Ta Iesu Akakeu Anga i te Ao Katoa

“POUROA ta te au evangeria e ripoti maira no ta Iesu i tuatua ana, i te ngai muna e i te ngai tangata, kua rauka iaia i te tuatua i roto i nga mea ora e rua,” i tata mai ei te tangata uri Pipiria ko Edgar Goodspeed. “Noatu kua riro taua manga apiianga ra ei akakeukeu anga tikai, ei akakeu anga tikai e te ko oonu anga tikai e e meitaki i te karangaia e kare e tangata ke atu tei akakeu maata ana i teianei ao.”

I te akaoti anga a Iesu Karaiti i tana angaanga orometua i te enua i te mataiti 33 T.N., kua tere atu te numero o tana au pipi vaitata atu ki etai 120 tane e te vaine. (Angaanga 1:15) I teia tuatau, kua tere atu i te rua pirioni te au tangata te karangaia ra e e au Kerititiano. E maata atu i te au anere mirioni tei kite ia Iesu e e peroveta. E akakeu anga takake tikai tana au apiianga ki runga i te tangata ravarai.

Ta Iesu akakeu anga i te ao katoa kua arikiia e te au arataki kare i te Kerititiano. Ei akaraanga, kua tata tetai tangata rapi ngati Iuda ko Hyman Enelow e: “Kua riro mai a Iesu ei tangata rongonui maata roa atu, tei apii maataia, ei akakeu anga maata roa atu i roto i te tuatua enua akonoanga o te tangata ravarai.” Kua akakite katoa mai a Enelow e: “Koai te ka rauka i te tare i te au akakeu anga pouroa ta Iesu i rave ki te tangata ravarai? Te aroa tana i akauru, te pumaana tana i oake mai, te meitaki tana i akatupu, te manakonako anga e te rekareka tana i akakeu​—pouroa te reira kare i aite i roto i te tuatua enua o te tangata. I rotopu i te maata e te  meitaki tei rauka i te tangata ravarai i te akatupu mai, kare roa e tangata i akaaiteia kia Iesu i te ariki anga e te akakeu anga i roto i te ao katoa. Kua riro mai aia ei tangata umere maataia i roto i te tuatua enua.” E kua karanga te arataki Initu ko Mohandas K. Gandhi e: “Kare aku tangata i kite ana e maata atu tei rave ana no te tangata mei ia Iesu ra. Ko te tika, kare e apinga tarevake ma te Akonoanga Kerititiano.” Inara, kua akakite mai aia: “Tei ia kotou e te au Kerititiano te manamanata. Kare i rauka ake ia kotou i te akono i ta kotou uaorai au apiianga.”

E papaanga roa to Kerititome no te autu kore anga i te akono i te au apiianga a Iesu. Kua akakite mai a Cecil John Cadoux, e tangata tata tuatua enua no te Akonoanga Kerititiano, e “te tupu marie e te maata maira te manako anga o tetai tu akono tau kore i roto i te Ekaretia” kua opu i “te manako o te au arataki Kerititiano mei te akamata anga o te . . . 140 T.A.” Kua kite aia e: “Te meangiti mai anga o teia nei ra no te tu akono tau ketaketa taito ra ka tauturu natura ua i te ravenga no te akatano anga ki te au tu o teianei ao.”

Kua tupu maata mai teia ravenga i te a anere mataiti, te ariki anga te Emepera Roma ko Constantine i te Akonoanga Kerititiano. “Kua kiteaia mai e te au tata tuatua enua, e i roto i etai au tu te rikarika ra,” i tata mai ei a Cadoux, “i te akaoko anga maata ta te Ekaretia i rave no tona taokotai anga kia Constantinus.” I te au anere mataiti mei reira mai, kua rave te au Kerititiano akatutu i te au angaanga kino e manganui te akangateitei kore anga i te ingoa o Karaiti.

Te au uianga ka akamanakoia, i reira, koia oki: Eaa tikai ta Iesu i apii ana? E eaa te akakeu anga ka rauka i tana au apiianga i te rave kia tatou nei?

[Tutu i te kapi 3]

“Kare aku tangata i kite ana e maata atu tei rave ana no te tangata mei ia Iesu ra.”​—Mohandas K. Gandhi

[Tutu i te kapi 3]

“Kare e tangata ke atu tei akakeu maata ana i teianei ao.”​—Edgar Goodspeed

[Akameitakianga]

Culver Pictures