Eaa ta Iesu Karaiti Akakeu Anga ka Rave kia Koe?

I TE manako anga i ta tatou i akamanako ana i roto i te atikara i mua akenei, ka ekokoia ainei e kua akatupu ta Iesu au apiianga i te akakeu anga i te ao katoa? Inara, te uianga puapinga maata, koia oki, “Eaa te akakeu anga ta Iesu au apiianga ka rave kiaku uaorai?”

Kua kapiti mai ta Iesu au apiianga i te au tumu manako tukeke e manganui. Te au apiianga puapinga maata ta te reira e akakite maira ka akakeu i te au tu ravarai o toou oraanga. Ka akara ana tatou i ta Iesu i apii ana no runga i te akanoonoo anga i te au mea mua i roto i te oraanga, te tatanu anga i te pirianga oa ki te Atua, te akanoo anga i te au pirianga meitaki ki tetai ke, te akatikatika anga i te au manamanata, e te kopae anga mei te au angaanga kino.

Akanoo i te Au Mea Mua i Roto i te Oraanga

Te akapou nei teia ao te aere viviki ra i teia tuatau i te au maro anga e manganui ki runga i to tatou taime e te au maroiroi te taapiapi putuputu  ra i te au manakoanga pae vaerua. E akamanako ana i te turanga o tetai tangata i roto i tona 20 mataiti ta tatou ka kapiki ra e ko Jerry. Ia Jerry e rekareka ra i te au tuatua no runga i te au tumu pae vaerua e te au puapinga tana i kite no roto mai i te reira, kua tuatua mai aia: “Kare oku taime i te rave putuputu atu i te reira. E ono oku ra angaanga i te epetoma. Ko te Tapati ua toku ra akangaroi anga. E i muri ake i te akono anga au i te au mea taku ka rave, kua roiroi tikai au.” Me te kite ra koe ia koe uaorai i roto i taua turanga, ka puapingaia koe mei ta Iesu e apii maira i roto i te Tuatua i te Maunga.

Kua karanga a Iesu ki te urupu tei akaputu mai i te akarongo anga kiaia e: “Auraka e apiapi i to kotou ora, i ta kotou e kai, e ta kotou e inu, e te kakau no to kotou kopapa. Kare aina e maata te ora i te kai, e te kopapa i te kakau? Ka akara na i te au manu o te reva nei: kare ratou i tanu, kare oki i kokoti, kare oki o ratou are kai; na to kotou Metua i te ao ra i angai ia ratou. Kare aina e meitaki maata to kotou i to ratou? . . . E teianei, auraka kotou e apiapi ua, ka na ko ei ra, Eaa ua ta matou kia kai? e, Eaa oki ta matou kia inu? e, Eaa to matou kakau kia kakau? (Te kimi ra oki te au etene i taua au mea katoa ra:) kua kite oki to kotou Metua i te ao ra e, kia rauka taua au mea katoa ra ia kotou e tikaʼi. E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.” (Mataio 6:25-33) Eaa ta tatou i kite no roto mai i teia?

Kare a Iesu e akakite maira e kia akakore tatou i te akono anga i to tatou au anoano i te pae kopapa e te aronga o to tatou au mema ngutuare. “Ko te tangata oki kare i takinga-meitaki i tona uaorai, e maata ua atu rai i tona uaorai ngutuare,” i akakite mai ei te Pipiria, “kua akaruke ïa aia i te akarongo, e e maata atu ïa tona kino i to te tangata akarongo kore ra.” (1 Timoteo 5:8) Inara, kua taputou mai a Iesu e me tuku tatou i te au mea mua e kia oronga i te au tumu pae vaerua ko te mea mua, ka akapapu mai te Atua e ka akonoia tetai atu au anoano. Te apiianga i konei koia oki no runga i te akanoo anga i te au mea mua. Aru anga i teia ako anga ka taki atu ki te tu mataora, e “mataora to te aronga tei manako i to ratou anoano i te pae vaerua.”​—Mataio 5:3, NW.

