Aaere na te Arataa o te Tu Tiratiratu
Aaere na te Arataa o te Tu Tiratiratu
“Kareka au nei, te aere nei au ma te [“tu tiratiratu,” NW].”—SALAMO 26:11.
1, 2. (a) Eaa ra i riro ei ei tuanga puapinga maata te tu tiratiratu o te tangata no te maroanga i to te Atua ra tu ngateitei? (e) Akapeea ra te au mea ora kite i te akaarianga e te tu ra ratou i te tua o to Iehova tu ngateitei?
I TO Satani meameaau anga i roto i te kainga i Edene, kua akatupu mai aia i te maroanga i te ao katoa e pini ua ake no te tikaanga o to te Atua tu ngateitei i runga ake i Tana au mea ora katoa. I etai tuatau i muri mai, kua akaao aia e ka akamori ua te tangata i te Atua me ka puapingaia ratou. (Iobu 1:9-11; 2:4) No reira, kua riro te tu tiratiratu o te tangata ei tuanga puapinga maata no te maroanga i to Iehova tu ngateitei i te ao katoa e pini ua ake.
2 Kare to te Atua tu ngateitei i vai ua ki runga i te tu tiratiratu o tana au mea ora, ka rauka i te au tangata e te au tamariki vaerua a te Atua i te akaari e teiea ratou e tu ra i runga i teia maroanga. Akapeea ra? Na te iki anga i te aru i tetai aerenga o te tu tiratiratu e me kare ra. No reira, e tumu anga ngaueue kore to tetai tangata tu tiratiratu no te akavaia anga aia.
3. (a) Eaa ta Iobu raua ko Davida e inangaro ra kia akara e kia akava a Iehova? (e) Eaa te au uianga tei mama mai no runga i te tu tiratiratu?
3 Ma te irinaki anga kua tuatua a Iobu: “E akateiaa [a Iehova] iaku ki roto i te arite tikai, kia kite te Atua i te pikikaa kore noku ra.” (Iobu 31:6) Ko te tu tiratiratu ta te Ariki ko Davida o Iseraela taito ra i pati kia Iehova kia akara mai i te pure anga aia e: “Tei ia koe te tuatua iaku, e Iehova; i aere ua ana oki au ma te [“tu tiratiratu,” NW]: i irinaki ana oki au ia Iehova; kare au e paeke.” (Salamo 26:1) Mei teaa ra te puapinga e kia aaere katoa tatou na te arataa o te tu tiratiratu! Inara eaa te tu tiratiratu, e eaa ra te aiteanga e kia aaere na te arataa o te reira? Eaa te ka tauturu ia tatou kia vai ua ki runga i te mataara o te tu tiratiratu?
‘I Aere ana Au ma te Tu Tiratiratu’
4. Eaa te tu tiratiratu?
4 Te akakite maira te tu tiratiratu i te manako no te tu tika, te apa kore, te tuatua tika, e te kino kore. Inara, e maata atu te o maira i te tu tiratiratu i to te rave anga i te tika. E tu mako akono tau te reira me kore e akamori anga ngakau ki katoa ki te Atua. Kua ekoko a Satani i te au akakoroanga o Iobu i te akakite anga aia ki te Atua e: “Kia akatika ua atura koe i to rima i tenana, ka rave atu ei i [to Iobu] ivi e tona kiko, kare aia e kore i te akakino ia koe ki mua i to mata.” (Iobu 2:5) Kapiti mai te angaanga tau, te umuumuia ra e te tu tiratiratu te akakeuanga tau o te ngakau.
