E Mea Ora te Tuatua a Iehova

Au Manako Maata Mei te Puka Tai a Samuela

TE MATAITI e 1117 M.T.N. Mei etai toru anere mataiti i topa i to Iosua autu anga i te Enua Taputouia. Kua aere mai te au tangata pakari o Iseraela ki te peroveta a Iehova ma tetai pati anga umere tikai. Kua pure te peroveta no runga i te manamanata, e kua akatika mai a Iehova i ta ratou pati anga. Kua akairo teia i te openga o te tuatau no te au Akava e te akamata anga o te tuatau no te au ariki tangata. Te akataka maira te puka Pipiria Tai a Samuela i te au tupuanga mataora te koropini ra i taua tauianga puapinga i roto i te tuatua enua o te iti tangata o Iseraela.

Na Samuela, Natana, e Gada i tata, te taiku maira te puka Tai a Samuela i tetai tuatau e 102 mataiti​—mei te 1180 ki te 1078 M.T.N. (1 Paraleipomeno 29:29) E papaanga te reira no te au arataki e a o Iseraela. E rua te tavini ra ei nga akava, e rua ei ariki; e rua te akarongo ra kia Iehova, e rua kare ra. Ka aravei katoa tatou e rua nga vaine akaraanga meitaki e tetai toa uritumu maroiroi e te maru. Te oronga maira taua au akaraanga i te au apiianga puapinga maata no te au tu e te au angaanga kia aruia e kia kopaeia. Ka rauka i reira i te au tumu manako o Tai Samuela i te akakeu ririnui i to tatou au manako e te au angaanga.​—Ebera 4:12.

KUA MONO A SAMUELA IA ELI EI AKAVA

(1 Samuela 1:1–​7:17)

E tuatau te reira no te Oroa Akaputuputuanga Kai, e ko Hana, te noo ra i Rama, kua mataora tikai aia. * Kua pau mai a Iehova i tana au pure, e kua anau aia i tetai tamaiti. Kia akatupu i tana tia, kua oronga a Hana i tana tamaiti ko Samuela kia angaanga “ki te are o Iehova.” I reira oki i riro mai ei te tamaiti i te “rave atura ïa i te angaanga a Iehova ki mua i te aroaro o te taunga ra o Eli.” (1 Samuela 1:24; 2:11) Te meangiti ua ra rai a Samuela, kua tuatua atu a Iehova kiaia, i te akakite anga e ka akavaia te ngutuare o Eli. Te pakari mai anga a Samuela, kua kite mai te au tangata ravarai o Iseraela e e peroveta aia no Iehova.

Kare i roa ana, kua aere mai te Philiseti i te tamaki ia Iseraela. Kua opu ratou i te Aruna e kua tamate i nga tamaiti e rua a Eli. I tona akarongo anga i te nuti, mate atura a Eli ruaine, e “a akera ona ngauru i te mataiti i te akava anga ia Iseraela ra.” (1 Samuela 4:18) Te rauka mai anga te Aruna kua riro ia ei tumatetenga no te Philiseti, no reira kua akaoki atu ratou i te reira ki te ngati Iseraela. Te akava nei a Samuela ia Iseraela, e te tupu ra te au i roto i te enua.

Pauia te Au Uianga Tuatua Tapu:

2:10​—Eaa a Hana i pure ei kia Iehova kia ‘oronga i te maroiroi ki to ariki’ me kare oki e ariki tangata i rungao ake ia Iseraela? Ko te tika e ka rauka i te ngati Iseraela tetai ariki tangata tei akakiteaia mai i roto i te Ture a Mose. (Deuteronomi 17:14-18) I roto i tana totou i runga i te roi mate, kua karanga a Iakoba e: “Kare te sepeta [e akairo no te mana taoonga tutara] e taka ke ia Iuda.” (Genese 49:10) Tei runga ravao, no runga ia Sara​—te tupuna vaine o te ngati Iseraela​—kua karanga a Iehova e: “Ei ui ariki te ka anau iaia no te pa enua.” (Genese 17:16) Te pure ra, i reira, a Hana no runga i tetai ariki no te tuatau ki mua.

3:3​—Kua moe tikai ainei a Samuela i roto i te Ngai Tapu Rava? Kare, kare aia i moe ana i reira. E ngati Levi a Samuela no roto mai i te kopu tangata kare i te kau taunga o te ngati Kohata. (1 Paraleipomeno 6:33-38) No reira, kare aia e akatikaia kia “aere ki roto e akara i te tapoki anga i te mea-tapu ra.” (Numero 4:17-20) Te tuanga anake ua ka akatikaia kia taangaangaia e Samuela no te ngai tapu ra ko te paepae ia o te tapenakara. Ko te reira paa te ngai i moe ei aia. I te akara anga, kua moe katoa a Eli i tetai ngai ke i roto i te  paepae. Te tuatua “i vaooiaʼi te aruna a te Atua ra” papu e te taikuia ra ki te ngai o te tapenakara.

