Tuatua Meitaki no te Au Tangata o te Au Pa Enua Ravarai

“Ei kite oki kotou noku . . . e tae ua atu ki te openga o te enua ra.”​—ANGAANGA 1:8.

1. Ei au puapii no te Pipiria, eaa ta tatou ka akamanako atu, e no teaa ra?

KARE te au puapii meitaki e akara ua ra i ta ratou e akakite ra ki ta ratou aronga apiipii mari katoa ra akapeea ratou i te akakite anga i te reira. Ei au puapii no te tuatua mou Pipiria, te akapera ra rai tatou. Te akara ra tatou i nga tua o te karere ta tatou e tutu aere ra e te au ravenga ta tatou e taangaanga ra. Kare ta tatou karere, te tuatua meitaki no te Patireia o te Atua, e taui ana, inara te akatikatika ra tatou i ta tatou au ravenga. No teaa ra? Kia rauka i te itae atu i te au tangata e manganui.

2. Me akatikatika tatou i ta tatou au ravenga tutu aere anga, koai ta tatou e aru ra?

² Na te akatikatika anga i ta tatou au ravenga tutu anga, te aru ra tatou i te au tavini taito o te Atua. E akamanako ana, ei akaraanga, i te apotetoro ko Paulo. Kua karanga aia e: “I te ngati Iuda ra, kua akangati Iuda katoa au . . . i te aronga i raro ake i te ture ra, mei te mea e tei raro katoa ake au i te ture . . . I te aronga apikepike ra, kua riro katoa au ei apikepike, kia rauka iaku te aronga apikepike: kua akaarite au iaku uaorai i te au mea katoa i te tangata ravarai nei, kia ora iaku tetai papaki i taua au ravenga katoa nei.” (1 Korinetia 9:19-23) E puapinga meitaki ta Paulo ravenga taui ua. Ka puapinga meitaki katoaia tatou me akatanotano meitakiia ta tatou au tuatua kia tau ki te au tangata tataki tai ta tatou ka tuatua atu.

I “te Au Openga Mai o te Enua Ra”

3. (a) Eaa te akaaoanga ta tatou e aro atura i roto i ta tatou angaanga tutu anga? (e) Akapeea te au tuatua a Isaia 45:22 te akatupuia anga i teia tuatau?

³ Ko tetai akaaoanga maata ta te aronga e tutu aere ra i te tuatua meitaki e aro ana koia oki te atea o te ngai​—“te au pa enua ravarai.” (Mataio 24:14, NW) I te openga o te anere mataiti, e manganui te au tavini o Iehova tei angaanga pakari i te itae i te au enua ou kia rauka i te akatotoa i te tuatua meitaki. Eaa ra tei tupu mai?  E akatotoa anga umere tikai i te ao katoa. I te akamata anga o te 20 anere mataiti, kua ripotiia mai te tutu anga i nga mea enua ua, inara i teianei e maroiroi te Au Kite o Iehova i roto i te 235 enua! E tika mou e, te akakitekite katoa aereia nei te tuatua meitaki o te Patireia i “te au openga mai o te enua ra.”​—Isaia 45:22.

4, 5. (a) Koai ma tei rave ana i tetai tuanga puapinga maata i te akatotoa anga i te tuatua meitaki? (e) Eaa ta etai au opati manga i akakite mai no runga i te aronga no tetai enua ke te tavini ra i te ngai o te manga ra?

⁴ Eaa te au tumu no taua tere anga ki mua? E maata te au mea. Kua tereniia te au mitinari i ko i te Apii Pipiria Punanga Tiaki o Gileada e, i ou ua akenei, kua tere atu i te 20,000 aronga karatuati no te Apii Terenianga Orometua tei oronga maata mai i tetai tauturu anga. E manganui te Au Kite tei neke katoa e na ratou uaorai i tutaki ia ratou ki te au enua te inangaro maataia ra te au papuritia Patireia. E tuanga puapinga maata ta taua au Kerititiano akaatinga uaorai​—te au tane e te au vaine, te mapu e te ruaine, te takaua e te aronga akaipoipo​—i roto i te tutu aere anga i te karere o te Patireia i te ao katoa nei. (Salamo 110:3; Roma 10:18) Te akaperepere maataia nei ratou. E akamanako ana eaa ta etai au opati manga i tata mai no runga i taua aronga no tetai ngai mamao te tavini ra i te ngai te anoano maataia ra te tauturu i roto i te ngai o te manga.

