Te Au Tavini Mataora o Iehova
Te Au Tavini Mataora o Iehova
“E mataora to te aronga tei manako i to ratou anoano i te pae vaerua.”—MATAIO 5:3, NW.
1. Eaa ra te tu mataora mou, e eaa ra ta te reira e akaata maira?
E MEA akaperepereia te tu mataora na te au tangata o Iehova. Kua tuatua maata te tata taramo ko Davida e: “E mataora te iti tangata ko Iehova to ratou Atua!” (Salamo 144:15, NW) E manako oraanga meitaki te tu mataora. Te tu mataora oonu roa atu—te itae oonu tikai anga ki roto ia tatou—kua aere mai te reira i te kite anga e te akameitakiia ra tatou e Iehova. (Maseli 10:22) Te akaata maira taua tu mataora i tetai pirianga vaitata ki to tatou Metua i te rangi e te kite anga e te rave ra tatou i tona anoano. (Salamo 112:1; 119:1, 2) Ma te tau, kua akapapa a Iesu e iva au tumu manako e mataora ai tatou. Na te akara matatioanga i teia au tu mataora, me kore te au tu te tapaia ra, i roto i teia atikara e te atikara te aru maira e tauturu ei ia tatou kia kite e mei teaa ra to tatou mataora me tavini tiratiratu tatou i “te Atua mataora,” ko Iehova.—1 Timoteo 1:11, NW.
Kite Anga i to Tatou Anoano i te Pae Vaerua
2. I runga i teea atianga i tuatua ai a Iesu no runga i te tu mataora, e eaa tana tuatua akamata anga?
2 I te 31 T.N., kua oronga mai a Iesu i tetai au tuatua rongonui roa atu o te au tuatau katoa. Kua kapikiia te reira ko te Tuatua i runga i te Maunga no te mea kua oronga a Iesu i te reira ki runga i tetai tua o te maunga te akara atura ki te Tai o Galilea. Kua akakite mai te Evangeria a Mataio e: “Te kite atu anga [a Iesu] i te urupu ra kua kake atura aia ki runga i te maunga; e i muri mai te noo anga aia ki raro kua aere mai tana au pipi kiaia; e kua amama akera aia i tona vaa e kua akamata atura i te apii ia ratou, na te tuatua anga e: ‘E mataora to te aronga tei manako i to ratou anoano i te pae vaerua, no ratou oki te patireia o te au rangi ra.’” Te urianga tikai, te tatau ra te au tuatua akamata anga a Iesu e: “E mataora te aronga putaua (mei) te vaerua,” me kore “E mataora te aronga te pati ra i te vaerua.” (Mataio 5:1-3, NW; Kingdom Interlinear; tataanga i raro ake, NW) Te tatau ra te Today’s English Version e: “E mataora te aronga tei kite e e putaua ratou i te pae vaerua.”
3. Akapeea ra tetai turanga akaaka te oronga anga mai i te tu mataora kia tatou?
3 I roto i tana tuatua i te maunga ra, kua tou atura a Iesu e e mataora atu tetai tangata me kite aia e te anoanoia ra i te pae vaerua. Ko te au Kerititiano akaaka ra kua kite pu tikai, i to ratou turanga ara, i te pati anga kia Iehova kia akakore mai aia i te ara no runga i te tumu anga o te atinga oko o Karaiti. (1 Ioane 1:9) Ei reira ratou e kite ei i te au o te manako e te tu mataora mou. “E mataora to tei akakoreia ra tana apa, tei tapokiia ra tana ara.”—Salamo 32:1, NW; 119:165.
4. (a) I roto i teea au tu e rauka ai ia tatou i te akaari i te kite anga no to tatou anoano pae vaerua e no tetai ke? (e) Eaa ra te ka kapiti atu ki to tatou tu mataora me manako tatou i to tatou anoano i te pae vaerua?