Tatanu Anga i te Pirianga Oa ma te Atua

Te aronga te manako ra i to ratou anoano i te pae vaerua te kite ra i te tu anoano no te tatanu anga i tetai pirianga oa meitaki ma te Atua. Akapeea tatou i te akanoo anga i tetai pirianga meitaki ki tetai tangata? Te tauta ra ainei tatou i te kite meitaki tikai i taua tangata ra? E rave tatou i te tuatau i te apii no runga i tona au manako, te au tu, e te au kite, e te au mea i rauka, te inangaroia ra, e kare e inangaroia ra. Kua aite te reira i te akatupu anga i tetai pirianga oa ma te Atua. Te umuumuia ra te kite tika tikai iaia. Te pure anga ki te Atua no tana au pipi, kua karanga a Iesu e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Ae, te tatanu anga i te pirianga oa ma te Atua te umuumuia ra e kia kite tatou iaia. Te tumu anake o taua kite ra ko te Tuatua akauruia a te Atua, te Pipiria. (2 Timoteo 3:16) E akanoo tatou i te tuatau kia apii i te au Tuatua Tapu.

Inara, kare e rava ua te kite uaorai. I roto i taua pure ra, kua karanga a Iesu e: “Kua akono ratou [tana au pipi] i taau tuatua.” (Ioane 17:6) Kare tatou e akono ua i te kite no te Atua mari katoa ra kia angaanga rotai ma taua kite ra. Akapeea tatou e riro mai ei e oa no te Atua? Ka rauka tikai ia tatou i te manako atu e ka tupu to tatou pirianga oa ki tetai tangata me rave akakoro tatou na tetai tu me te tuke ra ki te au manako e te au kaveinga o taua tangata ra? Ka  arataki i reira, to te Atua au manako e te au kaveinga, i to tatou au takainga katoa i roto i te oraanga. E akamanako ana e akapeea tana nga kaveinga e rua i te taangaangaia anga ki to tatou au pirianga ki tetai ua atu au tangata.

Akanoo Anga i te Au Pirianga Meitaki ki Tetai Ke

I tetai atianga, kua akakite a Iesu i tetai tua poto ua kia apii mai i tetai apiianga puapinga maata i roto i te au pirianga tangata. Kua tuatua aia no tetai ariki te inangaro ra i te akatau i te au tutaki anga o tona aronga tavini. Inara, ko tetai ia ratou e maata tana kaiou e kare e moni i te tutaki atu i te reira. Kua akaue te pu e kia okoia taua tangata, e tana vaine, e tana au tamariki e kia rauka mai oki te tutaki anga. Kua tipapa iora te tangata kaiou e kua pati akatenga atura: “Aua na koe e rapurapu iaku, e naku e akaoki atu i te oko naau, e ope rava ake.” Kua aroa atura, akakore atura te pu i tana kaiou. Inara kua aere atu te tavini, kua kiteaia mai tetai taeake tavini e manga moni tana e kaiou ra kiaia, e kua maro atu i te tutaki anga. Noatu e kua pati atu te taeake tavini ma te aroa, kua titiriia aia e te tavini mua ra ki roto i te are tapeka anga kia tutaki pouroa mai aia i tana kaiou. Te akarongo anga te ariki i teia, riri akera aia. “E auraka koe e aroa katoa atu i te taeake tavini noou ra, mei iaku i aroa ia koe ra?” i maro ei aia. E kua tuku atura aia kia tapekaia te tavini kare i akakore i te apa ra kia tutaki pouroa mai aia i tana kaiou ra. E apii ei i tetai apiianga no roto mai i te tua, kua karanga a Iesu e: “E akapera katoa mai taku Metua i te ao ra ia kotou katoa, kia kore kotou e akakore ma te ngakau katoa i te apa a tona taeake.”​—Mataio 18:23-35.

Ei au tangata apa, e maata to tatou au tarevake. Kare e rauka ia tatou i te tutaki i te kaiou maata ta tatou i akaputu ki te Atua no te ara anga iaia. Te apinga ua ka rauka ia tatou i te rave koia oki kia kimi i tana akakore anga i te apa. E kua papa te Atua ko Iehova i te akakore mai i te au tarevake katoatoa a tatou, tera ra kia akakore oki tatou i to tatou au taeake no te au ara ta ratou i rave kia tatou. E apiianga ririnui tikai te reira! Kua apii a Iesu i tana au pipi kia pure: “E akakore mai i ta matou ara, mei ia matou i akakore i ta tei ara ia matou nei.”​—Mataio 6:12.

Kite Anga i te Tumu o te Manamanata

I te marama anga i te tu tangata ra, e tangata kite a Iesu. Te akakore ra tana ako anga i te au manamanata na te akatikatika anga i te tumu tikai. E akamanako ana i nga akaraanga e rua e aru mai nei.

