Mei Teaa te Roa e Ora ai te Tangata?

I ROTO ia Mati 3, 1513, kua rave te tangata teretere Paniora ko Juan Ponce de León i tetai kimikimianga tau tikai. Kua teretere atu aia mei Pueto Riko i te manakoanga e ka taenaia te airani o Bimini. Kia tau ki te tua kua kimi aia i tetai puna vai temeio​—e Puna Vai Akariro kia Mapu. Inara kua tae atu aia ki te ngai tei kapikiia i teianei ko Florida, U.S.A. Inara, kare oki i kitenaia mai e ia te puna vai no te mea kare oki e apinga.

I teia tuatau, kare te au tangata e ora ua atu ana i te 70 me kore i te 80 mataiti. Noatu e te akapapa maira te Pipiria i te au tangata ma te oraanga maata roa atu, te karanga ra te 2002 Guinness Book of World Records e te mataiti no te tangata pakari roa atu oki tei ora ana e 122 mataiti e 164 ra. (Genese 5:3-32) Inara, te karanga ra te tangata manako tau no te ora ko John Harris e: “Te akaari maira te kimikimi anga ou i teianei i tetai akara anga ki roto i tetai ao e kare te ruaine anga​—e te mate katoa​—e tupu akaou mai.” E maata te aronga kimikimi o te 21 anere mataiti te tuatua ra no te “tu mate kore tikai,” “kare i kotingaia te tuatau no te oraanga o te au tangata ki te 2099,” “te rauka anga tetai akamaata anga mate kore no te au teera,” e tetai atu au mea.

I roto i tana puka The Dream of Eternal Life, kua akakite a Mark Benecke e: “Vaitata rai e kua akaou katoatoaia te kopapa i te au taime ravarai i roto i te oraanga. . . . Mei tetai itu mataiti i muri mai, e kopapa ou tikai to tatou.” Inara, kare teia e tupu ana e tuatau ua atu no te mea ka akamutu ua te au teera i te akamaata atu i muri ake i tetai numero akakoroia no te tua anga. Inara, me kare e ko te reira te turanga, te karanga ra a Benecke e “ka rauka i te kopapa o te tangata i te akaou iaia uaorai no tetai tuatau roa tikai​—e tuatau ua atu.”

E akamanako, katoa ana, i te tu umere no te roro o te tangata, tei tere maata atu i ta tatou ka taangaanga no te reira i te tuatau o to tatou oraanga poto ua. Kia tau ki te Encyclopædia Britannica, no te roro o te tangata ra “e maata atu te kite tei orongaia mai i tei kite meitakiia ana i  roto i te aerenga oraanga o tetai tangata ra.” (1976 Tataanga, Voriumu 12, kapi 998) Te akakite maira te puka How the Brain Learns, na David A. Sousa, e: “No te au akakoroanga tau katoatoa, te rauka anga i te roro i te akaputuputu i te akakiteanga ra kare i kotingaia.”​—Kapi 78, Tataanga Rua, tikaanga 2001.

Eaa ra i kore ei i kiteaia e te aronga kimikimi ra te apii anga i te kopapa te tumu i mate ei tatou? E eaa ra i rauka maata ai i te roro o te tangata ra taua tu? Kua rauka e kua akapapaia ainei tatou kia rave tamou ua atu i te kite e tuatau ua atu? Eaa ra i rauka ai ia tatou i te akamanako atu i te ora mutu kore?

Te akakite maira te Pipiria e: “E kua tuku [te Atua] i te manako i to teianei ao ki roto i to ratou ngakau; i kore ei te tangata i kite i te angaanga a te Atua, mei te akamataanga mai e tae ua atu ki te openga.” (Koheleta 3:11) Te akakite maira teia au tuatua e kua tuku te Atua ki roto ia tatou te manako no te ora anga e tuatau ua atu. No taua tumu ra, ka rauka ua atu ia tatou i te apii i tetai apinga no runga i te Atua e tana au angaanga. Me ka ora tatou e pirioni ua atu mataiti​—ae, e tuatau ua atu​—ka rauka ua rai ia tatou i te apii maata atu no runga i te au angaanga umere tei angaia e te Atua.

Te akaari katoa maira te au tuatua a Iesu Karaiti e ka rauka te oraanga mutu kore no te tangata. Kua karanga aia e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Akapeea koe? Ka inangaro ainei koe kia ora e tuatau ua atu?

[Au Tutu i te kapi 3]

I kimi ana a Juan Ponce de León i tetai puna vai akariro kia mapu

[Akameitakianga]

Ponce de León: Harper’s Encyclopædia of United States History