7:7-9, 17​—Eaa ra a Samuela i oronga ai i te atinga karakaratio i Mizepa e te akanoo anga i tetai atarau i Rama, i te mea e te oronga putuputu uaia ra te au atinga i te ngai ta Iehova i iki ra? (Deuteronomi 12:4-7, 13, 14; Iosua 22:19) I muri ake i te akaatea anga i te Aruna tapu mei te tapenakara i Silo, kare i kitea akaouia to Iehova vai anga i reira. No reira ei komono no te Atua, kua oronga a Samuela i te atinga karakaratio i Mizepa e kua akanoo katoa i tetai atarau i Rama. I te akara anga kua akatikaia teia au angaanga e Iehova.

Au Apiianga no Tatou:

1:11, 12, 21-23; 2:19. To Hana tu no te pure, tona tu akaaka, tona ariki rekareka anga i te takinga meitaki o Iehova, e tona aroa metua vaine ope kore ra e akaraanga meitaki no te au vaine ravarai te mataku ra i te Atua.

1:8. Mei teaa atura tetai akaraanga meitaki ta Elikana i akanoo no te akamaroiroi anga i tetai ke ma te au tuatua ra! (Iobu 16:5) Kua ui aia na mua i te uianga akaapa kore kia Hana taitaia: “Eaa i tumatetengaʼi to ngakau?” Kua akamaroiroi teia iaia kia tuatua no runga i tona au manako ngakau. Oti akera kua akapapu atu a Elikana i tona aroa kiaia, i te karanga anga e: “Kare ainei te meitaki maata toku i to te tamariki e kia tino ngauru ua atu ia koe na?”

2:26; 3:5-8, 15, 19. Na te rave anga i ta tatou angaanga tei orongaia mai e te Atua, na te akono meitaki anga i te tereni anga i te pae vaerua, e te maru e te akangateitei, ka “akaperepereia mai” tatou e te Atua e te tangata katoa.

4:3, 4, 10. Kare katoa tetai apinga tapu mei te aruna ra o te koreromotu i riro mai ei-kura no te paruruanga. Kia ‘matakite tatou uaorai i te au idolo.’​—1 Ioane 5:21.

TE ARIKI MUA O ISERAELA​—KUA AUTU ME KUA AUTU KORE?

(1 Samuela 8:1–​15:35)

Kua tiratiratu a Samuela kia Iehova i tona oraanga katoa, inara kare tana au tamariki tamaroa i aaere ana i te au arataa akono i te Atua. Te pati anga te au tangata pakari o Iseraela i tetai ariki tangata, kua akatika a Iehova kia akariro i tetai ei ariki. Kua aru a Samuela i ta Iehova arataki anga e kua akatainu ia Saula, ei ariki, e tangata ngati Beniamina manea. Kua akaketaketa a Saula i tona turanga ei ariki na te autu anga i te ngati Amona.

Kua tamate te tamaiti toa uritumu a Saula ko Ionatana i tetai pupu vaeau Philiseti. Kua tamaki mai to Philiseti ia Iseraela ma tetai vaeau maata. Kua mataku a Saula e kua oronga ma te akarongo kore i tetai atinga karakaratio nana uaorai. Te aere anga koia ua e tona apai taoonga ra, kua tamaki atu a Ionatana mataku kore i tetai vaeau o Philiseti i vao roa. Inara, kua akaparuparu ta Saula taputou rapurapu ra, i te puapinga o te autu anga. Kua “tamaki atura” a Saula i tona au enemi katoa ra. (1 Samuela 14:47) Inara, i te autu anga i te ngati Amaleka, kua akarongo kore aia ia Iehova na te akaora mai anga i te “au mea katoa i akataka roaia.” (Levitiku 27:28, 29) Tei tupu mai, kua kopae a Iehova ia Saula ei ariki.

Pauia te Au Uianga Tuatua Tapu:

9:9​—Eaa te aite anga no runga i te tuatua “e akara oki to te peroveta nei ingoa i muatangana ra”? Penei te akakite maira teia au tuatua e kua puapinga maata mai te au peroveta i te au tuatau o Samuela e i te tuatau o te au ariki i Iseraela, te tuatua “akara” ra kua monoia e te tuatua “peroveta.” Kua manakoia e ko Samuela te tangata mua o te au peroveta.​—Angaanga 3:24.

