“O Tei Apai Mai i te Tuatua Meitaki Ra”

“Te manea o te vaevae o te karere ki runga i te maunga . . . o tei apai mai i te tuatua meitaki ra.”​—ISAIA 52:7.

1, 2. (a) Eaa te au mea kino te tupu ra i te au ra ravarai? (e) Akapeea te au tangata e manganui i te ariu anga atu i te akarongo putuputu anga i te au nuti kino?

TE MANAKO rikarika ra te au tangata i te ao katoa i teia tuatau no te au nuti kino. Ka pata ratou i te ratio e te akarongo anga i te au ripoti matakutaku no runga i te au maki kino e tupu maira i te enua. Ka akara ratou i te au nuti i runga i te tivi e te kite anga atu i te au tutu kare e rauka i te akangaropoina no te au tamariki e onge ra e te aue ua ra no te tauturu. Ka mou mai ratou i tetai nutipepa e ka tatau no runga i te aruru anga pomu tei mavete na roto i tetai au are, i te tamate anga i te au tangata kino kore ra.

² Ae, te tupu nei te au mea kino i te au ra ravarai. Te ngaro ke tikai nei te tu o teianei ao​—te kino ua atura. (1 Korinetia 7:31) Kua akakite mai tetai nutipepa makatini i Europa Opunga e i tetai au taime i te akara anga “vaitata rai e ka takore takiriia” te ao katoa. No reira rai i taitaia roa ai te maata anga o te au tangata! Okotai tangata tei taikuia mai i roto i tetai tareanga no runga i te au nuti a te tivi i Marike tei tuatua mai ma te ekoko kore i te au manako o te au mirioni ua atu i tona karanga anga e: ‘I muri ake i toku akarakara anga i te au nuti, taitaia tikai au. E nuti kino pouroa te reira. E mataku tikai.’

Te Au Nuti ta te Katoatoa e Inangaro ra i te Akarongo

3. (a) Eaa te tuatua meitaki ta te Pipiria e akakitekite ra? (e) Eaa ra koe ka akaperepere ei i te tuatua meitaki o te Patireia?

³ I roto i taua ao taitaia, ka kiteaia ainei te au nuti meitaki? Ae ka rauka te reira! E mea pumaana i te kite e te akakitekite ra te Pipiria i te tuatua meitaki. E nuti te reira e ka akakoreia e te Patireia o te Atua te maki, te onge, te kino, te tamaki, e te au tu ravarai no te taomianga. (Salamo 46:9; 72:12) Kare ainei e ko te reira te au nuti ta te katoatoa e inangaro ra i te akarongo? Ta te Au Kite o Iehova ia e manako tikai ra. No reira, kua kiteaia ratou i te au ngai ravarai no ta ratou tauta ua anga i te tuatua atu i te tuatua meitaki no te Patireia a te Atua ki te au tangata o te au pa enua ravarai.​—Mataio 24:14, NW.

4. Ko teea au tu o ta tatou angaanga orometua ka akamanako tatou i roto i teia e i roto i te atikara te aru maira?

⁴ Inara, eaa ra ta tatou ka rave kia rauka ua atu i te akakite anga i tetai mea mareka anga e te puapinga i te tutu aere anga i teia tuatua meitaki​—noatu i te au ngai e iti ua te ka ariu mai? (Luka 8:15) Kare ekoko anga e na te akara poto akaou anga i nga tu puapinga e toru no ta tatou angaanga tutu anga e tauturu mai. E akara matatio tatou (1) i to tatou au akakoro anga, me kare no teaa ra tatou ka tutu aere ei; (2) ta tatou karere, me kare eaa ra ta tatou ka tutu aere; e te (3) ta tatou au ravenga, me kore akapeea tatou me tutu aere. Na te akono ma anga i ta tatou au akakoro anga, kia takataka ta tatou karere, e kia tau ta tatou au ravenga, ka rauka ia tatou i te oronga ki te au tangata tukeke i te tuatau kia akarongo mai ki te tuatua meitaki roa atu​—te tuatua meitaki o te Patireia o te Atua. *

 Eaa Tatou i O Atu ei i te Tutu Aere Anga i te Tuatua Meitaki

5. (a) Tei maata rava, eaa te akakeu ra ia tatou kia o atu ki roto i te angaanga orometua? (e) No teaa ra i karangaia ai e to tatou akarongo anga ki te akauenga Pipiria kia tutu aere ra e akakite anga te reira i te inangaro i te Atua?

