Taokotaiia e te Aroa o te Atua

I TE akanoo angaia te putuputuanga Kerititiano i te anere mataiti mua o to tatou Tuatau Noa Nei, ko tetai o to te reira au tu takake—​noatu te turanga tukeke o to te reira au mema​—koia oki ko to te reira tu taokotai. Mei roto mai taua aronga akamori i te Atua mou ra i te au enua i Asia, Europa, e Aperika. No te au turanga tukeke mai ratou​—e au taunga, au vaeau, au tuikaa, au tuitarere, au tangata okooko, aronga kite, e te au tangata pitiniti. E ngati Iuda tetai papaki, e ko etai, e au Kenitara. E maata tei riro ana ei aronga akaturi, aronga totoma, aronga kona kava, me kore aronga aru. Noatu rai, i te riro mai anga ratou ei au Kerititiano, kua akaruke ratou i ta ratou au angaanga kino ki muri e kua taokotai piri tikai i roto i te akarongo.

Eaa tei tauturu i te Akonoanga Kerititiano i te anere mataiti mua kia taokotai mai i teia au tangata katoatoa? Eaa ra ratou i au ua ai ma tetai e tetai e ma te tangata ravarai? Eaa ra ratou kare ei e piri ki te au orureauanga e te au manamanata? Eaa ra te Akonoanga Kerititiano mua i tuke ei mei te au akonoanga mamaata o teia tuatau?

Eaa Tei Akapiri Vaitata i te Au Mema Putuputuanga?

Te tumu maata roa atu tei taokotai i te au oa akarongo i te anere mataiti mua koia oki ko te aroa i te Atua. Kua kite taua au Kerititiano ra i ta ratou apainga puapinga kia aroa i te Atua mou, ia Iehova, ma to ratou ngakau katoa, te meta, e te manako. Ei akatauanga, kua akakiteia ki te apotetoro ko Petero, e ngati Iuda, kia aere ki te  kainga o tetai kenitara, tetai kare aia e akapiri ua atu ana. Te mea maata tei akakeu iaia kia akarongo koia oki ko te aroa i te Atua. Te rekareka ra a Petero e te au Kerititiano ke atu o mua ana i tetai pirianga vaitata ma te Atua tei akanooia ki runga i te kite tika tikai i Tona tu, au mea marekaia, e te au mea mareka koreia. Kare i roa, kua marama te aronga akamori katoatoa e ko to Iehova anoano no ratou kia “kapiti marie ra kotou ma te ngakau okotai e te manako okotai.”​—1 Korinetia 1:10; Mataio 22:37; Angaanga 10:1-35.

Na to ratou akarongo i roto ia Iesu Karaiti i akapiri maata atu i te aronga akarongo. Kua inangaro ratou i te aru marie na roto i tona takainga vaevae. Kua akaue aia ia ratou: “E aroa kotou ia kotou uaorai: mei iaku i aroa ia kotou na . . . Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioane 13:34, 35) Kia riro teia, auraka ei manako ngakau papaku ua, mari ra ei aroa akaatinga tikai. Eaa te ka tupu? Kua pure a Iesu no runga i te aronga e akarongo ra i roto iaia: “Te pati nei au . . . kia rotai ratou katoa ra, mei ia koe, e te Metua, i rotai kiaku nei e mei iaku i rotai kia koe na, e kia rotai katoa oki ratou kia taua.”​—Ioane 17:20, 21, NW; 1 Petero 2:21.

Kua riringi maira a Iehova i tona vaerua tapu, me kore mana ririnui, ki rungao i tona au tavini mou. Kua akatupu teia vaerua i te tu taokotai i rotopu ia ratou. Kua tauturu te reira ia ratou kia marama i te au apiianga Pipiria tei arikiia e te au putuputuanga katoatoa. Kua tutu te aronga akamori o Iehova i taua karere rai​—ko te akatapuanga i te ingoa o Iehova na roto i to te Atua Patireia Mesia, e kavamani i te rangi te ka tutara ki rungao i te tangata katoatoa. Kua marama te au Kerititiano mua i ta ratou apainga e ‘kare i to teianei ao.’ No reira, me tupu te au orureauanga a te tangata me kore te au manamanata vaeau, e vai neutara ua ana te au Kerititiano. E aruaru ana ratou i te noo au ua ki te tangata ravarai.​—Ioane 14:26; 18:36; Mataio 6:9, 10; Angaanga 2:1-4; Roma 12:17-21.