4 Te kite anga i to tatou anoano i te pae vaerua te akakeuia ra tatou kia tatau i te Pipiria i te au ra ravarai, kia tamou marie i te kai i te pae vaerua “i te ora mou” a te “tavini akono meitaki e te pakari,” e kia tae putuputu atu ki te au uipaanga Kerititiano. (Mataio 24:45; Salamo 1:1, 2; 119:111; Ebera 10:25) Te akatupu ra te aroa no te tangata tupu ra kia kite tatou i te anoano pae vaerua no tetai ke e te akakeu anga ia tatou kia rave maroiroi i te tutu anga e te apii anga i te tuatua meitaki o te Patireia. (Mareko 13:10; Roma 1:14-16) Te tua anga i te tuatua mou Pipiria ki tetai ke te oronga maira i te tu mataora kia tatou. (Angaanga 20:20, 35) Ka akaoonu maataia to tatou tu mataora me akamanako oonu tatou i te manakonakoanga umere no te Patireia e te au akameitakianga ta te Patireia ka oronga mai. No te “anana iti” o te au Kerititiano akatainuia ra, e aiteanga oraanga mutu kore te manakonakoanga Patireia i te rangi ra ei tuanga kavamani no te Patireia o Karaiti. (Luka 12:32; 1 Korinetia 15:50, 54) No te “mamoe ke atu,” e oraanga mutu kore te aiteanga to ratou i runga i tetai enua parataito i raro ake i taua kavamani o te Patireia.—Ioane 10:16; Salamo 37:11; Mataio 25:34, 46.
Akapeea e Rauka ai i te Aronga Aue kia Mataora
5. (a) Eaa ra te aite anga no te tuatua e ko “tei aue” ra? (e) Akapeea ra e akapumaanaia ai tei aue ra?
5 Te au tuatua ta Iesu i taiku mai i muri maira no te tu mataora e akaraanga e mea tarevake ia. Kua tuatua aia e: “E mataora to tei aue, e akapumaanaia oki ratou.” (Mataio 5:4, NW) Akapeea tetai tangata e aue ei e i taua taime rai te mataora ra? Kia marama ra i te aite anga o ta Iesu tuatua, te anoanoia ra tatou kia akamanako e eaa ra te aue anga tana e tuatua ra. Kua akataka mai te pipi ko Iakobo e ka riro to tatou uaorai turanga ara ei aue anga. Kua tata aia: “E orei na i to kotou rima, e te aronga rave ara ra; e tamā na i to kotou ngakau, e te aronga ngakau rua na. Ka aue na kotou, ka mii, e kia maringi to kotou roi-mata: kia riro oki to kotou kata ei aue, e to kotou rekareka ei taitaia. Ka taakaaka na kotou ki mua i te aroaro o [“Iehova,” NW], e nana kotou e akateitei.” (Iakobo 4:8-10) Te aronga te aue tikai ra no runga i to ratou turanga ara kua akapumaanaia to ratou kite anga e ka akakoreia ta ratou au ara me akono ratou i te akarongo na roto i te atinga oko o Karaiti e te akaari anga i te tataraara mou na te rave anga i to Iehova anoano. (Ioane 3:16; 2 Korinetia 7:9, 10) Ei reira e rauka ai ia ratou tetai pirianga akaperepere ma Iehova e te akono anga i te manakonakoanga no te ora anga mutu kore i te tavini anga e te akapaapaa anga iaia. Te oronga maira teia kia ratou i te tu mataora oonu i roto roa.—Roma 4:7, 8.
