Ka Tauturu te Pipiria ia Koe kia Rauka te Rekareka

NOATU kare i te puka rapakau, te tuatua ra ra te Pipiria no runga i te kino ta te manako ngakau​—papu me kore papu kore​—ka akatupu ki runga i te turanga pae manako e te pae kopapa o tetai tangata. “E meitaki to te ngakau rekareka mei te vairakau ra,” e karanga ra te Pipiria, “e marō ra te ivi i te ngakau taitaia.” Pera katoa, ka tatau tatou: “Kia potopoto to aʼo i te rā i eke ei ra, kua iti roa toou maroiroi.” (Maseli 17:22; 24:10) Ka akapou te au manako maroiroi kore i to tatou maroiroi, i te akaparuparu e te akapuapinga kore anga ia tatou kia kore e inangaro i te taui me kore i te kimi tauturu.

Ka takino katoa te maroiroi kore i te turanga pae vaerua o tetai tangata. Te aronga manako puapinga kore ua e putuputu ana i te manako e kare roa e rauka ia ratou tetai pirianga meitaki ki te Atua e kare e akameitakiia mai e ia. Ko Simone, tei taikuia e te atikara i mua ake, kua ekoko e koia “te tu tangata ta te Atua ka ariki mai.” Inara, me akara tatou ki roto i te Tuatua a te Atua, i te Pipiria, ka kite tatou e te manako akaperepere maira te Atua i te aronga e tauta ra i te akarekareka iaia.

Te Manako Maira te Atua

Te akakite maira te Pipiria kia tatou e “Te vaitata nei a Iehova i te aronga ngakau paruparu ra; e te akaora nei aia i te aronga ngakau taitaia.” Kare te Atua e akavaavaa i “te ngakau paruparu, e te aue ra,” mari ra te taputou maira aia i te “akamaroiroi i te vaerua o te aronga akaaka e i te akamaroiroi i te ngakau o te aronga tei taitaia ra.”​—Salamo 34:18; 51:17; Isaia 57:15, NW.

I tetai atianga kua manako a Iesu, koia oki te Tamaiti a te Atua, e kia akamarama ki tana au pipi e te kite maira te Atua i te meitaki i roto i Tona au tavini. Na roto i te akatutuanga, kua akakite aia e te kite ua maira te Atua me topa tetai manu rikiriki ki runga i te one​—tetai mea kare e puapinga roa ana ki te maata anga o te  tangata. Kua akaketaketa katoa aia e te kite maira te Atua i te au mea rikiriki anake no runga i te tangata, e tae roa atu ki te maata o te rauru i to ratou upoko. Kua taopenga a Iesu i tana akatutuanga i te karanga anga e: “Auraka mari kotou e mataku, e maata to kotou meitaki i to te au manu rikiriki e manganui.” (Mataio 10:29-31) * Te akaari maira a Iesu e noatu eaa te manako o te tangata ia ratou uaorai, ko te tangata akarongo ra e puapinga tona i roto i te mata o te Atua. Te tika, te akamaara maira te apotetoro ko Petero ia tatou e “kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.”​—Angaanga 10:34, 35.

Tamou Marie i te Tu Manako Tau

Te akamaroiroi maira te Tuatua a te Atua ia tatou kia tatanu i te tu tau i te akara anga ia tatou uaorai. Kua akauruia te apotetoro ko Paulo i te tata anga: “Teia taku tuatua kia kotou katoatoa e ope rava ake, i te meitaki i orongaia mai kiaku nei, eiaa e maata te manako iaia uaorai, i tei tau iaia kia manako ra; ka akono tikai ra te manako kia arite i te tu o te akarongo i tuaia e te Atua i te tangata katoatoa.”​—Roma 12:3.

