“E Mataora to te Aronga Tei Manako i to Ratou Anoano i te Pae Vaerua”

ME ARA mai te manu i te popongi, e tangitangi putuputu ana ratou no tetai taime e oti kua rere i te kimi kai. I te aiai, kua oki mai ki to ratou tauranga, tangitangi manga akaou, e oti kua moe. I te au tuatau tau kua tauani ratou, tuku i te ua, e te utuutu i ta ratou punupunua. Mei tera rai te tu o te au manu ke atu.

E tuke rai tatou te tangata nei. E tika, te kaikai nei tatou, te moe nei, e te anau tamariki nei, kareka ra kare te maata anga ia tatou e mareka ua ana i taua au apinga ua ra. Ka inangaro tatou kia kite e eaa ta tatou angaanga i konei. Te kimi nei tatou eaa te aiteanga i to tatou oraanga. Te anoano katoa nei tatou i tetai manakonakoanga no te tuatau ki mua. Te tou nei teia au anoano pakari nei ki tetai tu takake takiri no te tangata​—te turanga pae vaerua, me kore te anoano e te manakonakoanga no te au apinga pae vaerua.

Angaia i te Tu o te Atua

Te akamarama maira te Pipiria i te tumu no te tua pae vaerua o to te tangata tu, i te karanga anga e: “Kua anga iora oki te Atua i te tangata i tona uaorai tu; i anga aia iaia i te tu o te Atua ra; i anga aia ia raua ko te tane e te vaine.” (Genese 1:27) Te aiteanga i to tatou maani angaia mai “i te tu o te Atua” koia oki noatu e kua taviiviiia tatou e te ara e e te tu apa ua, kua rauka ra ia tatou te tu kite i te akaata mai i tetai au tu o te Atua. (Roma 5:12) Ei akaraanga, ka rauka ua ia tatou te taangaanga i te kite i te rave i tetai apinga. Kua rauka katoa ia tatou tetai tu pakari, te manako no te tuatua tau, e te tu kite i te akaari i te aroa akaatinga uaorai no tetai e tetai. Pera katoa ka rauka ia tatou i te akamanako no runga i te tuatau i topa e i te parani no te tuatau ki mua.​—Maseli 4:7; Koheleta 3:1, 11; Mika 6:8; Ioane 13:34; 1 Ioane 4:8.

Te akatutu taka meitakiia maira to tatou manakonakoanga i te pae vaerua i roto i to tatou anoano natura kia akamori i te Atua. Me kare tatou e akamerengo meitaki i te anoano kia piri atu ki Tei Anga mai ia tatou, kare e kitea ia tatou  te mataora mou e te mutu kore. “E Mataora to te aronga tei manako i to ratou anoano i te pae vaerua,” i akakite ei a Iesu. (Mataio 5:3, NW) Inara, kia matakite tatou, e kia akamerengo i taua anoano ra ki te tuatua mou pae vaerua​—te au tumu tika no runga i te Atua, i tona au turanga, e tona akakoroanga no te tangata nei. Ka kite tatou i te tuatua mou pae vaerua kiea? Ki roto i te Pipiria.

“Ko te Tuatua Aau na te Tuatua-mou”

Kua tata te apotetoro ko Paulo: “Te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa.” (2 Timoteo 3:16) Te rotai ra te au tuatua a Paulo ki ta Iesu, ko tei tuatua i roto i te pure ki te Atua e: “Ko te tuatua aau na te tuatua-mou.” Teia tuatau, kua kite tatou e ko te Pipiria Tapu taua Tuatua ra, e kia pakari tatou i te akapapu e te tau ra to tatou irinakianga e te au turanga ki te reira.​—Ioane 17:17.

Na te akaaite anga i to tatou irinakianga ki te Tuatua a te Atua, te aru ra tatou i te iti tangata o Berea i taito, ko tei akapapu meitaki e te rotai ra te au apiianga a Paulo ki te au Tuatua Tapu. Kare a Luka i akaapa atu i to Berea, mari ra kua akameitaki aia ia ratou no to ratou tu. Kua “āriki ua oki ratou i te tuatua ma te ngakau maoraora,” i tata ai aia, “e te kimi anga i te tuatua i tataia ra, i te tau anga oki i taua tuatua ra, kare e rā i tukua.” (Angaanga 17:11) No runga i te au apiianga akonoanga e te tu akono tarevake e manganui i teia tuatau, e mea puapinga e kia aru tatou i te akaraanga a te aronga manako meitaki o Berea.

Tetai mataara ke mai i te akataka i te tuatua mou pae vaerua koia oki kia akara e akapeea te reira i te akakeu anga i te oraanga o te tangata. (Mataio 7:17) Ei akaraanga, te noo anga kia tau ki te tuatua mou o te Pipiria tika anga ka akariro te reira i tetai ei tane meitaki, ei metua tane meitaki, ei vaine meitaki, me kore ei metua vaine meitaki, te kapiti anga atu i reira ki te tu mataora o te pamiri e te akamaata anga atu i to tetai marekaanga. “E mataora oki, to tei akarongo i te tuatua a te Atua e tei akono i te reira,” i tuatua ai a Iesu.​—Luka 11:28.

