“Kua Akamutu Mai”

I E mataiti 2002, kua rave te Au Kite o Iehova i tetai uruoaanga tapere i roto i te oire maata o Mbandaka, i te tua tokerau opunga o Temokaratiki o Kongoko. I te tukuna mai anga te New World Translation of the Christian Greek Scriptures i roto i te reo Lingala i te uruoaanga, te aronga i roto i te urupu tei tae mai kua rere tikai ki runga no te rekareka, e kua aue tetai pae. I muri akera, kua oro viviki atu te au tangata ki mua tikai i te paata i te akara meitaki i te Pipiria ou, ma te aue anga: “Basuki, Basambwe,” te aiteanga: “Kua akamutu mai! Kua taakamaia ratou!”

No teaa ra i rekareka tikai ei te aronga tei tae atu, e eaa te aiteanga o ta ratou au tuatua? I roto i tetai au ngai o Mbandaka, kare i rauka ana i te Au Kite o Iehova i te au Pipiria Lingala. No teaa ra? No te mea kare te au ekaretia i inangaro ana i te oko i te reira ki te Au Kite o Iehova. Kua aere atu te Au Kite i te pati atu i tetai pupu ke akaou mai i te tiki atu i tetai au kopi. I teianei kua mataora tikai ratou no te mea kare oki e rauka akaou i te au ekaretia i te arai ia ratou mei te tiki mai anga i te au Pipiria.

Kare te urianga ou e akapuapinga ua i te Au Kite o Iehova mari katoa ra te tangata katoatoa. Tetai tangata tei rongo atu i te porokaramu mei tona are na roto i te au akatangi pu mei te ngai o te akaputuputuanga kua tata atu aia ki te opati manga o te Au Kite o Iehova: “Mataora tikai au no runga i te tukuna mai anga teia Pipiria. Na te reira e akamarama mai kia tatou no runga i te au apinga e manganui. Kare ko au tetai o te Au Kite o Iehova, inara te tiaki rekareka atu nei au i teia Pipiria ta kotou i nenei ua akenei.”

Ka rauka te New World Translation of the Holy Scriptures i tona katoaanga i roto i te 33 reo, e te Christian Greek Scriptures, i roto i te 19 reo akaou mai, kapiti katoa mai te reo Lingala. Kore koe e ui atu ki tetai o te Au Kite o Iehova e akapeea e rauka ai ia koe tetai kopi o teia urianga meitaki tikai?