Te Kimi Anga i te Arataki Anga Meitaki
Te Kimi Anga i te Arataki Anga Meitaki
“Te akakite atu nei au, e akaruke, kua oti matou ia koe. I roto i te ingoa o te Atua, aere!”—Ko Oliver Cromwell; tei taikuia e Leopold Amery, e mema no te Paramani o Peritane.
Kua tupu ua atu te aerenga kino o te Tamaki II o te Ao no te varu marama, e kare a Peritane e tona au oa turuturu e meitaki ana. Kia Leopold Amery e etai atu i roto i te kavamani, ka anoanoia tetai tauianga i roto i te arataki anga. No reira, ia Me 7, 1940, i roto i te House of Commons, kua taiku a Mr. Amery i te au tuatua i runga akenei ki te Paraimi Minita ko Neville Chamberlain. E toru ra i muri mai, kua akaruke a Mr. Chamberlain i te taoonga, e kua mono a Winston Churchill i tona ngai.
KO TE aratakianga e anoano tumu ia no te tangata nei, inara kare tetai ua atu arataki e tau. I roto katoa rai i te ngutuare tangata, ka anoanoia te papa kia tau no te arataki anga kia mataora tana vaine e te tamariki. E akamanako ana, i reira, eaa te umuumuia ra no tetai arataki o te enua me kore o te ao! Kare e umere anga e e ngata tikai i te kimi i te au arataki meitaki.
Me akaraia, no te au tauatini mataiti, kua tupu ana te au akakoronaanga kare e rauka kia tareia, te au orureauanga, au uri tumuanga, au akataoongaanga, au ikianga, au tamateanga, e te au tauianga o te tutaraanga. Te au ariki, au paraimi minita, au ui ariki, au peretiteni, au tekeretere tianara, e te au tutara viivii kua kite ana ia ratou uaorai ki roto e ki vao i te mana akatere. Kua riro te au tauianga tapapa koreia i te akaatea katoa i te au tutara ririnui. (Akara i te pia “Ngere Poitirere ua i te Mana Akatere,” i te kapi 5.) Noatu ra, e ngata rai i te kimi i tetai arataki anga tau e te mou.
“Kia Akakoromaki ua Tatou”—Me ka Pera ua Ainei Tatou?
No reira, kare i te mea umere, e kua ngaro te manakonakoanga o te manganui no runga i te kimi anga i te arataki anga meitaki. I roto i tetai au enua, e kitea papuia ana te manako inangaro kore e te taitaia o te tangata i te tuatau tikai o te ikianga. Kua akakite a Geoff Hill, e tangata tata tianara i Aperika: “Ko te tu inangaro kore me kore patoi [i te voti anga] e mea matauia me kare e rauka i te tangata i te taui i te turanga taitaia o to ratou oraanga. . . . I Aperika, me kare te tangata e voti, kare tikai mei te mea e te mareka ua ra ratou. Te putuputu anga o te taime, e aue tera no tetai tauturu no ko mai i te aronga e manako ra e kare
e tangata e akarongo maira.” Mei te reira rai, ta tetai tangata tata nuti pepa i Marike i tata no runga i tetai ikianga e tapapaia ra: “Inangaro ua atu au e kia tu tetai mema tau tikai.” Kua kapiti atu aia: “Kare ra e mema mei te reira. Kare rava oki. Kia akakoromaki ua tatou.”E tika ainei e, kare a te tangata nei ikianga mari ra kia “akakoromaki” ua atu i te au arataki apa ua nei? Te riro ra ainei te tika e kare i rauka ana i te au arataki tangata i te akamerengo i te au anoano o to ratou au tangata i te akapapu e kare rava e rauka ia tatou tetai arataki anga meitaki? Kare. Ka rauka te arataki anga o te tu teitei roa atu. Ka akamanako ana i te atikara e aru mai nei e koai te arataki tau tikai no te tangata e ka akapeea tana arataki anga i te akapuapinga anga i te au mirioni tangata e manganui o te au turanga katoatoa—kapiti mai oki ia koe.
[Tutu i te kapi 3]
Kaui i runga: Neville Chamberlain
Katau i runga: Leopold Amery
Raro: Winston Churchill
[Au Akameitakianga]
Chamberlain: Photo by Jimmy Sime/Central Press/Getty Images; Amery: Photo by Kurt Hutton/Picture Post/Getty Images; Churchill: The Trustees of the Imperial War Museum (MH 26392)