⁵ “Te rave nei teia Au Kite akaperepereia i te arataki anga i te tutu aere anga i roto i te au ngai motutaa, te tauturu anga i te akanoo i te au putuputuanga ou, e te tauturu anga i te au taeake e te au tuaine o te reira ngai kia tupu mai i te pae vaerua.” (Ekuatoa) “Me ka akaruke ua ake te au anere ua atu o te aronga ke te tavini ra i konei, ka akakeu keia te tu ngaueue kore o te au putuputuanga. E akameitakianga ratou kia matou.” (Tominika Repapuriki) “I roto i to matou au putuputuanga e manganui, te maata anga e au tuaine, e i tetai au taime e 70 patene. (Salamo 68:11) Te maata anga ia ratou e aronga ou i roto i te tuatua mou, inara kua oronga mai te au tuaine painia takaua tei aere mai no tetai au enua ke i te tauturu anga maata i te tereni anga i taua  aronga ou ra. E e ei kura tikai teia au tuaine no tetai ngai ke mai kia matou nei!” (Tetai enua i Europa Itinga) I manako ana ainei koe i te tavini i tetai enua ke? *​—Angaanga 16:9, 10.

“Ei Nga Tangata Tino Ngauru, no Roto i te Au Reo Katoa”

6. Akapeea a Zekaria 8:23 i te tou anga mai i te akaaoanga no te reo ke i roto i ta tatou angaanga tutu anga?

⁶ Ko tetai akaaoanga maata roa koia oki te tuke maata o te au reo te tuatuaia ra i runga i te enua nei. Kua akakite te Tuatua a te Atua e: “Ei taua au rā ra e opu mai ei nga tangata tino ngauru, no roto i te au reo katoa o te pa enua ra, i te tapa kakau o tetai ngati Iuda ta ratou e opu, ka na ko atu ei, Ka aere katoa tatou: kite akenei oki matou e tei ia kotou te Atua.” (Zekaria 8:23) I roto i te akatupu anga o teia totou i teia tuatau, te akatutu maira te tino ngauru tangata i te aronga maata rava, tei totouia mai i roto ia Apokalupo 7:9. Inara, e akara ana e kia tau ki ta Zekaria totou, te “tangata tino ngauru” kare no roto ua mai i te pa enua ra, mari ra “no roto i te au reo katoa o te pa enua ra.” Kua kite ana ainei tatou i tetai akatupu anga no teia akataka anga puapinga maata o te totou? Ae.

7. Eaa te au tare anga te akaari maira e te itaeia ra e te tuatua meitaki te au tangata “no roto i te au reo katoa o te pa enua ra”?

⁷ E akamanako ana i etai au tare anga. E 50 mataiti i topa akenei kua neneiia ta tatou au puka i roto i te au reo e 90. I teia tuatau, te kake ua atura taua numero ki te 400. Kua rave te “tavini akono meitaki e te pakari” i te au mea ravarai te oronga anga i te au puka e tokoiti ua te au tangata te tuatua ra i taua au reo ra. (Mataio 24:45, NW) Ei akaraanga, te tuaia ra te au puka Pipiria i roto i te reo Kerenirani (tuatuaia ra e te 47,000 tangata), te reo Parau (te tuatuaia ra e te 15,000), e te reo Iapa (e tokoiti ua te tuatuaia ra e te 7,000 tangata).

“Ngutupa Maata” te Taki Atura ki te Au Tuatau Ou

8, 9. Eaa te akatupu anga tei akatueraia mai e te “ngutupa maata” kia tatou nei, e akapeea te au tauatini ua atu o te Au Kite i te ariu anga atu?

