“No Ko ia Iehova ra te Tauturu Iaku”

Te Au Mapu te Akakaka ra ia Iehova te Akameitaki ra i to Ratou Oraanga

“KA INANGARO au i te meitaki ta te oraanga e oronga maira!” I akapera ei tetai tamaiti mapu i te akataka mai anga i tana au tapapaanga. Inara akapeea e rauka ai i tetai tangata mapu te mea meitaki roa atu i roto i te oraanga? Te oronga maira te Pipiria i te pauanga tika ua: “E akamanako i Tei Anga ia koe ra ia koe e mapu ra!”​—Koheleta 12:1, Contemporary English Version.

Kare te akakakaanga e te tavinianga ia Iehova na te aronga mamaata ua. A Samuela, te tamaiti a Elikana raua ko Hana, te tamariki ra rai i tona tavinianga ia Iehova i te tapenakara. (1 Samuela 1:19, 20, 24; 2:11) Tetai tamaine Epera ou ua kua akaari pu tikai i te irinaki ki roto ia Iehova i tona akakite atu anga e kia aere te rangatira no te nuku vaeau Suria ko Naamana ki te peroveta ko Elia kia akaoraia tona lepera. (2 Ariki 5:2, 3) I roto ia Salamo148:7, 12, te akaueia ra te tamariki tamaroa e te tamariki tamaine kia akapaapaa ia Iehova. * E 12 ua rai ona mataiti i te pakari, kua akono a Iesu i tetai inangaro maata i roto i te angaanga a tona Metua. (Luka 2:41-49) No te mea kua tereniia ratou mei te au Tuatua Tapu, i te kite atu anga ia Iesu i te iero ra kua kapiki atu tetai papaki tamariki tamaroa: “Hosana i te tamaiti a Davida!”​—Mataio 21:15, 16.

Akapaapaaanga ia Iehova i Teia Tuatau

I teia tuatau, e manganui te aronga mapu i rotopu i te Au Kite o Iehova e ngakau parau ana i ta ratou au irinakianga e e tuatua mataku kore ana no runga i te reira ki tetai ke ra i roto i te au apii e i tetai ngai ke aere. E akatau ana i nga akaraanga e rua.

I Peritane, te uriuri ra te pupu apii o Stephanie e 18 mataiti i te pakari i te titirianga pepe e tetai atu au tumu manako no te tu akono tau. Kua irinaki oki te puapii e kua ariki uaia te au titirianga pepe e kare roa o tetai tamaine mapu tumuanga kia patoi i teia ravenga. I te akatikaanga te katoatoa ki teia manako kua akamaroiroiia a Stephanie kia turuturu i tona irinakianga akatumuia ki runga i te Pipiria. Kua tae mai taua atianga ra i te ui mai anga te puapii kia Stephanie no tona manako. Noatu tona mataku i te akamataanga, kua taangaanga a Stephanie i teia atianga i te oronga anga i te manako o te Tuatua Tapu. Kua akakite poto ua aia ia Exodo 21:22-24 e kua akataka atu e me e tarevake rai i te tamamae i tetai pepe kare i anauia ake, papu e te patoi ra te titirianga pepe i to te Atua anoano.

Kare roa te puapii, e mema no te pupu orometua, i tatau ana i teia au irava. Kua taki atu ta Stephanie tutu anga mataku kore ki te au uriurianga meitaki tikai e manganui ma tona au oa apii i runga i te au tumu manako tukeke. Tetai tamaine i teia nei e apai ua ana i te au kopi ou o Te Punanga Tiaki e te Awake!, e kua aere atu e rua ki te uruoaanga tapere no te Au Kite o Iehova i te akara ia Stephanie i te papetitoia anga ei akairo no tona akatapuanga ki te Atua.

Ko Vareta e ono mataiti i te pakari, te noo ra ki Suriname, Marike Tonga, kua taangaanga i te tuatau i te akapaapaa i te Atua i te inangaro anga tona puapii i te akapumaana maata mei te au Tuatua Tapu. I te oki atu anga ki te apii e toru ra i muri mai, kua ui atu te puapii ki tana aronga apiipii me kua kite ratou eaa oki aia i noo ei. Kua pau atu  ratou, “Kua maki oki koe, kare ainei?” “Kare,” i pau atu ei te puapii. “Kua mate toku tuakana, e e aka tangi tikai toku. No reira kia muteki ua kotou.”

I taua avatea ra i tona mama e moe poto ua ra, te kimikimi pakari ra a Vareta i roto i te au makatini takere, te tatau ra i te au upoko tuatua. Kua tano mai aia ki runga i Te Punanga Tiaki o Tiurai 15, 2001, ma te upoko tuatua “E Ora Ainei Tetai i Muri Ake i te Matenga?” Kua ki i te mataora, kua akaaraara aia i tona mama e kua karanga atu, “Mami, Mami, akara mai! Kua kitea mai iaku tetai makatini na toku puapii no runga i te mate!” Kua tukunaia atu te makatini ki te puapii ma tetai reta mei ko mai ia Vareta. Kua tata aia: “Naau tikai teia. I roto i te Parataito ka kite akaou koe i toou tuakana no te mea kare roa a Iehova e pikikaa ana. Kua taputou aia e ka apai mai aia i tetai parataito, kare i te rangi ra, mari ra ki te enua nei.” Kua akakite mai te puapii i tona arikianga oonu no te manakonakoanga akatumuia ki runga i te Pipiria ta teia au atikara i oronga mai.

Patu Anga no te Tuatau ki Mua

E “Atua mataora” a Iehova, e te inangaro ra aia kia mataora katoa te aronga mapu. (1 Timoteo 1:11) Te karanga ra tana uaorai Tuatua e: “Kia rekareka i to ou anga. Kia mataora ia koe e ou ra rai.” (Koheleta 11:9, Today’s English Version) E mamao to Iehova akaraanga e te kite ra i te au tupuanga i te tuatau ki mua no te tu meitaki e te kino. No reira rai tana Tuatua e ako maira i te au mapu: “E tenana e akamanako i Tei anga ia koe i to ou anga ra, kare i tae ki te au rā kino ra, e kare i tae ki te au mataiti, e karangaʼi koe ra e, Kare rava oku e mataora anga.”​—Koheleta 12:1.

Ae, te inangaro ra a Iehova i te au mapu kia rekareka pu tikai i te apinga aroa akaperepereia no te oraanga. Na te akamaaraanga e te akakakaanga i te Atua, ka rauka i te aronga mapu i te arataki i tetai oraanga puapinga tikai, e te meitaki. Noatu me te aro atura i te au akaaoanga, ka rauka papu ia ratou i te karanga e: “No ko ia Iehova ra te tauturu iaku.”​—Salamo 121:2.

[Tataanga Rikiriki i Raro]

[Tataanga i te kapi 9]

“E akameitaki ia Iehova i runga i te enua nei, . . . te au tangata ou, e te au tamaine.”​—SALAMO 148:7, 12.

[Pia i te kapi 8]

TE TURUTURU RA IEHOVA I TE ARONGA MAPU

“Ko koe toku manako anga, e taku Atu; toku irinaki anga, e Iehova, mei toku ou anga mairai.”​—Salamo 71:5.

“Ko [te Atua] tei akamerengo i toou vaerua ki te meitaki, kia akaouia rai koe mei te aeto ra.”​—Salamo 103:5.