6. I roto i teea manako i aue ei etai pae, e akapeea ra e akapumaanaia ai ratou?
6 Kua kapiti katoa mai ta Iesu tuatua i te aronga te aue ra no te au turanga viivii te tupu maata ra i runga i te enua. Kua taangaanga a Iesu kiaia uaorai te totou a Isaia 61:1, 2, te karanga ra e: ‘Tei runga iaku te vaerua o te Atu ra o Iehova; no te mea na Iehova au i akatainu, ei akakite i te tuatua rekareka ki tei tairoia ra; kua tono mai aia iaku ei vaî i te aronga ngakau paruparu, . . . ei akapumaana i te aronga ravarai i [“aue,” NW] ra.” Te tau katoa ra taua angaanga ki te au Kerititiano akatainuia i te enua nei, tei rave i te reira ma te tauturu a to ratou au oa, te “mamoe ke atu.” Te o ra te katoatoa i roto i te angaanga akairo akatutuanga i te au rae “o te au tangata i aue ua, e kua kapiki ua, i te au mea viivii katoa i raveia i roto ra [ia Ierusalema apoteiti, te akatutu maira ia Kerititome].” (Ezekiela 9:4) Te akapumaanaia ra taua aronga aue e “te evangelia o te basileia.” (Mataio 24:14) Te mataora ra ratou i te kite e kare e roa atu ana ka monoia te akatereanga o te au mea kino o Satani e te ao ou tuatua tika o Iehova.
E Mataora to te Aronga Maru
7. Eaa ra kare te aite anga o te tuatua e e “aronga maru”?
7 Kua tuatua ua atu a Iesu i tana Tuatua i runga i te Maunga i te karanga anga e: “E mataora to te aronga maru, e riro oki te enua ia ratou.” (Mataio 5:5, NW) I tetai au taime e manakoia ana te tu maru o te ngakau e te akakite maira i te tu paruparu. Inara, kare ko te reira te tu. I te akamarama anga i te manako no te tuatua tei uriia no te “aronga maru,” kua tata tetai tangata apii Pipiria e: “Te tu maata rava no te tangata te [maru ra te ngakau] koia oki e tangata aia tei raro ake i te akatere anga apa kore. Kare te reira tu maru e ngere ra i te mana ririnui, i tetai tu manako mareka anga, i tetai turanga muteki kore ua. E maroiroi te reira i raro ake i te akatere anga.” Kua tuatua a Iesu no runga iaia uaorai e: “Te maru nei au, e ngakau akaaka toku.” (Mataio 11:29) Inara, e tu mataku kore to Iesu i te paruru anga i te au kaveinga tuatua tika.—Mataio 21:12, 13; 23:13-33.
8. E piri anga vaitata to te tu maru o te ngakau ki teaa, e eaa ra tatou ka anoano ei i teia tu i roto i to tatou au pirianga ki tetai ke?
8 Te piri vaitata ra i reira, te tu maru o te ngakau ki te akatere-uaorai. E tikai, kua akanoo kapitiia mai e te apotetoro ko Paulo te tu maru e te akatere-uaorai i tona akapapa anga mai i “te ua o te vaerua.” (Galatia 5:22, 23, NW) E mea tau kia tatanuia te tu maru o te ngakau ma te tauturu a te vaerua tapu. E tu Kerititiano ia te akatupu ra i te au ki te aronga i vao ake e ma te aronga i roto i te putuputuanga. Kua tata a Paulo e: “Ka akakakau ia kotou uaorai ki te ngakau aroa ua, te takinga meitaki, te manako akaaka, te tu maru, e te akakoromakianga roa. E tamou rai i te akakoromaki anga tetai e tetai e te akakore ua anga i te ara tetai e tetai.”—Kolosa 3:12, 13, NW.
9. (a) Eaa ra te maru kare i kotingaia ki to tatou pirianga ki tetai au tangata? (e) Akapeea e ‘riro ei te enua’ i te aronga maru?