⁸ Inara, i teia tuatau, penei kare tatou e umuumuia kia aere atu ki tetai ngai ke i te oronga atu i te tuatua meitaki ki te au tangata o te au reo katoa ra. I nga mea mataiti ua akenei, te taenga mai te au mirioni ua atu o te au tangata o tetai enua ke e te aronga oro-kimiora no te au enua te puapinga ra i te pae moni e maata te au ngai tei akatupuia mai e te aronga o tetai enua ke te tuatua ra i te au reo e manganui. Ei akatauanga, i Paris, i Varani, te tuatuaia ra etai 100 reo ke ke. I Toronto, Kanata, te numero e 125; e i London, Engarani, tere atu i te 300 reo ke ke te tuatuaia ra! Te tae mai anga te au tangata no tetai au enua ke i roto i te au putuputuanga e manganui kua akatueraia te “ngutupa maata” te taki atura ki te au tuatau ou kia oronga atu i te tuatua meitaki ki te au tangata no te pa enua ravarai.​—1 Korinetia 16:9.

⁹ E tauatini ua atu te Au Kite te ariu maira ki te akaaoanga na te apii anga i tetai reo ke. Te maata anga ia ratou, e mea ngata te reira; inara te tutaki maataia maira te putoto anga ma te rekareka i te tauturu anga i te aronga no tetai enua ke e te  aronga oro-kimiora kia apii i te tuatua mou tei kiteaia i roto i te Tuatua a te Atua. I tetai mataiti ua akenei, vaitata e 40 patene o te aronga katoatoa tei papetitoia i te au uruoaanga tapere i tetai enua i Europa Opunga no tetai enua ke mai.

10. Akapeea koe te taangaanga anga i te puka rikiriki Good News for People of All Nations? (Akara i te pia “Au Akara Anga no te Puka Rikiriki Good News for People of All Nations,” i te kapi 26.)

¹⁰ E tika, te maata anga ia tatou kare i roto i tetai turanga kia apii i tetai reo ke. Noatu rai, ka rauka ia tatou i te tauturu i te aronga no tetai enua ke na te taangaanga meitaki anga i te puka rikiriki tei tukuna ouia mai te Good News for People of All Nations, * te vai ra tetai karere Pipiria reka i roto i te au reo ke ke e manganui. (Ioane 4:37) Te taangaanga ra ainei koe i teia puka rikiriki i roto i te angaanga orometua?

Me Kare te Au Tangata e Ariu Mai

11. Eaa tetai atu akaaoanga te aroia ra i roto i tetai au ngai?

¹¹ Te tupu ua maira ta Satani akakeu anga i te enua nei, ko tetai akaaoanga te aro putuputuia ra​—e iti ua te ariu maira i roto i tetai au ngai. Ae, kare tatou e poitirere i teia turanga nei, i te mea e kua akakite mai ana a Iesu e ka tupu mai taua turanga. Te tuatua anga no to tatou tuatau nei, kua karanga aia e: “Ka meangiti te aroa o te maata anga.” (Mataio 24:12, NW) E tikai, te irinaki anga i te Atua e te akangateitei anga i te Pipiria te ngaro ua atura i roto i te manganui. (2 Petero 3:3, 4) Tei tupu mai, i etai au tuanga o te ao, e tokoiti ua te aronga tataki tai tei riro mai ei au pipi ou na Karaiti. Inara, kare te aite anga o te reira e e puapinga kore ua te au angaanga a to tatou au taeake e te au tuaine Kerititiano akaperepere tei tutu tiratiratu aere ra i roto i taua au ngai ariu koreia mai. (Ebera 6:10) No teaa ra? E akamanako ana i te ka aru mai.