5. Eaa te akaari maira e kare te akono anga i te tu tiratiratu e umuumu maira i te tu apa kore mei ia tatou?
5 Inara, te akono anga i te tu tiratiratu, kare e umuumuia te tu apa kore. E tangata apa ua te Ariki ko Davida e kua rave i te au tarevake kino e manganui i roto i tona oraanga. Inara, te tuatua ra te Pipiria iaia e ei tangata tei aaere “ma te tu tiratiratu o te ngakau.” (1 Ariki 9:4, NW) No teaa ra? No to Davida inangaro ia Iehova. Tei te Atua tona ngakau. Kua akakite puareinga ua aia i tana au ara, kua ariki i te akoanga, e kua akatikatika i tona au arataa. E tikai, kua kiteaia to Davida tu tiratiratu i roto i tana akamori anga ngakau tae e te aroa no tona Atua, ko Iehova.—Deuteronomi 6:5, 6.
6, 7. Eaa te kapiti maira ki te aaere anga na te tu tiratiratu?
6 Kare te tu tiratiratu i takotingaia ki tetai ua atu tu o te tangata, mei te akamori anga akonoanga ra. Te kapiti maira te reira i to tatou oraanga katoa. Kua “aaere” ana a Davida ma tona tu tiratiratu. “Te verepa no te ‘aere’ te akakite maira i te ‘aerenga o te oraanga’ me kore te ‘tu o te oraanga,’” i karanga ai The New Interpreter’s Bible. Te tuatua anga no te aronga tei “apa kore i te arataa,” kua imene te tata taramo e: “E ao to tei akono i [ta te Atua] au tuatua-akakite, ko tei kimi iaia ma te ngakau katoa. Kare oki ratou i rave i te ara: kua aere ratou na tona ra au arataa.” (Salamo 119:1-3) Te umuumu maira te tu tiratiratu i te kimi putuputu anga i te anoano o te Atua e te aaere anga na tona arataa.
7 Te aaere anga na te tu tiratiratu te umuumuia ra te pirianga tiratiratu ki te Atua, noatu e e au turanga reka koreia. Me akakoromaki tatou i raro ake i te au timata anga, te vai ngaueue kore anga noatu te au kino, me kore te patoi anga i te au timataanga mei te ao akono kore i te Atua, ka kiteaia to tatou tu tiratiratu. Ka ‘akarekareka [tatou] i to Iehova ngakau’ no te mea kua rauka iaia i te patoi atu i tei akakino mai iaia ra. (Maseli 27:11) No reira, ma te tumu anga meitaki, ka rauka ia tatou i te akapapu mei ta Iobu rai i rave e: “E mate ua atu au, kare rai au e pa i te [“tu tiratiratu,” NW] naku ra!” (Iobu 27:5) Te akaari maira te Salamo 26 e eaa te ka tauturu ia tatou kia aaere na te tu tiratiratu.
‘E Makitoro Marie Mai i Toku Manako e Toku Ngakau’
8. Eaa taau i kite mai i to Davida pati anga kia unuunumou a Iehova i tona manako e tona ngakau?
8 Kua pure a Davida: “E unuunumou mai koe iaku, e timata mai, e Iehova; e akamakitoro marie mai koe i toku manako e toku ngakau.” (Salamo 26:2) Tei roto roa i te kopapa te ngai i vai ei te nga katu ii. Ma te akatutuanga, te akatutu maira te nga katu ii i to tetai manako e te manako ngakau oonu roa. E ko te ngakau akatutu ra ko te katoa anga o te tangata i roto roa—tana akakeuanga, te au manako ngakau, e te kite. Te pati anga a Davida kia Iehova e kia unuunumou iaia ra, kua pure aia e kia kimiia e kia akaraia tona au manako e te au manako ngakau o roto roa.
9. Na roto i teea mataara i makitoro marie ei a Iehova i to tatou manako e te ngakau akatutu ra?
9 Kua pati akatenga a Davida e kia makitoro marieia tona manako e tona ngakau. Akapeea a Iehova i te makitoro marie anga i to tatou tu i roto ra? Kua imene a Davida: “Ka akameitaki au ia Iehova, ko tei ako mai iaku; te apii maira toku manako iaku i te po.” (Salamo 16:7) Eaa oki te aiteanga o te reira? Ko te aiteanga kia itaeia e te akoanga tu-Atua te au tuanga oonu roa o Davida e kia vai ua rai ki reira, te akatikatika anga i tona au manako e te au manako ngakau o roto roa. Kia pera rai tatou me akamanako ariki rekareka tatou i te akoanga tei rauka mai ia tatou na roto i te Tuatua a te Atua, i tona au komono, e tana akaaerenga e kia tuku i te reira kia vai oonu i roto roa ia tatou. Na te pure putuputu anga kia Iehova kia makitoro marie ia tatou na roto i teia mataara nei e tauturu ei ia tatou kia aaere na te tu tiratiratu.
