Au Uianga a te Aronga Tatau

Ko te aiteanga ainei o te tuatua “peneiake” i roto ia Zephania 2:3 e kare i papu tikai e me ka rauka i te au tavini o te Atua te oraanga e tuatau ua atu?

Te tatau ra teia irava: “E kimi ia Iehova, e te aronga akaaka ravarai o te enua nei, ko tei rave i te tuatua-tau nana ra; e kimi i te tuatua-tika, e kimi i te akaaka, peneiake kotou ko te uunaia i te rā e riri ei a Iehova ra.” Eaa ra teia irava i karanga ai e “peneiake”?

Kia marama e ka akapeea a Iehova i te akono anga i tona aronga akarongo mou i Aramakito, ka tauturu maata roa kia akamaara e eaa ta te Pipiria e apii maira no runga i ta te Atua ka rave no te aronga tei mate i mua ake i taua tuatau akavaanga ra. Tetai papaki ka akatuakaouia mai ki te oraanga mutu kore ei au mea ora vaerua i te rangi, ko tetai papaki ka akatuakaouia mai ki te enua nei ma te manakonakoanga kia noo e mutu kore ua atu i te Parataito. (Ioane 5:28, 29; 1 Korinetia 15:53, 54) Me ka maara ia Iehova e me ka tutaki mai aia i tona aronga tiratiratu tei mate i mua ake ia Aramakito, papu e ka akapera rai aia i tona au tavini e ora ra i te ra e riri ei aia.

Te akamaroiroi katoa maira te au tuatua akauruia a te apotetoro ko Petero. Kua tata aia: ‘Akaora iora ra [te Atua] ia Noa, i te tangata i ako i te tuatua-tika ra, ma etai e tokoitu ra, ka apai mai ei aia i te nina-anga ki teianei ao akono kore i te Atua ra; E akariro atura i nga oire ra ko Sodoma e Gomora, ei reu ai, uripu takiri atura ia ratou i te akaapa anga atu, . . . E akaora atura ia Lota tuatua-tika ra . . . Kua kite mari a Iehova i te akaora i te aronga akono i te Atua i roto i te timataanga ra, e te tāpu i te aronga tuatua-tika kore e, kia tae ki te rā akava anga, kia mate.’ (2 Petero 2:5-9) Noatu kua apai mai a Iehova i te akapouanga ki rungao i te aronga kino i te au tuatau i topa, kua akaora ra aia ia Noa raua ko Lota, tei tavini iaia ma te akarongo mou, mei roto mai i te au akapouanga. Ka akaora katoa a Iehova i te aronga akono i te Atua me apai mai aia i te akapouanga ki rungao i te aronga kino i Aramakito. “E aronga maata rava” te aronga tuatua tika te ka ora mai.​—Apokalupo 7:9, 14.

I te akara anga, i reira, kare te tuatua “peneiake” i taangaangaia i roto ia Zephania 2:3 e no te tu papu kore e me ka rauka rai i te Atua i te akaora i te aronga tana i ariki. Mari ra, ko te uuna angaia tetai tangata i te ra e riri ei a Iehova i te akaraanga ua penei ka tupu rai me akamata aia i te kimi i te tuatua tika e te akaaka. Ko te akaora angaia tei runga te reira i to tetai tangata rave ua atu anga rai i te kimi i te akaaka e te tuatua tika. ​—Zephania 2:3.

[Tutu i te kapi 31]

‘Kua kite mari a Iehova i te akaora i te aronga akono i te Atua i roto i te timataanga ra’