Te akamaara maira te au tuatua a Iesu ia tatou i te tuatua a tona Metua i te rangi, ko tei tuatua ki to Iseraela i taito e: “Te na ko mairā Iehova, toou Akaora, Tei Tapu i Iseraela nei: Ko au toou Atua ra ko Iehova, ko tei akakite ia koe i te mea e puapingaʼi koe na; ko tei arataki ia koe na te arataa e tau ei kia aere koe ra. Angairi koe i akarongo mai ki te au akauenga naku! Kua riro ïa toou au ra mei te vai taʼe ra; e taau tuatua-tika mei te ngaru moana ra.” (Isaia 48:17, 18) Te aronga pouroa tei inangaro i te tu meitaki e te tuatua tika papu roa e ka akakeuia e taua patianga pumaana ra!

Inangaro Tetai Pae kia “Akamainiiniia to Ratou Taringa”

Kua tuku te Atua i te patianga ngakau tae ki to Iseraela no te mea te akavareia ra ratou e te au tuatua pikikaa a te akonoanga. (Salamo 106:35-40) Kia matakite katoa tatou i te au tu pikikaa. No runga i te au Kerititiano tutu ua, kua tata a Paulo: “Te vaira te tuatau e kare ratou e akarongo i te au apiianga oraora, inara, i tau ki to ratou uaorai au anoano, ka akaputu ratou i te au puapii no ratou uaorai kia akamainiiniia to ratou taringa; e ka uri ke ratou i to ratou au taringa mei te tuatua mou.”​—2 Timoteo 4:3, 4, NW.

Te akamainiini ra te au arataki akonoanga i te taringa o te tangata na te ariki anga i te au angaanga e akamerengo ra i te au anoano tarevake, mei te ainga i vao ake i te  akaipoipoanga, te angaanga totoma, e te kona kava. Te akakite taka ua maira te Pipiria e ko te aronga e ariki i taua au apinga ra e te aronga e rave ra i te reira “kare anake ïa e noo i te basileia o te Atua.”​—1 Korinetia 6:9, 10; Roma 1:24-32.

Kare e ekoko e, ka anoanoia te ngakau toa i te noo kia tau ki te au turanga Pipiria, i te aro anga atu tikai i te aviri, inara ka rauka ua te reira i te rave. E manganui te aronga e vai nei i rotopu i te Au Kite o Iehova tei riro ana ei aronga kai matau i te apinga akakona, au kona kava, aronga poneia, aronga ta i runga i te purumu, aronga keia, e te aronga pikipikikaa. E oti akera, kua ariki to ratou ngakau i te Tuatua a te Atua e ma te tauturu a te vaerua tapu kua akatupu i tetai au tauianga i roto i to ratou oraanga kia “tau ei te aerenga kia Iehova.” (Kolosa 1:9, 10; 1 Korinetia 6:11) Te oti anga i te akaau ki te Atua, kua rauka katoa mai ia ratou te manako au e, mei ta tatou ka kite, e tetai manakonakoanga tika tikai no te tuatau ki mua.

Te Manakonakoanga o te Patireia

Ka akatupuia te manakonakoanga Pipiria no te au mutu kore o te au tangata akarongo na roto i te Patireia o te Atua. “Kia tae toou basileia. Kia akonoia toou anoano i te enua nei, mei tei te ao katoa na,” i tuatua ai a Iesu i roto i tana pure akaraanga. (Mataio 6:10) Ae, ko te Patireia ua rai o te Atua te ka rauka i te akapapu e kia raveia te anoano o te Atua i te enua nei. No teaa ra? No te mea ko taua Patireia ra oki i te rangi​—te kavamani i roto i te rima o Iesu Karaiti​—ta te Atua mataara no te akakite anga i Tona tu ngateitei tikai ki runga i te enua.​—Salamo 2:7-12; Daniela 7:13, 14.

Ei Ariki no taua Patireia i te rangi ra, ka akaora a Iesu Karaiti i te au tangata akarongo mei te au tu tuikaaanga, kapiti mai te pakatianga piri a te ara a Adamu e te apainga o te maki e te mate tana i vaio mai. Te karanga ra a Apokalupo 21:3, 4: “I na tei ko te tangata ra te puakapa o te Atua . . . E nana [na te Atua ko Iehova] e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”

Ka vai rai te au mutu kore ki te enua e kako roa ake. No teaa ka papu ei tatou i te reira? Te akakiteia maira te tumu i roto ia Isaia 11:9, tei karanga e: “Kare ratou [te au tangata o te Patireia] e kanga, kare oki e mea e mate ei, i toku katoa nei maunga tapu: no te mea, ka ki te enua i te kite ia Iehova, mei te vairanga tai e ki i te tai ra.” Ae, ka rauka i te au tangata ravarai i te enua nei te kite tika  tikai o te Atua e ka akarongo iaia. Kare ainei tera manakonakoanga e akapumaana ana i toou ngakau? Me koia ia, teia te taime no te akamata i te apii i te “kite ia Iehova” ko tei akaperepere maataia.

