Ka Inangaro Ainei Koe kia Ora e Tuatau ua Atu?
Ka Inangaro Ainei Koe kia Ora e Tuatau ua Atu?
“KARE au e mataku i te mate,” i karanga mai ei tetai vaine pakarikari i Tiapani. “Inara te akataitaia nei te reira iaku e ka takake mai au mei teia au tiare nei.” Kua marama tetai orometua Kerititiano tei atoro atu i tona kainga i taua tuatua, no te mea e aua tiare manea ta te vaine. E manganui tei karanga ana e kare ratou e mataku tikai ana i te mate te ariki rekareka ra i te au mea umere o tei angaia ra e penei te inangaro tikai ra kia ora e tuatau ua atu.
Kia ora e tuatau ua atu? E manganui te kopae ra i taua manako. Penei te karanga katoa ra etai pae e kare ratou e inangaro ana i te ora e tuatau ua atu. Eaa ra tetai ka manako akapera ai?
Ora Mutu Kore—Maromaroa Ainei?
Te manako ra etai pae e ka riro te reira ei maromaroa
anga kia ora e tuatau ua atu. Penei ka tou mai ratou i te oraanga maromaroa o te au tangata e manganui tei ritaea e e meangiti ua ta ratou e rave ra i na te noo ua ra e te akara ua ra i te tivi. Me ko toou manako ia, e akamanako ana i ta te tangata akara etu ko Robert Jastrow i karanga ana i te uiia anga e me ka riro ainei te ora mutu kore ei akameitakianga me kore ei taumaa anga. Kua pau maira a Jastrow: “E akameitakianga te reira ki te aronga e e au manako inangaro to ratou no te kite e te inangaro ope kore ra i te apiianga. Te manako anga e e tuatau ua atu to ratou kia rauka mai te kite ra e akapumaana anga tikai ia no ratou. Inara no tetai papaki tei manako ana e kua rauka pouroa ia ratou te kite e kua topiriia to ratou au manako ra, e taumaa anga kino tikai te reira. Kare atu e ravenga e rauka ai ia ratou i te taangaanga meitaki i to ratou tuatau.”Noatu e ka kite koe i te ora mutu kore ei maromaroa me kare ra tei runga ua ia i toou tu. Me e ‘manako inangaro no te kite toou e te inangaro ope kore i te apiianga,’ e akamanako ana e eaa te ka rauka ia koe i akatupu i roto i te au tuanga o te ati, te akatangi anga imene, te parani e te patu anga i te are, te tanu tiare, me kore tetai ua atu au aruaru anga tau taau e inangaro ra. Ka oronga mai te ora mutu kore i te enua nei i te au manakonakoanga umere no te akatupu anga i toou kite i roto i te au tuanga tukeke no te angaanga.
Te rauka anga i te akaari e te kiteanga i te aroa e tuatau ua atu ka akariro i te ora mutu kore ei merengo anga tikai. Kua angaia tatou ma te kite no te akaari anga i te aroa, e ka tupu ruperupe tatou me te manako inangaroia maira tatou. Te rekareka anga i te aroa tika tikai te oronga maira i te merengoanga oonu kare roa e ngaro ke atu i te aereanga o te tuatau. Ka oronga mai te ora mutu kore i tetai tuatau ope kore kia tatanu i te aroa kare ua no te au taeake tangata ra mari ra no te Atua tikai. “Te inangaro ra tetai tangata i te Atua,” i na te apotetoro ko Paulo ei e, “koia tei kiteia mai e ia.” (1 Korinetia 8:3) Mei teaa ra te manakonakoanga umere—kia kite e kia kiteaia mai e te Ngateitei i te ao katoa e pini ua ake! Pera katoa, kare e ope ana te apii anga no runga i Tei Anga aroa mai ia tatou. I akapeea, i reira, i riro ei te ora mutu kore ei maromaroa anga e kare ei akameitakianga?