E tikai e, kare tatou e inangaro i te manako akateitei ua atu ei ia tatou uaorai ma te akaparau; e kare katoa tatou e inangaro kia topa ki tetai tua takiri mai i te manako e kare o tatou uaorai puapinga. Mari ra, ko to tatou akakoroanga kia tatanu i tetai akaraanga tau tikai ia tatou uaorai, tetai te akamanako ra i to tatou maroiroi pera katoa to tatou au kotinga. Teia ta tetai vaine Kerititiano i akakite: “Kare au i te vaine kino; e kare katoa au i te vaine ngateitei. E au tu meitaki e e au tu kino toku, e te pera katoa ra te katoatoa.”

E tika oki e, e mama atu te tuatua i to te rave e rauka mai ei taua tu manako tau ra. Penei ka anoanoia te tauta pakari i te takore anga i te manako papu kore maata penei tei akatupuia mai e tatou i te au mataiti e manganui. Noatu rai, ka rauka ia tatou ma te tauturu a te Atua i te taui i to tatou tu tangata pera to tatou manakonakoanga no te oraanga. Te tikaanga, ko teia tikai ta te Tuatua a te Atua e akamaroiroi maira kia rave tatou. Ka tatau tatou: “E akaruke atu kotou i te tu tangata taito tei aru ra i to kotou tu akono i muatangana ra tei akaviiviiia ra kia tau ki tona anoano pikikaa ra; inara kia akaouia kotou i te mana te taangaanga ra i to kotou manako, e kia aao i te tu tangata ou tei angaia kia tau ki to te Atua anoano i te tuatua tika ra e te tiratiratu.”​—Ephesia 4:22-24, NW.

Na te tauta anga kia taui i ‘te mana e taangaanga ra i to tatou manako,’ koia oki, te akakoroanga maata o to tatou manako, ka rauka ia tatou i te taui i to tatou tu tangata mei te tu papu kore maata roa ki te tu papu tikai. Kua kitea mai ia Lena, tei taikuia e te atikara i mua ake, e kare roa e apinga e rauka me kore e taui i tona manako ngakau iaia uaorai, mari ua na te takore roa aia i te manako e kare e tangata e inangaro mai iaia me kore e tauturu mai iaia. Eaa te kaveinga tau i roto i te Pipiria tei tauturu ia Lena, ia Simone, e etai atu kia akatupu i taua tauianga ra?

 Au Kaveinga Pipiria e Akatupu ra i te Rekareka

“E tuku koe i taau apainga kia Iehova ra, e nana koe e tauturu mai.” (Salamo 55:22) Te mea mua e te puapinga roa atu, ka tauturu te pure ia tatou kia rauka te rekareka mou. Kua karanga a Simone: “Me e ake e manako maroiroi kore au, e uri ana au kia Iehova i te pati i tana tauturu. I roto i te au turanga ravarai e kite ua ana au i tona maroiroi e tana aratakianga.” I te raurau mai anga te tata taramo ia tatou kia tuku i ta tatou apainga kia Iehova, te akamaara maira aia ia tatou e kare anake ua a Iehova e manako maira ia tatou mari ra te akara katoa maira ia tatou ei au tangata tatakitai tei tau kia tauturu e kia turuturu mai aia. I te po o te Pasa i te 33 T.N., kua taitaia rava te au pipi a Iesu no ta Iesu tuatua i tona takakeanga e vaitata maira. Kua raurau a Iesu ia ratou kia pure ki te Metua, e kua kapiti atu aia i reira: “Ka pati, e rauka ïa ia kotou, kia ki tikai oki kotou i te rekareka.”​—Ioane 16:23, 24.

