Au Uianga a te Aronga Tatau

Te kai anga a Davida e tona au tangata i te au varaoa o te aroaro te akakite maira ainei e ka rauka ua te ture a te Atua i te aatiia me kare e akautunga anga i raro ake i te au turanga ngata?​—1 Samuela 21:1-6.

Kia tau kia Levitiku 24:5-9, te au varaoa o te aroaro tei tupauia i te ra Tapati taki tai ra kua akanooia ei kai na te kau taunga. Te kaveinga i muri i teia kai anga koia oki e mea tapu te au varaoa e kia orongaia ei manga na te au tane te piri ra ki roto i ta te Atua angaanga​—te kau taunga. Te oronga anga i te reira ki tetai tangata angaanga noa ua me kore i te kai anga i te reira no te anoano ua e mea tarevake tikai. Inara, kare te taunga ko Ahimeleka i rave ana i tetai mea ara i te tua anga aia i te varaoa o te aroaro kia Davida e tona au tangata.

I te akara anga te rave ra a Davida i tetai tukuanga angaanga takake na te Ariki ko Saula. Kua pongi a Davida e tona au tangata. Kua tamanako a Ahimeleka e kua ma ratou i te pae ture. Ia ratou e kai ra i te au varaoa o te aroaro e kare e tau tikai ana ki te ture, te rotai ra te reira ki te tumu tei akakoroia kia taangaangaia no te varaoa o te aroaro. Kua tuku teia akamanako ia Ahimeleka kia akatika ua atu. Kua taangaanga a Iesu Karaiti i teia tupuanga i te akakite mai i te tu tau kore no te akono pakari tikai anga i te ture Tapati te maroia ra e manako anga na te au Pharisea no te reira.​—Mataio 12:1-8.

Inara, kare te aite anga tei akakiteia maira, e kia aatiia ta te Atua ture me kua riro te au turanga ei mea ngata. Ei akaraanga, kua tupu mai tetai turanga i te tamaki anga atu te au tumu toa ngati Iseraela i to Philiseti. Kua karanga ana te ariki ko Saula e: “Kia taumaaia te tangata e kaikai e aiai rava atu, kia tutaki atu au i toku au enemi.” Te karanga ra te Pipiria: “E ta aere ua atura ratou i te Philiseti i taua rā ra.” Kua roiroi te au vaeau i te tamaki e te pongi ra, ‘e kua ta ua iora te tangata i te puakatoro e te punua puakatoro ki raro i te one e kua kai io ra i te toto.’ (1 Samuela 14:24, 31-33) Kua ara ratou ia Iehova na te aati anga i tana ture no runga i te toto. Kare ta ratou au angaanga i tau ana ki ta te Atua anake ra e akakoro maira kia taangaangaia te toto, koia oki “ei tapokiangaara” no te au ara. (Levitiku 17:10-12; Genese 9:3, 4) Ma te aroa, kua ariki a Iehova i te au atinga takake no ko mai i te aronga tei rave i te ara.​—1 Samuela 14:34, 35.

Ae, te tapapa maira a Iehova ia tatou kia akono i tana au ture i raro ake i te au turanga ravarai. “Teia oki te inangaro i te Atua,” i karanga ai te apotetoro ko Ioane, “ko te akono i tana au akauenga.”​—1 Ioane 5:3.

[Tutu i te kapi 30]

Kua tukunaia te au varaoa ou o te aroaro ki roto i te tapenakara i te au Tapati