Te Ora—E Poto ua e e Akaperepere Anga
Te manako ra etai pae e te poto ua anga o te ora te riro ra te reira ei akaperepere anga tikai. Penei ka akaaite ratou i te ora ki te auro, te vai ua ra i roto i te au putunga i kotingaia. Me kiteaia mai te auro i te au ngai, ka tou mai ratou, e te iti maira to te reira puapinga. Noatu rai, ka vai manea ua rai te auro. Ko te tika te reira ki te ora.
Penei ka akaaite tatou i te rekarekaanga i te ora mutu kore ki te rauka anga tetai akaea anga maata. Ka akamanako te au mataro i roto i tetai pai ruku vai kare e meitaki ana i te akaea anga ei mea puapinga tikai. I muri ake i te akaora anga ia
ratou, i toou manako e ka koumuumu ariki kore mai ainei ratou no te rekareka maata akaou anga i te akaea anga? Kare rava!Mei taua au mataro rai, ka akaoraia mai tatou inara ma te manakonakoanga maata roa atu no te ora mutu kore. “E utunga te mate no te ara,” i tata ai te apotetoro ko Paulo, “kareka te ora mutu kore ra, e mea oronga uaia mai e te Atua i roto i to tatou Atu ia Iesu Mesia.” (Roma 6:23) Na roto i to Iesu atinga oko, ka takore te Atua i te tu apa o te tangata e te mate e ka oronga mai ki runga i te au tangata akarongo ravarai i te mea oronga uaia mai no te ora mutu kore. Mei teaa ra to tatou marekaanga no taua akanoonooanga aroa!
Akapeea Toou Aronga Akaperepere?
Penei ka manako etai au tangata e: ‘Akapeea ra toku aronga akaperepere? Kare e puapinga ana kiaku te ora mutu kore i runga i te enua nei me kare ratou i te pae iaku.’ Penei ua ake kua rauka oki ia koe te kite i te Pipiria e kua apii ana no te rauka anga te rekareka i te ora mutu kore i roto i te parataito i te enua nei. (Luka 23:43; Ioane 3:16; 17:3) Tei matauia, te inangaro ra koe i te au mema o toou ngutuare tikai, tetai aronga akaperepere ke, e te au oa akaperepere kia tae mai ki reira, te kite anga i taua au rekareka anga taau e manakonako ra i te kite i roto i te ao ou taputouia o te Atua no te tuatua tika ra.—2 Petero 3:13.
Inara akapeea me kare toou au oa e te aronga akaperepere e akaari mai ana i te inangaro kia noo ki runga i te enua parataito e tuatau ua atu? Auraka e tuku i te reira kia akataitaia ia koe. E rave ua atu i te apii i te kite tika tikai o te Tuatua Tapu, e kia angaanga rotai ma te reira. Kua tata te apotetoro ko Paulo e: “Eaa oki koe e kite ei, e maine e, kare taau tane e ora ia koe? e eaa oki koe e kite ei, e tama e, kare taau vaine e ora ia koe?” (1 Korinetia 7:16) Ka rauka te au tangata i te taui. Ei akaraanga, kua taui tetai tangata tei patoi ana i te Akonoanga Kerititiano e i muri mai kua riro mai ko tetai tangata pakari i roto i te putuputuanga Kerititiano. Te karanga ra aia: “Kua mareka tikai au e kua vai tiratiratu toku ngutuare tangata akaperepere i te aru anga i ta ratou au kaveinga Pipiria i roto i taku patoi katoatoa anga ra.”
Te manako tikai maira te Atua i toou oraanga e te au oraanga o toou aronga akaperepere. E tikai, “kare ua [“a Iehova,” NW] . . . i anoano e kia mate atu tetai, kia rauka katoatoa ra te tataraara.” (2 Petero 3:9) Te inangaro ra te Atua ko Iehova ia koe e toou aronga akaperepere kia ora mai e tuatau ua atu. E maata atu tona aroa i to te au tangata apa ua. (Isaia 49:15) No reira eaa ka kore ei e tatanu i tetai pirianga meitaki ma te Atua? I reira e rauka ai ia koe i te tauturu i toou aronga akaperepere kia rave katoa i te reira. Noatu e kare o ratou manakonakoanga i teianei kia ora ua e tuatau ua atu, penei ka taui to ratou tu me kite ratou ia koe e angaanga rotai ra ma te kite tika tikai o te Pipiria.
