Au Uianga a te Aronga Tatau
Au Uianga a te Aronga Tatau
Teiea te au temoni i te tuatau o te Tauatini Mataiti Tutaraanga o Karaiti?
Kare te Pipiria e akataka meitaki ana i te pau anga i teia uianga. Inara, ka rauka ia tatou i te taopenga tau e teiea te au temoni i te tuatau o to Karaiti Tutaraanga Mareniamu.
Oronga mai anga i tetai akaraanga momua e eaa te ka tupu i te akamataanga e te taopenga anga o teia Mareniamu, kua karanga te apotetoro Ioane e: “Kite atura au i tetai angela i te eke anga mai mei te rangi mai, e tei iaia te taviri o te vaarua takere kore ra, e pirianganaoa maata tei tona rima. Kua opu iora aia, i te taae, i taua ovi taito ra, koia oki te diabolo ra, ko Satani, kua tapeka iaia kia okotai tausani i te mataiti, Kua uri atura iaia ki raro i te vaarua takere kore ra, e popani atura iaia i reira, tuku iora i te akairo ki rungao, kia kore aia e pikikaa akaou i te pa enua, e kia ope rava aua nga mataiti okotai tausani ra: e i muri ake i te reira, kia tukuia mai aia i tetai manga tuatau iti e tikaʼi.” (Apokalupo 20:1-3) Te tuatua ra teia au irava no runga ua i to Satani titiri anga ia i roto i te vaarua takere kore e tona tukuna mai anga ki vao i te openga ra no tetai tuatau poto ua. Noatu e kare te au temoni i taikuia ana, ka tau kia karangaia e me opu te angera tei iaia te taviri o te vaarua takere kore—ko Iesu Karaiti akakakaia—i te Tiaporo e kua titiri atu ki roto i te vaarua takere kore, ka rave pera katoa aia i te reira ki te au temoni.—Apokalupo 9:11.
I te riro mai anga ei Ariki i te rangi ra i te 1914, kua rave a Iesu Karaiti i tetai angaanga tei riro ei akakeuanga maata tikai ki runga ia Satani e pera katoa te au temoni. Te karanga ra a Apokalupo 12:7-9: “E e tamaki tei runga i te rangi: ko Mikaela e tana au angela, tamaki atura i te taae; e kua tamaki maira te taae e tana au angela [te au temoni], Kare ra i riro te re ia ratou; e kare rava atura o ratou e nooanga i runga i te rangi. Uriia atura oki te taae maata ki vao, ko taua ovi taito ra ïa, ko tei karangaia i te diabolo ra, e ko Satani oki, ko tei pikikaa i to te ao katoatoa nei, i uriia aia ki vao ki runga i te enua nei, e tana au angela katoa, kua uri katoaia ki vao.” Mei taua taime ra, kua kotingaia a Satani e tana au temoni ki te ngai i te enua nei. Ka tau tatou kia irinaki e me arai akaou atu a Iesu Karaiti i te angaanga a Satani kia rauka i te enua i te akarangatiraia i tona akakeuanga kino, ka rave katoa rai Aia i te reira ki te au temoni.
E akamanako katoa ana i te totou mua tikai a te Pipiria. Te karanga ra: “Ka tuku oki au [te Atua] i te ke ia korua [Satani] ko te vaine [akaaereanga a Iehova i te rangi], e to [Satani] uanga e tona [Iesu Karaiti] uanga; nana e akaparuparu i to mimiti, e naau e akaparuparu i tona pooavae.” (Genese 3:15) Te kapiti maira i roto i te akaparuparu anga i te mimiti o te ovi to Satani titiri anga ia ki roto i te vaarua takere kore i te tuatau o to Karaiti Tauatini Mataiti Tutaraanga. Te karanga katoa ra te totou e kua tupu tetai ke i rotopu i Tei rave i te akaparuparu anga e te uanga a Satani. Tei piri mai ki roto i teia uanga, me kore akaaereanga, ko te tuanga kitea koreia o te au angera kino, me kore te au temoni. No reira e mea tau i te taopenga e me titiri a Iesu ia Satani i roto i te vaarua takere kore, ka tapeka e ka titiri katoa aia i te au temoni ki roto i te vaarua takere kore. Te tika e kua akaari te au vaerua kino i te mataku maata no te vaarua takere kore te akakite maira e kua kite ratou i teia tapupu anga te aere maira.—Luka 8:31.
I na, ka tau ainei i te irinaki e te tumu kare a Apokalupo 20:1-3 i taiku ana i te au temoni no te mea kua akapou ia atu ratou i Aramakito kapiti ma te tuanga kiteaia o te uanga a Satani? Kare te Pipiria e oronga mai ana teia e ko te tikaanga ia. No runga i to Satani manakonakoanga taopenga, te karanga ra te reira: “E i uriia atura te diabolo, i pikikaa ia ratou ra, ki roto i te roto ai e te teio ra, i te vairanga o te puaka taae e te peroveta pikikaa ra, e e akamamaeia ratou i te po e te ao e tuatau ua atu.” (Apokalupo 20:10) Te puaka taae e te peroveta pikikaa e au tuanga poritiki ia e e tuanga ia o ta Satani akaaereanga kiteaia. (Apokalupo 13:1, 2, 11-14; 16:13, 14) Ka akapouia ratou i Aramakito, me akapueurikiriki e me akapou te Patireia o te Atua i te au patireia o te ao nei. (Daniela 2:44) Te taiku ra te Pipiria i “te ai mate kore, tei akonoia no te diabolo e tana au angela.” (Mataio 25:41) Ka titiriia a Satani e tana au temoni ki roto i te “roto ai e te teio” aiteite rai ki to te puaka taae e te peroveta pikikaa mei tera oki e ka akapou takiriia ratou. Naringa kua akapouia te tuanga vaerua mana maata atu kitea koreia o ta Satani uanga i Aramakito, papu e kua taikuia te au temoni e tei roto takere i taua roto ai kapiti atu ma te puaka taae e te peroveta pikikaa. Kare o ratou taikuanga i roto ia Apokalupo 20:10 te akaari maira e kare te au temoni i akapouia i Aramakito.
Mei te mea e kare te au temoni i taiku meitakiia ana e kua titiriia i roto i te vaarua takere kore, kare oki ratou i taiku tika ia ana e kua tukunaia mai ki vao mei reira mai. Inara, aiteite ua rai to ratou taopengaanga i to te Tiaporo ra. I muri ake i te tukunaia atu anga ki vao ma te Tiaporo e te taokotai atu anga kiaia i te tuatau o te timataanga openga no te au tangata ravarai i te openga o te tauatini mataiti, ka titiri katoaia rai te au temoni ki roto i te roto ai e ka kite i reira i te akapou anga mutu kore.—Apokalupo 20:7-9.
No reira, noatu e te tuatua ra a Apokalupo 20:1-3 i to Satani anake tapekaanga ia e te titirianga ia ki roto i te vaarua no te angaanga kore, ka tau tatou i te taopenga e ka tapeka katoaia rai tana au angera e ka titiriia ki roto i te vaarua takere kore. Kare e rauka akaou ia Satani e tana au nuku temoni i te arai i te akatupuanga o ta te Atua akakoroanga kia taui i te enua ei parataito e kia akaora i te au tangata ravarai ki te tu apa kore i te tuatau o te Tauatini Mataiti Tutaraanga o Karaiti.