⁵ E akamanako ana tatou i te mea mua​—to tatou au akakoro anga. No teaa ra tatou ka tutu aere ei i te tuatua meitaki? No taua tumu rai ta Iesu i rave ana. Kua tuatua aia: “Te anoano nei au i te Metua.” (Ioane 14:31; Salamo 40:8) Tei maata rava atu, kua akakeuia tatou e to tatou inangaro i te Atua. (Mataio 22:37, 38) Te akakite maira te Pipiria i tetai pirianga i rotopu i te inangaro i te Atua e te angaanga orometua, te karanga anga te reira e: “Teia oki te inangaro i te Atua, ko te akono i tana au akauenga.” (1 Ioane 5:3; Ioane 14:21) Te kapiti maira ainei ta te Atua au akauenga i tetai ra kia ‘aere atu, e akariro i te tangata ei pipi ra’? (Mataio 28:19) Ae. E tika, na Iesu i tuatua i taua au tuatua, inara no ko mai tikai te reira ia Iehova. Akapeea ra? Kua akamarama mai a Iesu e: “Kare aku peu rave ua; ko ta taku Metua ra i apii mai iaku ra, ko taku ïa e tuatua nei.” (Ioane 8:28; Mataio 17:5) No reira, na te akono anga i te akauenga kia tutu aere, te akaari ra tatou kia Iehova e te inangaro ra tatou iaia.

6. Na roto i teea au mataara te akakeu ra te inangaro i te Atua kia tutu aere tatou?

⁶ Kapiti mai, no te inangaro ia Iehova te akakeu ra ia tatou kia tutu aere no te mea te inangaro ra tatou i te patoi atu i te au pikikaa ta Satani e tuku maira ki runga iaia. (2 Korinetia 4:4) Kua ekoko a Satani i te tu tika o ta te Atua tutara anga. (Genese 3:1-5) Ei Au Kite o Iehova, te inangaro ra tatou kia o atu i te akaari anga i ta Satani au akakino anga e i te akatapu anga i to te Atua ingoa i mua i te au tangata ravarai. (Isaia 43:10-12) Tei runga ravao, te o nei tatou ki roto i te angaanga orometua no te mea kua kite oki tatou i to Iehova au tu e te au mataara. Te manako piri vaitata nei tatou kiaia e te inangaro pakari nei i te akakite atu ki tetai ke no runga i to tatou Atua. Ko te tika, te oronga maira to Iehova tu meitaki e tana au mataara tuatua tika i te rekareka maata kia tatou e kare e rauka ia tatou i te akamutu i te tuatua atu no runga iaia. (Salamo 145:7-12) Te akakeuia nei tatou kia akakite ua atu i tona paapaa e kia tuatua ua atu no runga i tona “meitaki” ki te aronga te ka akarongo mai.​—1 Petero 2:9; Isaia 43:21.

7. I te pae mai i te inangaro i te Atua, eaa atu tetai tumu puapinga maata i o atu ei tatou ki roto i te angaanga tutu anga?

⁷ E tumu puapinga ke akaou tetai no te rave ua atu anga kia o atu ki roto i te angaanga orometua: Te inangaro tikai nei tatou i te apai mai i te pumaana ki te aronga tataki tai tei taitaia no te au nuti kino maata tikai e ki te aronga te mamae ra no tetai atu tumu ke. I roto i teia, te tauta nei tatou i te aru ia Iesu. Ei akaraanga, e akara ana i tei akatakaia mai i roto ia Mareko pene 6.

