Kia Ora Kare No Tatou Uaorai

“Kua mate [a Karaiti] no te katoatoa kia ora tatou kare no tatou uaorai.”—​2 KORINETIA 5:15, NW.

1, 2. Eaa te akauenga Tuatua Tapu tei akakeu i te au pipi a Iesu i te anere mataiti mua kia autu i te tu noinoi?

KO TE po openga teia o Iesu i runga nei i te enua. I nga mea ora ua, ka oronga aia i tona oraanga no te aronga katoatoa ka akono i te akarongo i roto iaia. I taua po ra, e manganui ta Iesu au apinga puapinga i akakite ki tana au pipi tiratiratu. I roto i te reira koia oki ko tetai akauenga no runga i te tu te ka riro ei akairo akataka anga i tana au pipi. “E tuku atu au i te akauenga ou kia kotou,” i akakite ei aia, “e aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai. Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”​—Ioane 13:34, 35.

² Kia akaari te au Kerititiano mou i te aroa akaatinga uaorai no tetai e tetai e kia tuku i te au anoano o to ratou au oa akarongo na mua ake i to ratou uaorai. Auraka ratou e emiemi noatu i te ‘oronga i to ratou meta no to ratou au oa.’ (Ioane 15:13, NW) Akapeea ra te au Kerititiano mua i te ariu anga atu ki te akauenga ou? I roto i tana angaanga rongonui i te Apology, kua taiku te tangata tata i te rua anere mataiti ko Tertullian i tetai aronga ke tei tuatua no runga i te au Kerititiano: ‘E akara i akapeea to ratou tu aroa ia ratou uaorai, e akapeea oki to ratou tu papa ua kia mate tetai no tetai.’

3, 4. (a) Eaa tatou ka patoi ei i te tu noinoi? (e) Eaa ta tatou ka akamanako i roto i teia atikara?

³ Kia pera katoa tatou i te ‘rave atu tetai i ta tetai apainga, kia pera tatou i te akatika i te ture a te Mesia.’ (Galatia 6:2) Inara, ko te tu noinoi tetai araianga maata roa atu i te akono anga i te ture a Karaiti e i te ‘anoano anga i to tatou Atua ia Iehova ma te ngakau katoa, e ma te vaerua katoa, e ma te manako katoa e te aroa anga i to tatou tangata tupu mei ia tatou uaorai.’ (Mataio 22:37-39) No te tu apa ua, ka akakeuia rai tatou kia manako ua ia tatou uaorai. Kapiti atu ki teia koia oki te taomianga o te oraanga i te au ra, te tu akarere i te apii me kore i te ngai  angaanga, e te ropi anga kia rauka te au mea no te oraanga, e i te openga kua pakari roa atu teia tu paruparu natura. Kare teia akakeuanga ki te tu noinoi e meangiti atura. Kua akamatakite mai te apotetoro ko Paulo: “I te au ra openga . . . ka riro te au tangata ei manako ia ratou uaorai.”​—2 Timoteo 3:1, 2, Phillips.

⁴ Vaitata atu ki te tuanga openga o tana angaanga orometua i te enua nei, kua oronga a Iesu e toru au takainga te ka tauturu ia ratou kia autu i te tu noinoi. Eaa ra te reira, e akapeea tatou e puapingaia ai mei tana au ikuikuanga?

Tetai Rapakauanga Papu Tikai!

5. I te tutu aere anga na te apatokerau o Galilea, eaa ta Iesu i akakite ki tana au pipi, e no teaa i riro ei te reira ei mea poitirere tikai kia ratou?

⁵ Te tutu aere ra a Iesu vaitata atu ki Kaisarea Philipi i te apatokerau o Galilea. I te akaraanga penei ka tau atu teia ngai au ua, e te manea no te noonoo ua kare ra no te akakore iaia uaorai. Inara, iaia i reira, kua akamata atura Iesu i te akakite ki tana au pipi e “e tika iaia kia aere ki Ierusalema e e maata oki te au apinga kino ka raveia kiaia e te aronga pakari e te kau taunga maata e te au tata tuatua ra, e e tamate roaia atu aia, e e akatu akaouia mai i te toru o te ra.” (Mataio 16:21, NW) Mei teaa ra te poitirere o ta Iesu au pipi i teia akakiteanga, no te mea kua tapapa mai ana ratou e tae mai ki taua taime ra e ka akanoo to ratou Arataki i tona Patireia ki runga nei i te enua!​—Luka 19:11; Angaanga 1:6.

