Papa ua Ratou i te Oronga ia Ratou Uaorai

“KA ORONGA puareinga ua toou tangata ia ratou uaorai.” (Salamo 110:3, NW) E aiteanga takake tikai taua au tuatua ki te 46 aronga apiipii o te pupu 118 o te Apii Pipiria Punanga Tiaki o Gileada. Akapeea ratou i te akapapa anga ia ratou uaorai kia aere atu ki teia apii, e tereni ra i te aronga ka angaanga ei mitinari kia akono i te au inangaro pae vaerua o te au tangata i roto i te au enua ke mai? Ko Mike raua ko Stacie, e nga mema no te pupu 118, kua akataka mai: “Ta maua ikianga kia akono i tetai oraanga ngoie ua kua tauturu ia maua i te akaiti mai i te au arairaianga e kia akono marie i to maua manako pae vaerua. Kua tauta pakari rai maua kia kore to maua puapinga i te tua o te pitiniti e opara i te au akakoroanga pae vaerua ki te pae.” Mei ia Mike raua ko Stacie rai, te toenga o te aronga apiipii o teia pupu kua puareinga ua i te oronga ia ratou uaorai e i teianei te tavini ra ei aronga akakitekite Patireia i roto i te au enua maatamaata tukeke e a.

I te Maanakai, ia Mati 12, 2005, e 6,843 te aronga katoatoa tei akarongo ma te rekareka maata ki te porokaramu no te karatuatianga. Ko Theodore Jaracz, e mema no te Pupu Akaaere no te Au Kite o Iehova, tei tavini ei tiamana. I muri mai i te turou pumaana anga i te au manuiri, i reira mei te 28 enua tukeke mai, kua akamou aia te akamanakoanga ki runga i te puapinga o te apiianga Pipiria. I te taiku anga ia William Lyon Phelps, e puapii Marike, kua akakite mai te vaa tuatua e: “Ko te tangata e kite taka meitaki to ratou no te Pipiria ka rauka i te kapiki tikai ia e kua apiiia.” Noatu e penei e puapinga to te apiianga i te ao nei, e teitei atu te apiianga Pipiria. Te tauturu ra te reira i te au tangata kia tamou i te kite no te Atua, te ka taki atu ki te oraanga mutu kore. (Ioane 17:3) Kua akameitaki mai te Taeake ko Jaracz i te au karatuati no to ratou tu puareinga kia piri maata atu ki roto i te porokaramu no te apiianga Pipiria takapini i te ao katoa te raveia ra i roto te au putuputuanga tei tere atu i te 98,000 o te Au Kite o Iehova i te ao nei.

Akamaroiroianga Tano Meitaki no te Au Karatuati

I muri ake i te tuatua akamataanga a te tiamana, kua tuatua mai a William Samuelson no runga i te tumu manako, “Akapeea Koe e Riro mai ei Mei te Olive Ruperupe i te Are o te Atua,” akatumuia ki runga ia Salamo 52:8. Kua tou mai aia e te akatutuia ra te tumu olive ei akairo no te uuaanga, te manea, e te tapunui. (Ieremia 11:16) I te akaaite anga i te aronga apiipii ki te au tumu olive, kua karanga te vaa tuatua e: “Te manako ra Iehova e e manea kotou e te tapunui ia kotou e rave tiratiratu ra i ta kotou angaanga no te tutu anga i te Patireia i roto i ta kotou au tukuanga angaanga mitinari.” Mei te tumu olive rai e inangaro ra i te au aka roangarere tikai kia ora atu i tetai tuatau maro, ka inangaroia rai te  aronga apiipii i te akaketaketa i to ratou au aka i te pae vaerua e rauka ai i te akakoromaki i te tu manako kore, te patoianga, me kore tetai au timataanga penei te ka kite mai ratou i roto i ta ratou tavinianga i te ngai ke.​—Mataio 13:21; Kolosa 2:6, 7.