12. Eaa nga akakoroanga e rua na tatou ra no te angaanga tutu anga?

¹² Te akataka maira te Evangeria a Mataio i nga akakoroanga maata e rua no ta tatou au angaanga tutu anga. Ko tetai oki te ‘akariro anga tatou i te au tangata o te pa enua katoa ei pipi.’ (Mataio 28:19) Ko tetai mai te riro anga te karere o te Patireia “ei kite.” (Mataio 24:14, NW) E puapinga maata nga akakoroanga, inara to muri ake e puapinga maata atu. No teaa ra?

13, 14. (a) Eaa tetai tu puapinga no te akairo ra no to Karaiti parutia? (e) Eaa ta tatou ka mou tamou mai, me tutu aere tikai i te au ngai e tokoiti ua te ariu maira?

¹³ Kua tata mai te tangata tata Pipiria ko Mataio e kua ui te au apotetoro kia Iesu e: “Eaa te akairo o toou ra parutia e te openga o te akatereanga o te au mea nei?” (Mataio 24:3, NW) I roto i te pauanga, kua karanga atura a Iesu e ko tetai tu maata roa atu no taua akairo ra ko tetai angaanga tutu anga i te ao katoa. Te tuatua ra ainei aia no te akariro anga i te tangata ei pipi ra? Kare. Te karanga ra aia e: “Kia tutu aereia teia tuatua meitaki o te patireia ki te au enua tei tangataia ei kite ki te au pa enua ravarai.” (Mataio 24:14, NW) No reira te akaari maira a Iesu e ko te angaanga tutu anga i te Patireia uaorai te ka riro mai ko tetai tu puapinga maata no te akairo.

¹⁴ No reira, ia tatou e tutu aere ra i te tuatua meitaki o te Patireia, te maara ra ia tatou e noatu e kare tatou e autu ua ana i roto i te akariro anga i te tangata ei pipi ra, te autu ra tatou “ei kite.” Noatu e akapeea te au tangata i te ariu mai anga, te kite ra ratou i ta tatou e rave ra, e no reira te o ra tatou i te akatupu anga i ta Iesu totou. (Isaia 52:7; Apokalupo 14:6, 7) Kua akakite mai a Jordy, ko tetai Kite mapu no Europa Opunga, e: “Te kite anga e te taangaangaia ra au e Iehova kia  rave i tetai tuanga i te akatupu anga ia Mataio 24:14 te akariro ra kia mataora tikai au.” (2 Korinetia 2:15-17) Kare ekoko anga te manako akapera ra koe.

Me Patoiia Mai ta Tatou Karere

15. (a) No runga i teaa i akamatakite ei a Iesu i tana au pipi? (e) Eaa te tauturu ra ia tatou kia tutu aere noatu te patoianga?

¹⁵ Te akatupu maira te au turanga kino i tetai akaaoanga te tutu aere anga i te tuatua meitaki o te Patireia. Kua akamatakite a Iesu ki tana au pipi e: “Ka riro kotou ei mea makitakitaia e te pa enua ravarai no toku ingoa nei.” (Mataio 24:9, NW) Mei te au Kerititiano mua rai, te makitakitaia nei, te patoiia nei, e te takinga kinoia nei ta Iesu au pipi i teia tuatau. (Angaanga 5:17, 18, 40; 2 Timoteo 3:12; Apokalupo 12:12, 17) I roto i etai au enua, e takete ratou i teianei na te au arai anga a te kavamani. Noatu rai, no te akarongo anga ki te Atua, te rave ua atura te au Kerititiano mou i taua au enua ra i te tutu aere i te tuatua meitaki o te Patireia. (Amosa 3:8; Angaanga 5:29; 1 Petero 2:21) Eaa te tauturu ra ia ratou, pera katoa i tetai Au Kite i te ao katoa ra, kia rave i te reira? Te akamaroiroi maira a Iehova ia ratou na roto i tona vaerua tapu.​—Zekaria 4:6; Ephesia 3:16; 2 Timoteo 4:17.