6. Eaa ra a Iesu i ako pakari atu ei ia Petero?

⁶ I reira rai “kua apai atura a Petero [ia Iesu] ki te pae e kua akamata iora i te ako iaia, te karanga anga atu: ‘Kia takinga meitaki ia koe uaorai, e te Atu: auraka rava teia tu kia tupu kia koe.’” Akapeea a Iesu i te pau anga? “I te anga mai anga i tona tua, kua tuatua atu aia kia Petero: ‘Ka aere mai ki muri iaku, e Satani e! Te riro nei koe ei tatipake iaku, no te mea kare koe e manako ana, i te au manako o te Atua, kareka ra i to te tangata ra.’” E aka tuke tikai tei rotopu i nga tu e rua! Kua ariki puareinga ua a Iesu i te arataa akaatinga iaia uaorai i tuku mai te Atua nana​—tetai te ka taki atu ki tona matenga i runga i te rakau tamamae i roto i nga mea marama ua. Kua akamaroiroi atura a Petero i tetai arataa mareka ua. “E takinga meitaki ia koe uaorai,” i tuatua atu ei aia. Kare e ekoko e au akakoroanga meitaki ua to Petero. Noatu rai, kua ako atura Iesu iaia no te mea kua akatika a Petero iaia uaorai kia akanauruia e Satani i taua taime ra. Kare a Petero “e manako ana, i te au manako o te Atua, kareka ra i to te tangata ra.”​—Mataio 16:22, 23, NW.

7. Mei tei tataia i roto ia Mataio 16:24, NW, eaa te mataara ta Iesu i akakite mai no tana au pipi kia aru?

⁷ Te rongoia nei te au tuatua mei ta Petero i tuatua kia Iesu i teia tuatau. E mea matau na teianei ao i te raurau i tetai tangata ‘kia meitaki kia koe uaorai’ me kore kia ‘aru i te arataa meangiti ua te patoianga.’ I tetai tua, kua akamaroiroi mai a Iesu i tetai tu manako tuke takiri. Kua akakite aia ki tana au pipi: “Me te anoano ra tetai i te aru mai iaku nei, e akaruke aia iaia uaorai e ka apai ei i tona rakau tamamae e ka aru tamou mai ei iaku.” (Mataio 16:24, NW) “Kare teia au tuatua i te patianga ki te aronga o vao kia riro mai ei pipi,” i akakite ei The New Interpreter’s Bible, “mari ra e akamanakoanga i te aiteanga o te riro anga ei pipi te aronga kua ariu ke mai ana ki te kapikianga a Karaiti.” Te au takainga e toru ta Iesu i akakite mai, mei tei tataia i roto i taua irava ra, kia aru te aronga akarongo ra. Ka akamanako tataki tai ana tatou i te au takainga taka ke.

8. Akamarama mai eaa te aiteanga kia akaruke ia koe uaorai.

⁸ Te mea mua, kia akaruke tatou ia tatou uaorai. Te tuatua Ereni “e akaruke aia iaia uaorai” te akakite maira i te tu puareinga ua i te tuatua e kare ki te au anoano noinoi me kore te au tu mareka uaorai. Kare te akaruke anga ia tatou uaorai e ko te akakore anga tatou i tetai au tu e navenave ei ra i tetai au atianga ua; e kare katoa te  aiteanga e ka riro tatou ei aronga akangere takiri me kore takinga kino ia tatou uaorai. Kare tatou ‘i to tatou uaorai’ no te mea ka oronga puareinga ua tatou i to tatou oraanga katoa e tona au mea ravarai kia Iehova. (1 Korinetia 6:19, 20) Kare e manako ua ia tatou uaorai, ka akariro ra to tatou uaorai oraanga ei tavini i te Atua. Te akaari maira te akaruke anga ia tatou uaorai i te tu manako akakoro tikai i te rave i te anoano o te Atua, noatu kare to tatou uaorai au akakeuanga apa ua e inangaro ana i te rave. Te akaari ra tatou e ko te Atua anake ua ta tatou e akono ra me rave tatou i to tatou akatapuanga kiaia e me papetitoia. Ka tauta tatou i reira i te akono i to tatou akatapuanga no te toenga o to tatou oraanga.

