Au Manako Maata Mei te Puka a Ruta
E Mea Ora te Tuatua a Iehova
Au Manako Maata Mei te Puka a Ruta
E NUKU pumaana tikai ki te ngakau no te tiratiratu i rotopu i nga vaine e rua. E tataanga te reira no te akangateitei anga no te Atua ko Iehova e te irinakianga i roto i tana akanoonooanga. E tua te reira te akamaata ra i to Iehova inangaro maata i roto i te akapapaanga o te uanga o te Mesia. E papaanga pumaana tikai no te au rekareka e te au mii o tetai ngutuare tangata. Te kapiti katoa maira te puka Pipiria a Ruta i te reira e e maata katoa atu.
Te kapi ra te puka o Ruta i tetai tuatau mei te 11 mataiti “i te au rā i te au o te aronga akava ra” i Iseraela. (Ruta 1:1) Te au tupuanga tei tataia kua tupu ana i te tuatau ou anga o Te Au Akava, mei te mea oki te ona enua ko Boaza, ko tetai o te au tangata i roto i teia nuku oraanga tika tikai, e tamaiti aia na Rahaba o to Iosua tuatau ra. (Iosua 2:1, 2; Ruta 2:1; Mataio 1:5) I te akaraanga kua tataia teia papaanga e te peroveta ko Samuela i te 1090 M.T.N. Ko teia ua te puka i roto i te Pipiria te akairo ra te ingoa o tetai vaine kare i te ngati Iseraela. Te karere i roto i te reira ‘e mea ora oki, e te ririnui.’—Ebera 4:12.
“I TE NGAI TAAU E AERE RA, E AERE KATOA ÏA AU”
I te tae atu anga a Naomi raua ko Ruta ki Betelehema, kua riro mai raua ei pukapuka anga na te oire tangata. I te tou atu anga ki te vaine pakari atu ia raua, kua tuatua akera te vaine tini: “Ko Naomi teia?” Ki teia kua karanga atura a Naomi: “Auraka au kia tuatuaia ia Naomi, kia tuatuaia ra au ia Mara; e tumatetenga maata oki ta te Mana katoatoa i tuku mai iaku nei. I aere oki au ma te ki, e kua akaoki akaou mai a Iehova iaku ma te ngere.”—Ruta 1:19-21.
I te tupu anga tetai onge i Iseraela kua neke atu tona ngutuare tangata mei Betelehema mai ki te enua o Moabi, kua “ki” oki a Naomi mei tera oki e e tane akaipoipo tana e e rua nga tamaroa. Inara, i etai tuatau i muri mai i to ratou nooanga ki Moabi, kua mate tana tane, ko Elimeleka. I muri mai, kua akaipoipo nga tamaroa e rua i nga vaine ngati Moabi ko Orapa raua ko Ruta. Mei tetai ngauru mataiti tei pati, e kua mate nga tamaroa e rua kare e uanga, te akaruke mai anga i nga vaine e toru ko ratou anake ua. I te manako mai anga te metua vaine ongai, ko Naomi, kia oki atu ki Iuda, kua aru katoa nga vaine takaua o tana nga tamaroa iaia. Te aaere ra, kua raurau a Naomi i tana nga unonga kia oki ki Moabi e kia kimi i nga tane na raua no roto mai i to raua uaorai iti tangata. Kua akatika rai a Orapa. Inara, kua piri ua atu rai a Ruta kia Naomi, i te na ko anga: “I te ngai taau e aere ra, e aere katoa ïa au; e te ngai taau e noo ra, e noo katoa ïa au ko toou iti-tangata, ko toku katoa ïa iti-tangata; e toou ra Atua, ko toku ïa Atua.”—Ruta 1:16.
Te nga takaua, ko Naomi raua ko Ruta, kua tae atu ki Betelehema i te akamataanga o te kokotianga i te kerite. I te akonoanga i te tuatau no teia akanoonooanga tei maaniia i roto i ta te Atua ture, kua akamata a Ruta i te koi i roto i te kainga kai a tetai kopu tangata o Elimeleka—ko tetai tangata ngati Iuda pakarikari ko Boaza te ingoa. Kua rauka ia Ruta i ta Boaza akaperepereanga e kua rave ua atu i te koi i roto i tona kainga “e tae ua atu ki te openga o taua akaū kerite ra, e te akaū sitona katoa.”—Ruta 2:23.