16. Akapeea a Iesu i te akaari anga i te piri anga i rotopu i te angaanga tutu aere anga e te vaerua o te Atua?

¹⁶ Kua akakite mai a Iesu i te piri anga vaitata i rotopu i to te Atua vaerua e te angaanga tutu aere anga i te akakite anga aia ki tana au pipi e: ‘Ka rauka ra to kotou mana i te vaerua tapu, kia aere mai aia i rungao ia kotou; e ei kite oki kotou noku . . . ki te openga o te enua ra.’ (Angaanga 1:8; Apokalupo 22:17) E puapinga maata te papaanga no te au tupuanga i roto i teia irava. Te mea mua, kua orongaia mai te vaerua tapu ki te au pipi, e oti kua rave ratou i te angaanga akakitekite anga i te ao katoa. Na roto anake ua i te tauturu anga a te vaerua o te Atua i rauka ai ia ratou te maroiroi kia tamou marie i te oronga anga i te “kite ki te au pa enua ravarai.” (Mataio 24:13, 14, NW; Isaia 61:1, 2) No reira, a Iesu i taiku tau ei i te vaerua tapu ei ‘akapumaana.’ (Ioane 15:26) Kua karanga aia e ka apiiia e ka aratakiia tana au pipi e te vaerua o te Atua.​—Ioane 14:16, 26; 16:13.

17. Me ka aro atu tatou i te patoianga kino pakari, akapeea te vaerua tapu i te tauturu anga ia tatou?

¹⁷ Na roto i teea au tu te tauturu maira te vaerua o te Atua ia tatou i teia tuatau nei me ka aro atu tatou i te patoianga pakari te tutu aere anga i te tuatua meitaki ra? Na te vaerua o te Atua e akamaroiroi mai nei ia tatou, e te patoi ra te reira i te aronga te takinga kino maira ia tatou. E akatutu ei i teia, e akamanako ana i tetai tupu anga i roto i te oraanga o te Ariki ko Saula.

 Patoiia Anga e te Vaerua o te Atua

18. (a) Eaa te taui anga kino roa atu ta Saula i rave? (e) Eaa te au ravenga ta Saula i taangaanga i te takinga kino anga ia Davida?

¹⁸ E akamata anga meitaki to Saula ei ariki mua no Iseraela, inara i muri mai kare aia i akarongo ana kia Iehova. (1 Samuela 10:1, 24; 11:14, 15; 15:17-23) Tei tupu mai, kare to te Atua vaerua i turu akaou ana i te ariki. Kua riri otooto tikai a Saula ia Davida, tei ikiia ko te ariki i muri mai e te rekareka ra i teianei i te turu anga a te vaerua o te Atua. (1 Samuela 16:1, 13, 14) I te akara anga kua riro mai a Davida ei ereere ngoie ua. Tei maata rava, te mou ua ra aia i te kinura, ko Saula ra te mou ra i tetai tao. I tetai ra ia Davida e akatangi ra i te kinura, kua “vero mairā Saula i taua tao ra; kua tuatua akera oki aia, E vero au e piri ua atu a Davida ki runga i te pae are. Kape akera rā Davida e rua akera kapenga.” (1 Samuela 18:10, 11) I muri ake, kua akarongo atu a Saula ki tana tamaiti ko Ionatana, e oa no Davida, e kua taputou iora: “Te ora rā Iehova, kare rava [a Davida] e taia.” Inara, kua “umuumu marie rā Saula e ko ia Davida ki taua tao ra, e kia piri atu ki runga i te pae are.” Inara, kua “akamanu ua atura ra [a Davida] mei mua i te aroaro o Saula, e puta atura taua tao ra ki roto i te pae are ra.” Oro atura a Davida, inara kua arumaki mai a Saula iaia. I taua taime tikai ra, riro maira to te Atua vaerua ei patoi anga ia Saula. Na roto i teea tu?​—1 Samuela 19:6, 10.

