Akono Anga i te Manako Tau no te Inu Anga i te Kava

“E akavaavaa tei te wina, e kanga maata tei te kava kona: kare i te tangata pakari tei vare i te reira.”​—MASELI 20:1.

1. Akapeea te tata taramo i te akakite anga mai i tona ariki rekareka anga no etai au mea memeitaki no ko mai ia Iehova?

“TE AU mea memeitaki i o maiia ra, e te au mea tika ravarai, no runga ïa, no runga mai i te Metua o te au mārama ra,” ta te pipi ko Iakobo i tata mai. (Iakobo 1:17) Kua akakeuia ma te akameitakianga no te au mea memeitaki e manganui a te Atua, kua imene te tata taramo e: “Te akatupu nei koe i te ngangaere na te au puaka, e te rakau rikiriki na te tangata: te rauka nei te kai no roto i te enua; E te wina, e rekarekaʼi te ngakau o te tangata nei, te manongi, e inuinu ei tona mata, e te manga e maroiroi ei te ngakau tangata nei.” (Salamo 104:14, 15) Te uaina e tetai atu au kava, mei te rakau rikiriki, te manga, e te  inuinu, e au mea memeitaki no ko mai i te Atua. Akapeea tatou i te taangaanga anga i te reira?

2. Eaa ra te au uianga ka akamanako tatou no te inu anga i te kava?

² Ko tetai mea oronga rekarekaia mai e meitaki ua me taangaanga meitakiia. Ei akaraanga, e “meitaki” te meri, inara “kare te mea meitaki kia kai maata i te meli.” (Maseli 24:13; 25:27) Penei te arikiia ra te inu anga i te “manga wina iti ra,” e kino pakari tikai te inu tau kore anga i te kava. (1 Timoteo 5:23) “E akavaavaa tei te wina,” i akamatakite mai ei te Pipiria, “e kanga maata tei te kava kona: kare i te tangata pakari tei vare i te reira.” (Maseli 20:1) Eaa, i reira, te akataka maira i te akavare angaia e te kava? * Eaa te maata o te maata rava? Eaa ra te manako tau no runga i teia?

‘Tei Akavareia’ e te Kava​—Akapeea Ra?

3, 4. (a) Eaa ra te akaari maira e te akaapaia ra te inu anga kia tae roa kia kona i te kava i roto i te Pipiria? (e) Eaa ra etai au akairo anga no te kona kava?

³ I Iseraela i taito, ko tetai tamaiti tei kaituauau tataraara kore e te kona kava kua peiia ki te toka kia mate takiri. (Deuteronomi 21:18-21) Kua akamatakite te apotetoro ko Paulo i te au Kerititiano e: “Auraka kotou e kapiti atu i te tangata e karangaia e taeake kia riro ei tangata kanga, e te noinoi apinga, e te akamori idolo, e te akakino, e te kona kava, e te aru; auraka katoa e kai atu i te manga i reira.” Te taka meitaki ra e, te inu anga kia tae roa kia kona i te kava te akaapaia ra i roto i te au Tuatua Tapu.​—1 Korinetia 5:11; 6:9, 10.

⁴ Te akataka anga i te au akairo no te kona kava, te akakite maira te Pipiria e: “Auraka e akara i te wina kia muramura mai, kia panapana i roto i te kapu ra, e topa ngoie iora ki raro. Kia tae oki ki te openga ra, e tau tona kakati ki to te ovi, rato atura oki tona kava mei to te vipera ra. E riro oki to mata i te akara i te [“au mea tuke rai,” NW]; e tupu oki te manako kino ki roto i to ngakau na.” (Maseli 23:31-33) Te inu maata anga ra ka kakati mei te poitini o te ovi, te akatupu anga i te maki, te oripuanga o te manako, pera katoa kare e kite mai. Penei ka kite tetai kona kava i te “au mea tuke rai” penei ka manako akavare aia me kore ra te manako moemoea ua ra. Penei kare katoa aia e arairaiia ana i te tuatua anga i te au manako e te au anoano viivii ko tei matauia e araiia ana.

5. Na teea tu e kino ei te inu maata anga i te kava?

⁵ Akapeea ra me te inu ra tetai i te kava inara te matakite ra e auraka e inu e tae roa atu ki te kona anga i te kava? E meangiti ua te akairo ta etai pae tangata ka akaari mai no te kona kava noatu e kua inu maata i te kava. Inara, i te manako anga e kare taua ravenga e kino ana te o atura ki roto i tetai tu no te akavare anga ia koe uaorai. (Ieremia 17:9) Ma te marie ua, penei ka akatupu tetai i te irinaki anga ki runga i te kava e ko tei riro mai “ei inu maata i te wina.” (Tito 2:3) No runga i te ravenga te riro anga mai ei tangata kai kava ra, te karanga ra te vaine tata ko Caroline Knapp e: “Te riro anga mai ei tangata kai kava e ravenga aere marie ua te reira.” E ereere kino tikai ia te inu maata anga i te kava!

