‘Mataora no Taku Tereni Anga’

KUA poitirere tikai te mapu a Kazuna i te karanga mai anga tona puapii e kia tomo atu aia ki roto i tetai tarere tuatuaanga Papaa. Kua akatueraia te tarere ki te au apii teitei katoatoa i runga i te airani maatamaata o te pae tokerau o Tiapani ko Hokkaido, inara kare roa tana apii i tuku atu ana i tetai tamariki apiipii no te tarere i mua atu ana. I te ra o te tarere, kua mataku mai a Kazuna no te mea ka tarere atu aia ma tetai 50 tamariki apiipii ke atu. Kua mataku roa mai aia i te kite atu anga i nga tangata akava e rua e e Papaa to raua reo tupuna.

Kua akakiteia mai te aronga tei re ra, akamataanga ki te tangata tei peke iaia i te re meangiti roa atu. I te akakiteia mai anga i te taopenga ra i to Kazuna ingoa, kua poitirere tikai aia. Koia e tona puapii, te noo ra i te pae mai iaia, kua akara i tetai e tetai ma te umere tikai. Te poitirere ra rai, kua aere atu a Kazuna ki ko i te paata e kua orongaia mai tana kapu​—no te re tai!

“Kua rauka anake teia no te tereni anga te orongaia maira e ta Iehova akaaereanga na roto i te Apii Orometua Teokaratiki,” i akataka mataora mai ei a Kazuna. “Kua mataora tikai au e kua rauka oki iaku i teia tereni anga.” Taua apii ra, tei piri atu a Kazuna ki roto mei tona meangiti anga mai, ko tetai ia o te au uipaanga putuputuanga a te Au Kite o Iehova. I te teateamamaoanga no te tarere, kua akono meitaki a Kazuna i te akamanakoanga takake ki te taangaanga anga o te pu, te tuatua anga ma te maru e te maoraora, taangaanga anga i te au akatutuanga, akarakaraanga ki te aronga akarongorongo maira, e tetai atu au tumu manako ke e apiiia ana i roto i te Apii Orometua Teokaratiki.

E ariki ine i ta matou patianga kia aere mai e kia akara i teia apii, tei raveia i te au epetoma i tetai Are Uipaanga Patireia i te pae ua mai o te Au Kite o Iehova. E akara uaorai koe e akapeea te mapu e te pakari katoa e puapingaia ai. Te akatueraia ra te uipaanga ki te katoatoa. No tetai akakiteanga maata atu no runga i te apii vaitata ake ki toou kainga, e aravei atu ine i te Au Kite o Iehova i roto i toou ngai nooanga.