19. Akapeea te vaerua o te Atua i te paruru anga ia Davida?

¹⁹ Kua oro atura a Davida ki te peroveta ko Samuela, inara kua tono atu a Saula i tona au tangata i te opu ia Davida. Inara, te tae atu anga ratou ki te ngai e pipini ra a Davida ‘na runga maira te vaerua o te Atua i taua au karere no Saula ra, totou katoa oki ratou.’ Kua autuia ratou e te vaerua o te Atua i ngaropoina takiri ei ia ratou te akakoroanga o ta ratou angaanga. E rua akaou nga taime i to Saula tono anga i te au tangata kia akaoki mai ia Davida, e kua tupu akaou mai taua mea rai. I te openga iora, kua aere atu te Ariki ko Saula kia Davida, inara kare i rauka katoa ana ia Saula i te patoi atu i te akatupu anga o to te Atua vaerua. Ko te tika, na te vaerua tapu i tapupu iaia  “i te reira rā e te reira po”​—te oronga anga i tetai tuatau no Davida i te oro ra.​—1 Samuela 19:20-24.

20. Eaa te apiianga ta tatou i kite mai mei te papaanga no ta Saula takinga kinoanga ia Davida?

²⁰ Te vai ra i roto i teia papaanga o Saula raua ko Davida tetai apiianga akamaroiroi anga: Kare te aronga te takinga kino ra i te au tavini o te Atua e autu me patoiia mai e te vaerua o te Atua. (Salamo 46:11; 125:2) Kua akakoro a Iehova e ka riro mai a Davida ei ariki ki rungao ia Iseraela. Kare e rauka i tetai i te taui i te reira. I to tatou tuatau nei, kua akakoro a Iehova e ‘ka tutu aereia teia tuatua meitaki o te patireia.’ Kare e rauka i tetai ua atu i te akamutu i te reira i te tupu anga.​—Angaanga 5:40, 42.

21. (a) Eaa ta etai aronga patoi i teia tuatau e rave ra? (e) Eaa ta tatou e irinaki nei?

²¹ Te taangaanga nei etai au arataki akonoanga e te poritiki i te au pikikaa e pera katoa i te kino i te tauta anga i te arai ia tatou. Inara, mei ta Iehova paruru anga ia Davida i te pae vaerua, ka paruru rai Aia i Tona au tangata i teia tuatau. (Malaki 3:6) No reira, mei ia Davida ra, kia karanga tatou ma te irinaki anga e: “Ka irinaki au i te Atua, kare au e mataku; eaa ta te tangata nei puapinga kia rave mai iaku?” (Salamo 56:11; 121:1-8; Roma 8:31) Ma ta Iehova tauturu, penei ka autu katoa ua atu tatou i te au akaaoanga ia tatou e rave ra i te angaanga tei orongaia mai e te Atua kia tutu aere i te tuatua meitaki no te Patireia ki te au tangata o te pa enua ravarai.

[Au Tataanga Rikiriki i Raro]

Maara Ainei ia Koe?

• Eaa ra tatou ka akatano ei i ta tatou au ravenga no te tutu aere anga?

• Te “ngutupa maata” tei akatueraia maira te taki atura ki teea au tuatau ou?

• Eaa tei akatupuia e ta tatou angaanga tutu aere anga, i roto katoa i te au ngai ariu kore ra?

• Eaa i kore ei e rauka i te aronga patoi i te tapu i te tutu aere anga i te tuatua meitaki o te Patireia?

[Au Uianga Apii]

[Pia/Tutu i te kapi 22]

Tetai Manako Anga Oonu ma te Mareka Anga

“Te mataora nei e te rekareka nei i to ratou tavini anga taokotai kia Iehova.” Te akataka maira te reira i tetai ngutuare tei neke atu mei Paniora ki Porivia. Kua aere atu ana te tamaiti o te ngutuare ki reira i te tauturu i tetai pupu mamao ke roa. No tona rekareka e kiteaia ra kare i roa ana kua akakeu tikai ia tona nga metua e tona ngutuare tangata katoa​—kapiti mai i nga tamariki tamaroa e a mei te 14 ki te 25 mataiti​—i te tavini anga i reira. E toru tamariki tamaroa te painia ra i teianei, e ko tei arataki ra i te aerenga ou ua akenei kua aere atu ki te Apii Terenianga Orometua.