9. (a) I te tuatau ia Iesu i te enua nei, eaa ta te rakau tamamae e akatutu ana? (e) Na teea mataara tatou me apai i to tatou rakau tamamae?

⁹ Te rua o te takainga koia oki kia apai tatou i to tatou rakau tamamae. I te anere mataiti mua, e akatutu ana te rakau tamamae i te mamae, te akama, e te mate. Tei matauia, ko te aronga rave kino ua rai tei tamateia ki runga i te rakau tamamae me kore tei akatautauia to ratou kopapa mate ki runga i te rakau. Na roto i teianei tuatua, te akaari maira a Iesu e kia papa ua tetai Kerititiano i te ariki i te takinga kino, te riri, me kore te mate katoa, i te mea kare aia i to teianei ao. (Ioane 15:18-20) Te akataka ke ra to tatou au turanga Kerititiano ia tatou, no reira ka ‘akakino mai teianei ao ia tatou.’ (1 Petero 4:4) Penei ka tupu teia ki te apii, ki ta tatou ngai angaanga, me kore ra ki roto katoa i te pamiri. (Luka 9:23) Noatu rai, kia akakoromaki puareinga ua tatou i te riri o teianei ao no te mea kare tatou e ora nei no tatou uaorai. Kua akakite a Iesu: “E ao to kotou, kia akakino mai, e kia takinga-kino mai, e kia tapepe pikikaa ua mai te tangata ia kotou i te au kino katoa nei, noku nei: E rekareka kotou, e kia rere ua i te rekareka; e tutaki maata oki ta kotou i te ao ra.” (Mataio 5:11, 12) E tika rava, e ko te rauka anga mai te akaperepereanga a te Atua te mea puapinga roa atu.

10. Eaa te ka o mai ki te aru tamou anga ia Iesu?

¹⁰ Te toru, kua akakite a Iesu Karaiti e kia aru tamou tatou iaia. Kia tau ki te An Expository Dictionary of New Testament Words, na W. E. Vine, ko te aiteanga e kia aru koia oki kia riro ei tokorua​—“tetai e aere ra na taua mataara rai.” Kua akakite a 1 Ioane 2:6 e: “Ko tei karanga e te piri ra aia [ki te Atua], e akaarite i tona uaorai aerenga mei [to Karaiti] katoa ra aerenga e tikaʼi.” Akapeea ra a Iesu i te aerenga? Kare roa to Iesu aroa no tona Metua i te rangi e no tana au pipi i akatika ana i tetai ngai no te tu noinoi. “Kare katoa oki te Mesia i akarekareka iaia uaorai,” i tata ai a Paulo. (Roma 15:3) Noatu kua roiroi aia me kore kua mate i te pongi, kua tuku ua rai a Iesu i te au anoano o etai ke na mua ake i tona uaorai. (Mareko 6:31-34) Kua akamaroiroi pakari katoa a Iesu iaia uaorai i roto i te angaanga tutuanga e te apiianga o te Patireia. Kare ainei e tau kia aru tatou iaia ia tatou e akatupu ra i ta tatou angaanga kia ‘akariro i to te pa enua katoa ei pipi, te apii atu ia ratou, kia akono i te au mea katoa ta Iesu i akaue mai’? (Mataio 28:19, 20) I roto pouroa i teia, kua vaoo mai a Karaiti i te akaraanga no tatou, e ‘kia aru tatou i tona takainga vaevae.’​—1 Petero 2:21.

11. Eaa i puapinga ai e kia akaruke tatou ia tatou uaorai, kia apai i to tatou rakau tamamae, e kia aru tamou ia Iesu Karaiti?