Pauia te Au Uianga Tuatua Tapu:
1:8—Eaa ra a Naomi i akakite atu ei ki tana nga unonga vaine kia oki ‘ki te ngutuare o tona puke metua vaine ra’ e kare ki te are o tona puke metua tane ra? Me te ora ra rai te metua tane o Orapa i taua taime ra kare i akakiteia mai. Inara, te ora ra rai to Ruta. (Ruta 2:11) Inara, kua tuatua atu a Naomi i te are o te metua vaine ra, penei i te manakoanga e ko te taikuanga i to raua nga metua vaine ka maara mai ia raua i te pumaana i te aroa o te mama. Ka riro teia ei tamaru anga tikai ki nga tamaine tei taitaiaia e te mii ra no te akatakake mai anga mei to raua metua vaine ongai akaperepere. Penei te akaata katoa ra te tuatua i te manako e kare mei ia Naomi rai, e au are akanoo meitakiia to te nga metua vaine o Ruta raua ko Orapa.
1:13, 21—Kua akariro ainei a Iehova i tetai oraanga makitakita no Naomi e kua akatupu i te tumatetenga kiaia? Kare, e kare roa a Naomi i akaapa ana i te Atua no tetai ua atu angaanga tarevake. Inara, i te akamanako pouroa anga i tei tupu kiaia, kua manako mai aia e te patoi ra Iehova iaia. Kua makitakita mai aia e kua oripu ua. Tei runga ravao, i taua tuatau ra ta te kopu i anau ra kua manakoia ei akameitakianga tu-Atua e te tu pa ua, e taumaa angaia. I te ngere anga i te au mokopuna e te mate anga o nga tamaroa e rua ra, penei kua manako mai a Naomi e kua tano rai aia i te manakoanga e kua taakamaia aia e Iehova.
2:12—Eaa te “tutaki maata” tei rauka ia Ruta mei ia Iehova ra? Kua anau mai a Ruta i tetai tamaroa e kua rauka i te akameitakianga i te riro mai anga ei pirianga i roto i to te tuatua enua papaanga tupuna puapinga roa atu—no Iesu Karaiti ra.—Ruta 4:13-17; Mataio 1:5, 16.
Au Apiianga no Tatou:
1:8; 2:20. Noatu te au tumatetenga tei tupu kiaia, kua tamou ua atu rai a Naomi i tona irinaki ki roto i to Iehova takinga meitaki. Kia rave pera rai tatou, koia tikai me te aaere ra i roto i te au taomianga kino tikai.
1:9. Ka tau tetai kainga e kia maata atu e e kainga ua e e kaikai ana e e moe ana te au mema pamiri. Ka tau te reira ei ngai au no te akaangaroianga e te pumaana.
1:14-16. Kua ‘oki [atu a Orapa] ki tona au tangata ra, e ki tona au atua.’ Kare ra oki a Ruta. Kua akaruke aia i te tu pumaana e te tinamou o tona enua anau e kua vai tiratiratu ua atu rai kia Iehova. Te tatanuanga i te aroa tiratiratu no te Atua e te akonoanga i te vaerua akaatinga uaorai ka paruru ia tatou mei te ariuanga ki te au inangaro noinoi e te ‘unui anga ki muri e mate atu.’—Ebera 10:39.
2:2. Kua inangaro a Ruta i te akono i te tuatau no te akanoonooanga no te koi anga tei maaniia no te puapinga o te aronga ke e tei putaua. E vaine akaaka tikai aia. Kare e tau ana i tetai Kerititiano anoano ra kia ngakau parau i te ariki i te tauturu anga aroa a te aronga taeake irinaki me kore i tetai ua atu tauturu a te kavamani ka tau aia i te pati atu.
2:7. Noatu te tikaanga i te koianga, kua pati atu a Ruta i te tika anga i mua ake i te raveanga i te reira. (Levitiku 19:9, 10) E akairo teia no tona tu akaaka. Kia pakari tatou i te “kimi i te akaaka,” no te mea ko “te aronga maru ra, ka noo ïa i te enua, e ka rekareka ratou i te maata o te au ra.”—Zephania 2:3; Salamo 37:11.
2:11. Kare a Ruta i riro ua ra ei kopu tangata no Naomi. E oa mou tikai aia. (Maseli 17:17) E ketaketa to raua pirianga oa no te mea kua akatumuia te reira ki runga i te au tu mei te aroa, tiratiratu, tu tangi, aroa ua, e tetai vaerua akaatinga uaorai. Tei maata rava atu, kua akatumuia ki runga i to raua turanga pae vaerua—to raua inangaro i te tavini ia Iehova e kia riro mai e ko tetai o tana aronga akamori. Tei ia tatou katoa te au atianga i te tatanu i te au pirianga oa tika tikai ma te aronga akamori mou.
