Ra Karatuati Anga​—E Ra Manea

“KUA akameitakiia tatou ma tetai ra manea. Te iti maira te ra. E auika te rangi. E matie te ngangaere. Te imene nei te au manu. Kua rauka ia tatou te akanoonoo anga no tetai ra manea, e kare oki tatou e mareka kore. Kare a Iehova i te Atua mareka kore. E Atua aia no te au akameitakianga.”

Ma taua au tuatua ra, na te Taeake ko Samuel Herd, e mema no te Pupu Akaaere o te Au Kite o Iehova, i akamata mai i te porokaramu karatuati anga no te 117 pupu Apii Pipiria Punanga Tiaki o Gileada. Ko Tepetema 11, 2004 te reira. Kua kapiti mai te porokaramu memeitaki i te ako anga akamaroiroi anga tei akatumuia ki runga i te Pipiria e pera katoa te au tupuanga no reira mai e te au tupuanga mei te ngai mitinari. Ae, e ra manea te reira no te 6,974 tei tae katoatoa mai ki te Ngai Apiipii Anga Punanga Tiaki i Patterson, New York, e i te au ngai i Brooklyn e Wallkill, tei kapitiia na roto i te rekoti tepe e te vitio.

Au Tuatua Akamaroiroi Anga no te Aronga Apiipii

Kua oronga mai a John Kikot, e mema aia no te Kumiti Manga i Marike, i te au tuatua akamaroiroi anga no runga i te tumu tuatua “E Tamou i te Rekareka ei Mitinari.” Kua tou mai aia e kua kiteaia te aronga apiipii Gileada no to ratou rekareka, te kiteaia ra i teia karatuati anga. Te oronga maira te ikuikuanga mei te au Tuatua Tapu i te tuatau apii anga i te rekareka ki te aronga apiipii, e kua rauka ia ratou i teianei i te tauturu atu i tetai ke kia kite i taua rekareka ra. Akapeea ra? Na te oronga anga ia ratou uaorai ei au mitinari i roto i ta ratou angaanga orometua. Kua karanga a Iesu e: “E maata atu te mataora o te orongaanga i to te rave mai.” (Angaanga 20:35, NW) Ia ratou e aru ra i te Atua ko Iehova, “te Atua mataora” takinga meitaki, tei oronga mai i te tuatua mou ki tetai ke, ka rauka i te au mitinari ou i te tamou i to ratou uaorai rekareka.​—1 Timoteo 1:11, NW.

Ko tetai mema o te Pupu Akaaere tei aru mai i roto i te porokaramu, ko David Splane, ko tana tumu tuatua koia oki “Ka Piri Meitaki Atu Ainei Koe ma Tetai Ke?” Kare ekoko anga e e mea meitaki e te mataora kia noo katoa ma te tau tikai, noatu e me te umuumu maira teia kia riro mai ei “au mea katoa i te tangata ravarai nei.” (1 Korinetia 9:22; Salamo 133:1) Kua taiku mai te Taeake ko Splane e ka piri atu te aronga apiipii karatuati ma tetai pae e manganui i roto i te angaanga mitinari​—ki te au tangata o te reira ngai, te au taeake mitinari, te au taeake e te au tuaine i roto i to ratou putuputuanga ou, e te aronga i ko i te opati manga te arataki ra i te angaanga tutu anga e te apii anga. Kua oronga mai aia i te au akakite anga tau e akapeea i te akariro anga kia rauka mai te au pirianga ei mataora anga tikai: E apii i te reo o te reira ngai, kia kite atu i te au peu o te reira ngai, e akangateitei i te tu muna o te au taeake mitinari, e kia akarongo ki te aronga te rave ra i te arataki anga.​—Ebera 13:17.