¹¹ E mea puapinga tikai e kia akaruke tatou ia tatou uaorai, kia apai i to tatou rakau tamamae, e kia aru tamou i to tatou Akaraanga. Me rave tatou i te reira te patoi atura tatou i te tu noinoi​—tetai araianga pakari roa atu ia ki te akaari anga i te aroa akaatinga uaorai. Kapiti katoa atu, kua akakite a Iesu: “Ko tei kimi i tona uaorai ora ka ngere ia; ko tei ngere ra i tona uaorai ora noku nei ka rauka mai ia te reira. Eaa te puapinga ki tetai tangata me ka rauka iaia teianei ao katoa e ka kore atu ei tona meta? me kare eaa ta te tangata ka oronga ei mono no tona meta?”​—Mataio 16:25, 26, NW.

Kare e Tika ia Tatou kia Akono i Nga Pu e Rua

12, 13. (a) Eaa ra te mea e manamanata ra tetai tutara ou tei pati tauturu atu kia Iesu? (e) Eaa te akoanga ta Iesu i oronga atu ki taua tangata ou ra, e no teaa ra?

¹² Tetai au marama i muri mai i to Iesu akaketaketa anga i te anoano no tana au pipi kia akaruke ia ratou uaorai, kua aere maira tetai tutara mapu apinganui kiaia e kua na ko maira: “E  te orometua meitaki e, eaa taku ravenga meitaki e raukaʼi iaku te ora mutu kore?” Kua akakite Iesu kiaia “e akono koe i te au ture” e kua taiku atura i tetai papaki o te reira. Kua na ko maira taua tangata ou ra: “Kua ope te reira i te akonoia e au.” Te taka ra e kua tae tikai te ngakau o taua tangata ra e kua rave pouroa i tei rauka iaia i te akono i te au akauenga o te Ture. I reira kua ui atu aia: “Eaa ua te toe iaku?” I te pau anga, kua oronga a Iesu i tetai patianga takake ki taua tangata ou ra, i te karanga anga e: “Kia inangaro koe e kia apa kore [“kia ope takiri,” New American Standard Bible], ka aere ka oko i taau apinga, ka apai atu ei na te putaua; e apinga taau i reira i te rangi; ka aere mai ei ka aru mai iaku.”​—Mataio 19:16-21.

¹³ Kua kite a Iesu e e rauka ai i taua tangata ou ra i te tavini ia Iehova ma te ngakau katoa, ka anoanoia aia kia takore atu i te tamanamanata anga maata i roto i tona oraanga​—tana apinganui. Kare e tika kia akono tetai tavini mou o Karaiti i nga pu e rua. “Kare [aia] e tika kia akono atu i te Atua e te Mamona.” (Mataio 6:24) Ka anoano aia i te ‘mata meitaki’ te tamou ra ki runga i te au mea pae vaerua. (Mataio 6:22) Te takore anga i taau au apinga e te oronga anga i te reira ki te putaua e akaatinga uaorai tikai te reira. Ei oko no teia akaatingaanga apinga pae kopapa, kua oronga a Iesu ki te tutara ou i te akameitakianga maata o te akaputuanga i te apinga i te rangi​—te apinga ka apai mai i te ora mutu kore nona e i te ka taki atu i te openga ki te manakonakoanga o te tutara anga ma Karaiti i te rangi. Kare ra taua tangata ou ra i papa i te akaruke iaia uaorai. “Aere ke atura ma te aue: e apinga maata oki tona.” (Mataio 19:22) Kareka ra, ko etai au pipi a Iesu, e tuke ta ratou pauanga.

14. Akapeea te au ravakai toko a i te ariu anga atu ki te patianga a Iesu kia aru iaia?

¹⁴ Mei te rua mataiti i mua ake, kua oronga a Iesu i tetai patianga mei te reira rai ki te toko a aronga ravakai tei karangaia e ko Petero, Anederea, Iakobo, e Ioane. Te tautai ra e tokorua i taua taime ra, e ko nga tokorua ke mai te ono ra i ta ratou puke kupenga. Kua karanga atura a Iesu kia ratou: ‘Ka aru mai iaku, e akariro au ia kotou ei ravakai tangata.’ I te openga iora kua akaruke atura te toko a i ta ratou pitiniti tautai e kua aru atura ia Iesu no te toenga o to ratou oraanga.​—Mataio 4:18-22.