8. Eaa ta te papaanga i roto ia Mareko pene 6 e akaari maira no runga i to Iesu au manako no te au tangata ra?

⁸ Kua oki maira te au apotetoro mei tetai oroanga tutu anga e kua akakite atura kia Iesu i te au mea pouroa ta ratou i rave ana e i apii ana. Akara atu a Iesu kua roiroi te au apotetoro, e kua akakite atu aia kia ratou kia aru mai iaia kia “noonoo iti ua na.” No reira kua kake atu ratou ki roto i tetai pai e kua aere atu ki tetai ngai motutaa. Kua aru mai te au tangata ia ratou, te oro aere anga na uta, e kare i roa ana kua taenaia atu ratou. Eaa ta Iesu i rave? “Akara atura aia i te pouou tangata maata,” i karanga ai te tata anga, “tangi atura ia ratou, no te mea, mei te mamoe tiaki kore ratou, e kua apii  atura aia ia ratou i te au tuatua e manganui.” (Mareko 6:31-34) No te tangi i akakeu ia Iesu kia rave ua atu i te oronga i te tuatua meitaki noatu tona tu roiroi. Te taka meitaki ra, e tu akaaroa to Iesu no teia au tangata. Te tangi aroa ra aia ia ratou.

9. Eaa ta tatou i kite mai mei te papaanga i roto ia Mareko pene 6 no runga i te akakoro anga tika no te tutu aere anga?

⁹ Eaa ta tatou i kite mai mei teia papaanga? Ei au Kerititiano, e apainga ta tatou i te tutu aere anga i te tuatua meitaki e te akariro anga i te au tangata ei pipi ra. Te kite ra tatou i ta tatou apainga i te akakitekite aere anga i te tuatua meitaki, no te mea to te Atua ia anoano ‘kia ora te tangata katoatoa.’ (1 Timoteo 2:4) Inara, kare tatou e rave i ta tatou angaanga orometua no tetai manako angaanga ua mari katoa ra no te tangi aroa. Me te tangi aroa ra tatou i te au tangata mei ia Iesu rai, ka akakeuia to tatou ngakau kia rave tatou i te ka rauka katoa ia tatou i te rave ua atu i te akakite anga i te tuatua meitaki kia ratou. (Mataio 22:39) Te rauka anga taua au akakoro anga memeitaki ra no te o atu anga ki roto i te angaanga orometua te akakeu ra ia tatou kia tutu aere i te tuatua meitaki ma te mataku kore.

Ta Tatou Karere​—Te Tuatua Meitaki no te Patireia o te Atua

10, 11. (a) Akapeea a Isaia i te akataka mai anga i te karere ta tatou ka tutu aere? (e) Akapeea a Iesu i te apai mai anga i te tuatua meitaki ra, e akapeea te au tavini o te Atua i teia tuatau i te aru anga i to Iesu akaraanga?

¹⁰ Akapeea ra te rua o ta tatou angaanga orometua​—ta tatou karere? Eaa ra ta tatou ka tutu aere? Kua oronga mai te peroveta ko Isaia i te akataka anga manea no te karere ka akakite tatou: “Te manea o te vaevae o te karere ki runga i te maunga, o tei apai mai i te tuatua meitaki ra, o tei tutu aere i te au ra; o tei apai mai i te tuatua meitaki ra, o tei tutu aere i te ora ra; o tei tuatua mai kia Ziona, Tei to Atua ra te au!”​—Isaia 52:7.

¹¹ Te tuatua puapinga maata i roto i taua irava ra, ‘tei to Atua ra te au,’ te akamaara maira ia tatou no te karere ta tatou ka akakite atu, koia oki, te tuatua meitaki o te Patireia o te Atua. (Mareko 13:10) E akara, katoa, te akaari maira teia irava i te au tumu maata no ta tatou karere. Te taangaanga ra a Isaia i taua au tuatua mei te “ora,” “tuatua meitaki,” “au,” e te “meitaki ra.” E anere au mataiti i muri ake ia Isaia, i te anere mataiti mua T.N., kua akatupu a Iesu Karaiti i teia totou na roto i tetai mataara meitaki roa atu na te akanoo anga i tetai akaraanga totomapu i te akakitekite anga i te au tuatua meitaki ra​—te Patireia o te Atua te aere maira. (Luka 4:43) I teia au tuatau nei, i te 1919 tikai, kua aru te Au Kite o Iehova i to Iesu akaraanga no te akakitekite maroiroi anga i te tuatua meitaki no to te Atua Patireia tei akanooia e te au akameitakianga ta te reira ka apai mai.

