Au Uianga a te Aronga Tatau

Eaa ra a Davida raua ko Bate-seba i kore ei i tamateia no te rave anga i te akaturi, kareka ra kua mate ta raua tamaiti tei anau ouia mai?

Kua akakite mai te Ture a Mose e: “Kia kitea te tangata i te moe anga ki te vaine noo tane ra, ka mate katoa raua i reira, taua tangata i moe i taua vaine ra e te vaine katoa ra: pou atura ia koe i reira te kino i roto ia Iseraela.” (Deuteronomi 22:22) Naringa te Atua ko Iehova i tuku i te akava anga no te ara a Davida raua ko Bate-seba e na te au akava tangata e akava i raro ake i te Ture, ka tamateia nga tokorua akaturi. I te mea e kare te au akava tangata i tatau i te au ngakau, ka oronga ratou i te akava anga na runga i te tumu o te tu o nga tangata ara tei akatumuia ki runga i te au tika anga. Te angaanga no te akaturi te umuumu ra i te utunga mate. Kare te au akava ngati Iuda i akamanaia kia akakore i taua ara.

I tetai tua, ka rauka i te Atua mou i te tatau i te au ngakau e te akakore i te au ara me kite aia i tetai tumu anga no te rave anga i te reira. I te mea e te o maira te tupu anga o Davida, tei oronga atu Aia i te koreromotu Patireia, kua iki a Iehova e nana uaorai e akatika i te akono i te tumu anga. (2 Samuela 7:12-16) E tika anga to “te Akava i to te ao katoa nei” kia rave i taua iki anga.​—Genese 18:25.

Eaa ta Iehova i kite i tona akara anga i to Davida ngakau? Te karanga ra te tata anga i runga ake ia Salamo 51 e te akaari maira teia taramo i to Davida manako “kia aere mai te peroveta rā Natana kiaia ra i muri ake i tona aere anga atu ki roto kia Bateseba.” Te akakite ra a Salamo 51:1-4: “E aroa mai koe iaku, e te Atua e, i toou ra takinga-meitaki; no te maata o toou ra aroa, e taparapara koe i taku nei au ara. E orei takiri mai koe iaku i toku nei kino; e tamā mai iaku i taku nei ara. Te aaki nei oki au i taku nei ara, e te vai ua nei rai toku kino i mua iaku. I mua i to aroaro, toou anake ra, i ara ai au nei, e i mua i to mata i rave ei au i teianei kino.” E mea tau e kua akara mai a Iehova i teia tataraara pakari i roto i to Davida ngakau ei akapapu anga i te tataraara anga tika tikai e te iki anga e te vai ra tetai tumu anga no te akaari anga i te aroa ki te nga tangata tei rave i te ara. Tei runga ravao, e tangata aroa a Davida, e te akaari ra a Iehova i te aroa ki te aronga te aroa ra. (1 Samuela 24:4-7; Mataio 5:7; Iakobo 2:13) No reira, i to Davida akakite anga i tana ara, kua akakite atura a Natana kiaia: “Kua akataka keia e Iehova taau ara; kare koe e mate.”​—2 Samuela 12:13.

Kare a Davida raua ko Bate-seba i ora mai ana i te au tupu anga katoatoa no ta raua ara. “No taua ravenga nei, kua maata rava te mea i raukaʼi i to Iehova au enemi i te akakino,” kua akakite atura a Natana kia Davida, “ko te tamaiti naau e anau nei, ka mate takiri ïa.” Kua maki ta raua tamaiti e kua mate atura noatu ta Davida akakore anga i te kai e te aue anga e itu ra.​—2 Samuela 12:14-18.

E ngata i etai i te marama e eaa te tamaiti i mate ei, no te mea te akakite maira a Deuteronomi 24:16 e: “Auraka katoa te tamariki kia mate ei tutaki i te ai metua.” Inara kia maara tatou e me na te au akava tangata e rave i te akava anga, ka ngere i nga metua e pera katoa te pepe kare i anauia ake to ratou ora. Penei te mate anga te tamaiti te tauturu katoa ra ia Davida i te kite meitaki tikai i to Iehova mareka kore no tana ara kia Bate-seba. Te papu ra ia tatou e te akono ra a Iehova i te tumu ma te tau, no te mea “kua tika rava tona aerenga.”​—2 Samuela 22:31.

[Tutu i te kapi 31]

Kua akaari a Davida i te tataraara mou