‘To Aroa Takinga Meitaki ra tei Mua i Toku Mata’
10. Eaa tei tauturu ia Davida kia aaere na te tuatua mou a te Atua?
10 “Ko to [“aroa takinga meitaki,” NW] ra, tei mua ïa i toku mata,” i tuatua mai ei a Davida, “e i aaere ana au i te tuatua-mou naau ra.” (Salamo 26:3) Kua kite meitaki a Davida i ta te Atua au angaanga no te aroa takinga meitaki, e kua manako ariki oonu aia i te reira. “E akameitaki ia Iehova, e taku vaerua,” i imene ei aia, “e auraka tona katoa ra au [“ravenga,” NW] takinga-meitaki e akangaropoinaia.” Te akamaara anga i tetai “au ravenga” a te Atua, kua tuatua mai a Davida e: “Te rave rā Iehova i te tuatua-tika, e te tuatua-tau, ki te aronga katoa i takinga-kinoia ra. Kua akakite aia i tona au aerenga kia Mose; tana au angaanga ki te tamariki a Iseraela.” (Salamo 103:2, 6, 7) Penei ua ake te manako ra a Davida te pikikaaia anga te ngati Iseraela e Aiphiti i te tuatau ia Mose. Me koia ia, te akamanako anga e akapeea a Iehova i te akakite anga i tona au arataa akaora anga kia Mose e tika e kua akakeuia to Davida ngakau e kua akaketaketaia tana tautaanga kia aaere na te tuatua mou a te Atua.
11. Eaa te ka tauturu ia tatou kia aaere na te arataa o te tu tiratiratu?
11 Te apii putuputu anga i te Tuatua a te Atua e te akamanako oonu anga i ta tatou i kite no roto mai i reira ka tauturu katoa ia tatou kia aaere na te arataa o te tu tiratiratu. Ei akaraanga, na te akamaara anga e kua oro ke atu a Iosepha mei te au akainangaro anga tau kore a te vaine a Potiphara e mea papu e te akamaroiroi maira ia tatou kia oro ke atu mei taua au akainangaro anga mei ko i ta tatou ngai angaanga, i te apii, me kore i tetai atu ngai ke. (Genese 39:7-12) Akapeea ra me timataia mai tatou e te au ravenga no te puapinga anga i te pae materia me kore te rongonui e te mana i roto i teianei ao? E akaraanga to tatou no Mose, tei kopae ke i te au kaka o Aiphiti. (Ebera 11:24-26) I te akamanako anga i to Iobu akakoromaki anga kare ekoko anga e ka tauturu ia tatou kia akaketaketa i to tatou akakoroanga kia vai tiratiratu kia Iehova noatu te au maki e te au tumatetenga. (Iakobo 5:11) Akapeea ra me riro mai tatou ei aronga takinga kinoia? I na, na te akamaara anga i te tupuanga o Daniela i roto i te vaarua o te riona ka akauru ia tatou ma te mataku kore!—Daniela 6:16-22.
“Kare Au i Noo i Roto i te Au Tangata Tarevakaua”
12, 13. Eaa te au tu kapitianga ka kopae tatou?
12 Te taiku anga ki tetai atu tumu te akaketaketa ra i tona tu tiratiratu, kua tuatua a Davida e: “Kare au i noo i roto i te au tangata tarevakaua, kare oki i kapiti i roto i te aronga pikikaa. E mea riri naku te uipa anga tangata ara; kare oki au i noo i roto i te aronga kino.” (Salamo 26:4, 5) Kare a Davida i noo ana ma te aronga kino. Kua riri aia i te au kapitianga kino.