“Kua akarongo oki kotou e i tuatuaia mai e te aronga taito ra e, ‘Auraka rava koe e ta ua:’ e te ta ua ra, e tau iaia te akavaanga,” i karanga ai a Iesu. “Te karanga atu nei ra au kia kotou, Ko te tangata e riri ua ki tona taeake, e tau katoa iaia te akavaanga.” (Mataio 5:21, 22) Te akaari maira a Iesu i konei i te tumu o te manamanata no te ta e maata roa atu i to te rave anga i te ta uaorai. Ko te tu ia te tupu ra i roto i te ngakau o te tangata ta. Me kare te tangata e akatika i tetai manako no te vareae me kore te riri kia tupu mai, ka ngaro ke te kino tei manako akakoroia. Mei teaa atura te maata o te akamaringi anga toto te ka kopaeia me akonoia teia apiianga!

E akara ana e akapeea a Iesu i te akakore anga i tetai ua atu manamanata te akatupu maata ra i te ngakau mamae. Kua akakite aia ki te urupu: “Kua akarongo kotou e, i tuatuaia mai e te aronga taito ra e, ‘Auraka rava koe e akaturi:’ Te karanga atu nei ra au kia kotou, Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau. te pekapeka na koe i toou mata katau, e koiti, e akaruke ke atu.” (Mataio 5:27-29) Kua apii a Iesu e e oonu roa atu te manamanata i te tu akonoanga tau kore uaorai ra. Kua akatupuia te manamanata e te​—au anoano tau kore. Me kare tetai tangata e akatika i te akamanako i te au anoano tau kore e te ‘koiti i te reira’ mei tona manako, ka autu i reira iaia te manamanata maata o te tu akonoanga tau kore.

“Ka Momono Ana i Taau Koke ki Roto i te Vaî”

I te po i pikikaaia ai e i opuia ai a Iesu, kua kiriti mai tetai o tana au pipi i tana koke e kua paruru atu iaia. Kua akaue atura a Iesu iaia: “Ka momono ana i taau koke ki roto i te vaî; ko tei  rave i te koke ra, ka mate ïa i te koke.” (Mataio 26:52) I tera mai popongi, kua akakite a Iesu kia Ponotio Pilato: “Kare to teianei ao taku basileia: naringa no teianei ao taku basileia, kua akamaroiroi ïa toku au tavini, kia kore au e tukuia ki te ngati Iuda; kare ra toku basileia i to ko nei.” (Ioane 18:36) E tau kore ainei teia apiianga?

Eaa ra te tu o te au Kerititiano mua ki ta Iesu i apii ana e auraka e rave i te kino? Te karanga ra te puka The Early Christian Attitude to War e: “I te mea e kua kopae te reira [ta Iesu au apiianga] kare e tau ana i te ture te rave anga i te kino e te tamamae anga ki tetai ke, te akakite taka meitaki maira [oki] i te tika anga kore no te piri anga ki roto i te tamaki . . . Kua aru tikai te au Kerititiano mua i ta Iesu tuatua, e te marama ra i tana au apiianga no te tu maru e te patoi kore anga i roto i te kino tikai o te reira. Kua akataka piri vaitata ratou i ta ratou akonoanga ki te au; kua patoi pakari ratou i te tamaki no te akamaringi anga toto te o atura te reira.” Mei teaa te tuke o te aerenga o te tuatua enua naringa oki e kua aru tikai te aronga katoa ra tei karanga e e au Kerititiano ra i teia apiianga!

Ka Puapingaia Koe mei ta Iesu Au Apiianga Katoatoa

E manea, e mama ua, e e ririnui te au apiianga a Iesu ta tatou i akamanako ana. Ka puapingaia te tangata ravarai te kite meitaki anga i tana au apiianga e te rave anga i te reira. *

Ka mataora te Au Kite o Iehova i toou ngai i te tauturu ia koe kia kite e akapeea koe e puapingaia ai mei te au apiianga pakari tikai te tuatuaia ra e tetai tangata. Tei ia koe ta matou pati anga maana kia aravei atu ia ratou me kore e tata atu ki te atereti i te kapi 2 o teia makatini.

[Tataanga Rikiriki i Raro]

[Tutu i te kapi 5]

“Na to kotou Metua i te ao ra i angai ia ratou”

[Tutu i te kapi 7]

E akakeu anga memeitaki ta Iesu au apiianga ki roto i toou oraanga