12. Eaa te akakeu anga ta te tuatua meitaki o te Patireia ka rave ki runga i te aronga tei ariki i te reira?

¹² Eaa te akakeu anga ta te tuatua meitaki o te Patireia ka rave ki runga i te aronga te ariu maira ki te reira? I teia tuatau mei to Iesu tuatau rai, te oronga maira te tuatua meitaki i te manakonakoanga e te pumaana. (Roma 12:12; 15:4) Te oronga ra te reira i te manakonakoanga ki te aronga ngakau tiratiratu no te mea kua kite ratou e te vai nei tetai au tumu anga ketaketa no te irinaki anga e e au tuatau meitaki atu tei mua. (Mataio 6:9, 10; 2 Petero 3:13) Te tauturu maata ra taua manakonakoanga  i te aronga tei mataku i te Atua e te tamou anga i tetai akara anga papu. Te akakite ra te tata taramo e “kare [ratou] e mataku i te rongo kino.”​—Salamo 112:1, 7.

Tetai Karere ei “Vaî i te Aronga Ngakau Paruparu”

13. Akapeea te peroveta ko Isaia i te akataka anga mai i te au akameitakianga i reira te ka aere mai ki te aronga tei ariki i te tuatua meitaki ra?

¹³ Kapiti atu, te apai maira te tuatua meitaki ta tatou e tutu aere ra i te akaora anga viviki e te au akameitakianga ki te aronga te akarongo maira ki te reira. Akapeea ra? Kua akakiteia mai etai o te au akameitakianga e te peroveta ko Isaia i tona akakite anga e: “Tei runga iaku te Vaerua o te Atu ra o Iehova; no te mea na Iehova au i akatainu, ei akakite i te tuatua rekareka ki tei tairoia ra; kua tono mai aia iaku ei vaî i te aronga ngakau paruparu, ei tutu aere i te ora ki te tuikaa, e ei eeu i te are tapeka anga i tei tapekaia ra; Ei tutu aere i te mataiti inangaroia e Iehova, e te rā akaoko anga na to tatou Atua; ei akapumaana i te aronga ravarai i mii ra.”​—Isaia 61:1, 2; Luka 4:16-21.

14. (a) Eaa ta te tuatua “vaî i te aronga ngakau paruparu” e akakite maira no runga i te karere o te Patireia? (e) Akapeea tatou i te akaata anga i to Iehova manako no te aronga ngakau paruparu ra?

¹⁴ Kia tau ki taua totou ra, na te tutu aere anga i te tuatua meitaki, ka “vaî [a Iesu] i te aronga ngakau paruparu.” Mei teaa atura te akatutuanga ta Isaia i taangaanga ra! Kia tau ki tetai tikitinari Pipiria, te tuatua Epera tei uriia “vaî” “kua taangaanga putuputuia no te ‘vaî anga’ i tetai takai, e reira na te vairakau e akono atu e te rapakau anga i tei mamae ra.” Penei ka tapeka takapini tetai neti aroa i tetai takai me kore kua opaia, ki runga i te kopapa maki o tetai tangata tei makiia kia turuturu atu i te reira. Na roto i taua mataara rai, me tutu aereia te karere o te Patireia, te oronga ra te au papuritia aroa i te turu anga ki te aronga katoatoa te ariu maira te mamae ra i roto i tetai tu. E na te turu anga i te aronga te anoano ra, te akaata ra ratou i to Iehova manako. (Ezekiela 34:15, 16) Te akakite maira te tata taramo no runga i te Atua e: “Kua rapakau aia i te aronga ngakau paruparu ra, e kua tākai i to ratou au puta.”​—Salamo 147:3.

Akapeea te Karere o te Patireia i te Akariro Anga i te Tuke Anga

15, 16. Eaa te au akaraanga no te oraanga tikai te akatutu maira e akapeea te karere o te Patireia i te oronga anga i te tauturu anga e te akamaroiroi anga ki te aronga tei anoano ra?