Aru mai, kua ui te tangata ikuiku Gileada ko Lawrence  Bowen e, “Te Manako ra Ainei Koe i to te Atua Manako me i to te Tangata Nei?” Kua akamaaraara atu aia i te aronga apiipii e ko te aronga tei ‘akava i te tu i vao ake’ kare i ariki ana ia Iesu ei Mesia. (Ioane 7:24) Ei au tangata apa ua, te anoano pouroaia ra kia matakite i te ‘manako anga i te au manako o te tangata’ kare i te “au manako o te Atua.” (Mataio 16:22, 23, NW) E mea tau kia rave ua atu te tangata pae vaerua i te akatikatika i to ratou manako. Mei tetai pai i te moana, ka riro te au akatikatika anga i teianei ei tuke anga i to rotopu i te itae anga i te akakoro anga me kare i te mamae anga i te ngaangaa pai i te pae vaerua. Te rave ua anga i te apii i te Pipiria i roto i to te reira papaanga te tauturu ra ia tatou kia manako i te “au manako o te Atua.”

Na Wallace Liverance, ko tetai tangata ikuiku i te Apii Gileada, i taopenga mai i teia tuanga o te porokaramu. Kua akatumuia ki runga ia Isaia 55:1, ko tana tumu tuatua koia oki “Eaa Taau ka Oko?” Kua akamaroiroi aia i te aronga apiipii kia “oko” i te akaangaroi, te rekareka, e te tauturu tei aere maira mei roto mai i te karere totou a te Atua no to tatou tuatau. Kua akaaite ta Isaia totou i teia tuatua nei a te Atua ki te vai, te uaina, e te u. Akapeea e okoia ai te reira e “auraka ei moni, auraka oki ei oko”? Kua akataka mai te Taeake ko Liverance i te reira e na te akono meitaki anga i te totou Pipiria e te taui anga i te au manako e te au aerenga kare i te pae vaerua ra ki te au manako e te au aerenga o te Atua. (Isaia 55:2, 3, 6, 7) Na te rave anga i teia, ka rauka i te au mitinari ou i te  akono i ta ratou au tukuanga angaanga ke. Te manako putuputu ra te au tangata apa e te vai ra te tu mataora ki runga i te aruaru anga i te akapumaana anga a te apinga. “Auraka e irinaki i te reira,” i raurau mai ei te vaa tuatua. “Auraka e irinaki i taua manako. E akapapu e kua akanooia tetai tuatau o te apii anga tau no te Tuatua totouia a te Atua. Ka rauka te reira i te akaoraora ia koe, te akaketaketa ia koe, e te oronga mai kia koe te rekareka i roto i taau tukuanga angaanga mitinari.”

Te Au Tupuanga e te Au Uiui Anga Reka a te Aronga Apiipii

E piri putuputu ana te aronga apiipii ki roto i te angaanga tutu anga. I raro ake i te arataki anga a Mark Noumair, ko tetai tangata ikuiku Gileada, kua akatutu akaou mai te manganui no roto mai i te pupu apii ra i te au tupuanga tei akakite mai i te tumu tuatua e “Kare i Akama i te Tuatua Meitaki.” (Roma 1:16, NW) Kua reka te aronga akarongorongo i te akarongo atu e akapeea teia au orometua tau i te akakitekite anga mei tera are ki tera are, i runga i te mataara, e i te au ngai toa o te oire. Te aronga apiipii tei kite i tetai au reo ke kua rave na mua i roto i to ratou ngai o te putuputuanga i te itae i te au tangata te tuatua ra i taua au reo ra. Kua taangaanga meitaki tetai pae i te au puka tei akatumuia ki runga i te Pipiria tei orongaia mai e te Au Kite o Iehova, i te taangaanga anga i te reira i roto i te au atoro anga e te akamata anga i te au apii Pipiria i te kainga. ‘Kare ratou i akama’ i te tutu aere i te tuatua meitaki.

Kua rave te Taeake ko William Nonkes, tei tukunaia ki te Tipatimani Tavini Anga, i te au uiui anga ma te au mitinari kite no Pukina Vato, Rativia, e Rutia. Kua oronga atu ratou i te ako anga tau te akatumuia ra ki runga i te tumu tuatua “Ka Tutaki Aroa Mai a Iehova i te Aronga Tiratiratu.” E tai o te au taeake tei uiuiia ra kua akamaroiroi atu i te aronga apiipii kia maara i te pupu vaeau 300 o Gideona. E tukuanga angaanga ta te vaeau taki tai i te tauturu anga kia autu ta Gideona oroanga. (Te Au Akava 7:19-21) Mei te reira rai, ka tutakiia te au mitinari tei vai tamou i roto i ta ratou au tukuanga angaanga.