15. Akapeea tetai Kite o Iehova i teia tuatau i te rave anga i te au atinga kia aru ia Iesu?

¹⁵ E manganui te au Kerititiano i teia tuatau tei aru i te akaraanga a te au ravakai toko a kare ra i ta te tutara mapu apinganui. Kua akaatinga ratou i te apinganui e te tuatau kia rongonui i roto i teia ao kia rauka i te tavini ia Iehova. “Te tae anga au ki te 22 mataiti, kua rave au i tetai ikianga maata,” i karanga ai a Deborah. Kua akamarama aia: “Kua apii au i te Pipiria no tetai ono marama, e kua inangaro au i te akatapu i toku oraanga kia Iehova, inara kua patoi pakari tikai toku pamiri. E aronga ona mirioni oki ratou, e kua manako ratou e ka apai mai toku riro anga ei Kite i te taakamaanga kia ratou no to ratou turanga. Kua oake mai ratou e 24 ora kia iki au e ko teea taku ka inangaro​—tetai oraanga puapinga mareka ua me ko te tuatua mou. Me kare au e akamutu i te au pirianga katoatoa ki te Au Kite, ka akataa takiriia au e toku pamiri. Kua tauturu mai a Iehova iaku kia tuku i te ikianga tau e kua  oronga mai i te maroiroi kia rauka iaku i te akatupu i te reira. Kua akapou au i te 42 mataiti i topa ki roto i te angaanga tavini anga tamou, e noatu eaa te tu kare roa oku manako tataraara. Na te patoi anga i te tu oraanga noinoi, te anoano navenave, kua ora mai au mei te oraanga puapinga kore e te mataora kore taku e kite nei i rotopu i te au mema o toku pamiri. Kapiti mai taku tane, kua tere atu i te anere tangata tei rauka iaku i te tauturu kia kite i te tuatua mou. E puapinga maata roa atu teia au tamariki pae vaerua kiaku i tetai ua atu au apinganui pae materia.” Te akatika katoa ra te au mirioni ua atu Au kite o Iehova ki tona au manako. Akapeea ra koe?

16. Akapeea tatou me akaari e te ora ra tatou kare no tatou uaorai?

¹⁶ Kua riro te anoano kia ora kare no ratou uaorai i te akakeu i te au tauatini ua atu Au Kite o Iehova kia tavini ei au painia, me kore ei aronga tutu tamou i te Patireia. Ko etai, kare e rauka kia piri ratou ki te angaanga orometua tamou no to ratou au turanga, te rave ra i ta ratou ka rauka i te tatanu i te tu painia e te turu i te angaanga tutu aere i te Patireia. Te akaari ra te au metua i taua tu ra me akapou maata ratou i to ratou taime e te akaatinga i to ratou uaorai au anoano kia rauka i te tereni i ta ratou tamariki. I tetai au tu, ka rauka rai ia tatou katoatoa te akaari e ko te au anoano o te Patireia te mea mua i roto i to tatou oraanga.​—Mataio 6:33.

Noai te Aroa e Akakeu nei ia Tatou?

17. Eaa te akakeu ra ia tatou kia rave i te au atinga?

¹⁷ Kare te akaari anga i te aroa akaatinga uaorai i te mataara ngoie roa atu i te aru. Inara ka akamanako ana e eaa tikai te akakeu ra ia tatou. Kua tata a Paulo: “Na te aroa o te Karaiti i akakeu ia tatou, no te mea ko teia ta tatou i akava, e kua mate te tangata okotai no te katoatoa . . . E kua mate aia no te katoatoa kia ora tatou kare no tatou uaorai, mari ra nona tei mate ra no tatou e kua akatuia mai.” (2 Korinetia 5:14, 15, NW) Na te aroa o Karaiti e akakeu nei ia tatou kia ora kare no tatou uaorai. E akakeuanga ririnui tikai tera! I te mea i mate a Karaiti no tatou, kare ainei tatou e kite ana i te apainga no te akono tau kia ora nona? E oti akera, na te akameitakianga oonu no te aroa ta te Atua raua ko Karaiti i akaari mai no tatou i akakeu ia tatou kia akatapu i to tatou oraanga ki te Atua e kia riro mai ei au pipi na Karaiti.​—Ioane 3:16; 1 Ioane 4:10, 11.

