Ka Rauka Ainei i te Tangata i te Akakore i te Putaua?
Ka Rauka Ainei i te Tangata i te Akakore i te Putaua?
E MIRIONI ua atu tei maata mai kare i kite ana i te putaua. Kare ratou e moe matepongi ana me kore e moe ruketekete ana no te anu. Noatu rai, e manganui o taua aronga tataki tai te tangi ra i te putaua e te tuku ra i te tauta anga pakari i te tauturu atu ia ratou.
Inara, e kino tikai te putaua ki te tangata tei akakinoia e te tamaki a te tangata, te au vaipuke, te tuatau maro, e tetai ua atu au manamanata. E kino tikai teia au tumu anga ki te au pama rikiriki o Aperika. Kua maroia etai kia akaruke i to ratou au kainga e kia neke atu ki te au oire mamaata me kore kia noo ei aronga kimi-ora i roto i tetai enua ke. Ko tetai aronga te noo ra i uta kua neke atu ki te au oire no te mea kua akavareia ratou e te au taputou no tetai oraanga meitaki roa atu.
E maata te taime kua riro mai te au oire tei ki i te tangata ra ei ngai tei akatupu mai i te putaua. E meangiti ua te ngai, me e ngai ra tetai, no te tanu anga i te one kai. E ngata tikai te kimi anga i te angaanga. Ma te taitaia, e manganui ka anga atu ki tetai oraanga kino. Ka kapiki mai te aronga e noo ra i te oire i te tauturu, inara kare e rauka i te au kavamani a te tangata nei i te akatikatika i te manamanata e tupu maira no te putaua. Te taiku anga ki tetai ripoti a te United Nations tei tukunaia mai i roto ia Noema 2003, te akakite maira The Independent o London e: “Te onge ua atura teianei ao.” Kua akakite mai te reira e: “Takapini i teianei ao kua akakiteia mai e e 842 mirioni tangata te paruparu ra i teia tuatau—e te kake akaou maira taua numero, i te kapiti anga mai e 5 mirioni tangata te matepongi ra i te au mataiti ravarai.”
I tetai au taime kua rauka i te opati manga o te Au Kite o Iehova i Aperika Tonga te au reta no ko mai i te au tangata putaua. Ei akaraanga, kua tata mai tetai tangata no Bloemfontein mai e: “Kare aku angaanga, e i roto i te oire me te vai ra te tuatau ka keia au. Me kare oki au e keia, ka matepongi matou i te au ra ravarai—pera katoa te anu toketoke tikai. Kare takiri e angaanga. E manganui te ori aere ra i runga i te au mataara i te kimi i te angaanga e tetai apinga no te kai. Kua kite atu au i tetai pae te kimi ra i te kai i roto i te ngai titiri anga tita. Ko etai kua tamate ia ratou uaorai. Kua taitaia e kua puapinga kore ua te manganui mei iaku rai. I te akara anga kare e manakonakoanga no te tuatau ki mua. Kare ainei te Atua, tei anga mai ia tatou tei anoano ra i te kai e te akakakau ia tatou uaorai, i kite mai ana i teia?”
E au pauanga akapumaana anga tetai ki te au manako o teia tangata nei. Mei ta te atikara e aru mai nei ka akaari mai, ka kiteaia teia au pauanga i roto i te au kapi o te Tuatua a te Atua, te Pipiria.