Ko John E. Barr, tetai o te toru mema o te Pupu Akaaere tei kapiti atu ki roto i te porokaramu, kua tuatua mai no runga i te upoko tuatua: “Ko Kotou te Tai no te Enua.” (Mataio 5:13) Kua tou mai aia e mei te miti tikai e paruru ra i te kai kia kore e pe, ka riro te tutu anga a te au mitinari no runga i to te Atua Patireia ei tupuanga akaora ki te aronga e akarongo maira, i te paruru anga ia ratou kia kore e pe i te pae o te tu akono e te pae vaerua. E oti na roto i te tu takinga meitaki, kua raurau mai te Taeake ko Barr i te au karatuati kia “tamou oki i te au” ma tetai ke. (Mareko 9:50) “E tatanu i te au ua o te vaerua, e akapapu tikai e e aroa ua ana e te manako meitaki ra toou tu e taau tuatua,” i ako mai ei te vaa tuatua.

“I te Au Ngai Oonu e Noo Rai ki Runga i te Poti” ko te upoko tuatua ia ta Wallace Liverance i akakite, koia tetai o te au puapii o Gileada. Mei tetai pai rai e teretere ra na roto i te au ngai oonu e te rauka ra i te aru i te kaveinga tano, pera katoa rai te maramaanga o “te au mea oonu rai o te Atua ra”​—te au tuatua mou no runga i ta te Atua akakoroanga e ka akapeea te reira me raveia​—ka tauturu i tetai kia tere ki mua i te pae vaerua. (1 Korinetia 2:10) I te noo ua anga i roto i te au ngai papaku ua i te pae vaerua na te ariki ua anga i te “apiianga mua o te tuatua a te Atua” ka tapupu i to tatou tere anga ki mua e penei ka akamaata katoa i te manakoanga i te “akangaa pai oki i [to tatou] akarongo.” (Ebera 5:12, 13; 1 Timoteo 1:19) “E tuku i te ‘oonu o te apinga nui o te pakari e te kite i te Atua’ e akaora ia koe i roto i taau au tukuanga angaanga mitinari,” i taopenga ei te Taeake ko Liverance.​—Roma 11:33.

Ko Mark Noumair, tetai puapii ke mai i Gileada, kua tuatua mai no runga i te tumu manako “Ka Akono Ainei Koe i Taau Tuanga?” Kua tere atu i te 60 mataiti, te rauka anga i te Apii Pipiria Punanga Tiaki o Gileada te tu irinakiia e te rongo meitaki no te ‘maata o te akakitekiteanga meitaki’ e orongaia ra e te au karatuati o te apii. (Genese 31:48) Kua patiia atu teia tuanga akaperepere a te Gileada ki te aronga apiipii o te pupu 118. Kua akamaroiroi te Taeake ko Noumair i te aronga apiipii kia aru i te au tangata o Tekoa i to Nehemia tuatau e kia taokotai akaaka ma te putuputuanga e te au taeake mitinari i te reira ngai. Kua akoia ratou kia kopae i te tu o te “aronga mamaata” ngakau parau te tuatuaia ra e Nehemia e mari ra kia puareinga i te angaanga maru ua i te noo marie ua anga.​—Nehemia 3:5.

Au Tupuanga e te Au Uiuianga Puapinga

Te tuanga tei aru mai i runga i te porokaramu kua tapaia “Tupu Atura te Tuatua a te Atua.” (Angaanga 6:7) I raro i te aratakianga a te puapii Gileada ko Lawrence Bowen, kua akatutu akaou mai te aronga apiipii i te au tupuanga ta ratou i rekareka i roto i te angaanga orometua ia ratou e aere ra ki te apii. Te akaari maira te au tupuanga e kua akakitekite aere te aronga apiipii i ta te Atua Tuatua ma te maroiroi e kua akameitaki maata tikai a Iehova i ta ratou au tautaanga.