¹⁵ E maata ua atu te au akaraanga tua oraanga te akatutu maira e akapeea te karere o te Patireia i te turu tikai anga e te akamaroiroi anga i te aronga ngakau paruparu ra. E akamanako ana ia Oreanna, e vaine pakarikari no Marike Tonga, kua ngaro te anoano kia ora ua atu. Kua akamata tetai Kite o Iehova i te atoro ia Oreanna e te tatau anga i te Pipiria kiaia e te puka My Book of Bible Stories. * I te akamata anga, kua akarongo mai te vaine taitaia ra ki te tatau anga iaia e takoto ra i runga i te roi ma tona nga mata piripiri, mei tetai taime ki tetai taime ka akaeaea ua aia. Inara, kare i roa ana, kua akamata aia i te rave i tetai tauta anga kia noo tu mai i runga i tona roi i te tuatau tatau anga. I etai taime i muri mai, kua noo aia ki runga i tetai noonga i roto i te pia noonooanga, te tiaki mai anga i tona puapii Pipiria i te aere mai anga. Aru mai, kua akamata teia vaine ra i te aere atu ki te au uipaanga Kerititiano i ko i te Are Uipaanga Patireia. Akamaroiroiia no tana i kite mai i taua au akaputuputu anga, kua akamata aia i te oronga i te au puka Pipiria ki tetai tangata e pati maira i tona kainga. Ei reira, i te mataiti 93, kua papetitoia a Oreanna e ko tetai o te Au Kite o Iehova. Kua akaoki akaouia mai e te karere o te Patireia tona anoano kia ora ua atu.​—Maseli 15:30; 16:24.

¹⁶ Te oronga ra te karere o te Patireia i te tauturu anga puapinga maata ki te aronga katoa tei kite e te vaitata ra to ratou oraanga i te ope no te maki. E akamanako ana i te akaraanga no Maria no Europa Opunga mai. Te mamae ra aia i tetai maki kino roa atu e kua ngaro pouroa te manakonakoanga. E taitaia tikai tona i te araveiia atu anga aia e te Au Kite o Iehova. Inara, i tona kite anga no runga i te au akakoroanga a te Atua, kua riro akaou mai tona oraanga ei mea puapinga tikai. Kua papetitoia aia e kua maroiroi tikai i roto i te angaanga tutu anga. I nga mataiti openga e rua o tona oraanga, kua akaari mai tona nga mata i te manakonakoanga e te rekareka. Kua mate  atu a Maria ma tetai manakonakoanga ketaketa no te tuakaouanga.​—Roma 8:38, 39.

17. (a) Akapeea te karere o te Patireia e akariro ra i te tuke anga i roto i te au oraanga o te aronga tei ariki mai i te reira? (e) Na roto i teea au mataara taau uaorai e kite ra e te ‘akatu ra a Iehova i te aronga katoa e piko ki raro’?

¹⁷ Te akakite maira taua au ripoti i te tuke anga ta te karere o te Patireia e rave ra i roto i te au oraanga o te aronga tei anoano roa ana i te tuatua mou o te Pipiria. Te aronga tataki tai tei mii ana i te mateanga o tei akaperepere ra kua rauka mai te maroiroi ou i to ratou kite anga i te manakonakoanga no te tuakaouanga. (1 Tesalonia 4:13) Te au tangata tei noo putaua e te putoto ra i te angai i to ratou pamiri kua kitea mai te ngateitei ou e te mataku kore i to ratou kite anga e kare roa a Iehova e akaruke ia ratou me vai tiratiratu ratou kiaia. (Salamo 37:28) Ma ta Iehova tauturu, te manganui tei taomiia e te taitaia te akatupu marie maira i te maroiroi te anoanoia ra kia akakoromaki e i roto i etai au tu kua rauka katoa i te autu i taua maki. (Salamo 40:1, 2) E tika, na roto i te mana tei orongaia mai na roto i tana Tuatua ra, te “akatu [ra a Iehova i teianei] i te aronga katoa e piko ki raro.” (Salamo 145:14) Na te akara anga e akapeea te tuatua meitaki o te Patireia i te apai mai anga i te pumaana ki te aronga ngakau paruparu i to tatou ngai nei e i roto i te putuputuanga Kerititiano, e maata te taime e akamaaraia ana tatou e tei ia tatou te nuti meitaki roa atu i teia tuatau!​—Salamo 51:17.