Akapeea ra te aronga akaperepere oou ra tei mate ra? No te mirioni ua atu tei mate ra, te oronga maira te Pipiria i te manakonakoanga umere no tetai tuakaouanga—i te akaara angaia mai mei te mate e te noo anga i roto i te Parataito i runga i te enua. Kua taputou mai a Iesu Karaiti e: ‘Te vaitata mai nei oki te ora, te aronga katoa i roto i te rua, ka aere mai ki vao.’ (Ioane 5:28, 29) E te aronga katoa tei mate kare i kite ana i te Atua ka akaora akaouia mai, no te mea te akakite maira te Pipiria: “E e tuakaouanga to tei mate, te aronga tuatua-tika e te aronga tuatua-tika kore.” (Angaanga 24:15) Mei teaa ra te rekareka i te reira te turou akaou anga mai i taua aronga ra ki te ora!
Ora Mutu Kore—E Manakonakoanga Rekareka
Me rauka ia koe i te kite i te tu mataora e te pumaana i teianei noatu te au manamanata katoatoa i roto i teianei ao, papu e ka rauka ia koe te rekareka i te ora mutu kore i runga i te enua parataito. Inara, te tou anga tetai o te Au Kite o Iehova i te au akameitakianga ta te ora mutu kore ka oronga mai, kua karanga atu tetai vaine e: “Kare au e inangaro kia ora ua e tuatau ua atu. Kua rava ua teia oraanga e 70 me kore e 80 mataiti noku.” Kua ui atu tetai tangata
pakari Kerititiano tei reira rai kiaia e: “I manako ana koe e eaa te manako o taau tamariki me mate ake koe?” Kua taetae ua te roi mata mei runga i tona nga paparinga i te manako anga aia no runga i te mamae ka kite mai ratou i te mate anga to ratou metua vaine. “Ka tai nei au, i kite ei i toku tu karapii,” i akatika mai ei aia, “e kua kite au e kare te ora mutu kore ko tetai manakonakoanga karapii inara te kapiti maira te reira i te ora anga no tetai ke.”Penei te manako ra etai pae e kare e kino ana ki tetai ke e me ka ora ratou me kore ka mate atu ratou. Inara, e puapinga tikai te reira ki to tatou Oronga-Ora, tei karanga e: “Te ora nei au, kare rava oku e mareka anga i te mate o te tangata kino ra; kia ariu maira te tangata kino i tona aerenga kia ora.” (Ezekiela 33:11) I te mea e te manako maira te Atua i te ora o te tangata kino ra, papu e te manako tikai maira aia i te aronga te inangaro ra iaia.
Kua irinaki te Ariki ko Davida o Iseraela taito i to Iehova manako aroa. Kua karanga ana a Davida e: “Akaruke ua toku metua tane e toku metua vaine iaku, ei reirā Iehova e rave mai ei iaku.” (Salamo 27:10) I te akaraanga kua papu ia Davida te aroa o tona nga metua nona ra. Inara noatu e ka akaruke tona nga metua—tona au pirianga vaitata tangata ra—iaia, kua kite aia e kare te Atua e akaruke iaia. No te aroa e te manako anga ra, te oronga maira a Iehova kia tatou i te ora mutu kore e te pirianga oa ope kore kiaia ra. (Iakobo 2:23) Kare ainei tatou e ariki mareka atu i teia au mea umere oronga uaia mai?
[Tutu i te kapi 7]
Te aroa no te Atua e te tangata tupu ra ka akariro i te ora mutu kore ei mea puapinga