Kua Akanauru ta Saula Tutu Anga i te Tu Kino Tikai
Kua Akanauru ta Saula Tutu Anga i te Tu Kino Tikai
KARE te au ngati Iuda i Damaseko i marama ana i te reira. Akapeea roa ai tetai tangata turuturu no te au akonoanga tupuna i riro mai ei ei apoteiti? Teia oki a Saula, te tangata tikai tei tamanamanata atu i te aronga tei kapiki i to Iesu ingoa i Ierusalema. Kua aere mai aia ki Damaseko i te takinga kino i te au pipi i reira. I na i teianei koia tikai tetai te tutu katoa ra e ko taua tangata rave kino rai tei akavaavaaia e kua patitiia no te tuatua akakino anga ra ko te Mesia ia! Kua auouoia ainei a Saula?—Angaanga 9:1, 2, 20-22.
Penei e akatakaanga tetai. Penei ko tetai tei teretere atu mei Ierusalema mai e e tai o ratou poupou ko Saula kua tuatua atu no runga i tei tupu i runga i te mataara. Te vaitata atura ratou ki Damaseko ra, kua pini rava akera ratou i te marama i te kaka anga mai, e kua topa iora ratou katoatoa ki raro i te one. E tangi anga katoa tetai o tetai reo. Kare atu mari ra ko Saula tei kino mai. Te takoto ra aia ki runga i te mataara. Taopenga ra i tona tu mai anga ki runga, na tetai aronga teretere ke mai i arataki atu iaia ki Damaseko, no te mea kare ana apinga i kite ana.—Angaanga 9:3-8; 26:13, 14.
Kua Riro Mai Tetai Tangata Patoi ei Tangata Turuturu
Eaa tei tupu kia Saula i runga i te mataara ki Damaseko? Na te teretereanga e roa te tuatau me kore te vera o te ra i te avatea i taparuparu ainei iaia? I te tautaanga i te kimi i te au akatakaanga natura, kua oronga mai te aronga ekoko o teia tuatau nei i te au akatutuanga te kapiti maira i te manako neneva, te manako pikikaa, tetai manamanata kino pakari i te pae manako tei akakokoia e te au akakoko anga o to Saula akava ngakau tamanataia, tetai taitaia pakari, e tetai turanga tei manakoia e te taki atura ki te maki uti.
Ko te tikaanga tikai kua mama mai a Iesu Karaiti kia Saula i roto i taua marama kaka, akapapu anga iaia e Koia tikai te Mesia. Tetai au akatutuanga ati no teia tupuanga te akaari maira ia Saula i te topa anga mei te oroenua. Noatu e ka tika katoa te reira, te karanga ua ra te Pipiria iaia e kua “inga iora ki raro i te one.” (Angaanga 22:6-11) Noatu eaa te tu topaanga tei kiteaia e Saula kare e vaitata maata atu ki te topa anga mei te parau anga o tona turanga. I teianei aia i kite mai e e ta te au pipi a Iesu i tutu aere e tika tikai. Te mataara ua te akatueraia ra kia Saula koia oki kia piri atu kia ratou. Mei tetai enemi takinokino o te karere a Iesu, kua riro mai a Saula e ko tetai o te reira tangata turuturu ketaketa roa atu. I te rauka akaou mai anga i tona kite e i te papetitoangaia, “maroiroi rava aturā Saula, e muteki atura iaia te ngati Iuda e noo i Damaseko ra, tupu marie atura e ko te Mesia teia.”—Angaanga 9:22.
Kua Poka Tetai Moetapapa Anga no te Tamateanga
Kua aere atu i reira a Saula, tei kapikiia i muri mai e ko Paulo, kiea i muri mai i tona tauianga? I te tataanga ki to Galatia, kua karanga aia: “Aere ke atura ra au ki Arabia, e oki maira oki ki Damaseko.” (Galatia 1:17) Te tuatua “Arabia” te akonoia ra ki tetai teretereanga ki roto i tetai ua atu tuanga ngai o te Penitura o Arapia. Kua karanga tetai aronga apiipii e penei kua aere atu a Paulo ki roto i te Metepara Suria me kore i tetai ngai ke atu i te patireia o Nabataea o Aretas IV. E mea papu, kua aere atu a Saula ki tetai ngai motutaa no te akamanako oonu anga i muri ake i tona papetitoanga, mei ia Iesu rai i te aere atu anga ki te metepara i muri ake i tona tarukuanga.—Luka 4:1.
I te oki atu anga a Saula ki Damaseko, “kua akaaiteite iora te ngati Iuda i te tuatua e ta iaia.” (Angaanga 9:23) Te kavana tei tavini ei komono no te Ariki ko Aretas i Damaseko te paruru ra i te oire kia rauka i te opu atu ia Saula. (2 Korinetia 11:32) Inara te moetapapa anga te au enemi i to Saula mateanga, kua parani te au pipi a Iesu i tona oro anga.
I roto i taua aronga tei tauturu atu ia Saula kia oro koia oki ko Anania e te au pipi kua rekareka maata te apotetoro ia ratou i muri ua ake i tona tauianga. * (Angaanga 9:17-19) Tetai tei riro mai ei aronga irinaki no te tutu anga a Saula i Damaseko penei ake kua tauturu katoa mai, no te mea te karanga ra a Angaanga 9:25 e: “Kua rave iora [“tana,” NW] au pipi iaia, tuku atura ki raro na te pae koro i te po i roto i tetai tapora.” Te tuatua “tana au pipi” penei te aiteanga e ko te aronga ta Saula i apii atu. Noatu rai, te tu manuia o tana angaanga orometua i te akaraanga kua akamaata i te riri tei kitea takereia kiaia.
Tetai Apiianga kia Tamouia
Me akara matatio tatou i tetai o te au tupuanga te koropini ra i to Saula tauianga e te papetitoanga, te kite meitaki ra tatou e kare oki aia i manako maata roa ana e akapeea tetai atu i te akaraanga iaia; e kare katoa aia i akamutu mai ana no te mea no te patoianga kino pakari. Te apinga manako maata roa atu kia Saula koia oki ko te angaanga tutu anga tei rauka iaia.—Angaanga 22:14, 15.
Kua akapapu ua akenei ainei koe i te puapinga no te tutu anga i te tuatua meitaki? Me ko te reira ia, kua kite mai koe e pouroa te au Kerititiano mou ka anoanoia kia riro mai ei aronga tutu anga Patireia. Auraka roa koe e poitirere me te akakeu ra taau angaanga orometua i tetai taime i te au ariuanga makitakita. (Mataio 24:9; Luka 21:12; 1 Petero 2:20) To Saula ariuanga ki te patoianga e akaraanga tau ia. Te au Kerititiano tei akakoromaki i raro i te au timataanga ma te kore i tukutuku ana ka rauka mai to te Atua mareka anga. Kua akakite a Iesu ki tana au pipi: “E ka makitakitaia mai kotou e te tangata ravarai i toku nei ingoa.” Inara kua akapapu atu aia ia ratou: “E ora ra kotou kia mou tamou marie.”—Luka 21:17-19.
[Tataanga Rikiriki i Raro]
^ para. 10 Penei kua tae mai te akonoanga Kerititiano i Damaseko i muri ake i ta Iesu tutu anga i Galilea me kore i muri ake ia Penetekote 33 T.N.—Mataio 4:24; Angaanga 2:5.
[Tutu i te kapi 28]
Kua ‘inga iora a Saula ki raro i te one’ i to Iesu mama mai anga kiaia
[Tutu i te kapi 29]
Kua ora atu a Saula i tetai moetapapa anga no te tamateanga i Damaseko