Ka Akarongo Ainei Koe ki te Karere Patireia?

Na roto i te Patireia, ka takore te Atua i ta Satani au angaanga pouroa e ka apii i te tangata i Tona au arataa. No reira, kare i te mea poitirere e ko te Patireia te karere maata o ta Iesu apiianga. “E tutu aere rai au i te evangelia o te basileia o te Atua,” i tuatua ai aia, “i tonokia mai ei oki au.” (Luka 4:43) Kua akaue a Karaiti i tana au pipi kia akakite i taua karere rai ki etai ke. (Mataio 28:19, 20) “E tutu aereia te evangelia o te basileia nei,” i totou ei aia, “e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:14) Te vaitata viviki roa mai nei taua openga ra. Mei teaa atura, i reira, te puapinga e kia akarongo te aronga tei tae te ngakau ki te tuatua meitaki o te ora!

Ko Albert, tei taikuia i te atikara i mua ake, kua akarongo aia i te karere o te Patireia i te akamata anga tana vaine e tana tamaiti i te apii i te Pipiria ki te Au Kite o Iehova. Te akamataanga, kua ekoko a Albert. Kua pati katoa aia i tetai orometua i reira kia atoro i tana vaine e te tamaiti kia akaariia mai te pikikaa a te au Kite. Inara kare te orometua i inangaro kia o atu ki roto. I reira kua manako a Albert i te akarongorongo atu ki tetai uriurianga Pipiria kia rauka i te akakite atu i te au tarevake. I muri ake i te okotai ua apiianga, kua piri atu aia ki roto i te apii, ma te inangaro kia kite maata atu. Kua akamarama aia i muri mai e no teaa i taui ei tona manako. “Teia tikai taku i kimi ua mai ana,” i akakite ei aia.

Te openga iora, kua akamata a Albert i te akamerengo i tona anoano i te pae vaerua, e kare roa aia i oki ana ki muri. Kua oronga te tuatua mou o te Pipiria kiaia i tana i kimi mai ana i tona oraanga katoa​—te pauanga ki te tu tau kore e te tu kino e totoa ua nei i roto i te taiate e tetai manakonakoanga no te tuatau ki mua. Kua oronga te tuatua mou o te Pipiria i te manako au nona. Te akamerengoia ra ainei toou anoano i te pae vaerua? Kore ei e akataka i tetai atianga i te tatau i te au uianga tei tataia i roto i te pia i te kapi 6? Me ka inangaro koe i tetai au akakiteanga akaou atu, ka rekareka roa te Au Kite o Iehova i te tauturu ia koe.

[Pia/Au Tutu i te kapi 6]

TE AKAMERENGOIA RA AINEI TOOU ANOANO I TE PAE VAERUA?

Te merengo ra ainei koe i taau kai pae vaerua e rauka maira? Te pati atu nei matou ia koe kia tatau i te au uianga ka aru mai e kia akaira i te au mea ka rauka ia koe i te pau tika tikai.

□ Koai te Atua, e koai tona ingoa?

□ Koai a Iesu Karaiti? No teaa aia i mate ei? Akapeea koe e puapingaia ai mei tona mate?

□ E Tiaporo ainei tetai? Me koia ia, noea mai aia?

□ Eaa te ka tupu kia tatou me mate tatou?

□ Eaa to te Atua akakoroanga no te enua e no te tangata?

□ Eaa te Patireia o te Atua?

□ Eaa to te Atua au turanga no te tu akono tau?

□ I roto i te pamiri, eaa te nga tuanga angaanga tei tukuia mai e te Atua na te tane e te vaine? Eaa tetai au kaveinga Pipiria te ka akamaata atu i te mataora o te pamiri?

Me kare koe e papu ana i te au pauanga ki tetai ua atu o teia au uianga, ka rauka ia koe kia pati i tetai kopi o te poroutia Eaa ta te Atua e Umuumu Maira ia Tatou? Neneiia e te Au Kite o Iehova i roto i te 300 reo, te uriuri nei teia poroutia e 16 tumu tuatua Pipiria e te oronga maira i te pauanga Tuatua Tapu ki te au uianga katoatoa tei tataia i runga akenei.

[Au Tutu i te kapi 4]

Kare mei te au manu te tu, e anoano pae vaerua to te tangata

[Tutu i te kapi 5]

“Ka akaputu ratou i te au puapii no ratou uaorai kia akamainiiniia to ratou taringa.”​—2 Timoteo 4:3, NW

[Tutu i te kapi 7]

Ka akatupuia te au mutu kore na roto i te Patireia Mesia o te Atua