Kua rave te aronga akarongo katoatoa i ta ratou apainga i te akatupu i te tu taokotai. Akapeea? Na te akapapu anga e te rotai ra to ratou tu ki te Pipiria. No reira, kua tata te apotetoro ko Paulo ki te au Kerititiano: “Kia kopae kotou i ta kotou tuatua i muatangana ra, i te tangata taito,” e “kia akatangata ou oki.”​—Ephesia 4:22-32.

Tamou Marieia te Tu Taokotai

E tika, e apa kore ua te aronga akarongo i te anere mataiti mua, e kua tupu te au turanga tei akaao atu i to ratou tu taokotai. Ei akaraanga, te akakite ra a Angaanga 6:1-6 e kua tupu tetai manamanata i rotopu i te au Kerititiano ngati Iuda tuatua reo Ereni e te aronga tuatua reo Epera. Kua manako te aronga tuatua Ereni e te akavaavaaia ra ratou. Inara, i te akakite angaia teia mea nei ki te au apotetoro, kua akono vivikiia atu te reira e te tau tikai. I muri mai, kua arataki atu tetai taumaroanga no te apiianga ki te manamanata no runga i te au apainga a te aronga kare i te ngati Iuda i roto i te putuputuanga Kerititiano. Kua tukuia tetai ikianga tei akanooia ki runga i te au kaveinga Pipiria, e kua ariki katoatoaia teia ikianga.​—Angaanga15:1-29.

Te akaari maira teia au akaraanga e kare te au tauetonoanga i arataki atu ki te au tu pae ke eteniki me kore ki te tu taokotai kore o te apiianga i roto i te putuputuanga Kerititiano i te anere mataiti mua. No teaa ra? No te mea ko te au tumu tei taokotai​—te aroa ia Iehova, te akarongo i roto ia Iesu Karaiti, te aroa akaatinga uaorai no tetai e tetai, te ariki i te aratakianga a te vaerua tapu, te marama anga tau o te  apiianga Pipiria, e te papa ua i te taui i to tetai tu—e mana ririnui maata tikai i te akamou i te putuputuanga mua kia vai taokotai e kia noo au ua.

Taokotaiia i Roto i te Akamorianga i Teia Au Tuatau

Ka rauka ainei te tu taokotai na taua mataara rai i teia tuatau? Ka rauka ainei i teia au tumu rai i te akapiri i te au mema o tetai irinakianga e te tauturu ia ratou kia noo au ua ma te au kopu tangata ravarai i te au tuanga katoatoa o te ao? Ae, ka rauka ia ratou! Kua taokotaiia te Au Kite o Iehova i roto i tetai taokotaianga taeake i te ao katoa tei taeria tere atu i te 230 enua, airani, e te au ngai. E kua taokotaiia ratou e taua au tumu rai tei taokotai i te au Kerititiano i te anere mataiti mua.

Maata roa atu i te oronga anga ki te tu taokotai e rekarekaia nei e te Au Kite o Iehova koia oki ko to ratou tu akono i te Atua ko Iehova. Teia te aiteanga te tauta ra ratou kia vai tiratiratu kiaia i roto i te au turanga katoatoa. Te akono katoa nei te Au Kite o Iehova i te akarongo i roto ia Iesu Karaiti e i roto i tana au apiianga. Te akaari nei teia au Kerititiano i te aroa akaatinga uaorai no te au taeake akarongo e te tutu nei i taua au tuatua meitaki rai o te Patireia o te Atua i roto i te au enua e angaanga ra ratou. E mataora ana ratou i te tuatua no runga i teia Patireia ki te tangata o te au irinakianga, au kopu, au enua, e te au pupu katoatoa. Te vai neutara katoa nei te Au Kite o Iehova i roto i te au angaanga a teia ao, tei tauturu ia ratou i te patoi i te au taomianga poritiki, peu matauia, pirianga tangata, e te pae kimi puapinga e akatupu nei i te ke i rotopu i te tangata. Te ariki nei te au Kite katoatoa i ta ratou apainga kia akatupu i te tu taokotai na te akamako anga ia ratou uaorai kia rotai ki te au turanga o te Pipiria.

