e Iehova iaia. Kare oki tatou i kite i te ingoa o te vaine takaua, inara kua kite oki a Iehova e kua rekotiia tana angaanga noinoi kore i roto i Pipiria no te au tuatau ravarai.

Tei kapiti katoaia mai ki te patuanga o te Are Uipaanga Patireia, te turuturu pouroa ra ta tatou au tauturu oronga ua i tetai au tuanga ke atu no te angaanga puapinga o te Patireia. Na te taokotaianga i roto i teia tu e oronga mai kia tatou i te tumu anga kia rekareka e “kua maringi ua ra i te rai i te akameitaki i te Atua.” (2 Korinetia 9:12) Kua ripoti to tatou au taeake mei Penini mai e: “I te au ra tatakitai e manganui te au pure no te ariki rekareka te aere ana ki runga ia Iehova no te tauturu i te pae moni tei rauka mai mei te taokotaianga taeake pa enua.” I taua taime rai, pouroa tatou katoatoa tei piri atu ki te turuturuanga angaanga Patireia i te pae moni kua kite mai i te mataora tei rauka mai mei te oronga anga Kerititiano!

[Pia/Tutu i te kapi 22, 23]

Au Ravenga ta Etai e Iki ra no te Oronga

AKAPUTUANGA NO TE ANGAANGA I TEIANEI AO

E manganui te akapae ra, me kore te akapapa ra, i tetai moni no te tuku ki roto i te au pia akaputuanga tei akairoia “Akaputuanga no te Angaanga i Teianei Ao​—Mataio 24:14.”

Te au marama katoatoa, e tuku ana te au putuputuanga i teia au moni ki te opati o te Jehovah’s Witnesses te akono tikai ra i to ratou au enua. Kia tuku tika katoaia te au moni tauturu tei oronga uaia ki te Watch Tower Bible and Tract Society of Pennsylvania, c/o Office of the Secretary and Treasurer, 25 Columbia Heights, Brooklyn, New York 11201-2483, me kore ki te opati manga e akono ra i toou enua. Te au tieki moni ra kia maaniia te tutaki anga ki te “Watch Tower.” Ka tau te au apinga akamanea me kore tetai atu au apinga puapinga kia oronga katoaia. Kia aru mai tetai reta poto ua i te au akaputuanga no te akakite i teia apinga aroa tikai.

AKANOOANGA I TE TURANGA NO TE TAUTURU E TE TATAANGA IRINAKIIA

Penei ka orongaia te moni i roto i tetai tataanga irinakiia no te puapinga o te Watch Tower. Inara, me ka patiia mai ka akaokiia atu te moni oronga ua kiaia. No tetai akakite anga maata atu, e tata ki te Office of the Secretary and Treasurer i te atereti i akakiteia i runga ake nei.

PARANIANGA ORONGA UA

I te pae i te au moni oronga aroa ua, te vaira tetai atu au ravenga orongaanga no te akapuapinga i te angaanga Patireia i teianei ao. Ka kapiti mai te:

Initurini: Penei kia tukuia te ingoa o te Watch Tower e ko tei puapingaia mei tetai tika anga initurini no te oraanga me kore tetai akapapaanga akaangaroi anga/moni pakari.

Akapapaanga Pangika: Penei kia tukuia te au akapapaanga pangika, te au pepa tuku anga, me kore te au akapapaanga akaangaroi no tetai tangata ki roto i te tataanga irinakiia me kore tei maaniia kia tutakiia ki te Watch Tower me mate ake, kia tau ki te au ikuikuanga a te pangika o te reira ngai.

Au Apinga Akaputuia e te Au Poni: Penei ka orongaia te au apinga akaputuia e te au poni ki te Watch Tower ei apinga aroa.

Enua: Penei ka orongaia te au enua e te au are ka rauka i te oko ei apinga aroa me kore, i roto i te turanga no te ngai noo anga, na te akono anga i tetai pepa koreromotu ki tei orongaia mai i te reira, te ka rauka iaia i te noo ki roto i te tuatau e ora ra aia. Kia araveiia atu te opati manga i toou enua i mua ake ka akamanaia ei tetai ua atu enua.

Moni Oronga ei Apinga Aroa: Te moni orongaia ei apinga aroa e akapapaanga ia mei te reira ka tuku atu tei oronga ra i te moni me kare te au apinga akaputuia ki te taokotaianga Watchtower. Ei tupau anga, ka rauka i tei oronga ra, me kare te aronga tei ikiia e tei oronga ra, i tetai tutaki anga moni oronga tei akatakaia i te au mataiti ravarai no te oraanga. Ka rauka i tei oronga ra tetai tero akameangitiia i te mataiti i akanooia ei te moni oronga ei apinga aroa.

Au Koreromotu e te Au Tataanga Irinakiia: Penei ka oronga tikaia te apinga me kore te moni ki te Watch Tower na roto i tetai koreromotu tikaia e te tataia, me kore kia tukuia te ingoa o te Watch Tower te ka puapingaia no tetai tataanga koreromotu irinakiia. Tetai tataanga irinakiia tei orongaia ki tetai akaaerenga akonoanga ka riro te reira ei au puapinga i te pae o te tero i tetai taime.

Mei ta te tuatua “paranianga oronga ua” e taiku ra, ka anoanoia kia paraniia teia au ravenga oronga moni tauturu i te tua o te tangata oronga. Ei tauturu i tetai te inangaro ra i te akapuapinga i te angaanga a te Au Kite o Iehova i te ao katoa na roto i tetai paranianga oronga ua, kua akapapaia tetai poroutia reo Papaa e te reo Paniora te ingoa Charitable Planning to Benefit Kingdom Service Worldwide. Kua tataia te poroutia kia oronga i te akakiteanga no runga i te au mataara tuketuke e ka rauka te au apinga aroa kia oronga ia i teianei me kore no te akaruke i tetai koreromotu i te mateanga. I muri ake i te tatauanga i te poroutia e te tukuanga ki ta ratou uaorai ture me kore ki te aronga e akono ra i te tero, e manganui tei rauka i te tauturu i te turuturu i te angaanga a te Au Kite o Iehova i teianei ao e kua akamaata mai i te au puapinga o ta ratou tero i te akapera anga. Ka rauka tetai kopi o te poroutia na te pati tikai anga i tetai kopi no ko mai i te Charitable Planning Office.

No tetai atu akakiteanga, penei e aravei atu koe i te Charitable Planning Office, na te tataanga me kore na te terepaoni anga, i te atereti i tataia i raro ake nei me kare i ko i te opati o te Jehovah’s Witnesses e akono ra i toou enua.

Charitable Planning Office

Watch Tower Bible and Tract Society of Pennsylvania

100 Watchtower Drive,

Patterson, New York 12563-9204

Telephone: (845) 306-0707

[Au Tutu i te kapi 20, 21]

Te au ngai uipaanga takere ake e te ou ake o te Au Kite o Iehova

Tamapia

Aperika Repapuriki i Rotopu