Tei Runga i Teea Tango Taau e Patu Ra?

TE VAI roa anga o tetai are tei runga maataia i te tu ketaketa o to te reira patuanga i roto ake, me kore te tango. Tetai taime e taangaanga ana te Pipiria i teia kaveinga na roto i te tu akatutu anga.

Te peroveta ko Isaia, ei akaraanga, te tou ra ki te Atua ko Iehova e ko tei “akatumu oki i te enua.” (Isaia 51:13) I roto i teia tango ko te au ture taui koreia a te Atua te akatere ra i te nekeanga o te enua e te mou ra i te reira i roto i to te reira ngai. (Salamo 104:5) Te tuatua katoa ra te Tuatua a te Atua, te Pipiria, i “te au tumu ra” e te noo ra te taiate tangata i runga. Teia oki ko te tuatua tau, te ture, e te akaaere anga. Me “uritumuia,” me kore me akaparuparuia, e te tuatua tau kore, te pikikaa, e te ta ua, ka tupu te pueu i roto te akaaere anga o tetai taiate.​—Salamo 11:2-6; Maseli 29:4.

Te akono katoaia ra teia kaveinga ki te turanga o te aronga tatakitai. I te taopenga anga i tana Tuatua rongonui i runga i te Maunga ra, kua karanga a Iesu Karaiti e: “E teianei, ko tei akarongo mai i taku nei tuatua, e akono atura, e arite au iaia i tetai tangata pakari, ko tei akatu i tona are ki runga i te papa. E topa iora te ua, e taʼe iora te vai puke, e te matangi oki i te arara viviki anga mai i rungao i taua are ra, kare rava i keu, no te mea e papa te turanga. Kareka tei akarongo ua mai i taku nei tuatua, e kare i akono, e arite au iaia ki te neneva, ko tei akatu i tona are ki runga i te one. E topa iora te ua, e taʼe iora te vai puke, e te matangi oki i te arara viviki anga mai i rungao i taua are ra; inga iora: e e ngaangaa maata to taua are ra.”​—Mataio 7:24-27.

Te patu ra ainei koe i toou oraanga ki runga i teea tango? Ki runga ainei i te au one ngaueue no te manakoanga tangata atua kore nei, te ka taki atu ki te pueu anga o to te reira patu anga? Me te patu ra ainei koe ki runga i te papa ketaketa no te akarongo anga ki te au tuatua a Iesu Karaiti, te ka tauturu ia koe i te aere meitaki atu na roto i te au uriia akatutuia no te oraanga?