13 Akapeea ra tatou? Te patoi ra ainei tatou i te noo ma te au tangata tarevakaua na roto i te au porokaramu tivi, te au vitio, te au teata, te au ngai o te Internet, me kore na tetai atu au ravenga ke? Te akaatea mamao maira ainei tatou mei te aronga te uuna ra i to ratou tu? Ko etai pae i te apii me kare i ta tatou ngai angaanga penei ka pikikaa mai i te pirianga oa kia tatou no te au akakoroanga akavare ua. Te inangaro tikai ra ainei tatou i te akatupu i te au pirianga vaitata ki te aronga kare e aaere ana na te tuatua mou a te Atua? I muri i te au akaapa anga no te tu ngakau tae, penei ka uuna katoa te au apoteiti i ta ratou akakoroanga kia anga ke atu ia tatou i te tavini anga ia Iehova. Akapeea ra me te vai ra i roto i te putuputuanga Kerititiano etai pae te akono ra e rua tu oraanga? Te uuna katoa ra ratou e koai tikai ratou. Ko Jayson, te tavini ra i teianei ei tavini orometua tauturu, mei te reira rai te au oa i tona mapu anga. No runga ia ratou, te karanga ra aia: “I tetai ra kua karanga mai tetai o ratou kiaku e: ‘Kare e kino ana e eaa ta tatou e rave nei no te mea me tae mai te akatereanga o te au mea ou, ka mate tatou. Kare tatou e kite atu e me kua ngere ia tatou tetai apinga.’ Na taua tu tuatua ra i akamatakite mai iaku. Kare au e inangaro e kia mate atu au me tae mai te akatereanga o te au mea ou.” Kua akakore pakari a Jayson i tana kapitianga ma taua aronga ra. “Auraka e vavare,” ta te apotetoro ko Paulo i akamatakite mai. “E kino te tuatua meitaki i te kapiti anga kikino ra.” (1 Korinetia 15:33) Mei teaa ra te puapinga e kia kopae tatou i te au kapitianga kino!
‘Ka Tatau oki Au i Taau Katoa ra Au Angaanga Taka Ke Ra’
14, 15. Akapeea tatou i te ‘akapini anga atu ei i to [Iehova] atarau’?
14 “Ka orei au i oku puke rima i te apa kore; ka akapini atu ei au i to atarau, e Iehova,” i tuatua mai ei a Davida. No teaa ra? “Ka akakite atu ei ma te reo akameitaki, ka tatau ei oki i taau katoa ra au angaanga taka ke ra.” (Salamo 26:6, 7) Kua inangaro a Davida kia vai ma ua kia rauka oki iaia i te akamori ia Iehova e te akakitekite aere i tana akamori anga ki te Atua.
15 Te au mea ravarai te kapiti atura ki te akamorianga mou i te tapenakara e i muri mai i te iero ra e “tutu ïa e te ata o te au mea o te rangi ra.” (Ebera 8:5; 9:23) Te akatutu maira te atarau i to Iehova anoano i te ariki anga i te atinga o Iesu Karaiti no te okoanga i te tangata ravarai. (Ebera 10:5-10) Te orei nei tatou i to tatou rima ma te apa kore e ka ‘akapini atu ei i to [Iehova] atarau’ na te akono anga i te akarongo i roto i taua atinga.—Ioane 3:16-18.
16. Akapeea e puapingaia ai tatou i te akakite anga ki tetai ke i te au angaanga takake a te Atua?
16 I te akamanako anga tatou no runga pouroa te ka rauka i te oko ra, kare ainei to tatou ngakau e akakiia ma te akameitakianga no Iehova e no tana Tamaiti anau tai ra? No reira, ma te akameitakianga i roto i to tatou ngakau, kia akakite tatou ki tetai ke i ta te Atua au angaanga takake—mei te angaia anga mai te tangata i roto i te kainga Edene ki te akaou katoa anga i te au mea ravarai i roto i te ao ou o te Atua. (Genese 2:7; Angaanga 3:21) E mei teaa atura te paruruanga pae vaerua te angaanga tutu anga i te Patireia e te akariro anga i te tangata ei pipi ra! (Mataio 24:14; 28:19, 20) Te angaanga maata anga i roto i te reira te tauturu ra ia tatou kia akono oraora i to tatou manakonakoanga no te tuatau ki mua, kia ketaketa to tatou akarongo i roto i te au taputou a te Atua, e kia vai rai to tatou inangaro no Iehova e te au taeake tangata ra.
