Ka Rauka ia Koe i te Akatere i Toou Tupu Anga Openga?

KUA akakoro takereia ainei to tatou tupu anga openga? Te au iki anga ta tatou ka rave i roto i te oraanga kare ainei e e akatuke anga i to tatou tuatau ki mua?

Penei ake ko te tangata te pu no tona uaorai openga. I roto i teia turanga, kua akono takereia ainei tetai ua atu tangata kia rave i tetai angaanga takake me kore kia mou i tetai taoonga opati? E akapeea te Atua i te akatupu anga i tona anoano no te enua me kua akarangatiraia te au tangata kia akatere i to ratou uaorai tupu anga openga? Te oronga maira te Pipiria i te au pau anga merengo ua ki teia au uianga.

Predestination e te Anoano Rangatira​—Kua Tano Ainei?

E akamanako ana e akapeea te Atua ko Iehova i te anga mai anga ia tatou. “I anga aia [i te tangata] i te tu o te Atua ra; i anga aia ia raua ko te tane e te vaine,” i akakite mai ei te Pipiria. (Genese 1:27) Kua angaia i te tu o te Atua ra, tei ia tatou te kite i te akaata i tona au tu, mei te aroa, tuatua tau, pakari, e te mana. Kua oronga katoa mai te Atua kia tatou te apinga aroa no te anoano rangatira, me kore te tu rangatira no te iki anga. Te akatuke ra teia ia tatou i rotopu i tana au mea anga i te enua. Ka iki tatou e me ka aru tatou i te aratakianga tau a te Atua me kare ra. No reira te peroveta ko Mose i karanga ai e: “Te kapiki nei au ki te rangi e te enua ei kite noku ia kotou i teianei rā e, kua tuku au i te ora e te mate, i te meitaki e te kino, ki mua ia koe i tenana, ka  rave i te ora, kia ora koe e toou katoa uanga: Kia inangaro oki koe i to Atua ra ia Iehova, e kia akarongo koe i tona reo, e kia piri atu koe kiaia.”​—Deuteronomi 30:19, 20.

I na, te apinga aroa no te tu rangatira no te iki anga, kare te aite anga e e rangatira tika tikai ia. Kare tatou i akarangatiraia mei te au ture kopapa e te akono tau ta te Atua i maani no te tu tau e te au i te ao e pini ua ake. Kua akanooia teia au ture ei meitaki no tatou, e te aati anga i tetai o te reira ka taki atu ki te au tumatetenga kino. E akamanako ana e eaa te ka tupu me iki tatou i te kopae i te ture no te gravity e te rere mai anga mei te tauu are o tetai are teitei!​—Galatia 6:7.

Te tatua kapiti katoa ra te tu rangatira no te iki anga ia tatou ma tetai kotinga anga kare i orongaia ana ki te au mea ora te ngere ra i taua rangatira ra. Kua ui te tangata tata ko Corliss Lamont e: “Akapeea tatou i te oronga anga i te apainga tau ki te tangata, e te akautunga anga ia ratou no te ravenga tarevake, me ariki tatou . . . e kua akakoro takereia ta ratou au iki anga e te au angaanga ra?” E tikai, kare e rauka ia tatou. Kare te au manu tei akakeuia e te tu kite i akaapaia no ta ratou i rave, kare rai oki te au komupiuta i manako akaapaia no te au angaanga tei porokaramuia kia rave ratou. Te tuku ra, i reira, te tu rangatira no te iki anga, i tetai apainga teimaa ki runga ia tatou e te akariro anga ia tatou kia pau atu no ta tatou au angaanga.

Mei teaa te aroa kore e te tu tau kore o te reira no te Atua ko Iehova e i mua ake ka anauia mai ei tatou, kua akakoro takereia e ia te mataara ka aru tatou e oti akera kua akaapa ia tatou no te au angaanga ta tatou i rave! Kare aia i rave i teia, “ko te Atua oki te aroa,” e kua “tau katoa tona au aerenga.” (1 Ioane 4:8; Deuteronomi 32:4) Te oronga anga mai kia tatou i te tu rangatira no te iki anga, kare aia i taua taime rai i ‘akakoro ana mei te tuatau mutu kore ra e koai tana ka akaora e koai tana ka akaapa,’ ei aronga irinaki ra i te manako predestination. Te akakore ra te tu rangatira no te iki anga i te predestination.