9 Inara, ko te tu maru o te ngakau, kare i kotingaia ki to tatou pirianga ma tetai au tangata. Na te kauraro puareinga anga ia tatou uaorai ki to Iehova tu ngateitei, te akaari ra tatou e e tu maru to tatou. Te akaraanga maata no runga i teia tu nei ko Iesu Karaiti, iaia i runga i te enua nei kua akaari i te tu maru o te ngakau e te kauraro katoa anga ki te anoano o tona Metua. (Ioane 5:19, 30) Ko Iesu te momua o te enua nei, koia oki te Tutara ikiia. (Salamo 2:6-8; Daniela 7:13, 14) Te akono kapiti ra aia i teia tuanga ki te “aronga tuanga ïa” e 144,000, tei ikiia mei “roto i te tangata nei” kia ‘tutara ei au ariki i rungao i te enua nei.’ (Roma 8:17; Apokalupo 5:9, 10, NW; 14:1, 3, 4; Daniela 7:27) Na Karaiti e tona au tutara taokotaiia e akaaere i te au tangata e te au vaine e mirioni ua atu mei te mamoe rai i runga ia ratou e kiteaia ai ta te taramo totou anga no te reira akatupuanga mataora e: “Kareka te aronga maru ra, ka noo ïa i te enua, e ka rekareka ratou i te maata o te au ra.”—Salamo 37:11; Mataio 25:33, 34, 46.
E Mataora to te Aronga te Pongi ra no te Tuatua Tika
10. Eaa te mataara okotai e akakiia ai te aronga te “pongi ra e te kaki ra i te tuatua tika”?
10 Kua akapapaia e Iesu te tu mataora te aru maira iaia e tuatua ra i runga i taua maunga ra o Galilea e: “E mataora to te aronga te pongi ra e te kaki ra i te tuatua tika, i te mea e kua akakiia ratou.” (Mataio 5:6, NW) No te au Kerititiano ra, kua akanoo a Iehova i te turanga no te tuatua tika. No reira, ko te aronga te pongi ra e te kaki ra i te tuatua tika te pongi ra e te kaki ra i te kaveinga tu-Atua. Kua kite pu tikai taua aronga i ta ratou ara e te tu apa e te anoano ra i tetai turanga arikiia i mua i te aroaro o Iehova. Mei teaa ra to ratou mataora i te kite anga ratou mei te Tuatua a te Atua e me tataraara ratou e me kimi i te akakore anga i te ara no runga i te tumu anga o to Karaiti atinga oko, tei ia ratou tetai turanga kia rauka i te tu ma te tuatua tika i mua i te aroaro o te Atua!—Angaanga 2:38; 10:43; 13:38, 39; Roma 5:19.
11, 12. (a) Akapeea e rauka ai i te au Kerititiano akatainuia te tuatua tika? (e) Akapeea te au oa o te aronga akatainuia i te akakiia anga to ratou kaki no te tuatua tika?
11 Te karanga ra a Iesu e ka mataora taua aronga, i te mea e “kua akamerengoia” ratou. (Mataio 5:6, Kingdom Interlinear) Te au Kerititiano akatainuia tei kapikiia kia ‘manaʼi ei ariki’ ma Karaiti i te rangi ra kua akatikaia te “tika kia ora.” (Roma 5:1, 9, 16-18) Na Iehova i akaanau mai ia ratou, i te akatamariki anga ia ratou ei tamariki i te pae vaerua. Kua riro mai ratou ei aronga akatuangaia ma Karaiti, kua kapikiia kia riro mai e ui ariki e e kau taunga i roto i tona kavamani Patireia i te rangi ra.—Ioane 3:3; 1 Petero 2:9.
12 Kare te au oa o te aronga akatainuia i akatikaia ake ei aronga tuatua tika no te ora. Inara, e tuanga no te tuatua tika ta ratou tei orongaia mai kia ratou e Iehova no to ratou akarongo i roto i te toto akamaringiia o Karaiti ra. (Iakobo 2:22-25; Apokalupo 7:9, 10) Kua akapapaia ratou ei aronga tuatua tika e ei au oa no Iehova tei tau no te akaora anga i te tuatau o “te mate maata.” (Apokalupo 7:14) To ratou kaki no te tuatua tika ka akamerengo maataia me, i raro ake i te “rangi ou” ra, ka riro mai ratou ei tuanga no tetai enua ou te “vai tika anga o te tuatua-tika ra.”—2 Petero 3:13; Salamo 37:29.