18. Eaa te arataa akaatinga uaorai i puapinga maata atu ei?

¹⁸ Te puapingaia ra ainei kia ora kare no tatou uaorai? I muri ake i te patoi anga te tutara ou apinganui i te patianga a Karaiti e kua aere ke atura, kua tuatua atura a Petero kia Iesu: “I na matou, kua akaruke matou i te au mea katoa, e kua aru mai ia koe; eaa te ka rauka ia matou?” (Mataio 19:27) Kua akaruke tika tikai a Petero e te au apotetoro ia ratou uaorai. Eaa ra ta ratou tutaki? Kua tuatua a Iesu na mua no runga i te akameitakianga ka rauka ia ratou no te tutara anga ma ia i te rangi. (Mataio 19:28) I taua atianga rai, kua taiku a Iesu i te au akameitakianga ka rauka i tana au pipi tataki tai. Kua karanga atura aia: “Koia mou taku e karanga atu kia kotou nei, Kare e tangata i akaruke i te are, e te au taeake, e te au tuaine, e te metua tane, e te metua vaine, e te vaine, e te tamariki, e te kainga, noku, e no te evangelia nei, E kore ei e rauka iaia e anere ua atu, i teianei ao . . . e i te ao a muri nei, ko te ora mutu kore ïa.” (Mareko 10:29, 30) E maata roa atu ta tatou e rauka maira i ta tatou i akaatinga. Kare ainei to tatou au metua tane pae vaerua, au metua vaine, au tungane, au tuaine, e te au tamariki i puapinga maata atu i tetai ua atu apinga ta tatou i akaruke no te Patireia? Noai ra te oraanga puapinga roa atu​—no Petero ainei me no te tutara ou apinganui ainei?

19. (a) Tei runga i teaa te mataora tika tikai? (e) Eaa ta tatou ka akamanako i roto i te atikara ka aru mai?

 ¹⁹ Kua akaari mai a Iesu na roto i tana au tuatua e te au angaanga e, ka rauka mai te mataora mei te orongaanga e te tavinianga, kare mei te tu noinoi. (Mataio 20:28; Angaanga 20:35) Me ora tatou kare no tatou uaorai mari ra kia aru tamou ia Karaiti, ka maata to tatou merengoanga i te oraanga i teianei e te manakonakoanga no te oraanga ki mua e tuatau ua atu. E tika, me akaruke tatou ia tatou uaorai, ka riro mai ko Iehova to tatou Pu. Ka riro mai tatou i reira ei au tavini no te Atua. Eaa ra i tutakianga maata ai teia tavinianga? Akapeea te reira i te akakeu anga i te au ikianga ta tatou ka rave i te oraanga nei? Ka uriuri te atikara e aru mai nei i teia au uianga.

Maara Ainei ia Koe?

• Eaa tatou ka patoi ei i to tatou au akakeuanga noinoi?

• Eaa te aiteanga e kia akaruke ia tatou uaorai, kia apai i to tatou rakau tamamae, e ka aru tamou ei ia Iesu?

• Eaa te akakeu nei ia tatou kia ora kare no tatou uaorai?

• Eaa te noo anga i tetai oraanga akaatinga uaorai i puapinga maata ai?

[Au Uianga Apii]

[Tutu i te kapi 11]

“Kia takinga meitaki ia koe uaorai, e te Atu”

[Tutu i te kapi 13]

Eaa te arai ra i taua tutara ou ra mei te aru anga ia Iesu?

[Au Tutu i te kapi 15]

Na te aroa e akakeu ra i te Au Kite o Iehova kia tavini ei aronga tutu maroiroi no te Patireia