6. Eaa ra tetai ka kopae ei i te inu maata anga i te kava pera katoa te kai?

⁶ E akamanako katoa ana i ta Iesu akamatakite anga: “E matakite ra ia kotou, ko te opue aea to kotou ngakau i te maata o te kai e te kona, e te pekapeka o teianei ao, ka rokoia mai ei kotou e taua rā ra, kare i manakoia atu. E rokoia mai oki tei noo i te ao katoa nei i te reira, mei te ereere ra.” (Luka 21:34, 35) Kare e umuumuia te inu anga kia taeria ki te kona kava i mua ake ka  akariro ei te reira i tetai tangata ra kia varea moe me kore kia kope​—i te pae kopapa pera katoa i te pae vaerua. Akapeea ra me taenaia mai aia e to Iehova ra ra e tei roto i taua turanga ra?

Ka Taki Atu te Inu Tau Kore Anga i te Kava ki Teaa

7. Eaa ra te inu tau kore anga i te kava kare e tau ana ki te akauenga tei akakiteia ia 2 Korinetia 7:1?

⁷ Te taki atura te vaito kore anga o te kava i tetai ki te au kino e manganui​—i te pae kopapa e i te pae vaerua. Ko te au maki tei akatupuia no te inu tau kore anga i te kava ko te maki kai ate, te hepatitis no te kai kava, e etai au maki no te akatereanga i te roro e te uo ivi mei te au maki manako. Me roa te inu tau kore anga i te kava ka taki katoa atu ki te cancer, ki te toto vene, e etai atu au maki pukuatu e te maki kopu. Te inu tau kore anga i te kava kare e rotai katoa ana ki te akauenga Tuatua Tapu: “E tamā ua tatou ia tatou uaorai i te au viivii katoa o te kopapa e te vaerua, ma te akaope marie i te akonoanga tapu i te mataku anga atu i te Atua.”​—2 Korinetia 7:1.

8. Kia tau kia Maseli 23:20, 21, eaa te ka tupu mai mei te inu tau kore anga i te kava?

⁸ Te aite anga katoa no te inu tau kore anga i te kava ko te kaimoumou anga i te moni, pera katoa te ruti anga i te angaanga. Kua akamatakite te Ariki ko Solomona o Iseraela taito e: “Auraka koe e kapiti katoa ki te aronga i kona i te wina ra: ki roto i te aronga e kaituauau i te puaka.” No teaa ra? Kua akataka mai aia e: “Ko te konā kava oki, e te kaki nui ra, ka putaua ïa; e na te moe ua e akakakau mai ki te kakau ngaengae.”​—Maseli 23:20, 21.

9. Eaa ra ei mea pakari no tetai tangata kia kopae mei te inu anga i te au kava me ka akaoro aia i tetai apinga akaoro?

⁹ Te tou anga ki tetai ua atu kino, te karanga ra The Encyclopedia of Alcoholism e: “Te akaari maira te au apii anga e te akatupu ra te kava i te akamarie anga mai i te tu karape o te akaoro anga, kapiti mai te viviki i te ariu anga, te akatereanga, te matakite, te kite mata anga e te manako meitaki.” Te au turanga no te kairo anga i te akaoro ki te inu anga e tumatetenga tikai. I Marike ua, e ngauru tauatini ua atu tei mate e e anere tauatini ua atu te u ra i te au mataiti ravarai no te au tumatetenga i runga i te mataara te piri atura ki te kava. Ko tei rokona tikai ia e teia kino nei ko te au mapu, kare e kite roa ana i te akaoro meitaki pera katoa i te inu anga. Ka rauka ainei i tetai ua atu tangata i te akaoro i muri mai i te inu maata anga i te kava e oti akera i taua taime rai te karanga ra e te akangateitei ra i te ora ei mea orongaia mai no ko mai i te Atua ra ko Iehova? (Salamo 36:9) I te akamanako anga i te tu tapu o te oraanga, e mea meitaki no tetai tangata ra e auraka oki e inu i te au kava me ka akaoro aia.

