‘Mei te Sarido ra Rai te Tu’

KUA rauka i te apotetoro ko Paulo tetai orama o tetai terono kaka i te rangi ra. Ko Tei noo ra i runga i te terono kua akaraanga “mei te toka iasepe ra.” Mei tetai “sarido ra” rai aia te tu. (Apokalupo 4:2, 3) Eaa oki teia au toka nei?

Kare teia i te au toka areare ua te kaka maira tona manea mei to ratou ngai i runga ra. I te au tuatau taito ra, te tuatua Ereni tei uriia e “iasepe” kua taangaangaia i te akatutu i te au toka tukeke te au kara, kapiti katoa mai te au poe areare ua i te akaraanga. Te “toka iasepe” o Apokalupo 4:3 “papu tikai e kare [oki] te reira i te iasepe oko mama ua o teia tuatau nei,” i karanga ai a A. T. Robertson i roto i te Word Pictures in the New Testament. Tei runga ravao, i muri mai i roto i te puka o Apokalupo, te akataka maira a Ioane i tetai oire i te rangi ra, i te na ko anga: “E tona mārama mei to te toka meitaki rava ra, mei te toka iasepe, mei te io i te areare ra.” (Apokalupo 21:10, 11) Te au toka ta Ioane e tou atura i te akaraanga ka kite uaia atu a roto, te akatikaanga i te marama kia pati na roto i te reira.

Ko tei akatutuia i roto i ta Ioane orama e te noo ra ki runga i te terono ko te Peretana akakaka roa atu ia i te ao katoa e pini ua ake, ko te Atua ko Iehova. E peretana ma aia e te tapu katoa ki te turanga teitei roa atu. Tei rotai ki te reira, kua tata te apotetoro ko Ioane e: “E mārama te Atua, e kare rava e poiri o roto iaia.” (1 Ioane 1:5) E no reira, kua raurau a Ioane i tona au taeake irinaki kia ‘akatapu iaia uaorai, mei ia Iehova katoa e tapu ra.’​—1 Ioane 3:3.

Eaa ta tatou ka rave kia akaraia mai e Iehova e te ma ra? Ka umuumu maata tikai ia to tatou rauka anga i te irinaki ki roto i to Karaiti toto akataeia no te akakoreanga i ta tatou au ara. Ka tau tatou kia ‘aere ua atu na te mārama’ na te apii putuputu anga i te Pipiria e te akono rotai anga ma ta te reira au apiianga.​—1 Ioane 1:7.