2:15-17. Noatu kua maani a Boaza ia Ruta kia akamama mai i tana apainga angaanga, “koi aere iora aia i roto i taua kainga ra e aiai ua atura.” E vaine angaanga pakari a Ruta. Ka tau tetai Kerititiano kia rauka te ingoa meitaki ei tangata angaanga pakari.
2:19-22. Kua rauka ia Naomi raua ko Ruta i te pukapuka anga reka tikai i te au tuatau i te aiai, te akaari ra te pakari ake ia raua i tetai inangaro i roto i te au angaanga a te mapu, e ngoie ua raua roa ai i te akakitekite ua i to raua manako e te au manako ngakau. Ka tuke ainei te reira i roto i tetai pamiri Kerititiano?
2:22, 23. Kare mei te tamaine rai a Iakoba ko Dina, kua kimi a Ruta i te kapiti anga ma te aronga akamori o Iehova. Mei teaa tikai te akaraanga meitaki no tatou!—Genese 34:1, 2; 1 Korinetia 15:33.
KUA “KI” MAI A NAOMI
Kua pakari roa a Naomi i te anau tamariki. No reira kua ikuiku atu aia ia Ruta kia tupau i tona ngai na roto i tetai akaipoipoanga na te oko anga, me kore te akaipoipoanga taokete. I te aru anga i ta Naomi aratakianga, kua pati atu a Ruta ia Boaza kia riro mai ei tangata oko. Kua papa ua a Boaza i te akono. Inara, e kopu tangata vaitata atu tetai te ka tau kia orongaia te patianga mua.
Kare roa a Boaza i kaimoumou taime ana i te akatikatika i te manamanata. I tera mai popongi tikai, kua akaputu aia e tai ngauru aronga pakari o Betelehema i mua i te kopu tangata e kua ui atu kiaia me ka inangaro rai aia i te rave i te oko anga. Kua patoi te tangata i te rave i te reira. No reira, kua riro mai a Boaza ei tangata oko e kua akaipoipo atu ia Ruta. Kua akatupu mai to raua akaipoipoanga i tetai tamaroa, ko Obeda, te tupuna tane o te Ariki ko Davida. Kua karanga te au vaine o Betelehema i teianei kia Naomi: “Kia akameitakiiā Iehova . . . E riro aia ei akapumaana ia koe, e ei tauturu ia koe i to ruaine anga; na to unonga oki, na tei aroa ia koe ra, e te meitaki maata ia koe i te tamariki e kia itu ua atu, nana aia i anau.” (Ruta 4:14, 15) Te vaine tei oki mai “ma te ngere” ki Betelehema kua “ki” akaou!—Ruta 1:21.
Pauia te Au Uianga Tuatua Tapu:
3:11—Eaa i rauka ai ia Ruta i te ingoa meitaki ei “vaine akono meitaki”? Kare oki e ko “te manea ki vao ua ra i te rauru iri ra” me kore “te tatua anga i te auro ra, e te kakau anga i te kakau ra” tei akakeu i tetai ke ra i te rekareka ia Ruta. Mari ra, ko “te tangata ngaro ra ko te ngakau te akamanea”—tona tu tiratiratu e te aroa, tona tu kauraro e te akaaka, tona maroiroi e te tu akaatinga uaorai. Ko tetai ua atu vaine te mataku ra i te Atua te inangaro ra i tetai ingoa meitaki mei to Ruta rai ka tau kia aruaru i te tatanu i teia au tu.—1 Petero 3:3, 4; Maseli 31:28-31.
3:14—No teaa ra a Ruta raua ko Boaza i ara vave ei i mua ake i te maiata? Kare teia no te mea kua tupu tetai apinga tau kore i taua po ra e kua inangaro raua kia kore e kitenaia. Te au angaanga a Ruta i taua po ra i te akaraanga te tau ra ki te peu tei rave matauia e tetai vaine te kimi ra i te tikaanga no te akaipoipoanga taokete. Kua rave rotai aia ma ta Naomi ikuikuanga. Tei runga ravao, to Boaza ariu mai anga te akakite taka meitaki maira e kare ana apinga tarevake i kite ana i roto i ta Ruta i rave ei. (Ruta 3:2-13) I te akaraanga, kua tu vave a Ruta raua ko Boaza kia kore tetai tangata tumu anga no te akamataanga i tetai au tuatua puapinga kore ua.
3:15—Eaa te puapinga i to Boaza oake anga i nga aite kerite e ono ra kia Ruta? Penei te tou ra teia angaanga mei te ra akaangaroi ra e aru mai ana i nga ra ono no te angaanga, te vaitata maira te ra o Ruta no te akaangaroi anga. Ka akara rai a Boaza kia rauka iaia tetai “akaangaroianga” i roto i te are o tana tane akaipoipo. (Ruta 1:9; 3:1) Penei rai paa e e ono ua rai a Ruta aite kerite ka rauka i te apai i runga i tona katu.