“E mea meitaki i te oronga atu i te rave mai.” (Angaanga 20:35) Mei ta Iesu i apii, ko te oronga te taviri ki te rauka anga te rekareka mou i roto i te oraanga. Na te akono anga i teia tuatua mou o te Pipiria e tauturu ia tatou kia akamou ki to etai ke au anoano eiaa to tatou uaorai au tu tukatau kore. Me tauturu tatou i etai ke e me kite atu i to ratou tu rekareka, ka mareka roa tatou ia tatou uaorai. Kua irinaki a Lena e kua riro te akakitekite putuputu i te tuatua meitaki o te Pipiria ki etai ke ei tauturu iaia na roto i nga mataara e rua. “Te mea mua, te oronga maira te reira i te tu mataora e te tu merengo ta Iesu i akakite mai,” i karanga ai aia. “Te rua, e maata tikai taku au pauanga meitaki i rauka mai mei etai ke, tei tauturu iaku kia rauka te rekareka.” Na te oronga maoraora anga ia tatou uaorai, ka kite i reira tatou i te tikaanga tikai o Maseli 11:25: “Te tangata oronga ra, e matu ïa: e tei tamauu ki te vai ra, ka tamauu katoaia mai aia.”

“E rā kino anake to te tangata tumatetenga ra: kareka tei mataora te ngakau ra, e pokai tamou ïa tana.” (Maseli 15:15) Tei runga ia tatou pouroa te iki e akapeea to tatou manako ia tatou uaorai e to tatou au turanga. Ka rauka ia tatou kia riro mei te tangata e akara i te au apinga ravarai ma te papu kore e kua tumatetenga iora, me kore ka rauka ia tatou i te iki kia manako papu tikai, kia “mataora te ngakau ra,” e kia pereperekavana mei te mea ra e pokai ta tatou. Kua karanga a Simone: “E tauta ana au kia vai papu ua toku manakonakoanga. E rave putuputu ana au i taku uaorai apii e te angaanga orometua, e kare au e tukutuku ana i te pure. E tauta katoa ana au i te piri ki te au tangata papu te manakonakoanga, e i te tauturu i etai ke.” Ka arataki taua tu ngakau ra ki te rekarekaanga mou, mei ta te Pipiria e raurau maira ia tatou e: “Kia rekareka e kia pereperekavana ia Iehova, kotou e te aronga tuatua-tika ra; e maeva i te rekareka, kotou katoa, e te aronga i tiratiratu te ngakau ra.”​—Salamo 32:11.

“E aroa mairai te taunga te au tuatau katoa ra, i anau mairai te taeake no te tuatau e tumatetengaʼi ra.” (Maseli 17:17) Na te akakite anga ki tetai taeake akaperepereia me kore tetai tangata ako irinakiia e tauturu ia tatou i te akono atu i te au manako ngakau papu kore e  te akakore atu i te reira i mua ake ka takino ei te reira ia tatou. Ka tauturu te tuatua anga ki etai ke kia rauka ia tatou te akara atu i te au mea na roto i te tu tau, e te papu. “Kua riro te tuatua anga no runga i toku au manako ngakau ei tauturu maata,” i akakite ei a Simone. “Ka inangaro koe kia akakite i toou manako ngakau ki tetai tangata. Te maata anga i te taime ka rava ua te akakite i toou manako ki te taeake.” Ka tauturu te reira ia koe kia kite i te tikaanga tikai o te materi tei karanga e: “E aue tei te ngakau o te tangata ra, e piko ïa ki raro: okotai rava ra tuatua meitaki ra, rekareka akera ïa.”​—Maseli 12:25.

Taau ka Rave

Kua akamanako ana tatou i etai ua o te au kaveinga umere e manganui e te tau mei te Pipiria te ka tauturu ia tatou kia autu i te au manako ngakau papu kore e kia rauka te rekareka mou. Me ko koe tetai o te aronga e ngata ra i te akaaere i te au manako ngakau tukatau kore, te akamaroiroi atu nei matou ia koe kia akara matatio tikai i te Tuatua a te Atua, i te Pipiria. E apii i te tatanu i te manako ngakau tika e te tau no runga ia koe uaorai e toou pirianga ki te Atua. To matou manakonakoanga tikai koia oki ma te aratakianga a te Tuatua a te Atua, kia rauka ia koe te rekareka mou i roto i te au mea katoa taau ka rave.

[Tataanga Rikiriki i Raro]

[Tutu i te kapi 7]

Ka akatupu te noo anga na te au kaveinga Pipiria i te rekareka