10. Akapeea te kava i te akatuke anga i to tatou manako, e eaa ra i kino ei te reira?

¹⁰ Te vaito kore anga i te kava te tamamae ra i te tangata e kare e no te pae kopapa ua mari katoa ra i te pae vaerua. “Te wina, e te wina ou, i riro ke ei te ngakau,” ta te Pipiria e akakite maira. (Hosea 4:11) Te akatuke ra te kava i te manako. “Me inu tetai tangata,” i akataka mai ei tetai puka na te U.S. National Institute on Drug Abuse, “ka aere te kava na roto i te akaaere anga kopu ki roto i te akaaere anga o te toto e ka tae viviki atu ki te roro. Ka akamata te reira i te akamarie mai i te au tuanga o te roro te akaaere ra i te manako anga e te manako ngakau. E manako arairai kore to te tangata ra.” I roto i taua turanga, te akara anga maata te ‘akavareia’ ra tatou, i te rave anga i te mea tau kore, e te akatuera anga ki te au timataanga e manganui.​—Maseli 20:1.

11, 12. Eaa ra te kino i te pae vaerua ka tupu mai mei te inu maata anga i te kava?

 ¹¹ Tei runga ravao, te akaue maira te Pipiria e: “Te kai ra e te inu ra oki, e te au mea ravarai ta kotou e rave na, e rave anake ïa ma te akakakā i te Atua.” (1 Korinetia 10:31) Te oronga ra ainei te inu maata anga i te kava i te kaka ki te Atua? E mea papu e ka inangaro tetai Kerititiano i te kopae i tetai tu no te manakoia anga ei tangata inu maata. Ka apai mai taua tu i te akakino anga ki runga i to Iehova ingoa, kare i te akakaka anga.

¹² Akapeea me te turori ra ta tetai Kerititiano vaito kore anga i te kava i tetai taeake irinaki ra, penei ua ake i tetai pipi ou ra? (Roma 14:21) “Tei akatarevake i tetai o teianei aronga tangata rikiriki e akarongo mai iaku nei, e ngari ake aia kia riia tetai toka tavirianga ki runga i tona kaki, e kia akamaremoia ki raro i te moana.” (Mataio 18:6) Te inu maata anga ka akatupu katoa i te ngere anga i te au akameitakianga i roto i te putuputuanga. (1 Timoteo 3:1-3, 8) Auraka oki e akangaropoina i te maroanga ta te inu tau kore anga i te kava ka akatupu i roto i te ngutuare tangata.

Kopae i te Au Kino​—Akapeea Ra?

13. Eaa ra te tumu puapinga i te kopae anga i te inu tau kore anga i te kava?

¹³ Ko tetai taviri kia kopae i te au kino no te inu tau kore anga i te kava koia oki te kite anga e ko teea te kotinga, kare e no rotopu ua i te inuanga maata e te kona kava, kareka ra i rotopu i te vaito anga e te inuanga maata. Naai e akataka mai e ko teea teia kotinga anga noou? No te mea e manganui te au tumu te o maira, kare e ture pakari e vai ana e mei teaa te maata roa atu i te inu anga i te kava. E mea tau kia kite oki tetai uaorai i tona kotinga e kia vai rai i roto i taua kotinga anga. Eaa te ka tauturu ia koe kia iki e eaa te maata o te maata rava noou ra? E kaveinga ainei tetai te ka riro ei arataki anga?

14. Eaa ra te kaveinga arataki anga te ka tauturu ia koe te kotinga anga i rotopu i te vaito anga e te inuanga maata?

¹⁴ Te akakite ra te Pipiria e: “E tāpu koe i te pakari meitaki e te akono; Ko te ora ïa no toou ra vaerua, e ko te apinga manea ïa ki runga i toou ra kaki.” (Maseli 3:21, 22) No reira, te kaveinga arataki anga kia aru, ko teia oki: Ko tetai ua atu manga kava te arairai ra i toou manako e te akaaveave ra i toou manako kite kua maata roa atu taau uaorai inu anga. Inara e mea tau kia tika tikai koe kia koe uaorai i te kite anga e eaa oki taua kotinga ra!

15. Noatu e tai ua inu anga peea ra e kite ei e maata katoa te reira?

¹⁵ I etai au turanga, noatu e tai ua inu anga penei e maata rava ia. I te akamanako anga i te kino ki te pepe kare i anauia ake, penei ka iki tetai vaine nui e kia kore e inu katoa. E kare ainei ei mea meitaki kia akakore atu i te inu anga i mua i tetai tangata e manamanata tona no te kava me kore kare tona akava ngakau e akatika i te inu anga? Kua akaue a Iehova i te aronga te rave ra i te au angaanga taunga i te tapenakara e: “Auraka ei wina e te kava kona e inumia e koe . . . kia aere kotou ki roto i te Are uipaanga ra, ka mate aea kotou.” (Levitiku 10:8, 9) No reira, e kopae i te inu anga i te au kava akakona i mua ake ka aere atu ei ki te au uipaanga Kerititiano, te piri anga atu ki roto i te angaanga orometua, e te akono anga i tetai ua atu au apainga i te pae vaerua. Tei runga ravao, i roto i te au enua kua tureia te inu anga i te kava me kore kua akatika uaia ki te aronga me taeria ki tetai mataiti, kia orongaia te akangateitei anga ki te au ture o te enua.​—Roma 13:1.