14:24-32, 44, 45​—Kua ngere ainei ia Ionatana to te Atua mareka anga no te kai anga i te meri te aati anga i ta Saula taputou? I te akara anga kare teia angaanga i tuku ana kia mareka kore te Atua ia Ionatana. Te mea mua, kare a Ionatana i kite ana i te taputou a tona metua tane. Tei runga ravao, te taputou, tei akakeuia e te maroiroi pikikaa me kore te manako tarevake no te mana ariki, kua akatupu i te au manamanata ki te au tangata. Akapeea e rauka mai ei to te Atua mareka anga no taua taputou ra? Noatu e te puareinga ra a Ionatana i te ariki i te au tupuanga no te aati anga i te taputou, kua akaoraia mai aia.

15:6​—No teaa ra i rauka mai ei i te ngati Keni te takinga meitaki takake mei ia Saula ra? E tamariki tamaroa te ngati Keni na te metua tane ongoai o Mose. Kua tauturu ratou i te ngati Iseraela i muri ake i te akaatea mai anga mei te Maunga Sinai. (Numero 10:29-32) I roto i te enua  o Kanaana, kua noo katoa te ngati Keni no tetai tuatau ma te au tamariki tamaroa a Iuda. (Te Au Akava 1:16) Noatu e kua noo ratou i muri ake i rotopu i te ngati Amaleka e tetai au tangata ke ke ra, kua vai oaoa te ngati Keni kia Iseraela. Te tumu meitaki, i reira, kua akaora a Saula i te ngati Keni.

Au Apiianga no Tatou:

9:21; 10:22, 27. Te tu tau e te tu akaaka tei rauka ia Saula i tona riro anga mai ei ariki kua paruru iaia mei te ravenga neneva te kore anga etai “tangata kanga ra” e ariki mai i tona taoonga ariki. Mei teaa ra te paruru anga o taua manako ra mei te au angaanga kino ra!

12:20, 21. Auraka e akatika “i te au mea puapinga kore ua ra,” mei te irinaki anga i te tangata, te irinaki anga i te vaeau maata o te pa enua, me kore i te akamori itoro, kia anga ke ia koe mei te tavini anga ia Iehova.

12:24. Tetai taviri kia akono tamou i te mataku ngateitei ia Iehova e te tavini anga iaia ma to tatou ngakau katoa koia oki kia “akamaara oki i te mea maata i raveia e ia” no tona iti tangata i te tuatau taito e pera katoa i teia tuatau.

13:10-14; 15:22-25, 30. Kia matakite i te ngakau parau​—me te akakiteia ra na roto i te au angaanga akarongo kore me kore i tetai tu akaparau.​—Maseli 11:2.

KUA IKIIA TETAI TAMAITI TIAKI MAMOE NO TE TAOONGA ARIKI

(1 Samuela 16:1–​31:13)

Kua akatainu a Samuela ia Davida no te kopu tangata o Iuda kia riro mai ei ariki i te tuatau ki mua. I muri poto ua ake i te reira, kua tamate a Davida i te tuputupua Philiseti ko Golia ma tetai toka maka okotai ra. Kua tupu tetai pirianga oa i rotopu ia Davida raua ko Ionatana. Kua tuku a Saula ia Davida i rungao ake i tona au tumu toa. I te ariu anga atu ki te autu anga e manganui a Davida, kua imene te au vaine o Iseraela: “Kua mate ta Saula e kua tausani, kua ngauru ra te tausani i ta Davida.” (1 Samuela 18:7) Kua ki i te vareae, kua kimi a Saula i te ta ia Davida. E toru ta anga i muri mai na Saula, kua oro ke atu a Davida e kua riro mai ei tangata tuitarere.

I te au mataiti i tona tuitarere anga, e rua taime to David akaora anga ia Saula. Kua rave katoa e kua akaipoipo katoa aia ia Abigaila purotu ra. Te aere mai anga to Philiseti i te tamaki ia Iseraela, kua kimi atura a Saula ia Iehova. Inara kua akaruke a Iehova iaia. Mate atura a Samuela. Ma te taitaia, kua kimi a Saula i tetai vaerua kino, i te akarongo ua anga e ka mate aia i roto i te tamaki atu anga i to Philiseti. I te tuatau o te taua tamaki, kua puta roa a Saula, e kua mate tana tamariki tamaroa. Kua taopenga te papaanga te mate autu kore anga a Saula. Te pipini ra rai a Davida.