E Mataora to Tei Akaaroa
13, 14. Na roto i teea au tu tau e akaari ei tatou ia tatou uaorai ei aronga akaaroa, e eaa te puapinga kia tatou?
13 Te rave ua atu anga i tana Tuatua i runga i te Maunga, kua tuatua a Iesu e: “E mataora to tei akaaroa, i te mea e ka akaariia kia ratou te akaaroa.” (Mataio 5:7, NW) I roto i tetai manako anga i te pae ture, te maramaia ra te akaaroa e te taikuia ra ki te akakoromaki anga i runga i te tuanga o tetai akavanui tei akakore i te tuku atu ki te tangata tarevake ra i te utunga maata tei akatikaia i raro ake i te ture. Inara, mei tei taangaangaia i roto i te Pipiria, te au tuatua mua tei uriia no te “akaaroa” te taiku maataia ra ki tetai tuatua no te akamanakoanga meitaki me kare e tangi anga te oronga maira i te akamaru anga ki te aronga tei ngere ra. No reira, ko te aronga te akaaroa ra te akaari ra i te tu tangi aroa. Kua oronga mai ta Iesu akatutuanga no te tangata tupu Samaria i tetai akaraanga meitaki no tetai “tei aroa atu” i tetai tangata tei anoano ra.—Luka 10:29-37.
14 E kite ei i te tu mataora te tupu maira no te tu akaaroa, te anoanoia ra tatou kia piri atu ki roto i te au angaanga tau no te takinga meitaki ki te aronga tei anoano ra. (Galatia 6:10) Kua tangi ngakau aroa atura a Iesu i te au tangata tana i kite atu. “Tangi atura ia ratou, no te mea, mei te mamoe tiaki kore ratou, e kua apii atura aia ia ratou i te au tuatua e manganui.” (Mareko 6:34) Kua kite a Iesu e ko ta te tangata ravarai e anoano maata ra ko te mea i te pae vaerua. Ka rauka katoa ia tatou i te akaari ia tatou uaorai e tu tangi aroa e te tu akaaroa na te oronga anga ki tetai ke i ta ratou e anoano maata ra—te “evangelia o te basileia.” (Mataio 24:14) Ka rauka katoa ia tatou i te oronga atu i te tauturu ki te au taeake pakarikari Kerititiano, te au takaua, e te au matiroeroe e kia “akapumaana atu i te ngakau taitaia.” (1 Tesalonia 5:14; Maseli 12:25; Iakobo 1:27) Kare teia e oronga ua mai i te tu mataora kia tatou mari ra ka akariro katoa te reira ia tatou ei aronga tei rauka mai te akaaroa o Iehova.—Angaanga 20:35; Iakobo 2:13.
Tei Ma te Ngakau e te Ponuiaau
15. Akapeea tatou e ma ei te ngakau e te ponuiaau?
15 Kua akapapa mai a Iesu i te ono e te itu o te tu mataora e aru maira: “E mataora tei ma ra te ngakau, i te mea e ka kite ratou i te Atua. E mataora te aronga ponuiaau, i te mea ka kapikiia ratou e ‘tamariki na te Atua.’” (Mataio 5:8, 9, NW) Tei ma te ngakau ko tetai kare i ma anake ua i te akono tau ra kareka ra te ma katoa ra i te pae vaerua e te taokotai ra i roto i ta ratou akamori anga kia Iehova. (1 Paraleipomeno 28:9; Salamo 86:11) Te tuatua mua tei taikuia no te tuatua “ponuiaau” te aiteanga tikai e “aronga akatupu i te au.” Te noo au ra te aronga ponuiaau ma to ratou au taeake Kerititiano e, me ka rauka ia ratou, ki to ratou au tangata tupu. (Roma 12:17-21) “E kimi [ratou] i te au, e aruaru atu.”—1 Petero 3:11.