Akapiri Mai te Tu Taokotai i Etai Ke

E putuputu ua ana teia tu taokotai i te akakeu i te inangaro o te au tangata kare i te Au Kite. Ei akatauanga, ko Iise, * e paretenia Katorika i roto i te kainga o te paretenia i Tiamani. Eaa tei akapiri mai iaia ki te Au Kite o Iehova? Kua akakite a Ilse: “Ko ratou te au tangata meitaki roa atu taku i aravei ana. Kare ratou e aere ana ki te tamaki; kare ratou e rave ana i tetai apinga i te takino i tetai ua atu. Te inangaro ra ratou i te tauturu i te tangata kia noo mataora ua i tetai enua parataito i raro i te Patireia o te Atua.”

E oti tera oki a Günther, kua riro ana aia ei vaeau Tiamani tei tukuia ki Varani i te tuatau o te tamaki rua o te ao. Tetai ra kua rave tetai orometua Porotetani i tetai pureanga akonoanga no te au vaeau i roto i to Günther pupu. Kua pure te orometua no te au akameitakianga, paruruanga, e te autuanga. I muri ake i te pureanga, kua tukuia atu a Günther ki tona ngai ei kati. Na roto i tana io akarakara, kua kite atu aia i te au pupu enemi i tetai tua mai o te ngai tamaki e aere katoa ra ki tetai pureanga akonoanga e raveia ra e tetai orometua. I muri mai kua tuatua a Günther: “Penei te pure katoa ra tera orometua no te au akameitakianga, paruruanga, e te autuanga. Kua umere tikai au e akapeea ake te au ekaretia Kerititiano i riro ei ki te nga tua patoi o taua tamaki rai.” Kua vai rai teia au manako nei ki roto i to Günther manako. I muri mai i tona aravei anga i te Au Kite o Iehova, te kare e piri ana ki roto i te tamaki, kua riro mai a Günther ei tuanga no to ratou taokotaianga taeake i te ao katoa nei.

Ko Ashok raua ko Feema no roto ana raua i tetai akonoanga Pae Itinga. I roto i to raua kainga, e ngai akamorianga ta raua ki tetai atua. I te tupu anga tetai maki kino ki to raua pamiri, kua akara matatio akaou raua i ta raua akonoanga. I te au pukapukaanga ki te Au Kite o Iehova, kua umere tikai a Ashok raua ko Feema i te au apiianga a te Pipiria e te aroa e vai ra i rotopu i te au Kite. I teianei e nga papuritia maroiroi raua no te tuatua meitaki o te Patireia o Iehova.

Kua taokotaiia a Ilse, Günther, Ashok, e Feema ki te au mirioni ua atu o te Au Kite o Iehova i roto i tetai taokotaianga taeake i te ao katoa nei. Te irinaki ra ratou i ta te Pipiria taputou e kare e roa atu ka riro taua au tumu rai e taokotai nei ia ratou i roto i te akamorianga i teia tuatau i te taokotai i te katoatoa rava o te au tangata akarongo. E oti i reira, kare e au kino akaou, kare e taokotai kore, e te pae ke i roto i te ingoa o te akonoanga. Ka taokotaiia te ao katoa i roto i te akamorianga o te Atua mou, ko Iehova.​—Apokalupo 21:4, 5.

[Tataanga Rikiriki i Raro]

[Au Tutu i te kapi 4, 5]

Noatu i aere mai mei roto i te au turanga tukeke, kua taokotai tikai te au Kerititiano mua