‘Kua Inangaro Au i te Vairanga o To Are’
17, 18. Eaa ra to tatou manako no te au uipaanga Kerititiano?
17 Ko te tapenakara, ma to te reira atarau no te au atinga, e ngai ia no te akamori anga ia Iehova i Iseraela. Te akakite anga i tona rekareka i taua ngai ra, kua pure a Davida e: “Kua inangaro au, e Iehova, i te vairanga o to are, e te ngai i noo ei toou ra kakā.”—Salamo 26:8.
18 Te inangaro ra ainei tatou i te akaputuputu mai ki te au ngai te apiiia ra tatou no runga ia Iehova? Te au Are Uipaanga Patireia katoatoa ma to te reira porokaramu no te akoanga pae vaerua kua riro ei ngai no te akamori anga mou i roto i te ngai tangata. Kapiti atu, e au uruoaanga ta tatou i te mataiti, te au akaputuputuanga kotinga, e te au ra akaputuputuanga takake. Te uriuriia ra ta Iehova “au tuatua-akakite” i ko i taua au uipaanga. Me apiiia tatou kia ‘inangaro maata i te reira,’ ka inangaro rai tatou kia tae atu ki te au uipaanga e kia akarongo meitaki atu tatou i te reira ia tatou i reira ra. (Salamo 119:167) Mei teaa atura te maoraora te piri anga atu ki te au taeake akarongo te manako maira i to tatou uaorai oraanga e te tauturu maira ia tatou kia vai ua rai ki runga i te mataara no te akono anga i te tu tiratiratu!—Ebera 10:24, 25.
‘Auraka kia Kapiti Katoaia Toku Ora’
19. Ko teea au ara ta Davida kare i inangaro ana kia kiteaia mai te apa?
19 Te kite pu tikai anga i te au turanga no te aere ke anga mei te aaere anga i te tuatua mou a te Atua, kua pati akatenga a Davida e: “Auraka kia kapiti katoaia toku [meta] ki to te aronga rave ara, e [toku oraanga] katoa nei ki to te aronga toto ra: Te vai ra te ravenga kino i roto i to ratou rima; kua ki oki to ratou rima katau i te tutaki.” (Salamo 26:9, 10, akaaite ia NW) Kare a Davida i inangaro ana kia kapitiia atu ki rotopu i te au tangata akono kore i te Atua tei apa ra no te ravenga kino me kore i te tutaki.
20, 21. Eaa te ka taki atu ia tatou ki te arataa o te au tangata akono kore i te Atua?
20 Kua ki maata tikai te ao o teia tuatau i te au ravenga tau kore. Te akamaroiroi maira te tivi, te au makatini, e te au teata i te “kanga.” (Galatia 5:19) Kua riro etai pae ei tavini ki te ravenga ainga viivii, te taki putuputu atura ki te tu akono tau kore. Ko te au mapu tikai te ka akakeuia e taua au akakeuanga ra. I etai au enua, e peu matauia te aere kapiti anga, e kua taomiia te au mapu ma te manako anga e e mea tau kia aere kapiti. Kua piri akainangaro te au mapu e manganui, noatu rai e e mapu ou ua rai ratou no te akaipoipoanga. Kia akamerengo i te au anoano ainga e tupu maira i roto ia ratou, kare i roa ana kua piri atu ratou ki roto i te tu akono tau kore e tae roa atu i te rave anga i te poneia.