Te akaari meitaki maira te Pipiria e ka taui te au iki anga ta tatou e rave ra i to tatou tupu anga openga. Ei akaraanga, kua pati te Atua ki te aronga e rave ra i te kino, i te karanga anga e: “Ka ariu mai ana kotou katoa i tenana i tona ra aerenga kino, e te kino o ta kotou ravenga . . . kare oki au e rave kino ia kotou.” (Ieremia 25:5, 6) Ka puapinga kore ua teia pati anga me kua akono takereia e te Atua to tetai tupu anga openga. Tei runga ravao, te akakite ra te Tuatua a te Atua e: “E teianei e tataraara kotou, e e ariu mai, kia taparaia ta kotou ara; kia kitea mai te tuatau rekareka no mua mai i te aroaro o [“Iehova,” NW] ra.” (Angaanga 3:19) Eaa i reira a Iehova i pati ei i te tangata kia tataraara e e i muri mai kua kite takere aia e kare roa ratou e rave i tetai apinga i te taui i to ratou tupu anga openga?

 Te tuatua ra te au Tuatua Tapu no etai pae tei patiia mai e te Atua kia tutara ei au ariki i te rangi ma Iesu Karaiti. (Mataio 22:14; Luka 12:32) Inara, te karanga ra te Pipiria e ka ruti ia ratou taua akameitakianga me kare ratou e tamou marie e tae ua atu ki te openga. (Apokalupo 2:10) Eaa ra te Atua i pati ei ia ratou me kua iki ke ana aia e kare ratou e ikiia? E akamanako katoa ana i te au tuatua a te apotetoro ko Paulo ki tona au taeake akarongo. Kua tata aia: “Kua rauka na ia tatou te kite i te tuatua-mou ka rave inangaro mou atu ei i te ara, kare ua atu e tarangaara toe.” (Ebera 10:26) E puapinga kore ua taua akamatakite anga me kua akono takereia e te Atua to ratou tupu anga openga. Inara kare ainei e kua akono takereia e te Atua etai au tangata tataki tai kia riro mai ei au tutara ma Iesu Karaiti?

Akono Takereia​—Ei Au Tangata Tataki Tai me e Pupu?

“Ko [te Atua tei] akameitaki mai ia tatou nei i te au meitaki ravarai o te vaerua i te ao ra i te Mesia nei,” i tata mai ei te apotetoro ko Paulo, “koia i iki mai ia tatou i roto iaia nei, ou te tumu o teianei ao . . . E kua akono takere ia tatou, kia riro ei tamariki rave nana uaorai ia Iesu Mesia ra.” (Ephesia 1:3-5) Eaa ta te Atua i akono takere, e eaa te aite anga e kia iki “ou te tumu o teianei ao”?

Te akakite ra teia irava e kua iki te Atua i etai o te au uanga a te tangata mua, ko Adamu, kia tutara ma Karaiti i te au rangi ra. (Roma 8:14-17, 28-30; Apokalupo 5:9, 10) Inara, te manako anga e kua akono takereia e te Atua ko Iehova e tauatini ua atu mataiti i mua ake ka anauia mai ei ratou tetai au tangata tataki tai tikai kia rauka mai teia akameitaki anga te patoi ra te reira i te tika anga e kua orongaia ki te au tangata te tu rangatira no te iki anga. E pupu ta te Atua i akono takere, me kore e ututua tangata, kare i te tangata tataki tai.

Kia akatutuia: Penei ake kua ikiia tetai kavamani kia akanoo tikai i tetai rima rave. Kua akakoro takere te reira i te au angaanga a te rima rave, i tona au mana, e tona maata. Kua akamata iora te rima rave i te angaanga i tetai taime i muri ake i te akanooia anga te reira, e kua akakiteia atu ki tona au mema tetai akakiteanga i te karanga anga e: “Kua akakoroia e te kavamani i tetai mataiti i topa akenei e eaa ta tatou angaanga ka rave. I teianei ka akamata tatou i te angaanga tei tukunaia mai kia tatou.” Ka taopenga ainei koe e kua akakoro takere te kavamani i etai au mataiti i mua atu ana e koai ma te au mema tataki tai o taua rima rave ra? Kare rava. Mei te reira katoa, kua akakoro takere a Iehova e ka akanoo aia i tetai rima rave takake ei rapakau anga i te au tupu anga o ta Adamu ara. Kua akono takere aia i te pupu tangata te ka tavini i roto i taua rima rave ra​—inara kare ei aronga tataki tai. Ka ikiia ratou i muri mai, e te au iki anga ta ratou ka rave i roto i te oraanga ka riro ei akakeu anga me ka arikiia ratou i te openga ra me kare ra.

Eaa teianei ao ta te apotetoro ko Paulo e manako ra i te karanga anga aia e: “[Na te Atua] i iki mai ia tatou i roto iaia nei, ou te tumu o teianei ao”? Ko teianei ao ta Paulo e taiku ra i konei kare i teianei ao ta te Atua i akamata ana i tona anga mai anga ia Adamu raua ko Eva. E “meitaki roa” taua ao​—kua akarangatira tikaia mei te ara e te kino. (Genese 1:31) Kare e anoanoia tetai ‘tatara anga’ mei te ara.​—Ephesia 1:7, NW.

