Kaikaianga​—Maata Atu i Tetai Tuatau ua no te Kaikai Anga!

E REKAREKA ana te katoatoa i tetai kaikai anga meitaki. Kapiti atu ki te kaikai anga ko tetai pukapuka anga meitaki e te taokotai anga pumaana ma te au tangata taau e aroa ana, e kua riro te reira ei tupuanga mataora tikai te akamerengo maata atura e kare i to tatou pongi anga ua. E manganui te au pamiri te akanoo ra i tetai akonoanga kia taokotai kapipiti e okotai ua ake taime i te ra i te kaikai kapiti. Te oronga ra te tuatau kaikai anga ki te pamiri i te atianga kia uriuri i te au tupu anga me kore te au parani no tera ra. Te au metua te akarongo ana ki te au pauanga a ta ratou tamariki te rauka ra i te kiteanga i te manakoanga e te au manako ngakau o ta ratou aronga mapu ra. I te tuatau ka aereia, te kapitianga maru ua, ma te mataora tei kiteaia i te tuatau kaikaianga te akamaroiroi ra i roto tikai i te pamiri tetai tu tinamou, te irinaki, e te aroa te kapiti atura ki te tu ngaueue kore no te taokotaianga ngutuare tangata.

I teia tuatau nei, no te mea e angaanga ana te au mema pamiri e manganui e e maata ta ratou angaanga ka rave, e ngata ana ia ratou i te kapiti putuputu no tetai kaikai anga. I etai au tuanga o teianei ao, e akara mareka koreia ana e te peu matauia o reira tetai pamiri e kaikai kapiti ana me kore e tuatua katoa ana i te tuatau kaikai anga. I tetai atu au pamiri e mea matauia i te pata atu i te TV i te tuatau kaikai anga, keia meitakianga ia ratou uaorai i tetai ua atu tuatua anga puapinga tikai.

Inara, te au metua Kerititiano, e matakite ua ana ki te au atianga i te akamaroiroi i to ratou ngutuare tangata. (Maseli 24:27) I te tuatau i topa, kua akakiteia ki te au metua e ko tetai au atianga meitaki rava atu i te akakiteanga i ta te Atua tuatua ki ta ratou tamariki koia oki ‘me noo ua ratou i roto i te are.’ (Deuteronomi 6:7) I te noo kapiti putuputu ana ki raro no tetai kaikai anga te oronga ra ki te au metua i tetai tuatau takake kia akamaroiroi i roto tikai i ta ratou tamariki i tetai inangaro oonu no Iehova e tana au kaveinga tuatua tika. Na te tatanu anga i tetai turanga mataora e te maru, ka rauka ia koe i te akono i te tuatau kaikai anga ei tupuanga rekareka e te akamaroiroi no toou ngutuare tangata katoa. Ae, e akariro i te tuatau kaikai anga ei mea maata atu i tetai tuatau ua no te kaikai anga!