Au Uianga a te Aronga Tatau

Eaa ra a Iesu tei akatuakaouia i pati atu ei ia Toma kia akatukia iaia i na kua tapu aia ia Maria Magadala i mua atu ana mei te raveanga i te reira?

Te oronga maira tetai o te au urianga takere atu no te Pipiria i te akaraanga e kua karanga a Iesu ia Maria Magadala e auraka e akatukia atu iaia. Ei akatauanga, kua uri te King James Version i te au tuatua a Iesu e: “Auraka koe e akatukia mai iaku; kare rai au i tae ki runga i toku Metua ra.” (Ioane 20:17) Inara, te verepa Ereni mua, kua matauia i te uriia e “akatukia,” te aiteanga koia oki “kia mou piri, kia tautau ki runga, kia rave atu, kia mou atu, kia amiri atu.” Kua tau i reira, e kare i te mea e te patoi ra a Iesu ia Maria Magadala i te tukia ua atu anga iaia, mei tera oki kua akatika aia i tetai papaki vaine tei te ngai tanumanga kia ‘tapeka i tona vaevae.’​—Mataio 28:9.

Manganui te au urianga i teia tuatau nei, mei taua ra o te New World Translation of the Holy Scriptures, The New Jerusalem Bible, e te The New English Bible, te tauturu ra ia tatou kia marama i te aite anga tikai o ta Iesu au tuatua na te uri anga i te reira: “Auraka koe e mou piri mai iaku.” Eaa ra a Iesu i tuatua ei i te reira kia Maria Magadala, e taeake vaitata oki aia?​—Luka 8:1-3.

Kua papu e, kua mataku a Maria Magadala e te aere ra a Iesu ka akaruke e ka aere atu ki runga i te rangi. Akakeuia e tona inangaro maata kia noo ma tona Atu, te mou piri ra aia kia Iesu, kare oki i tuku ana iaia kia aere. I te akapapuanga iaia e kare aia e akaruke, kua ikuiku a Iesu ia Maria e auraka e mou piri kiaia mari ra kia aere e kia akakite atu ki tana au pipi i te au nuti o tona akatuakaouanga.​—Ioane 20:17.

E tuke rai te tuatua i rotopu ia Iesu e Toma. I to Iesu mama mai anga ki etai au pipi, kare oki a Toma i reira. I muri akera, kua akakite a Toma i tona au ekoko anga no runga i to Iesu akatuakaouanga, i te tuatua anga e kare roa aia e irinaki i te reira kia kite roa aia i to Iesu au puta naero e kia tuku i tona rima i roto i te tua i korareia ai a Iesu. Varu ra i muri mai, kua mama akaou mai a Iesu ki tana au pipi. I teia taime ra, tei ko oki a Toma, e kua pati atu a Iesu iaia kia amiri i tona au puta.​—Ioane 20:24-27.

No reira, i te tua ia Maria Magadala, te akono ra a Iesu i tetai inangaro tuku tau koreia kia arai atu iaia mei te akaruke anga; i te tua ra ia Toma, te tauturu ra a Iesu i tetai tangata e e au ekokoanga tona. I roto i nga akatauanga e rua, e au tumu meitaki ta Iesu i te raveanga i te mataara i rave ei aia.