“Tiratiratu i Raro Ake i te Au Timata Anga”

I TE akamataanga o Aperira 1951, kua tomo poitirere atu te kavamani Toviete ririnui ki rungao i tetai pupu apa kore ua o te au Kerititiano i te pae itinga o te Toviete Unioni​—ko te Au Kite o Iehova. Tauatini ua atu te au pamiri​—kapiti mai te tamariki, au vaine nui, e te ruaine​—kua akatomoia ki roto i te au pia pereoo no tetai teretereanga kino tikai na runga i te rerue e 20 ra te roa ki Tiperia. Kua aro atu ratou i te tuikaaanga tinamou i roto i te au turanga kino pakari, e te taito.

I roto ia Aperira 2001, kua akairoia te 50 mataiti akamaaraanga o teia tupuanga tuatua enua i Moscow ma te tukuna mai anga o tetai vitio te akakite ra i te takinga kino anga e au ngauru mataiti te roa o te Au Kite o Iehova i roto i te Toviete Unioni o mua ana. I roto i te tataanga tei teataia, te akakite maira te aronga tata tuatua enua e te au kite mata e akapeea te Au Kite i ora ai e i tupu ua atu ei noatu te taomianga kino tikai.

Teia tataanga tei teataia, Faithful Under Trials​—Jehovah’s Witnesses in the Soviet Union, kua akarakaraia i teianei e te au mirioni ua atu i Rutia e tetai ngai ke atu e kua rauka i tetai akapaapaanga teitei mei te au tangata ua nei e mei te aronga tata tuatua enua katoa. Tei aru mai e rua nga tuatua anga na te aronga kite Rutia te noo ra i roto i te ngai tikai i tukunaia atu te maataanga o te au pamiri Kite:

“Kua mataora tikai au i teia teata. E rekareka ua ana rai au i te au komono o ta kotou akonoanga, inara i te akaraanga i te teata, kua ketaketa roa atu toku akaraanga ia kotou. E angaanga mako tikai teia teata! Kua reka tikai au i te mataara i oronga mai ei kotou i te tangata okotai ei tangata tataki tai. Noatu e tangata Otototi oki au e kare rai e inangaro ana i te taui i taku akonoanga, kua rekareka tikai au i te Au Kite. Ka inangaro au i ta matou apii kia tu i tetai kopi o teia teata. Kua manako mai au e toku au taeake i te akaari i te reira ki ta matou aronga apiipii e kia kapiti atu i teia i roto i te akapapaanga apii.”​—Poropeta ko Sergei Nikolayevich Rubtsov, te akaaere o te apii no te tuatua enua o te Apii Teitei Pa Enua Pedagogical, Irkutsk, Rutia.

“Kua ariki au i te tae anga mai o teia teata. Me maani tetai tangata i tetai teata no runga i te maroanga, e aka angaanga ua ana rai i te akatupu i te tua na roto i te tu tau. Inara kua rauka ia kotou i te rave i te reira. Eiaa e mataku ine i te apai akaou mai i ta kotou au teata kiaku.”​—Poropeta ko Sergei Ilyich Kuznetsov, te akaaere o te apii no te tuatua enua o te Apii Teitei Pa Enua Irkutsk, Rutia.

Kua rekareka katoa te Au Kite o Iehova e noo ra i Tiperia i te tataanga tei teataia. Tei aru mai ko tetai akaraanga o ta ratou au ariuanga:

“I te tuatau i tupu tikai ei te au tupuanga tei akaariia i roto i teia teata, te maataanga i Rutia kua akakite tarevakeia no runga i te au angaanga a te Au Kite o Iehova. Inara i te akaraanga i te teata, kua kite ratou e kare ta tatou akaaerenga e ko etai akapupuanga akonoanga ua, mei ta ratou i manako ei i mua atu ana. Tetai atu tei riro ua  akenei ei au Kite kua karanga e: ‘Kare roa matou i manako ana e te noo e te angaanga kapiti ra matou ma te au taeake Kerititiano tei akakoromaki maata tikai!’ I muri ake i te akaraanga i te teata, kua akakite mai tetai Kite i tona inangaro kia riro mai ei orometua painia tamou.”​—Anna Vovchuk, ko tei tuikaaia ki Tiperia.