16, 17. (a) Eaa ra te aronga akatainuia i kapikiia ai e “tamariki na te Atua,” e akapeea ratou e ‘kite ei i te Atua’? (e) Akapeea te “mamoe ke atu” e ‘kite ei i te Atua’? (nga) Akapeea e aea, i te manako ki katoa anga, i riro mai ei te “mamoe ke atu” e “tamariki na te Atua”?
16 Ki te aronga ponuiaau te ma ra te ngakau, kua raveia te taputou e “ka kapikiia ratou e ‘tamariki na te Atua’” e ‘ka kite i te Atua.’ Kua anau vaerua ia te au Kerititiano akatainuia e kua akatamarikiia e Iehova ei “tamariki” ia ratou e vai ra i te enua nei. (Roma 8:14-17) Me akatuakaouia mai ratou kia noo ma Karaiti i te rangi, ka tavini ratou i mua i to Iehova aroaro e ka kite tikai Iaia.—1 Ioane 3:1, 2; Apokalupo 4:9-11.
17 Te tavini ra te “mamoe ke atu” ma te ponuiaau ia Iehova i raro ake i te Tiaki Meitaki, ko Iesu Karaiti, tei riro mai ko to ratou “Metua no te tuatau mutu kore.” (Ioane 10:14, 16; Isaia 9:5) Ko te aronga tei tere autu atu i te timataanga openga i muri ake i te Tutara Anga Tauatini Mataiti o Karaiti ra ka akatamarikiia ei tamariki na Iehova i te enua nei “kia rauka te rangatira meitaki o te tamariki a te Atua ra.” (Roma 8:21; Apokalupo 20:7, 9) I te akara anga ki mua no teia nei, kua kapiki ratou ia Iehova ei Metua no ratou, i te mea e kua akatapu ratou i to ratou oraanga kiaia, i te kite anga e koia to ratou Oronga-Ora. (Isaia 64:8) Mei ia Iobu raua ko Mose i taito ra, te ‘akara ra ratou i te Atua’ ma te mata o te akarongo. (Iobu 42:5; Ebera 11:27) Ma ‘te au mata o to ratou ngakau’ e na roto i te kite tika tikai i te Atua, kua kite ratou i te au tu umere o Iehova e te tauta ra i te aru iaia na te rave anga i tona anoano.—Ephesia 1:18; Roma 1:19, 20; 3 Ioane 11.
18. Kia tau ki te akamata anga o te au tu mataora e itu ra tei akapapaia mai e Iesu, koai ma te ka kite i te tu mataora mou i teia tuatau?
18 Kua kite tatou e e ko te aronga te manako ra i to ratou anoano i te pae vaerua, te aronga tei aue, tei maru te ngakau, te aronga tei pongi e te kaki ra i te tuatua tika, te aronga akaaroa, tei ma te ngakau, e te aronga ponuiaau kua kitea te tu mataora mou i te tavini anga ia Iehova. Inara, e aro ua ana taua aronga ra i te patoianga, pera katoa te takinga kinoanga. Te akakino ra ainei teia i to ratou tu mataora? Ka akamanakoia taua uianga i roto i te atikara te aru mai nei.
Na te Akamanako Akaou Anga
• Eaa ra te tu mataora te aere maira ki te aronga te manako ra i to ratou anoano i te pae vaerua?
• I roto i teea au tu i akapumaanaia ai te aronga te aue ra?
• Akapeea ra tatou i te akaari anga i te tu maru o te ngakau?
• Eaa ra i tau ei kia akaaroa tatou, kia ma te ngakau, e kia ponuiaau?
[Au Uianga Apii]
[Tutu i te kapi 10]
“E mataora to te aronga tei manako i to ratou anoano i te pae vaerua”
[Au Tutu i te kapi 10]
“E mataora to te aronga te pongi ra e te kaki ra i te tuatua tika”
[Tutu i te kapi 10]
“E mataora to tei akaaroa”