Pauia te Au Uianga Tuatua Tapu:

16:14​—Eaa te vaerua kino te akakoiriria ra ia Saula? Te vaerua kino te akakore ra ia Saula no tona manako au koia oki te manako kino o tona manako e te ngakau​—tona anoano i roto roa kia rave i te tarevake. Te akaatea mai anga a Iehova i tona vaerua tapu, kua ngere ia Saula te paruru anga a te reira e kua akatereia e tona uaorai vaerua kino. I te mea e kua akatika te Atua i taua vaerua kia mono atu i Tona vaerua tapu, kua tapaia teia vaerua kino nei ko “tetai vaerua kino i tukuia mai e Iehova.”

17:55-58​—I te akamanako anga ia 1 Samuela 16:17-23, eaa ra a Saula i ui ei e tamaiti a Davida naai? Kare anake ra ta Saula ui anga no runga i te ingoa o te metua tane o Davida. Penei,  te inangaro ra aia i te kite e mei teaa rai te tangata tei uanga mai i te tamaiti tei akatupu ua akera i te au angaanga umere te ta anga i tetai tuputupua.

Au Apiianga no Tatou:

16:6, 7. Kare oki e umere atu i te akara anga o vao o tetai ke me kore e akakino viviki atu ia ratou, e tauta tatou i te akara ia ratou mei ia Iehova e akara ra ia ratou.

17:47-50. Ka rauka ia tatou i te aro mataku kore i te patoianga me kore i te takinga kino a te au enemi mei ia Golia ra no te mea “na Iehova oki te tamaki.”

18:1, 3; 20:41, 42. Ka kiteaia te au oa tika tikai i rotopu i te aronga te inangaro ra ia Iehova.

21:12, 13. Te tapapa maira a Iehova ia tatou kia taangaanga i to tatou au tu kite manako e te au tu kia akono i te au turanga ngata i roto i te oraanga. Kua oake mai aia kia tatou i tana Tuatua akauruia, te oronga mai anga i te tu akono meitaki, te kite, e te tu kite o te manako. (Maseli 1:4) Tei ia tatou katoa te tauturu a te aronga pakari Kerititiano ikiia.

24:6; 26:11. Mei teaa tetai akaraanga memeitaki ta Davida e oronga maira no te akangateitei tika tikai no te aronga akatainuia o Iehova!

25:23-33. Ta Abigaila tuatua meitaki e akaraanga meitakiia.

28:8-19. I ta ratou au tauta anga kia arataki ke atu me kore kia akakino i te tangata, ka rauka i te au vaerua kino i te akatutu mai ei au tangata ke i mate ra. Kia akaatea ke mai tatou mei te au tu ravarai o te ravenga purepure.​—Deuteronomi 18:10-12.

30:23, 24. Kua akatumuia teia ikianga, ki runga ia Numero 31:27, te akaari ra e te akaperepere ra a Iehova i te aronga te tavini ra i roto i te au tuanga turu anga i roto i te putuputuanga. Noatu e eaa ta tatou e rave nei, kia “rave [tatou] i te reira ma te meta katoa kia Iehova e kare ki te tangata nei.”​—Kolosa 3:23, NW.

Eaa Oki te “Meitaki Maata Tei te Akono i Tei te Atinga”?

Eaa te tika anga maata te akakiteia maira e te au tupuanga o Eli, Samuela, Saula, e Davida? Ko teia oki: “E meitaki maata tei te akono i tei te atinga, e meitaki maata tei te akarongo i tei te tongaua mamoe ra. Kua aite katoa te meameaau ki te ara ra ki te purepure, e te māro ki te kino e te akamori idolo ra.”​—1 Samuela 15:22, 23.

Mei teaa ra tetai akameitakianga kia piri atu tatou ki roto i te angaanga tutu anga Patireia e te akariro anga i te tangata ei pipi i te ao katoa ra! Ia tatou e oronga ra kia Iehova ‘i te atinga o to tatou vaa,’ e rave tatou i te meitaki te ka rauka ia tatou kia akono i te arataki anga tana i oronga mai na roto i tana Tuatua i tataia e te tuanga o tana akaaerenga i te enua nei.​—Hosea 14:2; Ebera 13:15.

[Tataanga Rikiriki i Raro]

[Tutu i te kapi 23]

Kua taui te ariki mua o Iseraela mei tetai tutara akaaka e te tau ki tetai tutara akaparau e te ngakau parau

[Tutu i te kapi 24]

Te papu ra ia tatou i teaa me aro atu tatou i te patoianga a te au enemi mei ia Golia rai?