Ko teianei ao tikai ta Paulo e akakite maira e ao tei mama mai i muri ake te meameaau anga a Adamu raua ko Eva i Edene​—e ao tuke tikai mei te ao ta te Atua i akakoro ra. E ao te reira tei akamata mai ma te tamariki a Adamu raua ko Eva. I roto i taua ao ko te au tangata tei akatakake mai mei te Atua e kua akatuikaaia ki te ara e te kino. E ao te reira no te au tangata tei okoia, kare mei ia Adamu raua ko Eva e nga tangata tei rave akakoro i te ara ra.​—Roma 5:12; 8:18-21.

Kua rauka viviki i te Atua ko Iehova i te akono i te turanga tei tupu mai no te meameaau i Edene. Te tupu mai anga te anoano, kua akono takere aia i tetai rima rave takake​—te Patireia o te Mesia i roto i nga rima o Iesu Karaiti—​tana ka taangaanga te kapiti atura i te oko anga i te tangata ravarai mei roto mai i te ara a Adamu. (Mataio 6:10) “Ou te tumu o teianei oa” kua rave te Atua i teia i te oko anga mai i te tangata ravarai, koia oki, i mua ake ka anau mai ei a Adamu raua ko Eva meameaau ra i te tamariki.

Tei matauia te inangaro ra te au tangata i tetai parani no te angaanga e rauka ai i te akatupu i ta ratou e inangaro ra i te rave. Kua kapitiia te  predestination ki te manako anga e e parani akatakaia ta te Atua no te ao e pini ua ake e kua akakoro takereia te au mea ravarai i roto i reira. “I te akara anga ki te aronga apiipii e manganui,” i tata mai ei a Roy Weatherford, “ko tetai apinga kare e akatakaanga katoa no te au tupu anga ravarai kare e tau ana ki te Atua Tu Ngateitei.” Te anoano tikai ra ainei te Atua kia akakite takere mai i te au tupu anga ravarai?

No te kotinga kore i te mana e te pakari akaaite koreia, ka rauka ia Iehova i te akono i tetai ua atu manamanata me kare i te tumatetenga te ka tupu mai i te akono anga tana au mea anga ra i to ratou anoano rangatira. (Isaia 40:25, 26; Roma 11:33) Ka rauka iaia i te rave viviki i teia e ma te manako kore anga na mua. Kare mei te au tangata apa ma to ratou au tu kotinga anga, kare te Atua Mana Katoatoa e inangaro ana i tetai parani akatakaia e te akapapaia te akakite maira i mua akera i te tupu anga openga o te au tangata ravarai i runga i te enua. (Maseli 19:21) I roto i tetai au urianga Pipiria e manganui, te akakite maira a Ephesia 3:11 i ta te Atua “akakoroanga” kare i tetai parani tamou.

Te Akakeuia Anga Koe e Toou Tuatau ki Mua

E akakoroanga to te Atua no te enua, e ko taua akakoroanga ra kua akono takereia. Te akakite ra a Apokalupo 21:3, 4 e: “I na, tei ko te tangata ra te puakapa o te Atua, e e noo aia ki rotopu ia ratou, e riro ratou ei tangata nona, e e noo te Atua ki rotopu ia ratou, ei Atua no ratou. E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” Ae, ka riro mai teia enua ei parataito, mei ta Iehova i akakoro ana i mua ana. (Genese 1:27, 28) Te uianga i reira e, Ka tae ainei koe ki reira? I teianei te vai ra te reira i runga i te au iki anga taau ka rave. Kare a Iehova i akono tamou i toou tupu anga openga.

Kua rauka i te atinga oko a te Tamaiti a te Atua, ko Iesu Karaiti, i te akatupu i te reira no tetai tangata te akono ra i te akarongo i roto iaia kia rauka oki te ora mutu kore. (Ioane 3:16, 17; Angaanga 10:34, 35) “Ko te akarongo i te Tamaiti ra, e ora mutu kore tona,” i karanga ai te Pipiria. “E te kore e akarongo i te Tamaiti ra, kare aia e kite i te ora.” (Ioane 3:36) Ka rauka ia koe i te iki i te ora na te kite anga i te Atua, tana Tamaiti, e Tona anoano i roto i te au kapi o te Pipiria e na te akono anga i ta tatou i kite. Kua akapapuia ki te tangata tei angaanga tau ma te pakari mou tei tataia i roto i te Tuatua a te Atua e “ka noo marie ua ïa ma te ora; e akaea ua aia ma te mataku kore i te kino.”​—Maseli 1:20, 33.

[Au Tutu i te kapi 5]

Kare mei te au manu, tei te au tangata te akaapa anga tikai no ta ratou au angaanga

[Akameitakianga]

Eagle: Foto: Cortesía de GREFA