Au Uianga a te Aronga Tatau
Au Uianga a te Aronga Tatau
Akapeea i rauka ai ia Samasona i te amiri i te au kopapa mate tana i ta atu ei e e kia vai tamou rai ei tangata Nazira?
I Iseraela taito ra, ka rauka i tetai tangata i te oronga ua i tetai tia e kia riro mai ei tangata Nazira no tetai tuatau tikai. * Ko tetai o te au arairai anga tei maaniia ki runga i te tangata te akono ra i teia tia kua akatakaia: “Te au rā katoa i akatakaiaʼi aia no Iehova ra, auraka roa aia e akavaitata ua atu ki tetai tangata mate. Auraka aia e akaviivii iaia uaorai i tona metua tane, e tona metua vaine, e tona taeake, e tona tuaine, kia mate ra.” Akapeea me ka “mate vave ua tetai tangata i vaitata iaia ra”? Taua amirianga tapapa koreia o tetai kopapa mate ka akaviivii i tona turanga Nazira. No reira, kua akakiteia: “Kare oki tei muatangana ra au rā e tatauia.” Ka inangaroia aia kia aere na roto i tetai angaanga tama anga e kia akamata akaou i te tuatau ei Nazira.—Numero 6:6-12.
Inara, ia Samasona, e tangata Nazira aia i roto i te tu tuke ake rai. I mua ake i to Samasona anauanga, kua akakite te angera a Iehova ki tona metua vaine: “I na oki! ka to koe, e e tamaiti taau e anau; auraka rava ra ei reta e tae ki runga i tona mimiti: ei Nazira oki tenana tamaiti na te Atua mei te kopu mai: e nana e akamata i te akaora ia Iseraela i te rima o te Philiseti ra.” (Te Au Akava 13:5) Kare roa a Samasona i akono ana i tetai tia no te turanga Nazira. E tangata Nazira aia na te ikianga tu-Atua, e tona turanga Nazira no te tuatau oraanga ia. Kare e rauka i te kotingaanga i te amirianga i tetai kopapa mate i te akonoia ki tona turanga. Naringa i pera ana te reira e kua amiri tapapa kore aia i tetai kopapa mate, akapeea aia i te akamata akaou anga i tetai tuatau oraanga no te turanga Nazira tei akamata roa mai ma tona anau mai anga? Papu, i reira, te au umuumuanga no te au tangata Nazira no te tuatau oraanga kua tuke ia i roto i tetai au tu mei taua ra no te aronga tei oronga ua ia ratou ei au tangata Nazira.
E akamanako ana i ta Iehova au akaue anga ki te au tangata Nazira e toru no te tuatau oraanga—ia Samasona, Samuela, e Ioane Papetito—tei akakiteia i roto i te Pipiria. Tei taikuia i mua atu ana, kua umuumuia a Samasona e auraka e tipu i te rouru o tona mimiti. No runga i tana tama te ka anau mai—ko Samuela—kua tia a Hana: “Ei reira au e orongaʼi iaia kia Iehova, e ope rava ake ona puke rā i te ao nei, e kare e reta e tae ki runga i tona upoko.” (1 Samuela 1:11) I te turanga o Ioane Papetito, kua karanga te angera a Iehova e: ‘Kare aia e inu i te wina e te kava kona.’ (Luka 1:15) Pera katoa, “E uruuru kamela to Ioane kakau i tatuaia tona taukupu ki te kiri puaka; e tāpaki e te meli ngangaere tana kai.” (Mataio 3:4) Kare roa teia nga tangata e toru i akaueia e auraka e akavaitata mai ki tetai tangata mate.
Noatu e tangata Nazira, ko Samasona tetai o te au akava ta Iehova i akatu mai kia akaora i te ngati Iseraela mei roto mai i te rima o to ratou aronga keikeia. (Te Au Akava 2:16) E i te akatupuanga i teia tukuanga angaanga, kua amirimiri aia i te au kopapa mate. I tetai atianga, kua ta iora a Samasona i te au tangata Philiseti e toru ngauru, e kua rave iora i to ratou au kakau. I muri akera, kua ta iora aia i te enemi, “e pou maata rava.” Kua rave katoa mai aia i tetai ivi tanga atini e kua ta atura i te tangata okotai katoa tausani i te reira ra. (Te Au Akava 14:19; 15:8, 15) Kua rave katoatoa a Samasona i teia au apinga ma to Iehova marekaanga e te turuturu anga. Kua taiku te au Tuatua Tapu iaia ei tangata no te akaraanga akarongo meitaki.—Ebera 11:32; 12:1.
Te akakite maira ainei te tuatua e kua aae atura a Samasona i te riona ra ‘mei tetai e aae ua i tetai punua puakanio e rua tuanga’ e te aae anga i te au punua puakanio e angaanga matauia i te rave i tona tuatau ra?
Kare e akapapuanga e i te tuatau o te au Akava o Iseraela, e e peu matauia no te tangata i te aae i te au punua puakanio. Te karanga ra Te Au Akava 14:6 e: ‘Kua tae viviki maira te vaerua o Iehova ki runga [ia Samasona,] e kua aae atura aia i taua liona [ou] ra e rua tuanga mei tetai e aae ua i tetai punua puakanio e rua tuanga, kare ana taoonga i te rima.’ I te akaraanga e akatutuanga ua teia tuatua.
Te tuatua e ‘kua aae atura aia e rua tuanga’ penei e rua ona aiteanga. Penei kua aae atura a Samasona i te vaa o te riona me kore kua aae potopotonga ua i te riona na roto i tetai tu. Me ko te mea mua ia te aiteanga, ko te rave katoaanga i reira i taua apinga ra ki tetai punua puakanio kua maramaia e ka rauka katoaia e te mana tangata. I roto i teia turanga, te akatutu maira te tu aiteite e ko te autu anga i tetai riona ma tona nga rima ua kare e aka angaanga kia Samasona mei tetai tu rai te riona e e punua puakanio ua ia. Inara, akapeea me kua ta a Samasona i te riona na te aae potopotonga ua i te reira? Kare e rauka i reira i te tuatua i te manako ia atu e ko tetai apinga ke atu mari ra e akaaiteiteanga ua. Te aiteanga o teia akaaiteiteanga koia oki e na te vaerua o Iehova i akamaroiroi ia Samasona kia rave i tetai angaanga te umuumuia ra i tetai ririnui kopapa tuke maata roa atu. I nga turanga, te akatutu maira te akaaiteanga tei kiteaia i Te Au Akava 14:6 e ma to Iehova tauturu, kare te riona ririnui i rerevao roa atu kia Samasona e i tetai punua puakanio rai ki tetai tangata ua nei.
[Tataanga Rikiriki i Raro]
^ para. 3 Te roa o te tuatau no te turanga Nazira kua akarukenaia te reira ki runga i te tangata tataki tai te akono ra i te tia. Inara, kia tau ki te akonoanga ngati Iuda, te tuatau meangiti roa atu no te tia koia oki e 30 ra. Kua manakoia e ko tetai tei raro mai ake kua akariro i te tia ei mea apinga noa ua.