Kua akono mai a Richard Ashe i te au uiuianga ma te au mema o te pamiri Betela tei angaanga piri vaitata atu ma te apii. Kua oronga mai ta ratou au tuatua i te marama oonu o te turuturuanga ta te pamiri Betela i oronga kia tauturu i te aronga apiipii Gileada kia rauka i te puapinga maata mei ta ratou apiianga. E oti, kua tuatua atu a Geoffrey Jackson ki tetai o te au karatuati mua o Gileada. Kua akakite mai ratou i te au atianga e manganui ta te oraanga mitinari e oronga maira kia apai mai i te akapaapaa e te akangateitei kia Iehova. Kua tuatua mai tetai: “Te akara maira te au tangata i te au apinga pouroa taau e rave ra ei mitinari. Te akarongo maira ratou, te akara maira, e te maara ra ia ratou.” No reira, kua akamaroiroiia te aronga apiipii i te akamanako kia akanoo i te akaraanga meitaki i te au taime ravarai. Kare e ekokoanga e ka riro teia ako ei mea puapinga tikai i roto i te au ra ki mua.

Kua oronga mai a Stephen Lett, e mema no te Pupu Akaaere, i te tuatua openga, tei tapaia “Kia Aere ei Aronga tei Apai i te ‘Vai Ora.’” (Ioane 7:38) Kua akakite mai aia e i te rima marama i topa akenei, kua puapinga maata tikai te aronga apiipii na te inu oonuanga mei te tuatua mou a te Tuatua a te Atua. Inara eaa ta te au mitinari ka rave no runga i te akakiteanga ta ratou i tamou  mai? Kua raurau atu te Taeake ko Lett i te au karatuati kia oronga i teia au vai pae vaerua ma te karapii kore e rauka ai i tetai atu ki roto ia ratou uaorai te ‘vai pupui ua, e tika i te pupui anga, e tae ua atu ki te ora mutu kore ra.’ (Ioane 4:14) Kua karanga katoa mai te vaa tuatua e: “Auraka rava e ngaropoina i te oronga kia Iehova, ‘te tumu no te vai ora,’ i te kaka e te ngateitei tei tau ra iaia. E akakoromaki ua me apii atu te aronga tei aere mai ki vao mei ia Babulonia Maata tei rokoia e te maro.” (Ieremia 2:13) Kua taopenga te Taeake ko Lett na te akamaroiroianga i te au karatuati i te aru maoraora i te vaerua e te vaine akaipoipo e kia tuatua ua atu: “E aere mai. E ko tei akarongo ra, ka tuatua katoa aia e, E aere mai. E ko tei kaki ra, ka aere mai. E tei anoano ua ra, ka rave ua mai aia i te vai ora.”​—Apokalupo 22:17.

Kua taopenga te Taeake ko Jaracz i te porokaramu na te oronga anga i te au aroa mei te au enua tuketuke. Kua aru mai te tatau anga i tetai reta akameitakianga na tetai mema o te pupu tei karatuati.

Ka rauka ainei ia koe i te oronga ua ia koe uaorai kia tavini atu i te ngai e umuumu maataia ra? Me ko te reira ia, e aruaru i reira i te au akakoroanga pae vaerua, mei ta teia aronga apiipii rai i rave. E kokoti i te rekareka e te merengoanga tei kiteaia me oronga puareinga ua tetai tangata iaia uaorai ma te mataora i roto i ta te Atua tavinianga​—me e mitinari i tetai enua ke me kore ei orometua vaitata mai ki te kainga.

[Pia i te kapi 13]

TE AU TU O TE PUPU

Numero o te au enua tei komonoia: 8

Numero o te au enua tei tukuia: 19

Numero o te aronga apiipii: 46

Mataiti avereti: 33.0

Au mataiti avereti i roto i te tuatua mou: 16.5

Au mataiti avereti i roto i te angaanga orometua tamou: 12.9

[Tutu i te kapi 15]

Te 118 Pupu Karatuatianga o te Apii Pipiria Punanga Tiaki o Gileada

I te papaanga i raro ake, kua tanumeroia te au pa mei mua ki muri, e kua papaia te au ingoa mei te kaui ki te katau i te pa takitai.

(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.