“E manganui te au akaaoanga,” i na Angelica ei, e 30 mataiti no Kanata mai, tei tavini ana i Europa Itinga, “inara te mareka nei ra au i te tauturu anga i te au tangata i roto i te angaanga orometua. Kua akakeu katoaia au e te au tuatua akameitaki anga e manganui no ko mai i te Au Kite i te reira ngai tei akameitaki putuputu mai iaku no te aere anga mai i te tauturu ia ratou.”

“E manganui te au peu tukeke kia matau atu,” i karanga ai nga tuaine pae kopapa tei roto i to raua 20 mataiti no Marike mai, tei tavini ana i Tominika Repapuriki. Inara, kua akakoromaki maua i roto i ta maua tukuanga angaanga, e i teianei e itu a maua aronga apiipii Pipiria te aere mai nei ki te au uipaanga.” Na teia nga tuaine i tauturu i te akaaere i tetai pupu o te au papuritia Patireia i roto i tetai taoni kare e putuputuanga o reira.

Kua tavini ana a Laura, e tuaine tei roto i tona 20 mataiti, i tetai ngai ke e a mataiti e ara atu. Te karanga ra aia e: “Kua akamama mai au i toku oraanga. Te tauturu ra teia i te au papuritia i te akara mai e te noo tau ua anga e tumu iki anga ia e te ngakau akono meitaki, kare i te putaua. Te rauka anga i te tauturu i tetai ke, te au mapu tikai, kua riro mai ei tumu anga rekareka noku te akakore anga i te au tu ngata tikai no te tavini anga i roto i tetai ngai ke. Kare au e taui i taku tavini anga i konei no tetai oraanga ke, e ka noo mai au me ka akatika mai a Iehova.”

[Pia/Tutu i te kapi 26]

Te Au Tu o te Puka Rikiriki Good News for People of All Nations

Te vai ra i roto i te puka rikiriki Good News for People of All Nations okotai kapi o te karere tei orongaia mai e tere atu i te 92 reo ke ke. Kua tataia te karere i te tangata mua. No reira me tatau te tangata o te ngutuare i te karere, mei te mea rai e te tuatua ra koe kiaia.

E mapu no te ao to te reira i roto i te kapi i roto ake. E taangaanga i teia mapu ei ravenga no te akanoo i tetai tuatua anga ki te tangata o te ngutuare. Penei ka rauka ia koe i te tou ki te enua e noo ra koe e te akakite atu anga e te inangaro ra koe i te kite e noea mai aia. Na roto i taua tu nei, ka rauka ia koe i te akakeu atu iaia e te maani anga i tetai tu oaoa e te maru.

E maata te au takainga ta te tuanga mua o te puka rikiriki e akapapa maira ta tatou ka rave kia rauka oki i te oronga atu i te tauturu tau ki te aronga te tuatua ra i tetai reo kare tatou e marama ana. E tatau meitaki i teia au takainga nei e e taangaanga meitaki tikai i te reira ine.

Kare e ko te au reo ua ta te au tumu tuatua i akapapa mai mari katoa ra te au akairo tei akaaiteia ki te reo. Te tauturu ra teia tu kia rauka ia koe i te akataka mai i te au akairo no te reo tei neneiia i roto i ta tatou au aenga pepa e tetai atu au puka ke i roto i tetai au reo ke ke.

[Tutu]

Te taangaanga ra ainei koe i teia puka rikiriki i roto i te angaanga orometua?

[Au Tutu i te kapi 23]

Te rauka ra i teianei ta tatou au puka Pipiria e tere atu e 400 reo

KAANA

LAPLAND (TUITENE)

PIRIPINE

[Au Tutu i te kapi 24, 25]

Ka rauka ainei ia koe i te tavini i te ngai te anoano maataia ra te aronga tutu Patireia?

EKUATOA

TOMINIKA REPAPURIKI