16. Akapeea koe i te iki anga e eaa te ka raveia me tukunaia mai tetai kava ki mua ia koe?

 ¹⁶ Me ka orongaia mai tetai kava me kore ka tukunaia mai ki mua ia koe, ko te uianga mua kia uiia koia oki: ‘Ka inu ainei au?’ Me iki koe i te inu, kia maara ra i taau uaorai kotinga, e auraka e akamaata atu i taua kotinga. Auraka e akatika i te tangata akamanuiri takinga meitaki kia akakeu ia koe. E kia matakite i te au ngai inu kava te orongaia ra te au kava kare i takotingaia i taua au ngai ra mei te akaputuputuanga akaipoipo. I te au ngai e manganui, te akatikaia ra te tamariki e te ture kia inu i te kava. Tei te nga metua te apainga kia apii i ta raua tamariki no runga i te inu anga i te kava e kia akarakara i ta ratou au angaanga i roto i teia tu.​—Maseli 22:6.

Ka Rauka ia Koe i te Akono i te Manamanata

17. Eaa ra te ka tauturu ia koe i te kite e me e manamanata toou no te inu tau kore anga i te kava?

¹⁷ E manamanata ainei noou te inu tau kore anga i te uaina e te kava kona ra? Auraka e vavareia no runga i te reira, me te riro maira te inu tau kore anga i te kava ei ara muna, kare e roa atu me kore i muri maira ka tupu mai te reira kia koe. No reira e akara pakari ia koe uaorai ma te tika tikai. E ui i taua au uianga kimikimi uaorai e: ‘Te inu putuputu ra ainei au kare oki mei taku i rave ana i mua ana? Kua pakari mai ainei taku kava? Te inu ra ainei au i te kava kia akakore atu i te au apiapi, te taitaia, me kore i te au manamanata? Kua akakite mai ana ainei tetai mema ngutuare me kore tetai oa no runga i taku inuinu anga? Kua akatupu ainei taku inu anga i te au manamanata i roto i toku ngutuare? Te ngata ra ainei iaku i te akakore i te kava e tai epetoma, e tai marama, me kore i te au marama ra? Te uuna ra ainei au mei tetai ke i te maata o te uaina me kore i te kava taku e inu ra?’ Akapeea ra me e ae te pauanga ki etai o teia au uianga nei? Auraka e aite ki tetai tangata tei ‘akara i tona mata i roto i te io ra ngaropoina ua iora tona tu iaia uaorai i reira ra.’ (Iakobo 1:22-24) E rave i te au takainga kia akatanotano i te manamanata. Eaa ra taau ka rave?

18, 19. Akapeea e rauka ai ia koe i te akamutu i te inu maata anga i te kava?

¹⁸ Kua ako te apotetoro ko Paulo i te au Kerititiano: ‘Auraka e kona i te wina, e tupu ei te kanga maata; kia ki ra kotou i te vaerua.’ (Ephesia 5:18) E iki e eaa oki te maata o taau kava, e kia akanoo i te au kotinga tau. E akapapu meitaki e auraka e akamaata atu i te reira; e akono i te akatere-uaorai. (Galatia 5:22, 23) E au oa ainei toou te maro maira ia koe kia inu maata? Kia matakite. “Ko tei kapiti katoa i tona aerenga ki to te aronga pakari ra, ka pakari katoa ïa,” i akakite mai ei te Pipiria, “ko tei kapiti ra ki te aronga neneva ra, e mate ïa.”​—Maseli 13:20.

¹⁹ Me te inu ra koe i te kava kia akakore atu i etai manamanata, e aro tika atu i te manamanata. Ka rauka te au manamanata i te akonoia na te taangaanga anga i te akoanga no roto mai i te Tuatua a te Atua. (Salamo 119:105) Auraka e taroaroa i te kimi i te tauturu a tetai tangata pakari Kerititiano irinakiia. E taangaanga meitaki i te au mea a Iehova kia patu i toou tu i te pae vaerua. E akaketaketa i toou pirianga ki te Atua. E pure putuputu kiaia​—no runga tikai i toou au tu paruparu. E pati ki te Atua kia ‘makitoro marie mai i toou manako e toou ngakau.’ (Salamo 26:2) Mei tei uriuriia i roto i te atikara i mua akenei, e rave ua atu rai koe i te aaere na te arataa o te tu tiratiratu.