21 Kare te aronga mamaata i paruruia mei taua au akakeuanga. Te au ravenga tiratiratu kore no te pitiniti e te manako anga i te rave i te au ikianga naau uaorai e akakiteanga ia no te ngere anga i te tu tiratiratu. Aaere anga na te arataa o te ao te akaatea mamao ua atura ia tatou mei ia Iehova. Kia “rikarika [tatou] i te kino, e kia inangaro i te meitaki” e kia aaere ua atu na te arataa o te tu tiratiratu.—Amosa 5:15.
“E Akaora Koe Iaku, e Aroa Mai oki Iaku”
22-24. (a) Eaa te akamaroiroianga taau i kite i roto i te au tuatua openga o Salamo 26? (e) Eaa te ereere ka uriuriia i roto i te atikara e aru mai nei?
22 Kua taopenga a Davida i tana tuatua ki te Atua, i te na ko anga e: “Kareka au nei, te aere nei au ma te [“tu tiratiratu,” NW]; e akaora koe iaku, e aroa mai oki iaku. Te takai nei toku vaevae i te ngai maniania; ka akameitaki rai au ia Iehova i roto i te au uipa anga ra.” (Salamo 26:11, 12) Kua kapitiia atu ta Davida tauta pakari anga kia akono i tona tu tiratiratu i tona pati akatenga anga no te okoanga. Mei teaa atura te akamaroiroi anga o te reira! Noatu to tatou turanga ara, na Iehova e tauturu mai ia tatou me tauta ua atu rai tatou i te aaere na te arataa o te tu tiratiratu.
23 Kia akaari to tatou tu no te ora anga e te akangateitei ra e te ariki rekareka ra tatou i te tu ngateitei o te Atua i roto i te au tu ravarai o to tatou oraanga. Ka rauka ia tatou taki tai i te pati kia Iehova na roto i te pure kia unuunumou e kia makitoro marie i to tatou manako e te manako oonu o roto roa. Ka akono tatou i tana tuatua mou ki mua ia tatou i te au taime ravarai na te apii meitaki anga i tana Tuatua. No reira, i te au tu ravarai, kia kopae tatou i te au kapitianga kino inara e akameitaki ia Iehova i roto i te au uipaanga. Kia piri maroiroi ua atu rai tatou i roto i te angaanga tutu anga i te Patireia e te akariro anga i te tangata ei pipi ra, auraka rava e tuku i teianei ao kia akakino mai i to tatou pirianga akaperepere ma te Atua. Ia tatou e rave meitaki ra kia aaere na te arataa o te tu tiratiratu, te irinaki ra tatou e ka aroa mai a Iehova ia tatou.
24 Mei te mea e te kapiti maira te tu tiratiratu i te au tu ravarai o te oraanga, te anoanoia ra tatou kia matakite i tetai ereere kino—te inu anga tau kore i te kava. Ka uriuriia teia i roto i te atikara e aru mai nei.
Maara Ainei ia Koe?
• No teaa tikai i akavaia ai te au mea ora kite no runga i te tumu anga o to ratou tu tiratiratu?
• Eaa te tu tiratiratu, e eaa te kapiti maira i te aaere anga na te reira arataa?
• Eaa te ka tauturu mai ia tatou kia aaere na te arataa o te tu tiratiratu?
• Kia akono i te tu tiratiratu, eaa te au kino ka matakite tatou e kia kopae ke atu?
[Au Uianga Apii]
[Tutu i te kapi 14]
Te pati putuputu ra ainei koe kia Iehova kia unuunumou i toou au manako oonu o roto roa?
[Tutu i te kapi 14]
Te akono ra koe i ta Iehova au angaanga no te aroa takinga meitaki ki mua i to mata?
[Au Tutu i te kapi 15]
Te akono anga tatou i te tu tiratiratu i raro ake i te au timata anga te akarekareka ra i to Iehova ngakau
[Au Tutu i te kapi 17]
Te rave ra ainei koe ma te tau i te au apinga a Iehova i te tauturu ia koe kia aaere na te arataa o te tu tiratiratu?