3:16—No teaa ra a Naomi i ui atu ei kia Ruta: “Koai koe, e taku tamaine?” Kare ainei aia i kite ana i tana unonga vaine? Penei ake rai paa, no te mea i to Ruta oki atu anga kia Naomi, penei te poiri ra rai. Penei, te uianga, te aite katoa ra e te ui ra a Naomi no runga i to Ruta rauka anga i tetai turanga ou te kapiti atura kiaia i te okoia anga.
4:6—Na roto i teea tu e rauka ai i tetai tangata oko i te ‘takino’ i tona kainga na te rave anga i te oko akaou mai anga? Te mea mua, me kua oko te tangata tei topa ki roto i te turanga putaua i tona kainga enua, ka tau te tangata oko i te oko i te enua i te moni akatanoia na runga i te au mataiti te vai ra e tae ua atu ki te Tiupiri tei aru mai. (Levitiku 25:25-27) Te raveanga i te reira ka akameangiti mai i te moni oko o tana uaorai au apinga. Tei runga ravao, e ua ake ka anauia mai tetai tamaroa kia Ruta, taua tamaiti ra, kare i tetai ua atu o te kopu tangata vaitata mai o te tangata oko te ora ra rai, te ka peke i te kainga tei okoia.
Au Apiianga no Tatou:
3:12; 4:1-6. Kua aru meitaki a Boaza i ta Iehova akanoonooanga. Te aru akava ngakau ra ainei tatou i te au rave anga teokaratiki?—1 Korinetia 14:40.
3:18. Kua irinaki papu a Naomi ki roto ia Boaza. Kare ainei e ka tau katoa tatou kia irinaki papu ki roto i to tatou au taeake irinaki tiratiratu? Kua inangaro ua a Ruta i te akono i te akaipoipoanga taokete ki tetai tangata kare roa aia i kite ana, tetai tangata kare i akakiteia mai ana te ingoa i roto i te Pipiria. (Ruta 4:1) No teaa ra? No te mea kua irinaki papu aia ki roto i ta te Atua akanoonooanga. Te aiteite ra ainei to tatou irinakianga papu? Me tae mai ki te kimianga i tetai tokorua akaipoipo, ei akaraanga, te akarongo ra ainei tatou i te akoanga kia akaipoipo “kia tau ra i te Atu”?—1 Korinetia 7:39.
4:13-16. Noatu e e vaine Moabi aia e e tangata akamori i te atua ko Kemosa i mua atu ana, mei teaa ra te akameitakianga tei rauka ia Ruta! Te akatutu maira teia i te kaveinga e “kare to te anoano, kare oki to te oro, no te Atua ra i aroa maira.”—Roma 9:16.
‘Kia Akateitei te Atua ia Kotou i te Tuatau Tikai’
Te akatutu maira te puka a Ruta ia Iehova e e Atua no te aroa takinga meitaki, te angaanga ra ma tona au tavini tiratiratu. (2 Paraleipomeno 16:9) Me akamanako tatou e akapeea a Ruta i te akameitakiia anga, ka kite mai tatou i te puapinga i te tukuanga i to tatou irinakianga papu ki roto i te Atua ma te akarongo ekoko kore, irinaki tikai anga e “e Atua e tikaʼi, e koia tei tutaki mai i te aronga i kimi tikai iaia.”—Ebera 11:6.
Kua tuku pu tikai a Ruta, Naomi, e Boaza i to ratou irinakianga ki roto i ta Iehova akanoonooanga, e kua puapinga meitakiia ratou. Ma te aiteite, ‘kua akatupu te Atua i te au mea ravarai i te meitaki no te aronga i anoano i te Atua, no te aronga i karangaia mai i te akakoroanga nana ra.’ (Roma 8:28) Kia akono tatou i te ako a te apotetoro ko Petero: “E tenana, ka akamoraro ia kotou uaorai i raro ake i te rima mana o te Atua, kia akateitei aia ia kotou i te tuatau tikai. E uri i to kotou tumatetenga katoa ki runga iaia; koia oki te tiaki mai ia kotou.”—1 Petero 5:6, 7.
[Tutu i te kapi 26]
Kua kite ainei koe e eaa ra a Ruta i kore ei i akaruke ia Naomi?
[Tutu i te kapi 27]
Eaa i rauka ai ia Ruta i te ingoa meitaki ei “vaine akono meitaki”?
[Tutu i te kapi 28]
Eaa ta Ruta “tutaki maata” mei ko mai ia Iehova?