“I te akaari mai anga te teata i tetai akava muna te topapa ra i te ngutupa o te are o tetai Kite, kua ruketekete mai au. Mei te reira rai te topapaanga i runga i to matou ngutupa, e kua maara mai iaku i toku mama i te tuatua anga: ‘Penei kua ka te ai i tetai ngai.’ Inara kua akamaara katoa mai te teata kiaku e e manganui te au Kite tei kino roa atu iaku. Pouroa teia akakiteanga te oronga maata maira kia tatou i te maroiroi e te tu maoraora kia tavini ua atu rai ia Iehova.”​—Stepan Vovchuk, ko tei tuikaaia ki Tiperia.

“E tamaiti au na tetai nga Kite akatuikaaia. Kua manako oki au, i reira, e e maata taku i akarongo takere ana no runga i taua au tuatau ra. Inara i te akaraanga i teia teata, kua kite mai au e kare takiri aku apinga i kite. Iaku e akarongorongo ra i te au uiuianga, kua ki toku nga mata i te roimata. I teianei kare te au tupuanga i te au tua ua kiaku mari ra e tupuanga oraanga tika tikai. Kua akaketaketa te teata i toku pirianga ki te Atua e kua tauturu i te akateateamamao iaku kia akakoromaki atu i te au tu ngata i te tuatau ki mua.”​—Vladimir Kovash, Irkutsk.

“Iaku rai, e ririnui atu teia i tetai akakiteanga tataia. I toku akara anga e te akarongo anga i te au uiuianga ma te au taeake, kua manako mai au mei te mea rai kua na roto mai ana au i te au tupuanga tei kiteaia e ratou. Te akaraanga o te taeake tei toro i te au kati na tana nga tamariki tamaine ou iaia i roto i te are auri kua akakeu iaku kia tauta i te itae i te au ngakau a taku uaorai tamariki ma te au tuatua mou Pipiria. Meitaki maata! Kua akariro teia teata i te Au Kite o Iehova i Rutia kia manako maata atu i teianei e e tuanga ratou no to Iehova akaaerenga takapini i te ao nei.”​—Tatyana Kalina, Irkutsk.

“Te tuatuaanga, ‘E meitaki atu te kite anga e okotai taime i te akarongo anga e anere ua atu au taime’ kua tau tikai ki teia teata. E taka meitaki tikai te reira, e tika tikai, e te piri vaitata tikai kia tatou! I te akaraanga i te reira, kua inangaro au i te tuatau maata no te akamanako anga. Kua akakeu te teata iaku kia tauru iaku uaorai ki roto i te au oraanga o taua au Kite ra tei akatuikaaia. I teianei me akaaite au i toku au turanga ki to ratou ra, kua tauturuia au kia akono i tetai akaraanga tuke ake no te au manamanata o to tatou tuatau nei.”​—Lidia Beda, Irkutsk.

E nei kua tukunaia mai te Faithful Under Trials i roto i te au reo e 25 e te kiteia ra te arikianga pumaana takapini i te ao nei. * Kua akaariia te katoaanga o te tataanga tei teataia e te au ngai tivi i St. Petersburg, Omsk, e i tetai au oire ke mai i Rutia, e pera katoa i roto i te au oire Ukarania, Kereki, Meritopora e i roto i te ngai o Revive. Kua rauka katoa mai i te reira te au re mei te pupu akarakara pa enua o te teata.

Te mana o te karere o teia tataanga tei teataia kua kiteaia i roto i te au akaraanga o te au tauatini ua atu au tangata ua nei tei akaari i te mataku kore tuke maata e te ririnui pae vaerua i roto i te au mataiti roa no te takinga kino anga. Kua akapapu tiratiratu mai te Au Kite o Iehova i te Toviete Unioni ia ratou uaorai i raro i te au timataanga. Me ka inangaro koe i te akarakara i teia tataanga tei teataia, ka mataora Te Au Kite o Iehova i te oronga atu i tetai kia koe. E aravei atu ine i tetai ia ratou i roto i toou oire.

[Tataanga Rikiriki i Raro]

[Akameitakianga no te Tutu i te kapi 8]

Stalin: U.S. Army photo

[Akameitakianga no te Tutu i te kapi 9]

Stalin: U.S. Army photo