20. Eaa ra te au ravenga taau ka rave kia rauka i te akono i tetai manamanata e tupu ua atura no te inu maata?

²⁰ Akapeea ra me ka aere ua atu te manamanata  no te inu maata anga noatu taau au tauta anga? Ka tau kia aru koe i ta Iesu ako anga: “E te apa ra koe i to rima ra, ka tipu ke atu: e meitaki koe i te rima okotai kia tae ki te ao ra, i te rima rua kia tae ki te po, ki roto i te ai mate kore.” (Mareko 9:43) Te pauanga: Auraka e inu. Ko ta tetai vaine ia ta tatou ka kapiki ko Irene i rave ma te manako papu. “Vaitata rai e rua e te apa mataiti i muri ake i te tu rangimarie,” i karanga ai aia, “kua akamata au i te manako e penei ka meitaki e tai ua inu anga, i te akara ua anga e me ka rauka iaku i te akono i te reira. Inara me ua ake ka manako au na te reira tu, ka tuku viviki au i te tumu manako kia Iehova na te pure anga. Ka tauta pakari au e auraka rava e inu i te kava e tae ua mai te akatereanga ou​—e noatu rai i reira.” Te akakore takiri anga kare e tutaki anga teitei rava no te ora anga i roto i to te Atua ao ou tuatua tika ra.​—2 Petero 3:13.

“E Akaarite i to Kotou Taemoemo Anga, kia Rauka te Korona”

21, 22. Eaa ra te arai anga te ka tapu ia tatou kia kore e taenaia te openga i roto i te oro anga no te ora, e akapeea tatou i te kopae anga i te reira?

²¹ I te akaaite anga i te aerenga oraanga o tetai Kerititiano ki tetai oro, me kore ki tetai taemoemo anga, te karanga ra te apotetoro ko Paulo e: “Kare ra kotou i kite e ko te aronga e oro i te taemoemo anga ra, e oro katoatoa ïa, okotai ua ra e rave i te korona: E akaarite i to kotou taemoemo anga, kia rauka te korona. E te tangata ravarai e manono kia riro iaia te re ra, e akono ïa i tei tau i te au mea katoa nei. Kia rauka te korona pe ua i peraʼi ratou; kareka tatou kia rauka ïa te korona pe kore. E teianei te oro nei au, kare ra mei te mea kare i kitea; te moto nei au, kare ra mei te mea e, e moto ki te matangi: Te moto nei ra au i taku kopapa kia vi: ko te riro ua aea oki au, ko tei ako ia etai ke ra, ei tangata kite koreia mai.”​—1 Korinetia 9:24-27.

²² Ka oronga uaia te re ki te aronga tei akaoti meitaki i te oro anga. I roto i te oro anga no te ora, te inu tau kore anga i te kava ka tapu ia tatou kia kore e taenaia te openga. Kia akono tatou i te akatere-uaorai. Te oro anga ma te manako papu te umuumuia ra e auraka tatou e rave atu i “te inu nui i te wina ra.” (1 Petero 4:3) Ei tuke anga, te anoanoia ra kia akono tatou i te akatere-uaorai i roto i te au mea ravarai. No runga i te inu anga i te kava, e mea pakari no tatou kia “kopae ke i te tu akono kore i te Atua e te au anoano o teianei ao e kia noo ma te manako tau e te tuatua tika e te akono i te Atua ra.”​—Tito 2:12, NW.

[Tataanga Rikiriki i Raro]

Maara Ainei ia Koe?

• Eaa ra te inu tau kore anga i te kava?

• Eaa ra te mamae ka tupu mai mei te inu tau kore anga i te kava?

• Akapeea koe me kopae i te au kino no te inu tau kore anga i te kava?

• Akapeea tetai me akono i te manamanata no te inu tau kore anga i te kava?

[Au Uianga Apii]

[Tutu i te kapi 19]

Na te uaina “e rekarekaʼi te ngakau o te tangata nei”

[Tutu i te kapi 20]

Kia kite tatou i to tatou uaorai kotinga anga e kia vai rai i roto i te reira

[Tutu i te kapi 21]

E iki na mua e ko teea te kotinga

[Tutu i te kapi 22]

E pure putuputu kia Iehova no runga i toou tu paruparu

[Tutu i te kapi 23]

Tei te nga metua te apainga kia apii i ta ratou tamariki no runga i te inu anga i te kava