Tu Akono Meitaki te ‘Akamanea ra te Apiianga a te Atua’

TE MAPU ko Maria i Kransnoyarsk, Rutia, e imene meitaki ana tikai e kua tuku tona puapii iaia ki roto i te pupu imene no te apii. Kare i roa i muri akera, kua aravei atu a Maria ma te tu ngateitei i tetai o tona au puapii i te akataka atu e kare oki e rauka iaia i te imene i tetai au imene. No teaa ra? No te mea te imene anga i te au imene ma te au manakoanga akonoanga kua patoi i tana au irinakianga akatumuia ki runga i te Pipiria. Ma te poitirere, kua manako mai te puapii, ‘Eaa oki te tarevake i te akakaka anga i te Atua na roto i te imene?’

I te akaari anga eaa oki aia i patoi ei i te imene anga i tetai imene no runga i tetai Atua Toru Tai, kua eeu atu a Maria i tana Pipiria e kua akataka atu e kare te Atua e Iesu Karaiti i te Atua okotai e ko te vaerua tapu ko te mana ririnui ia no te Atua. (Mataio 26:39; Ioane 14:28; Angaanga 4:31) Kua akakite mai a Maria: “Kare toku pirianga ki toku puapii i kino ana. I te katoa anga, e au puapii meitaki tikai to matou i ta matou apii. Te inangaro ra ratou kia tuatua tika atu matou.”

I roto i te mataiti o te apii, kua rauka to Maria turanga i te akangateiteianga mei tona au puapii e te au oa apii katoa. Kua karanga a Maria: “Kua tauturu te au kaveinga Pipiria iaku i roto i toku oraanga. I te openga o te mataiti apii, kua rauka iaku i tetai re no te tuatua tika anga e no te tu mako, e kua rauka i toku nga metua tetai reta tikai no te akameitakianga mei ko mai i te apii no te oronga anga ki ta raua tamaine i tetai utuutuanga meitaki.”

Kua papetitoia a Maria ia Aukute 18, 2001. Kua karanga aia: “Kua mataora au e kua rauka iaku i te tavini i tetai Atua umere tikai ko Iehova!” Te akatupu ra te au mapu Kite o Iehova takapini i te ao nei i te au tuatua a Tito 2:10, NW, e te tatau ra tatou: ‘Kia akamanea i te apiianga a to tatou Akaora, koia te Atua, i te au mea katoa ra.’

[Tutu i te kapi 32]

Ko Maria e tona nga metua i muri ake i tona papetitoanga

[Tutu i te kapi 32]

Tetai reta no te arikianga e tetai pepa no te akameitakianga