“Akaarite i te Au Mea Katoa i te Tangata Ravarai Nei” ko te tumu tuatua ia tei akakiteaia mai i roto i te au uiuianga ta Samuel Roberson i rave i muri mai, e tangata ikuiku i Patterson. E a ana mema Kumiti Manga i uiui, no Tenekara, Kuama, Riperia, e Matakatika. E 170 te katoa anga o te au mitinari te tavini ra i roto i teia au enua. Kua kitea mai e te aronga apiipii karatuati mei te au pau anga ra e akapeea te au Kumiti Manga i te tauturu anga i te au mitinari ou kia akatano ki ta ratou au tukuanga angaanga. Te maata anga o te taime te o maira te apii anga i te au peu penei e akara anga tuke mei te au turanga i te tua Opunga. Ei akaraanga, i roto i etai au enua e mea matauia i te kite atu i te au tane, kapiti mai te aronga i roto i te putuputuanga Kerititiano, i te moumou rima anga ei au oa ia ratou e aere taokotai ra. I tetai au ngai i raro ake i te manga i Kuama, ka orongaia mai te au kai tuke. Inara kua akatano tetai papaki, e ka rauka katoa rai i te au mitinari ou.

Kua akatakamai a Guy Pierce, e mema no te Pupu Akaaere, i te tumu manako “Kia Vai Tiratiratu ki ‘te Patireia o to Tatou Atu.’” Kua akamaaraara atu aia i te aronga akarongorongo e: “Kua anga a Iehova ma tetai akakoro anga. E apinga tetai i roto i tona manako no te au mea tana i anga. Kare tona akakoro anga no teia enua nei i taui. Te aere tapupu kore ra te reira ki tona akaotianga. Kare e rauka i tetai apinga i te taui i te reira.” (Genese 1:28) Kua akamaroiroi te Taeake ko Pierce i te katoatoa kia kauraro tiratiratu ki te tu ngateitei o te Atua noatu te au tu ngata tei tupu mai no te ara a te tangata mua ra, ko Adamu. “Te noo nei tatou i roto i te ora no te akavaanga. E meangiti ua to tatou taime e toe nei kia itaeia te au tangata ngakau tika i te tauturu ia ratou kia kite i te tuatua mou. E taangaanga meitaki i te tuatau i te itae anga i tetai ke ma te tuatua meitaki o te Patireia,” ta te Taeake ko Pierce i raurau mai. Ka rauka i te aronga te turu tiratiratu ra i te Patireia o te Atua i te irinaki ki runga i tana turu anga.​—Salamo 18:25.

I roto i te tuanga openga, kua tatau te tiamana i te au turou anga e te au tuatua akamaroiroi anga meitaki no ko mai i te au manga takapini i te ao. E oti kua oronga atu aia i te au tiporoma ki te aronga apiipii karatuati, kua tatau mai tetai o ratou i tetai reta mei te pupu, i te akakite anga i te tu ariki anga ngakau tae no te tereni anga tei rauka ra. E taopenga anga tau te reira ki tetai ra reka roa atu te ka maaraaraia e te katoatoa tei tae mai no tetai tuatau roa.

[Pia i te kapi 23]

TE AU TU O TE PUPU

Numero o te au enua tei komonoia: 11

Numero o te au enua tei tukuia: 22

Numero o te aronga apiipii: 48

Mataiti avereti: 34.8

Au mataiti avereti i roto i te tuatua mou: 18.3

Au mataiti avereti i roto i te angaanga tamou: 13.4

[Tutu i te kapi 24]

Te 117 Pupu Karatuati Anga o te Apii Pipiria Punanga Tiaki o Gileada

I te papaanga i raro ake, kua tanumeroia te au pa mei mua ki muri, e kua papaia te au ingoa mei te kaui ki te katau i te pa takitai.

(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.