“Taku nei Pure ki te Atua ia Iseraela”

18. Akapeea a Paulo i te akakeuia anga te kopae anga te ngati Iuda i te tuatua meitaki, e no teaa ra?

¹⁸ Noatu e te vai ra ta tatou karere e ko te nuti meitaki roa atu, e manganui tei kopae i te reira. Akapeea teia i te akakeu anga ia tatou? Na roto i taua tu rai tei tupu ana ki te apotetoro ko Paulo. E tutu putuputu aere ana aia ki te ngati Iuda, inara te maata anga ia ratou kua kopae i te karere no te ora. Kua akakeu oonuia a Paulo no te patoi anga ratou. Kua akakite mai aia: “E aue maata toku, e te mamae tukutuku kore i roto i toku ngakau.” (Roma 9:2) E tangi aroa to Paulo no te au ngati Iuda tana i tutu aere atu. Tangi tikai aia e kua kopae ratou i te tuatua meitaki.

19. (a) No teaa ra i marama uaia ai e ka maromaroa tatou i tetai au taime? (e) Eaa tei tauturu ia Paulo kia rave ua atu i tana angaanga tutu anga?

¹⁹ Te tutu aere katoa nei tatou i te tuatua meitaki no te tangi aroa. No reira, te marama uaia ra te reira e penei ka maromaroa tatou me kopae te maata anga o te au tangata i te karere o te Patireia. Te akaari maira taua manako anga e te manako tikai ra tatou i te oraanga pae vaerua o te aronga ta tatou ka tutu aere atu. Inara, e mea meitaki no tatou kia maara i te akaraanga o te apotetoro ko Paulo. Eaa tei tauturu iaia kia rave ua atu i tana angaanga tutu anga? Noatu e kua patoi mai te ngati Iuda i te ariki mai i te tuatua meitaki tei akatupu mai i te mii e te mamae kiaia ra, kare a Paulo i tuku ana i te au no te ngati Iuda katoa ra, i te manako anga kare e rauka i te tauturu atu ia ratou. Te  manakonako ra aia e te vai ra rai etai te ka ariki mai ia Karaiti. No reira, no runga i tona au manako ki te au ngati Iuda tataki tai ra, kua tata a Paulo: “Teia oki te anoano tikai i taku ngakau, e taku nei pure ki te Atua ia Iseraela, kia ora ratou.”​—Roma 10:1.

20, 21. (a) No runga i ta tatou angaanga orometua, akapeea e rauka ai ia tatou i te aru i to Paulo akaraanga? (e) Eaa te tu o ta tatou angaanga orometua ka akamanakoia i roto i te atikara e aru mai nei?

²⁰ Akara e e rua nga mea ta Paulo i akakite mai. Tona anoano ngakau tikai ia kia kiteaia mai etai aronga tataki tai ra te ora, e kua pure atu aia ki te Atua no runga i teia nei. I teia tuatau, te aru nei tatou i to Paulo akaraanga. Te tamou nei tatou i te ngakau anoano kia itaeia tetai ua atu penei te manako maira rai tei akono tau i te tuatua meitaki. Kia pure ua atu tatou kia Iehova e ka kiteaia mai e tatou taua aronga ra kia rauka oki ia tatou i te tauturu atu ia ratou kia aru i te aerenga te taki atura ki to ratou ora.​—Maseli 11:30; Ezekiela 33:11; Ioane 6:44.

²¹ Inara, kia itaeia taua aronga tataki tai e manganui ma te karere o te Patireia, te inangaroia ra tatou kia akamanako e kare ua e no teaa ra e e eaa ra tatou ka tutu aere ei mari katoa ra akapeea tatou i te tutu aere anga. Ka akaraia teia tumu manako i roto i te atikara e aru mai nei.

[Au Tataanga Rikiriki i Raro]

Eaa Taau i Kite?

• No teea au tumu i o ei tatou i roto i te angaanga orometua?

• Eaa te karere maata ta tatou e tutu aere ra?

• Eaa te au akameitakianga te kiteia ra e te aronga tei ariki mai i te karere o te Patireia?

• Eaa te ka tauturu ia tatou kia rave ua atu i ta tatou angaanga orometua?

[Au Uianga Apii]

[Au Tutu i te kapi 18]

Te oronga ra te karere o te Patireia i te maroiroi ki te aronga ngakau paruparu

[Au Tutu i te kapi 20]

Te tauturu maira te pure ia tatou kia tamou marie i roto i ta tatou angaanga orometua